ESI ITUUGHẠ PHỌ 42
ABaibul Phọ Akaạph Eeghe Ilọ Adọl Egelhenyạ r’Apinien?
Iniin arikpisi, awe omeeraam mọ apinien bịn kụ katue angọ oye oḅaạl olhoghi. Toroboiperolbọ, abuniin awe dị moḍigh pinien u/moọgh oḅaạl olhoghi, kuolọ abuniin awe dị odi dọl egelhenyạ omoọgh ni. ABaibul phọ aḅẹm mọ adọl egelhenyạ r’apinien eḍighi inmo k’Enhaạn.
1. Eeghe asuọ kụ odi orọl adọl egelhenyạ?
ABaibul phọ aḅẹm mọ: ‘Oye lọ aphin anhịr kaḍighi ni igey, kuolọ oye lọ anhịr u/pin kụ kaḍighi apuemhi.’ (Ibạl 1 Korịnt 7:32, 33, 38.) Ighẹn areten kụ edị oye dị odi dọl egelhenyạ ‘kaḍighi bọ apuemhi’? AKristẹn dị odi dọl egelhenyạ ro/moọgh ghan ooḅaghamhiạn aloor ophogh olom obobọ anhịr. Esi iduọn phọ, bidị romoọgh ghan ni eboom eereẹgh. Esi omaạm, abuniin mobughẹ ni rukumuan phọ abidị siẹn oḍighi omhạr phọ, esi oḍuạ oghị enhọn ekpisi oghaạph iiḅi iinhaghạn phọ. Dị epelhom siẹn, bidị omoọgh muboom amem oḍighi araraạr dị keḍur bidị etumeriom aZihova.
2. Eeghe asuọ kụ ratọl ghan mem dị olhephiri oọny r’anhịr ephoph okạr aalhạn?
Apinien, idiphọ adọl egelhenyạ, amoọgh aani ni suọ. ABaibul phọ aḅẹm ni mọ “iyạl awe kụ unhighẹ opu oniin oye.” (Ecclesiastes 4:9) Kụ iphẹn phọ kụ remite ghan mem dị aKristẹn osighẹ sinhị-iilhogh aBaibul phọ kụ orolhọm siphẹ apinien phọ abidị. Abulọ okạr aalhạn roguan ghan ophomhoghiạn, olhọgh eegu ḅilhẹ r’omhaạr ghan ophogh nyooriphọ. Esi iduọn phọ, bidị romoọgh ghan ni oghoph kopu bulọ odianhaan ghan bịn. Kụ mem dị olhephiri oọny r’anhịr ephoph okạr aalhạn, ibạm anmụny phọ abidị romoọgh ghan kẹn ni oghoph.
3. AZihova amiịn aani ika pinien?
Mem mọ aZihova aphighi bọ oḅẹl apinien phọ, odị aḅẹm mọ: “Oye kabilhẹ odẹ r’onhiin odị, kụ aḅophạn r’anhịr odị.” (Genesis 2:24) AZihova rawạ dị olom r’anhịr kopomhoghiạn kụ oḅilhẹ oḅophoghạn tutụ k’aḍuugh. Kuolọ odị angọ ni ogẹl okạ apinien phọ mem dị oniin alhe emhạ. Mem dị oniin alhe emhạ, aZihova angọ ni eepoogh opọ u/le aani bọ emhạ phọ osopha mughumọ odị kakạ pinien phọ obobọ kasạr abilhenhaạn. a (Matiu 19:9) AZihova akel li dị onyọ aKristẹn kamoọgh iyạl aburulom obobọ anmariịr.—1 Timoti 3:2.
OLHEGHERI OBUGHẸ
Otuughạ olhegheri idị nạ katue amoọgh oḅaạl olhoghi aḅilhẹ aḍighi idị ekpom aZihova kemoọgh ibo—mughumọ nạ odi dọl egelhenyạ obobọ nạ maḍigh pinien.
4. Ḍighinhom agey inmo egelhenyạ phọ anạ
AZizọs amhiịn dọl egelhenyạ idiphọ inmo. (Matiu 19:11, 12) Ibạl Matiu 4:23, kụ eeḅeghiọn ḍipuru phọ aḍiẹn:
-
Ika kụ idị aZizọs asighẹ dọl egelhenyạ phọ odị akumuom Odẹ phọ odị aḅilhẹ alhoghonhaạn bunhọn ḍighaạgh?
Onyọ aKristẹn dị odi dọl egelhenyạ katue ni amoọgh ibo mem dị amhaạr aḍighinhom dọl phọ odị idiphọ aZizọs. Ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
Ighẹn araraạr dị kengọ suọ kụ edị onyọ aKristẹn katue asighẹ dọl egelhenyạ phọ odị aḍighinhom?
Nạ alegheri ni?
ABaibul phọ o/ghol onhụ asiạ dị oye kasi kụ aḍigh pinien. Toroboiperolbọ, atoma ni mọ oye phọ akoriom ni tutụ oye phọ matenhom mem dị eephuạ orolhạn esi ketue ni eḍighi idị kekparanhaạn oye phọ osopha ogey osopha.—1 Korịnt 7:36.
5. Saḅạr opọ r’anạ kebalhạn bọ r’osụ olhoghi
Osaḅạr opọ r’anạ kebalhạn bọ eḍighi ni osopha dị amhạn maạr iboom. Ibạl Matiu 19:4-6, 9, kụ eeḅeghiọn ḍipuru phọ aḍiẹn:
-
Uḍighi ika kụ i/wạ bọ dị onyọ aKristẹn kakiil aḍigh pinien?
ABaibul phọ katue ni alhoghonhaạn nyinhạ ḍighaạgh olhegheri iyaạr ophogh esi oye dị r’anạ rewạ aalhạn. Iyaạr dị emhạn maạr epu pọ aạl obobọ ophin oye dị aphomhoghiạn aZihova. b Ibạl 1 Korịnt 7:39 r’2 Korịnt 6:14. Kụ eeḅeghiọn sipuru phọ iphẹn:
-
Uḍighi ika kụ ekpẹ bọ ophin obobọ aạl oye dị aḍighi aani onyọ aKristẹn?
-
Nạ aatughiạn mọ retọl ghan ika esi aZihova mem dị yira aạl obobọ ophin oye dị u/pomhoghiạn nyodị?
Eḍighi maạr dị olhọgh ofegumạ orum iyạl inhạm dị inyaạm mọ ii/leeny mọ eḅọph eḍighi oḍighi, iyạl phọ idị kemiinhọm ni. Iduọn kẹn kụ edị onyọ aKristẹn dị aạl obobọ aphin oye dị r’odị u/ḅọph omheeraam kamoọgh aani iiḅaghamhị
6. Miịn pinien eten phọ epẹ aZihova amhiịn bọ
Iḍiodi phọ epẹ Izrạl, abuniin awe useere ghan nmariịr abidị loor esi owạ ilọ aloor. Ibạl Malachi 2:13, 14, 16, kụ eeḅeghiọn ḍipuru phọ aḍiẹn:
-
Eeghe kụ iḍighi kụ aZihova akel bọ okạ apinien mem dị olhe emhạ u/mite?
Mem dị olom obobọ anhịr alhe emhạ kụ apinien phọ akạ, opọ u/le aani bọ emhạ phọ r’ibạm anmụny phọ romiinhọm ghan ni
Ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
Eḍighi maạr dị nạ maạl obobọ maphin oye dị u/pomhoghiạn aZihova, nạ kaḍighi ika kụ apinien phọ anyinha amoọgh ekol?
7. Daphạn iilhogh phọ aZihova ilọ apinien
Kewạ ni olhọgh ikuph orue osighẹ asiigbu phọ aZihova oḍighinhom siphẹ apinien phọ. c Kuolọ aZihova rasẹph ghan ni bulọ oḍighi iduọn phọ. Ipegh VIDIO phọ.
Ibạl Hibru 13:4, kụ eeḅeghiọn sipuru phọ iphẹn:
-
Nạ ragbi mọ yira kotue ni odạph siigbu phọ aZihova ilọ apinien? Eeghe kụ iḍighi?
AZihova rawạ ni mọ aKristẹn ogeeghiạn mem dị bidị robalhạn r’amem dị bidị rokạ pinien phọ eḍighi maạr dị iilhogh eelhe phọ eḅẹm mọ oḍighi idiphọ. Ibạl Taitọs 3:1, kụ eeḅeghiọn ḍipuru phọ aḍiẹn:
-
Eḍighi maạr dị nạ maạl ilhom obobọ aphin anhịr, apinien phọ anạ adaphạn ni iilhogh eelhe phọ ḍughụm?
OYE ATUE NI APURU MỌ: “Emoghi ni okạr aalhạn? Olhephiri oọny r’anhịr ephoph ko/tue otọl idiphọ olom r’anhịr dị u/balhạn?”
-
Nạ kapagharanhaạn ika?
OGHAẠPH OOKARAGH
Adọl egelhenyạ r’apinien eḍighi inmo aZihova. Abulọ moḍigh pinien r’abulọ odi dọl egelhenyạ kotue ni omoọgh oḅaạl olhoghi eḍighi maạr dị orọl dọl dị eḅọph r’ogbi phọ aZihova.
Ooḅula
-
Ika kụ idị oye kamaạr aḍighinhom dọl egelhenyạ phọ odị?
-
Uḍighi ika kụ aBaibul phọ aḅẹm bọ mọ aạl obobọ ophin oye dị aḍighi aani onyọ aKristẹn?
-
Eeghe kụ iyaạr dị aBaibul phọ aḅẹm mọ kotue ni otuạn okạ pinien?
WAAGHỊ AMHIỊN
Remạ ghan eeghe aạl isiẹn k’Uw-emhoọgh phọ?
“Asipuru Dị Abuẹn Robạl Ghan Bọ Rinyạ Phọ Ayira Opuru” (The Watchtower, July 1, 2004)
Pogh iraạr oḍighi oḍeenhaan dị kelhoghonhaạn nyinhạ ḍighaạgh osopha ogey osopha ilọ apinien.
Miịn iyaạr dị eḍighi idị oniin onyọ umor alhoghoma mọ araraạr dị aZihova mangọ nyodị emạn maạr epu ipẹ odị awilhẹ yogh bọ.
Ighẹn kụ araraạr dị oye kapụr aatughiạn kụ agbi osopha mughumọ odị kakạ pinien phọ odị obobọ bidị kogbaranhaạn?
“Lọgh Eegu ‘Iyaạr Lọ Enhaạn Meḅophoghị’” (The Watchtower, December 2018)
a Miịn Igẹ Dị Opumhom 4 olhegheri araraạr dị egbolhomaam ogbaranhaạn mem dị olhe emhạ u/mite.
b Iniin arikpisi, aburudẹ r’aburunhiin kụ rosaḅạr ghan oye dị obumoọny abidị kapin obobọ abạl. Mem dị eḍighi iduọn phọ, odẹ r’onhiin dị omhoọgh ephomhoghiạn kopụr opogh mughumọ oye phọ apomhoghiạn ni aZihova, ko/pogh ikpoki obobọ esi dị oye phọ aphạm.
c Eḍighi maạr dị nạ amhoọgh oye dị r’anạ edianhaan ghan, nạ kụ kasopha mughumọ nạ kabilhẹ oye phọ obobọ abạl.
