Wɔ nnɩka be nɩ, mmenii bede bedi kɛɛ sɛ abiye yɩ anyɩ ɩkɔhʋla ikele a, gyɩsɛ ikyia. Naasʋ̃, kɛ agyiahʋnlɩmaa munwala yɛ bɛ anyɩ ide a, yɛɛ kɛ asigyiamaa munwala yɛ bɛ anyɩ iále a. Nɔhʋanlɛ odwokɔ yɛ lɛ kɛɛ, Bayɩbʋlʋ ɩkã kɛɛ sigyialilɛ nɩɩ agyiahʋnlɩ munwala ɩdɩ dɩyɛ baaba mɔɔ ɩzʋ̃ Gyehova ɛkɛ.

1. Mɩnla mfasʋ yɛ ɩwɔ sigyialilɛ zʋ a?

Bayɩbʋlʋ ɩkã kɛɛ: “Benyia mɔɔ igyia baalɛ mɔɔ izi yɩ asʋwa nɩ, ɩyɛ dɩyɛ baaba. Naasʋ̃ mɔɔ ilékyialɩ ebiye nɩ ɩyɛ dɩyɛ baaba ɩdɛla mɔɔ igyia ebiye nɩ.” (Kɩnga 1 Kɔlɛntɩmaa 7:32, 33, 38.) Mɩnla ɔhʋanɩ zʋ yɛ abiye mɔɔ idii sigyia nɩ “ɩyɛ dɩyɛ baaba” ɩdɛla mɔɔ igyia nɩ a? Kilisinyiamaa asigyiamaa béni ohunɛ anzɛnyɩɩ ɛyɩlɛ mɔɔ ɩsɛ kɛɛ bekila yɩ, eyi ti bɔwɔ fanwʋdi sʋ̃maa. Kɛ ndianwʋ nɩ, bo nu be kʋla tɛlɛ bɔ ɔzʋ̃mɩnlɛ nu wɔ ɔhʋanɩ mɔɔ ɩyɛ anyɩnlɩlelɛ zʋ, ebiye yɛ lɛ kɛɛ botudu ahʋanɩ bɔkɔ nnɩka mvʋlɔ bɔkɔ bɛkã odwokɔba yɩ. Mɔɔ ihyinyia baaba paa nɩ, ɩma benyia mmɩlɩ sʋ̃maa bɛfa bebike Gyehova.

2. Mɩnla mfasʋ yɛ ɩwɔ ɔzʋlɔ kɛɛ abiye ikegyia wɔ mmɛla ɔhʋanɩ zʋ a?

Dɩkɛɛ sigyialilɛ nɩ, agyiahʋnlɩ sʋ̃ wɔ yɩ mfasʋ dɩyɛ. Bayɩbʋlʋ ɩkã kɛɛ “mmenii anwɩ̃ ɩdɩ baaba tɛla ɔkʋ̃.” (Odwokɔhanlɛvʋlɔ 4:9) Odwokɔ eyi ɩdɩ nɔhʋanlɛ paa wɔ Kilisinyiamaa mɔɔ bɛfa Bayɩbʋlʋ egyinalɛzʋ-ndwokɔ bɛyɛ egyima wɔ bɛ agyiahʋnlɩ nu. Sɛ mmenii anwɩ̃ bekyia wɔ mmɛla ɔhʋanɩ zʋ a, bɔbɔ bɔ nwʋkãvʋlɔ anʋhʋba kɛɛ bɔkɔlɔ yɩ, bekeli yi nni na bɛahila yɩ. Eyi ti, ɩma bɛtɩ nɣanlɩ kɛɛ bɔwɔ banɩwɔlɛ bɛtɛla mmenii anwɩ̃ mɔɔ belékyialɩ naasʋ̃ bɛda kɛɛ agyiahʋnlɩmaa nɩ. Na agyiahʋnlɩ ɩma nnwuakula mɔɔ bɔkɔwʋ bɛ nɩ sʋ̃ nyia banɩwɔlɛ.

3. Kɛ Gyehova bu agyiahʋnlɩ ise a?

Mmɩlɩ mɔ Gyehova hyɩhyɛlɩ agyiahʋnlɩ mɔɔ ili bɔmʋnlɩ nɩ, ɩhanlɩ kɛɛ: “Benyia ikeyiaki yɩ papa nɩɩ yɩ maamɩ na ɩava yɩ nwʋ ɩahɔ ɩavʋãmɩ yɩ yɩ nwʋ na bɛayɛ nnwʋnlamɩ ɔkʋ̃.” (Gyɛnɛsɩsɩ 2:24) Gyehova ɩpɛ kɛɛ ohunɛ nɩɩ ɛyɩlɛ bɔdɔ bɔ nwʋ na bɔkɔ ɔzʋlɔ bɔbɔ nu bɔbʋwa mmɩlɩ tɩndɩnlɩ mɔɔ bɛda azɩ nɩ. Sɛ bo nu ɔkʋ̃ ɩbɔ adwomanlɩ a, yɛ Gyehova ɩma ɔhʋanɩ kɛɛ bɔkʋla beyiaki agyiahʋnlɩ a. Wɔ ɔzɔ bʋwabɩlɛ yi nu nɩ, Gyehova ɩma ohunɛ anzɛnyɩɩ ɛyɩlɛ mɔɔ yɩ nwʋ íni odwokɔ ɔhʋanɩ kɛɛ ikezi pɔkɔ kɛɛ ikeyiaki agyiahʋnlɩ anzɛnyɩɩ ɩlɛ́yɛ ɔzɔ. a (Matiyu 19:9) Gyehova ɩáma ɔhʋanɩ kɛɛ Kilisinyianii ikegyia mmaalɛ anzɛnyɩɩ mmenyia anwɩ̃ anzɛnyɩɩ mɔɔ ɩbʋ ɔzɔ.—1 Timoti 3:2.

 SUMÁ SƲ̃MAA

5. Pɩbɛ́ wʋ nwʋkãvʋlɔ wɔ nɣɛlɛbɛ nu

Abiye mɔɔ ekegyia yɩ nwʋ pɔkɔzilɛ nɩ, ɩkɩnla pɔkɔzilɛ mɔɔ nwʋmɔ ihyinyia baaba paa mɔɔ ekezi wɔ wʋ ɛbɩlawɔlɛ nu nɩ nwʋ. Kɩnga Matiyu 19:4-6, 9, na akʋ̃ bozunzú odwokɔɣizialɛ eyi nwʋ:

• Mɩnla ti mɔɔ íni kɛɛ Kilisinyianii ɩpɩlɩ yɩ nwʋ ɩkɔ ikyia a?

Bayɩbʋlʋ kɔhʋla kɔwʋwa wʋ ma ɔkɔnwʋ mɔɔ ɩsɛ kɛɛ ɛpɩbɛ wɔ abiye mɔɔ ekegyia yɩ nɩ nwʋ. Mɔɔ ɩtɛla ebiyela nɩ, pɩbɛ abiye mɔɔ ɩdɔ Gyehova. b Kɩnga 1 Kɔlɛntɩmaa 7:39 nɩɩ 2 Kɔlɛntɩmaa 6:14. Na akʋ̃ bozunzú ndwokɔɣizialɛ eyimmɔ nwʋ:

• Mɩnla ti mɔɔ yɛ ɔhɔnwʋ Kilisinyianii la yɛ ɩsɛ kɛɛ yekyia yɩ a?

• Sɛ yekyia abiye mɔɔ ɩálɔ Gyehova a, ekila a, kɛ Gyehova ɩkɛdɩ nɣanlɩ ikeze a?

 6. Bú agyiahʋnlɩ kɛmɔ Gyehova bu yi nɩ

Wɔ tɩɩtɩɩ Yizilaya nɩ, nɩ mmenyia be duwa angʋmidi ɔhʋanɩ zʋ yiaki bɛ yɩmmɔ agyiahʋnlɩ. Kɩnga Malaki 2:13, 14, 16, na akʋ̃ bozunzú odwokɔɣizialɛ eyi nwʋ:

• Mɩnla ti mɔɔ Gyehova ikyi agyiahʋnlɩyiakilɛ mɔɔ ígyĩ Bayɩbʋlʋ zʋ a?

Yɩ́ VIDIYO nɩ, na akʋ̃ bozunzú ndwokɔɣizialɛ eyimmɔ nwʋ.

• Sɛ egyia abiye mɔɔ ɩázʋ̃mɩ Gyehova a, mɩnla yɛ ɔkɔhʋla ɛkɛyɛ na ama wʋ agyiahʋnlɩ ɩayɛ anyɩnlɩlelɛ a?

7. Fá Gyehova yɩ mmɛla mɔɔ ɩfalɩ agyiahʋnlɩ nwʋ nɩ yɛ egyima

 YƖ DƆKƆWƆLƐ

Sigyialilɛ nɩɩ agyiahʋnlɩ ɩdɩ akyɛdɩ mɔɔ ɩzʋ̃ Gyehova yɩ ɛkɛnɩ. Agyiahʋnlɩmaa nɩɩ asigyiamaa munwala bɛ anyɩ kɔhʋla kele mmɩlɩ mɔ bɛlɛ Gyehova yɩ mmɛla bedii egyima nɩ.

Kɛ Okowuwa Ekeze a?

• Mɩnla ɔhʋanɩ zʋ yɛ abiye kɔhʋla kɛva yɩ sigyialilɛ keli egyima wɔ ɔhʋanɩ baaba zʋ a?

• Mɩnla ti mɔɔ Bayɩbʋlʋ ɩkã ikile yɛ kɛɛ yegyiá yɛ ɔhɔnwʋmmɔ Kilisinyiamaa nkʋ̃ la a?

• Mɩnla yɛ Bayɩbʋlʋ ɩkã kɛɛ abiye kɔhʋla kegyina ɔzʋlɔ keyiaki agyiahʋnlɩ a?