JIʼTE 42
Bible gôm ge ke ne lômdye ba ne ne tchwe te lômdye ?
Tchum she mkô, pômneng kwè ge mo ka fing ne ŋwègne be ye é ka lômdye a. Daʼge, te goung pô pye a be wap lômdye a ne ŋwègne pe, te ba goung pô pye a be wap ka lômdye a ne tchyete ŋwègne pe. Nyenyô be ge, Bible gôm ge ne lômdye ba ne tchwe te lômdye be mboutchi fe m bi Jéova.
1. Ma mtsupé be si ne tchwe te lômdye ?
Bible gôm ge : “mo ye é dômdye a gre a poung, daʼge mo ye é te dômdye a pe gô ghe a tchente boung.” (Ké 1 Korinto 7:32, 33, 38, nwt.) Taʼ mo ye é ka lômdye a fing ne “ghe a tchente boung” m tchi ge ge ? Mkritè pye wap ka lômdye a, be wap ka ghe faʼ ne pe dé dze yap ke djwi yap le. Poʼo ne boʼgwye mtchum, a be wap ghe medou lepue. She khouʼgne ne ping kwiʼ tsap faʼ bi Jéova. Taʼ foʼte, wap fing ne ghe potse pepoung paʼ ne ghe taʼ waka gô ne mouʼ tsuʼ ne sing tchoung pepoung a. Ye ywe gwye neng be ge, wap ping gre medou tam ne ne fouʼte ne yap ha beng Jéova.
2. Ma mtsupé be si ne lômdye tchi paʼ gôpnaʼ tcheng a ?
Paʼ ne tchwe te lômdye a, lômdye, be a ghe mtsupé. Bible gôm ge “dze be pô pue ne taʼ mo.” (Ékléziaste 4:9) Ya bô tchente be nyenyô bi mkritè pye wap ging ne mkhète Bible tchum lômdye yap a. Taʼ mdjwi pou taʼ mbè pye wap lômdye tchi paʼ gôpnaʼ tcheng a, khaʼgne ge wap gô pe goung tam awè pe koungne, pe ha mkouʼ, neng pe ning deng ne yemouʼ mo. Ya bô gre ge, ne boʼgwye mtchum wap tchwe te pwôk, te tchye taʼ mdjwi pou taʼ mbè pye wap bemte tchwe pe te lômdye a. Lômdye gô neng ghe ge ba po pap tchwe te pwôk.
3. Jéova djô lômdye m tchi ge ke ?
Tchwe ye Jéova le tu dendze lômdye a, é le ghôm ge : “mbè gô sôʼ tem ne tap é ba ne map é ping kwe m ne djwi é.” (Ne toʼ 2:24) Jéova tcheng ge taʼ dze pou djwi é pe khoungne, neng bemte tchwe ne goung tam ye wap be a tse vôk a. É bing ge pou tem lômdye daʼ tchwe ye dze ke mdjwi le ghe ghap a. Tchwe ye a be poʼo a, Jéova ha sô bi dze ke mdjwi le ye é ka hô a, ne le khète be ye é gô tem lômdye ke gè a le. * (Matio 19:9) Jéova te bing ge taʼ kritè ghe mdjwi ke dze le, te a twôk yemouʼ pe.—1 Timotio 3:2.
PING TCHENG NE GÔ DZE
Ke o lômdye, ke o ka lômdye le, lagne tchi paʼ o fing ne ŋwègne neng gre ba ge Jéova ŋwègne a.
4. Tchente gwim poutchi ye a be ne tchwe te lômdye a
Yéso le djô ne tchwe te lômdye paʼ taʼ poutchi a. (Matio 19:11, 12) Ké Matio 4:23, neng gômte ne hente yenge :
-
Ne paʼ Yéso le be é ka lômdye a, é le wim poutchi é bô ne ne faʼ bi tap é ba ne ne kwite pyeshe pô m tchi ge ke ?
Mkritè pye wap ka lômdye a fing ne ghe ŋwègne, tchye m ne ne wim poutchi yap paʼ Yéso le ghe a. Yô VIDÉO, neng gômte ne hente yenge.
-
Mkritè pye wap ka lômdye a fing ne ghe ma mfaʼ pepoung mye a gô ha mtsupé bi pou a ?
A ke be o ji jye le ?
Bible te ha taʼ gouʼdzu ye a tcheng ge mo kem ne te dômdye a pe. Daʼge, a ha kaktuô bi taʼ mo ne pyap te khem tchwe ye é “tchye tam ye é tchente be tchum mye mgouʼdzu mousem a”, taʼ tam ye ji ne noung pou a mo be a ghaʼ bou téʼ, be a neng fing ne ghe ge a tuô bi taʼ mo ne le jyenwe de mkhète a.—1 Korinto 7:36, nwt.
5. Le jyenwe ne tchi djwi o ke dze o le
Ne tchi djwi o ke dze o le, be taʼ ne mkhète tuôdeng ye o gô laʼ le tchum vôk tsu a. Ké Matio 19:4-6, 9, neng dou gômte ne hente yenge :
-
Nweke a tcheng ge taʼ kritè le tam ne tchente sè nwe te dômdye bi taʼ mo ?
Bible fing ne kwite o ne jye m ma mye a tcheng bi mo, te é pe taʼ dze ke taʼ mdjwi pepoung a le. Ye ywe mtuôdeng téʼ pe ne tcheng taʼ mo ye é khoung Jéova a. * Ké 1 Korinto 7:39 ba 2 Korinto 6:14. Lou gômte ne mhente menge :
-
Nweke a tcheng ge pe lômdye daʼ pou a taʼ mo ye é gamte Jéova a ?
-
O kwè ge Jéova gô youʼ ne é m tchi ge ke, be ye pe le khète ne lômdye bi taʼ mo ye é te khoung é a pe ?
Pou pemte tcheng mnôm mebue pye wap ka hwegne be a mouywe é a, be wap gô yô goʼ. Dendeng poʼo, taʼ kritè ye é lômdye bi taʼ mo ye é te khoung Jéova a pe gô ghe medou mnwe
6. Yô lômdye paʼ Jéova djô a
Ne tam pô a Israèl tchwedze, she pebè le be jeng pedjwi pap dou ne bakele. Ké Malaki 2:13, 14, 16, neng gômte ne hente yenge :
-
Nweke Jéova bô tchwe ye pô gre ge lômdye yap mii, dou ne she potse tsye a te nwe ghap a pe ?
Ghap, ba ne tem lômdye gre ge yemouʼ mo ye é ka hô a, ba pekhu tchente djô goʼ
Yô VIDÉO, neng gômte ne hente yenge.
-
A pe be o lômdye bi taʼ mo ye é te khoung Jéova a pe, be o fing ne ghe la te ŋwègne pe tchum lômdye o ?
7. Ying ne mkhète Jéova ne lômdye
A fing ne tcheng ge taʼ mo kaktuô téʼ te ne ging ne mkhète Jéova ne lômdye. * Daʼge Jéova ning byagne ne pô pye wap gre ya a. Yô VIDÉO.
Ké Ébraika 13:4, neng gômte ne mhente menge :
-
O kwè ge pe fing ne khouʼgne ne ying ne mkhète Jéova ne lômdye a ? Nweke ?
Tchum medou mgoung, gôpnaʼ hente ge pô shan ŋwaʼgne tchwe ye wap bo dômdye a, ba tchwe ye wap bo them lômdye a. Poʼo, Jéova byap ge mkritè shan ŋwaʼgne tchwe ye wap bo dômdye a, ba tchwe ye wap bo them lômdye a. Ké Tito 3:1, neng gômte ne hente yenge :
-
A pe be o lômdye, te o tchente dé be ye o ghe ŋwaʼgne lômdye kwaʼ paʼ gôpnaʼ tcheng a le ?
MO FING NE HENTE GE : “Nweke a tcheng ge pou shan ŋwaʼgne lômdye ? Taʼ mbè pou taʼ mdjwi ka fing ne pemte tchwe daʼ poʼ a ?”
-
O gô paʼ ge ke ?
YE NE KHAMTE
Ne lômdye ba ne tchwe te lômdye be mboutchi fe m bi Jéova. Pô pye wap lômdye a, ba pô pye wap ka lômdye a fing ne ghe ŋwègne neng gre taʼ tchi ne tchwe pepoung, tchwe ye wap ging ne mkhète Jéova a.
O lagne ke ?
-
Taʼ mo ye é ka lômdye a fing ne tchente gwim ye poutchi bô m tchi ge ?
-
Nweke Bible gôm ge pou gô lômdye daʼ bi taʼ mo ye é gamte Jéova a ?
-
Bible gôm ge daʼ ywe ye a fing ne ghe ge pô pye wap lômdye a, tem lômdye a be ke ?
YÔ SHE POTSE NE
Ne lômdye “daʼ bi mo Kristo” thoute ge ke ?
“Questions des lecteurs” (La Tour de Garde, 1er juillet 2004)
Yô mvidéo metha be a ka sak, mye a fing ne kwite o ne le mkhète pepoung, ne ne keka mo ne lômdye, ba mkhète pepoung ne lômdye a.
Lagne nweke taʼ fe djô ge ywe ye Jéova ha bii a, be a ghe deng te tchye bakele ye é thak neng a.
Taʼ mo gô lendze sè nwe ne ma potse, te le khète be ye é gô hapgne pou a djwi é ke dze é le, ke be ye é gô tem lômdye a le ?
“Honore ‘ce que Dieu a uniʼ” (La Tour de Garde, décembre 2018)
^ Lé Ywe ne toute nouba 4 ye a gôm nwe ne ne ghapgne tchwe ye sômmo ka ghe ghap a.
^ Tchum she mkô, mta po né tchi taʼ dze ke taʼ mdjwi le bi mou yap. Tchwe ye a be poʼo a, mta po pye wap khoung po pap a, te gô lendze lé khap ke ba tchi faʼ ye mo ye é bo tcheng ne lômdye pou mou yap a be é ghe a pe, daʼge, wap gô lé be ye é khoung Jéova a.
^ O pe tchwe pou a taʼ mo ye wô po é ka lômdye a, be ne hapgne pou a yu ke dômdye bii le, be taʼ khète ye daʼ wou né gô le a.
