LECCIÓN 41
¿Xi rusiidiʼ Biblia de relación sexual?
Stale binni rituí lú guiníʼ de relación sexual. Peru né stale respetu rusiidiʼ Stiidxaʼ Dios de laani ne nabé nayaʼniʼ modo rusiéneni de tema riʼ. Ra gánnanu xi rusiidiʼ Biblia de laani zanda gacaneni laanu purtiʼ jneza ni nani ne zeeda ni de Jehová, Dios ni bizáʼ laanu ne ni racalaʼdxiʼ ni galán para laanu. Laabe cayábibe laanu xi naquiiñeʼ gúninu para ganda gusiéchenu laabe ne ximodo zanda ugaandanu guendanabani ni qué zaluxe.
1. ¿Ximodo ruuyaʼ Jehová gapa binni relación sexual?
Laani nga ti regalu ni bidii Jehová binni guidxilayú. Ne racaláʼdxibe ti hombre ne ti gunaa ni maʼ bichaganáʼ si nga gapa relación sexual. Cadi para si gapa binni xiiñiʼ nga regalu riʼ, sínuque laaca para gusihuinni binni pabiáʼ nadxii xheelaʼ ne guiechenecaʼ regalu bidii Dios laacaʼ. Nga runi Stiidxaʼ Dios ná: «Biechené xheelaluʼ ni bichaganaluʼ dxi nahuiiniluʼ» (Proverbios 5:18, 19). Qué racalaʼdxiʼ Jehová gucheené ti xpinni Cristu xheelaʼ. Nga runi, ti binni ni naca xpinni Cristu la? qué ziuuné tuuxa ni cadi xheelaʼ (biindaʼ Hebreos 13:4).
2. ¿Xii nga pecadu sexual?
Biblia rusiidiʼ qué ziuu «ca binni ni runi cometer pecadu sexual [...] lu Reinu stiʼ Dios» (1 Corintios 6:9, 10). Diidxaʼ griegu ni biquiiñeʼ ca hombre bicaa Biblia ora bizeetecaʼ de pecadu sexual nga pornéia. Diidxaʼ riʼ rugaandani 1) gapa binni relación sexual né tuuxa ni cadi xheelaʼ, a 2) gaca tuuxa muxeʼ o gunaa nguiuʼ ne 3) gapa tuuxa relación sexual né ti maniʼ. Ora rúninu stipa para cadi guiábanu lu pecadu sexual rusiéchenu Jehová ne ziuʼnu galán pur ca cosa ni gúninu (1 Tesalonicenses 4:3).
GUIZÍʼDIRUNU JMA
Guidúʼyanu xi zanda gúninu para cadi guiábanu lu pecadu sexual ne xi zabeendunu pa gúninu stipa chuʼnu nayá nezalú Dios.
3. Bixooñelú de pecadu sexual
Ti hombre ni bibani dxiqué ni bizuubaʼ stiidxaʼ Jehová láʼ José, biʼniʼ stipa pur chuʼ nayá nezalube. Laguundaʼ Génesis 39:1-12 ne laiquiiñeʼ ca pregunta riʼ para güitu diidxaʼ:
-
¿Xiñee bixooñelú José? (Laguuyaʼ versículo 9).
-
¿Ñee rábiluʼ biaʼsi nga ni biʼniʼ José la? ¿Xiñee riníʼ íqueluʼ zacá yaʼ?
¿Ximodo zanda chinanda ca joven ejemplu stiʼ José ne guxooñelucaʼ de pecadu sexual? Laguuyaʼ VIDEU riʼ.
Racalaʼdxiʼ Jehová gucáʼnanu pecadu sexual. Laguundaʼ 1 Corintios 6:18 ne laiquiiñeʼ ca pregunta riʼ para güitu diidxaʼ:
-
¿Pora rábiluʼ zanda guiaba tuuxa lu pecadu sexual?
-
¿Ximodo zanda guxooñeluluʼ de pecadu sexual?
4. Zanda gucaanaluʼ intiica tentación
¿Xiñee raca nagana para binni gucaanáʼ pecadu sexual? Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
-
¿Xi biʼniʼ hermanu ni bihuinni lu videu riʼ ora bidii cuenta zanda gucheené xheelaʼ pur ni cayuni ne ni caníʼ ique?
Dede nuu hermanu ni qué huasaana Jehová raca nagana para laa guiníʼ ique ni jneza. ¿Xi zanda gúniluʼ para cadi guiníʼ íqueluʼ ni cadi jneza yaʼ? Laguundaʼ Filipenses 4:8 ne laiquiiñeʼ ca pregunta riʼ para güitu diidxaʼ:
-
¿Xi ca cosa galán naquiiñeʼ guiníʼ íquenu?
-
Pa guidúʼndanu Biblia ne cadi gusaana de gúninu xhiiñaʼ Jehová, ¿ñee rábiluʼ zacané ni laanu gucáʼnanu intiica tentación la? ¿Xiñee riníʼ íqueluʼ zacá yaʼ?
5. Zabeendunu ni galán pa chinándanu ca ley stiʼ Jehová
Nanna Jehová xii nga ni jma galán para laanu. Nga runi rábibe laanu ximodo zanda chuʼnu nayá nezalube ne xi zabeendunu. Laguundaʼ Proverbios 7:7-27 ne laguuyaʼ VIDEU riʼ. Despué laiquiiñeʼ ca pregunta riʼ para güitu diidxaʼ:
-
¿Ximodo guluu joven riʼ xquendanabani ra naxoo? (Laguuyaʼ Proverbios 7:8, 9).
-
Casi ná Proverbios 7:23, 26, rapa binni stale guendanagana ora guni ti pecadu sexual. ¿Xi guendanagana rapa binni ora guni xiixa pecadu sexual?
-
Pa chuʼnu nayá nezalú Dios, ¿ximodo zanda gacané ni laanu ugaandanu guendanabani ni qué zaluxe?
Nuu tu riníʼ ique pur ni rusiidiʼ Biblia, cadi nadxii Jehová ca muxeʼ ne ca gunaa nguiuʼ. Peru naca Jehová ti Dios ni nadxii binni ne racalaʼdxiʼ guibánicabe nayecheʼ sin chuʼ dxi gáticabe. Ne para ugaandanu ca ndaayaʼ riʼ caquiiñeʼ guibáninu modo ná ca ley stiʼ Dios. Laguundaʼ 1 Corintios 6:9-11 ne laiquiiñeʼ pregunta riʼ para güitu diidxaʼ:
-
¿Ñee ca muxeʼ ne ca gunaa nguiuʼ si nga qué riuulaʼdxiʼ Jehová ni rúnicaʼ la?
Para ganda chuulaʼdxiʼ Dios ni rúninu, guiranu caquiiñeʼ guchaʼnu. ¿Xi zabeendunu yaʼ? Laguundaʼ Salmo 19:8, 11 ne laiquiiñeʼ ca pregunta riʼ para güitu diidxaʼ:
-
¿Ñee rábiluʼ jneza nga ca ley ni riguixhe Jehová la? ¿Xiñee riníʼ íqueluʼ zacá yaʼ?
Maʼ gucané Jehová stale binni para chinándacaʼ ley stibe, ne laaca zanda gacanebe lii.
NUU TU NÁ: «Gastiʼ naca gapa chupa binni relación sexual pa nadxiicaʼ».
-
¿Lii xi riníʼ íqueluʼ yaʼ?
XI BIZÍʼDINU
Ti regalu ni maʼ bidii Jehová binni nga relación sexual. Ti hombre ne ti gunaa ni maʼ bichaganacaʼ nga zanda guiechenecaʼ regalu riʼ.
Xi biziidiluʼ
-
¿Xi ca cosa rugaanda pecadu sexual?
-
¿Xi zacané laanu cadi guiábanu lu pecadu sexual?
-
¿Xi zabeendunu pa chinándanu ca ley stiʼ Jehová?
BIIYAʼ XIRUʼ ZANDA GUIZIIDILUʼ
Biiyaʼ xiñee racalaʼdxiʼ Dios guichaganáʼ ti hombre ne ti gunaa ni racalaʼdxiʼ cueza juntu.
«¿Ñee jneza nga cueza chupa binni juntu pa caʼruʼ guichaganacaʼ la?» (Tema ni zeeda lu jw.org)
Biiyaʼ pa dxandíʼ rusiidiʼ Biblia naquiiñeʼ gacananalaʼdxiʼ binni o gúnicaʼ menu ca muxeʼ o ca gunaa nguiuʼ.
«¿Ñee malu gaca ti hombre muxeʼ o ti gunaa nguiuʼ la?» (Tema ni zeeda lu jw.org)
Biiyaʼ ximodo zanda gacané ca ley ni zeeda lu Biblia laanu para cadi guiábanu lu pecadu sexual.
«¿Ñee laaca relación sexual nga gapa binni sexo oral la?» (Tema ni zeeda lu jw.org)
Biindaʼ xi bicaa ti muxeʼ guchaa modo nabani ne guni ni ná Dios, lu historia ni láʼ «Biʼniʼ respetárcabe naa».
«Gucané Biblia laacabe para bichaacabe» (Torre stiʼ ni rapa, 1 de julio de 2011)
a Stale cosa nga ni rugaanda pecadu sexual, caadxi de laacani nga sexo oral, sexo anal o quiteʼ ti binni ra naca tuuxa hombre o gunaa.
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
