ZƐŊ-LƐƐI 41
Le Ɓe Ŋala-kɔlɔi E Mo E Pilaŋ Nɛni-mɛni Da Surɔŋ-mɛni Ma?
Nua tamaa da ŋumɛ lonoi e pilaŋ nɛni-mɛni da surɔŋ-mɛni ma. Kɛlɛ, Ŋala-kɔlɔi a lono e pilaŋ nɛni-mɛni da surɔŋ-mɛni ma, a gɛ a ɓaa-kɛ-maa pere. Kwa mɛni lɛlɛɛ sɔlɔ ɓo mɛnii e moi su, nyaŋ tare kaa zu. Ziova ɓa Kukpɛtɛ Ɣalai. Mɛni ma e mɛnii kɔlɔŋ nɛlɛɛi kumɛni mai. E berei lɛ kwa pɔri nii laai la da mɛnii a pɔri kpɔŋ maa tɛɛi kupɔ a gɛɛ kukɛ-ɣeniɛ ŋaa-nɛ̃ɛ kula wɔlɔ-wɔlɔ da wɔlɔ-wɔlɔ.
1. Le ɓa Ziova ŋɔkili-ŋa-siai e pilaŋ nɛni-mɛni da surɔŋ-mɛni ma?
Nɛni-mɛni da surɔŋ-mɛni kaa a ɓɛlɛ-see nyii kula Ziova yeei. A ŋwɛlii e kɛ nɔ surɔŋ da nɛni loai nyii tua-laa sui. Mɛlɛ-see ŋi fa nɛɛ nɔ naa a gɛɛ tua-laa su-ɓela di nĩa-pɛlɛɛ maa sɔlɔ ɓo, kɛɛ a gɛ di ŋɔnɔ diwɛli-kɛ-maai lɛ dikie-ni dia a lii-nɛ̃ɛ pere. Nyiŋi ɓe gɛ Ŋala-kɔlɔi kɛ mo nyɛɛi: “Lii-nɛ̃ɛ kula inɛnii mɛni ma nyii I gula a inaɣa tãi.” (Tare-woo-ŋa 5:18, 19) Ziova a ŋwɛlii tua-laa su-ɓela di kanaŋ dipɔŋ-ni dia, mɛni ma dife pai wɔlɔ wulu-wulu kpɛi.—Ibulu 13:4 lono.
2. Wulu-wulu kpɛɛ sukulai ɓa le?
Ŋala-kɔlɔi e mo nyɛɛ ‘Ɣala Ŋɔkaloŋ-laai fe pai kɛi a goyaŋ-wulu-wulu kɛ-ɓela pɔɔ.’ (1 Kɔleŋtiɛŋ 6:9, 10) Ŋala-kɔlɔ pɔ̃yɛ-ɓelai nyii Ŋala-kɔlɔi pɔ̃yɛ Gurii sui, di tii kɛ a Gurii wooi por·neiʹa a gɛɛ di lono e pilaŋ wulu-wulu kpɛɛ ma. Ŋooi ti sukulai ɓa (1) nɛni-mɛni da surɔŋ-mɛni kɛɛ a nuu feerɛ loai nyii-ŋai dife tua-laa sui, (2) sinaa kɛɛ dikie-ni kɛi a dinɛyaa da (3) nuu kɛɛ lɔ-pɔrɔŋ kɛi a sua. Kwa ku “kɛi koya wulu-wulu kɛɛ ma” kwa Ziova lii laa ku mɛni lɛlɛɛ sɔlɔ ɓo zu.—1 Tɛsɛloniɛŋ 4:3.
MƐNI TAMAA MAA-KƆRI
Berei kaa ya pɔri wulu-wulu kpɛɛ maa laai la da berei ya pɔri mɛni lɛlɛɛ sɔlɔ ɓoi la ya lɛɛ a imaa waa.
3. Ife iyee pili wulu-wulu kpɛɛ su
Zosɛ nyii kɛ a Ziova fɛli-nuui, e kɔ a gɛɛ e lɛɛ a maa waa dua-pere su. Zɛnɛse 39:1-12 lono, gɛ ni ka lono e pilaŋ mare-kɛɛ-ŋai ŋi dia:
-
Le ɓe Zosɛ lii kula a gɛɛ e pui? —Ŋoo-kpua 9 kaa.
-
I laai la Zosɛ e mɛni-kpɛtɛɛ lɛlɛɛ kɛ? Le mɛni ma?
Nuu-tɔɔ-ŋa da pɔri Zosɛ pɔɔ-kɔɔni leŋ, di diyee kula wulu-wulu kpɛɛ su saa? VILOI su kaa.
Ziova fe ŋwɛlii a gɛɛ ku kuyee pu wulu-wulu kpɛɛ su. 1 Kɔleŋtiɛŋ 6:18 lono, gɛ ni ka lono e pilaŋ mare-kɛɛ-ŋai ŋi dia:
-
Mɛni-ŋa kɛɛ leŋ ɓe a pɔri gɛi nuu e nyee pili wulu-wulu kpɛɛ su?
-
Ya pɔri iyee kulai leŋ wulu-wulu kpɛɛ su?
4. Ya pɔri tɔɔi a gbanaŋɔɔ sukɔɔŋ su
Le ɓe a gɛ a gbanaŋɔɔ a gɛɛ ku lɛɛ kutɔɔi sukɔɔŋ a pa kupɔ a gɛɛ ku wulu-wulu kpɛ? VILOI su kaa, gɛ ni ka lono e pilaŋ mare-kɛɛ ŋi ma.
-
Viloi su, tãi bɔlɔi e gaa la a gɛɛ ŋɔkili-ŋa-siai da dua-pere a pɔri gɛi e wulu-wulu kpɛ, le ɓe e gɛi?
Korai-ɓelai nyii-ŋai ditɔɔi kpanaŋɔɔi dɔ̃yai sui, dia maŋ da kɔ a gɛɛ dikili-ŋa-siai e lɛɛ a maa waa. Le ɓe ya pɔri gɛi a gɛɛ ife kɛ ikili-ŋa siai e pilaŋ wulu-wulu kpɛɛ ma? Felepiɛŋ 4:8 lono, gɛ ni ka lono e pilaŋ mare-kɛɛ-ŋai ŋi dia:
-
Mɛni-ŋa kɛɛ leŋ ɓe maa nɛ̃ɛi ku kukili-ŋa sia e pilaŋ dia?
-
Ŋala-kɔlɔi lonoɔɔ da tii tamaa kɛɛ Ziova mi a tãi kelee a kpɔŋ leŋ kua a gɛɛ kufe kuyee pili sɔnyɔŋ su?
5. Kwa mɛni lɛlɛɛ sɔlɔ ɓo Ziova ŋɔtɔŋ-ŋai su
Ziova e mɛnii kɔlɔŋ nɛlɛɛi kumɛni ma. E berei lɛ kwa pɔri lɛɛi la a kumaa waa kutua-pere su da mɛni lɛlɛɛ-ŋai kwa pɔri zɔlɔ ɓoi zui. Tare-woo-ŋa 7:7-27 (NWT) lono kpaa VILOI su kaa, gɛ ni ka lono e pilaŋ mare-kɛ-ŋai ŋi dia.
-
Le ɓe nyaŋkpai ŋi e gɛ nyii pa a sukɔɔŋ bɔi?—Tare-woo-ŋa 7:8, 9 kaa.
-
Yɛɛ berei Tare-woo-ŋa 7:23, 26 e mo lai, wulu-wulu kpɛɛ a pa a mɛni-kpɔlu tamaa. Mɛni-kpɔlu-ŋa kɛɛ leŋ ɓe kwa pɔri maa laai kwa wala kuyee pili wulu-wulu kpɛɛ su?
-
Kwa lɛɛ a kumaa waa kutua-pere su, a kpɔŋ leŋ kua a gɛɛ ku kɛ-ɣeniɛ ŋaa-nɛ̃ɛ kula wɔlɔ-wɔlɔ da wɔlɔ-wɔlɔ?
Nua taŋa da gaa yɛɛ mɛnii Ŋala-kɔlɔi e mo e pilaŋ sinaa kɛɛ dikie-ni kɛi a dinɛyaa mai fe lɛlɛ ni. Kɛlɛ, ŋwɛli-kɛ-maa Ɣalai Ziova, a ŋwɛlii a gɛɛ ku kelee ku kɛ-ɣeniɛ ŋaa-nɛ̃ɛ kula wɔlɔ-wɔlɔ da wɔlɔ-wɔlɔ. A gɛɛ ku wɔlɔ-wɔlɔ fulu-laa sɔlɔ ɓo, maa nɛ̃ɛi ku ŋɔtɔŋ-ŋai mɛi kaa. 1 Kɔleŋtiɛŋ 6:9-11 lono, gɛ ni ka lono e pilaŋ mare-kɛɛ ŋi ma:
-
I laai la sinaa kɛɛ dikie-ni kɛi a dinɛyaa nɔ ɓe nyɔmɔɔi Ɣala ŋɛi?
A gɛɛ ku Ɣala lii laa, maa nɛ̃ɛi ku kelee ku mɛni maa faleŋɔɔ-ŋa kɛ. I laai la nyiŋi kaa a mɛni lɛlɛɛ? Ŋule-wooi 19:8, 11 lono, gɛ ni ka lono e pilaŋ mare-kɛɛ ŋi ma:
-
I laai la Ziova ŋɔtɔŋ-ŋai lɛlɛɛi e pilaŋ kutua-pere ma? Le mɛni ma?
Ziova aa kpɔŋ nua tamaa dia a gɛɛ di ŋɔtɔŋ-ŋai mɛi kaa e pilaŋ wulu-wulu kpɛɛ ma. A pɔri kpɔnii ya maŋ
NUA TAŊA DA MO DIYƐƐI: “Nɛni-mɛni da surɔŋ-mɛni kɛɛ nuu feerɛ kelee ta loai fe a mɛni nyɔmɔɔ a kɛ nɔ di dikie-ni wɛlini.”
-
Le ɓe ya pɔri moi e pilaŋ nyiŋi ma?
MƐNI-ŊUŊ-ŊAI YAA MAA-KƆRII
Nɛni-mɛni da surɔŋ-mɛni kaa a ɓɛlɛ-see nyii kula Ziova yeei tua-laa su-ɓela mɛni ma.
Gili-too-ŋa mare-kɛɛ-ŋai
-
Wulu-wulu kpɛɛ sukulai taŋa ɓa le?
-
Le ɓe pai kpɔnii kua a gɛɛ kufe kuyee pu wulu-wulu kpɛɛ su?
-
Mɛni lɛlɛɛ kɛɛ leŋ ɓe kwa zɔlɔ ɓo kwa sia a Ziova ŋɔtɔŋ-ŋai e pilaŋ wulu-wulu kpɛɛ ma?
MƐNI TAKPƐNI-ŊA MAA-KƆRI
Mɛnii kaa gɛ Ɣala a ŋwɛlii nɛni da surɔŋ nyii-ŋai ŋwɛlii dikɛ dikie mai, di too la tua-laa su.
Mɛnii kaa gɛ Ŋala-kɔlɔi ŋɔsɛŋ-lɛɛi e pilaŋ sinaa kɛɛ dikie-ni kɛi a dinɛyaa ma, fe nɛi a gɛɛ ku nuai gɛi kpɔara.
“Sinaa Kɛɛ Dikie-ni Kɛi A Dinɛyaa Kaa A Mɛni Nyɔmɔɔ?” (Zɛŋ-lɛɛi ŋi kaa jw.org fãai ŋa)
Mɛni maa-kɔri e pilaŋ berei ma Ɣala ŋɔtɔŋ-ŋai e pilaŋ nɛni-mɛni da surɔŋ-mɛni sii kelee ta ma a kumaa kɔ̃ɔ lai.
“I Laai La Nɛni-mɛni Da Surɔŋ-mɛni Kɛɛ Nuu La Nyɔmɔɔi?” (Zɛŋ-lɛɛi ŋi kaa jw.org fãai ŋa)
Mɛni-kɔɔŋ-maai “Di Tua A Nyãa A Ɓaa-kɛ-maa Pere” su, mɛnii kaa naloŋ ta lii kula a gɛɛ e nyee kula sinaa kɛɛ dikie-ni kɛi a dinɛyaa mɛni sui.
“Ŋala-kɔlɔi A Nua Dikɛ-ɣeniɛi Maa Faleŋ” (Nyeŋkeŋ, Dɛniŋ 1, 2011)
a Nɛni-mɛni da surɔŋ-mɛni kɛɛ nyii va Ɣala lii laai taŋa ɓa, nɛni-mɛni da surɔŋ-mɛni kɛɛ nuu feerɛ loai nyii-ŋai dife tua-laa sui. Daŋa ŋɔnɔ ɓa nɛni-mɛni da surɔŋ-mɛni kɛɛ nuu la pere, nuu polu pere da nuu kɛɛ pele kɛi a nuu ta kpono nɛni-mɛni da surɔŋ-mɛni kɛ mɛni ma nyii ve a bɔŋ.
