ROMNHORÉ 41
E marĩ Ropotoꞌwai mreme te tinha datsina dahöimana na hã.
Daꞌahö ma hã rowadzéb di da te robdzanhamri da hã datsina dahöimana na hã. Tadzahã Ropotoꞌwai mreme te te nharĩ wamhã datsina dahöimana na hã, te rowatsuꞌu tsõꞌawi duré wadzép tsina. Te te ĩnharĩdzé hã te wapawaptob dzaꞌra. Tahã tô tsena. Jeová Wapotoꞌwa na, tãma waihuꞌu petse di wama danhipai u rowẽ hã. Õ hã, te wama waihuꞌu dzaꞌra wa te ĩꞌmanharĩ dzaꞌra dzéb da hã wa te tãma rowẽ dzaꞌra da, duré dza te te ĩwapawaptob dzaꞌra dzé hã wa te watsima ꞌre robdze dzaꞌra mono da õne uꞌö.
1. E niha Jeová nhimirotsaꞌrada datsina dahöimana na hã.
Datsina dahöimana hã marĩ ĩwẽ Jeová te te dama ĩpodo hã. Õ hã te tsima wẽ aibö duré piꞌõ tsina ĩmro dzahuré tsi datsina dahöimana na hã te te tsima rowẽ dzahuré da. a Datsina dahöimana na hã, aibö duré piꞌõ te dza tiꞌra dzahuré. Taha tsi õ di, te dza duré tsima höiꞌré dzahuré ĩtsitsawidzé ĩbö na te te tsina robdze dzahuré tsina. Ropotoꞌwai mreme te tinha: ‘Piꞌõ na aipréduptéb ré ãma ĩꞌaimro na hã ãma atsima ꞌre rowẽ uꞌötsi mono.’ (Provérbios 5:18, 19) Jeová te tsima wẽ Cristo dzadawa dzamarĩꞌwa norĩ timro te te rẽme dzaꞌra tõ da. Te tsima wẽ duré daꞌãma tsimitsaihuri dzaꞌra tõ da. Ãne, timro na tsi te dza tsina tihöimana dzaꞌra. — Tsõré na Hebreus 13:4.
2. E marĩ dahöimana nhitsébꞌõ.
Ropotoꞌwai mreme te tinha: ‘Dahöiba na dawatsédé te te ꞌre ĩꞌmanharĩ dzaꞌra mono norĩ hã . . . ꞌRe ĩhöimana uꞌötsi mono, daꞌãma ꞌre ĩtsibꞌaꞌuwẽ mono dzém na, dame ꞌre höimana dzaꞌra mono õ di dza.’ (1 Coríntios 6:9, 10) Ropotoꞌwai mreme ꞌremhã, damreme dahöimana nhitsébꞌõ ãma ĩtsaprĩdzé hã grego mreme hã porneía. Ãhã damreme te watsuꞌu (1) tsina ĩhöimana dzaꞌra norĩ hã tsina mro ãna, b (2) aibö tsiꞌuiwa niwamhã piꞌõ tsiꞌuiwa tsina ĩhöimana dzaꞌra norĩ, duré (3) abadze na ãma ĩhöimana dzaꞌra norĩ. ‘Dahöimana nhitsébꞌõ’ nhiti ꞌre wahöimana dzaꞌra mono wamhã wa dza rowẽ dzaꞌra ni Jeová ma duré watsima. — Efésios 5:3.
WAIHUꞌU DURÉ
Te dza ĩꞌmadö e niha atsina tsada ꞌre ĩꞌatsiptete mono da hã dahöimana nhitsébꞌõ wi hã. Te dza duré ĩwaihu aihöimana upto nhiti ꞌre aihöimana mono wamhã dza aima ꞌre ĩrowẽ mono na hã.
3. Dahöimana nhitsébꞌõ wi hã atsina tsada ꞌre atsiptete mono
Ropotoꞌwai mreme te tinha duréihã aibö José na ĩtsitsi tsada ꞌre ĩtsiptete mono na hã dahöimana upto nhiti ꞌre höimana mono da. Atsiré tsõré aba Gênesis 39:1-12. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
E marĩ wa, José piꞌõi wi ma tô tiwi wara. — ꞌMadöꞌö ĩtsihötö ꞌrare 9.
-
Aima hã, José e ĩbö na ma tô ꞌre höimana. E marĩ wa.
E niha ĩhöibatém norĩ, José ne te dza tsina tsada ꞌre tsiptete dzaꞌra dahöimana nhitsébꞌõ wi hã. ꞌMadöꞌö aba ĨROPODO.
Jeová te tsima wẽ dahöimana nhitsébꞌõ hã wa te wẽꞌõ dzaꞌra da. Atsiré tsõré aba 1 Coríntios 6:18. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
E mahã romhöimanadzéb ꞌremhã ãté niꞌwa dahöimana nhitsébꞌõ na te dza ãma upa.
-
E niha a hã, dahöimana nhitsébꞌõ wi hã te dza atsina tsada ꞌre atsiptete mo.
4. Te dza ãma ĩꞌaiꞌuté dapibudzém na
E marĩ te dza wawi roꞌwaꞌrutu dzaꞌra dahöimana nhitsébꞌõ nhiti ꞌre wahöimana dzaꞌra mono tõ da. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã.
-
Ĩropoto na, e marĩ watsitsãnawã ma tô ꞌmanha te te tsina waihuꞌu wamhã tinhimirotsaꞌrada duré tinhimiꞌmanharĩdzé te te ĩrétsi waihuꞌu petse na hã piꞌõ aimawi na te te ãma upa da.
Nimahã na hã, Jesus dzadawa dzamarĩꞌwa norĩ tsimidzadzei petse dzaꞌra nherẽ te dza duré ꞌwapé dzaꞌra tinhimirotsaꞌrata watsédé. E niha a hã, te dza ĩwẽꞌõ rotsaꞌrata nhitsébꞌõ. Atsiré tsõré aba Filipenses 4:8. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
E marĩ na wa dza rotsaꞌrata dzaꞌra ni.
-
E niha Ropotoꞌwai mreme nhoré duré Jeová ma romhuri te dza wapawaptob dzaꞌra dapibudzém na wa te aiꞌuté dzaꞌra da.
5. Jeová nhimiroti wama rowẽdzéb da
Jeová ma, tãma waihuꞌu petse di marĩ ĩwẽ danhipai u wama hã. Õ hã, te wama waihuꞌu dzaꞌra dahöimana upto nhiti ꞌre wahöimana dzaꞌra mono da duré te tinha e marĩ wa, tahã ĩwẽ wama. Atsiré tsõré aba Provérbios 7:7-27 niwamhã ꞌmadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã.
-
E niha ĩhöibaté romnhihötö watsuꞌu na dapibudzé ma tô tsitsô wadze. — ꞌMadöꞌö aba Provérbios 7:8, 9.
-
Provérbios 7:23, 26 dzarina, dahöimana nhitsébꞌõ te dza ropire dadzô wadze. Wahöimana upto ãna ꞌre wahöimana dzaꞌra mono wamhã, e mahã ropire nhiti wa dza wahöimana dzaꞌra ni.
-
Wahöimana upto ãna ꞌre wahöimana dzaꞌra mono wamhã e marĩ ĩwẽ te dza wama ꞌre höimana dzaꞌra aptoꞌoré.
Niꞌwam norĩ ma hã, Ropotoꞌwai mreme te te ĩnharĩdzé aibö tsiꞌuiwa na duré piꞌõ tsiꞌuiwa na dahöimana na ĩtsimidzawiꞌõ na hã. Tadzahã Jeová, Ropotoꞌwa ĩtsimidzawi pe hã, te tsima wẽ aihĩni ꞌre höimana uꞌötsi dzaꞌra mono da õne uꞌö. Taha da, ĩtsimiroti dzarina ꞌre ĩwahöimana dzaꞌra mono da tsi. Atsiré tsõré aba 1 Coríntios 6:9-11. Taha parimhã atsima robdzanhamri aba ãhã dadzadanharĩ ãma piꞌrebamhã:
-
Ropotoꞌwa nhimiroti dzarina, e aibö tsiꞌuiwa na duré piꞌõ tsiꞌuiwa na ꞌre ĩhöimana dzaꞌra mono norĩ tsi tihöimanadzém na te te ãma ĩtsaprĩ dzaꞌra da tsi.
Ropotoꞌwai ma wa te rowẽ dzaꞌra da, wa norĩ hã, aihĩni wahöimanadzém na wa dza ãma tsaprĩ dzaꞌra ni. E tahã tô tsena te dza duré wama rowẽ wadzere dzaꞌra. Atsiré tsõré aba Salmo 19:8, 11. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
Aima hã, Jeová nhimiroti dahöimana na e pire di ꞌre ĩꞌmadöꞌö mono dzéb da hã. E marĩ wa, ãne te ĩrotsaꞌra.
Jeová ma tô daꞌapawapto ĩtsimiroti dzarina ꞌre dahöimana dzaꞌra mono da. Õ hã, te dza duré aipawapto.
NIꞌWAM NORĨ TE NHARĨ DZAꞌRA ÃNE: “Marĩ õ di datsina dahöimana dzahuré da datsitsawi dzahuré wamhã.”
-
E marĩ te aré ĩnha.
ĨWAIHUꞌUDZÉ HÃ
Datsina dahöimana hã marĩ ĩwẽ Jeová te te ĩpodo hã aibö duré piꞌõ ĩmro ré norĩ ma
Ãma aipoꞌre puꞌu
-
E ma norĩ dahöimana nhitsébꞌõ hã Jeová nhimiroꞌmadöꞌö dzarina.
-
E marĩ te dza wapawaptob dzaꞌra dahöimana nhitsébꞌõ nhiti ꞌre wahöimana dzaꞌra mono da.
-
E marĩ wa, Jeová nhimiroti dzarina dahöimana na wama rowẽdzéb da hã.
TSÔ AIRĨTĨ DURÉ
ꞌMadöꞌö e marĩ wa, ĩpire Ropotoꞌwai nhimiroꞌmadöꞌö dzarina aibö duré piꞌõ tsiré ĩhöimana dzahuré hã tsina mro dzahuré da dama ĩpire norĩ te na hã.
Ropotoꞌwai mreme te te roti nherẽ aibö tsiꞌuiwa duré piꞌõ tsiꞌuiwa dahöimana ĩböiꞌõ na hã, ꞌmadöꞌö e marĩ wa, wa te ꞌruiwapari dzaꞌra õ di aibö tsiꞌuiwa duré piꞌõ tsiꞌuiwa norĩ.
“E aibö tsiꞌuiwa duré piꞌõ tsiꞌuiwa dahöimana hã ĩböiꞌõ.” (Ĩtsihötödzé jw.org na)
Waihuꞌu e niha Ropotoꞌwai nhimiroti norĩ hã datsina dahöimana na hã te waꞌwawi ꞌre tsimapa dzaꞌra.
“Datsina dahöimana dadzadawa na, e tô tsena datsina dahöimana uptabi.” (Ĩtsihötödzé jw.org na)
ꞌMadöꞌö e marĩ wa, aibö tsiꞌuiwa aré ꞌre ĩhöimana mono hã ma tô tsima wẽ tihöimanadzém na te te ãma tsaprĩ da Ropotoꞌwai ma te te rowẽ da. Tsõré na ĩwatsuꞌu hã “Õ norĩ hã, wadzém na ma tô ĩ̱ma ꞌre höimana dzaꞌra”.
“Ropotoꞌwai mreme te te daꞌadzaprĩ waihuꞌu petse di” (Roꞌmadöꞌöꞌwa, 1.º abril na, 2011 na)
a Wa te watsuꞌu dzaꞌra wamhã datsina damro ãhã romnhoré na hã, wa ãma nharĩ dzaꞌra ni aibö duré piꞌõ ĩꞌuptabi na hã tsina ĩmro dzahuré na hã dama ĩpire norĩ nhimiroꞌmadöꞌö na.
b Datsina dahöimana ĩböiꞌõ me, damreme porneía te duré watsuꞌu datsina dahöimana dadzadawa hawi, datsina dahöimana datsaiꞌrata dzanidzéb hawi duré datsiwabdzudzé upi robꞌruiwapari watsété dzarina.
