42 УРОК
Агару Бичикте биле тӧзӧбӧй јӱрери ле биле тӧзӧӧри керегинде не айдылат?
Кезик культураларда кижи биле тӧзӧбӧгӧн болзо, ырысту болор аргазы јок деп бодойдылар. Је ончо билелӱ улусты ырысту деп айдып болбозыҥ, анайда ок биле тӧзӧбӧгӧн дӧ улусты ырысту эмес деп, база айдып болбозыҥ. Агару Бичикте билелӱ де, биле јок то болгоны — Кудайдыҥ сыйы деп айдылат.
1. Биле тӧзӧбӧй јӱрериниҥ тузазы кандый?
Агару Бичикте айдылат: «Кижи алып турганы јакшы эдет, кижи албай турганы оноҥ артык эдет». (1 Коринфтегилерге 7:32, 33, 38 кычырыгар.) Биле тӧзӧбӧгӧн кижи незиле артык болот? Андый кижиде кичееп кӧрӧтӧн эш-нӧкӧри јок. Оныҥ учун биле тӧзӧбӧгӧн улуста јайым ӧй кӧп болот. Андый улустыҥ кезигине јилбилӱ јаҥы аргалар ачылат. Темдектезе, олор јарлаарга ӧскӧ ороонго кӧчӧр аргалу. Је эҥ учурлузы, олордо Иеговала колбуларын тыҥыдатан кӧп ӧй бар.
2. Билени јасак аайынча тӧзӧгӧниниҥ тузазы кандый?
Билелӱ улуста биле тӧзӧбӧй јӱрген улуста ла чылап бойыныҥ тузазы бар. Агару Бичикте айдылат: «Јаҥыскан болгончо, экӱ болгоны артык» (Экклезиаст 4:9). Бу анчада ла библиялык принциптерди биледе тузаланып турган эш-нӧкӧрлӧрдӧҥ кӧрӱнет. Јасак аайынча биле тӧзӧп јаткан улус бой бойын сӱӱр, тоор ло кичеер деп сӧзин берет. Андый билелер, јасак аайынча биле тӧзӧбӧй кожо јуртап турган улуска кӧрӧ, бойлорын коруда деп сезет. Јасак аайынча тӧзӧгӧн билелерде чыдаган балдар да коруда болот.
3. Иегованыҥ биле тӧзӧгӧн улуска кӧрӱми кандый?
Иегова баштапкы билени тӧзӧп, айткан: «Эр кижи ада-энезин артыргызып, бойыныҥ ӱйиле кожо јаантайын болор» (Башталганы 2:24, ЈТ). Кудай эр ле ӱй кижи бой-бойын сӱӱп, бастыра јӱрӱмине кожо болзын деп кӱӱнзейт. Эш-нӧкӧрлӧрдиҥ бир-бирӱзи ӧскӧ кижиле кожо конзо, Иегова јӱк ле ол тушта айрылыжарын јарадат. Бу учуралда, Иегова буру јок эш-нӧкӧрине айрылатан ба, айрылбайтан ба бойы кӧрзин деп арга берет (Матфей 19:9) a. Анайда ок Кудай христиандарга бир ле ӱйлӱ эмезе ӧбӧӧндӱ болзын деп јакарат (1 Тимофейге 3:2).
ТЕРЕҤЖИДЕ КӦРӰГЕР
Слер билелӱ де, биле јок то болзоор, ырысту болорго нени эдерин ле Иегованы канайып ачындырбай јӱрерин билип алыгар.
4. Биле тӧзӧбӧй јӱрерин баалагар
Иисус биле тӧзӧбӧй јӱргенин сый деп айткан (Матфей 19:11, 12). Матфей 4:23 кычырып, суракты шӱӱжип ийигер:
-
Иисуста биле тӧзӧбӧй јӱргенинеҥ улам Адазына иштеерге ле улуска болужарга кандый аргалар болгон?
Биле тӧзӧбӧй јӱрген христиандар Иисустаҥ тем алып јӱрзе, кӧп сӱӱнчи алар. ВИДЕОНЫ кӧрӱп, суракты шӱӱжип ийигер.
-
Биле тӧзӧбӧй јӱргени христиандарга кандый сӱреен јакшы аргалар ачат?
Слер билереер бе?
Агару Бичикте канча јаштуда биле тӧзӧӧргӧ јараар деп айдылбай јат. Је анда кижиниҥ јиит тужында болуп турган тыҥ сексуальный кӱӱни ӧткӧнчӧ, сакып алзын деп јӧп берилет. Нениҥ учун дезе андый кӱӱн ойгор јӧптӧр чыгарарга чаптыгын јетирердеҥ айабас (1 Коринфтегилерге 7:36).
5. Эш-нӧкӧрди ойгор талдагар
Эш-нӧкӧр талдаары — эҥ јаан учурлу алтамдардыҥ бирӱзи болот. Матфей 19:4—6, 9 кычырып, суракты шӱӱжип ийигер:
-
Биле тӧзӧӧргӧ нениҥ учун меҥдебес керек?
Агару Бичик эш-нӧкӧр талдаарында ајаруны неге эдер керек деп кӧргӱзет. Эҥ учурлузы слердиҥ талдап алган кижи Иегованы сӱӱп турзын b. 1 Коринфтегилерге 7:39 ла 2 Коринфтегилерге 6:14 кычырып, сурактарды шӱӱжип ийигер:
-
Эш-нӧкӧрди нениҥ учун јӱк ле Иегованыҥ ишчилериниҥ ортозынаҥ бедиреер керек?
-
Слердиҥ санаагарла болзо, слер Иегованы сӱӱбей турган кижиле биле тӧзӧзӧӧр, Кудайда кандый сезимдер болор?
Эки башка тындуны кожо јегип салза, олор экилези шыралаар. Анайып ла христиан кижи Иегованы сӱӱбей турган кижиле биле тӧзӧзӧ, кӧп кӱчтерге табартар
6. Биле тӧзӧӧрине Иегова чылап кӧрӱгер
Јебрен Израильде кезик эр улус бойыныҥ ӱйлериле кандый ла шылтактардаҥ улам айрылыжып туратан. Малахия 2:13, 14, 16 кычырып, суракты шӱӱжип ийигер:
-
Библиялык тӧзӧлгӧ јогынаҥ айрылышканын Иегова нениҥ учун кӧрӧр кӱӱни јок?
Ӧскӧ кижиле конгоны ла айрылышканы буру јок эш-нӧкӧрине ле балдарына јаан ачу јетирет
ВИДЕОНЫ кӧрӱп, суракты шӱӱжип ийигер.
-
Слердиҥ эш-нӧкӧрӧӧр кудай јаҥаарды јаратпай турган болзо, билегер ырысту болзын деп, слер нени эдер аргалу?
7. Иегованыҥ нормаларыла јӱрӱгер
Кемге де билеге берилген Иегованыҥ нормаларыла јӱрерге тыҥ албаданар керек болот c. Је Иегова анайып албаданганын јаантайын кайралдап јат. ВИДЕОНЫ кӧрӱгер.
Еврейлерге 13:4 кычырып, суракты шӱӱжип ийигер:
-
Слер сананзаар, биле јанынаҥ Иегованыҥ нормаларыла јӱрерге кӱч пе? Јартап беригер.
Христиандар биле тӧзӧгӧнин эмезе айрылышканын орооныныҥ јасагы аайынча бичидер деп Иегова кӱӱнзейт. Титке 3:1 кычырып, суракты шӱӱжип ийигер:
-
Слер биле тӧзӧгӧнӧӧрди ороонныҥ јасагы аайынча бичиткенеер бе?
КЕЗИК УЛУС СУРААР БОЛОР: «Оны не бичидер? Анайда ла јатпай».
-
Слер нени айдараар?
ТӦС ШӰӰЛТЕЗИ
Биле тӧзӧбӧй јӱрери де, биле тӧзӧӧри де — Иегованыҥ сыйы. Билелӱ де, биле јок то улус ырысту ла јилбилӱ јӱрӱм јӱрер аргалу. Анайып јӱрерге Иегованыҥ нормаларыла јӱрер керек.
Нени билип алдыгар?
-
Биле тӧзӧбӧй јӱрери кандый учуралда сый болор?
-
Агару Бичикте билени нениҥ учун јӱк ле Иегованыҥ ишчизиле тӧзӧӧр керек деп айдылат?
-
Агару Бичикте айрылыжары јанынаҥ сок јаҥыс кандый тӧзӧлгӧ бар?
ШИҤДЕЙТЕН МАТЕРИАЛ
Биле тӧзӧӧргӧ јаткан кижи јӱк ле «Кайракандыйы болор учурлу» дегени нени темдектейт?
«Кычыраачылардыҥ сурактары» («Каруулчы шибее», 2004 јыл, јаан изӱ ай 1)
Бу эки видео слерге туштажары јанынаҥ ла биле тӧзӧӧри јанынаҥ јакшы јӧп чыгарарга болужар.
Бу интервьюда ака оныҥ чыгымдарыныҥ ончозын Иегова артыгынча јаап салган деп куучындайт.
Айрылыжары эмезе башка јадары керегинде сананып тура, озо баштап нени ајаруга алар керек?
«„Кудайдыҥ бириктиргенин“ баалап јӱригер» («Каруулчы шибее», 2018 јыл, јаҥар ай)
a Эш-нӧкӧрлӧрдиҥ бир-бирӱзи ӧскӧ кижиле конбогон болзо, олор башка јадар аргалу ба деп билип аларга, 4 кожултаны кӧрӱгер.
b Кезик албатыларда бойыныҥ уулына эмезе кызына эш-нӧкӧрди ада-энези талдап јат. Мындый учуралда ада-энезине озо ло баштап ајаруны кижиниҥ арга-чактузына ла јамылу болгонына эмес, је ол кижи Иегованы сӱӱп турган ба деп кӧрӧр керек.
c Слер јасак аайынча биле тӧзӧбӧй кожо јадып турган болзоор, нени эдереер? Ол кижинеҥ јӱре беререер бе эмезе јасак аайынча бичидип алараар ба деп, бойоор шӱӱп сананыгар.
Анайда ок слерге јараар болор
ЈААНТАЙЫН БЕРИЛИП ТУРГАН СУРАКТАР
Иегованыҥ Керечилериниҥ Агару Бичикти ӱренетен курсы канайып ӧдӧт?
Иегованыҥ Керечилеринде Агару Бичик неге ӱредип турганын билип аларга болужатан тузалу курс бар. Ӱредӱниҥ ӧйинде слер бойоордыҥ Агару Бичигерле тузаланар аргалу, анайда ок ӱредӱлерге бойоордыҥ билегерди ле најылараарды айдып алар аргалу.
