ISAMBILILO 42
Finshi Baibolo Yalanda pa Bushimbe na pa Cupo?
Mu fyalo fimo, abantu bamona kwati umuntu te kuti abe ne nsansa nga topile nelyo ukuupwa. Na lyo line, te bonse abaupa nelyo ukuupwa ababa ne nsansa, kabili te bonse abashimbe abashaba ne nsansa. Baibolo itila fyonse fibili, ubushimbe ne cupo, bupe.
1. Busuma nshi ubwaba mu kuba umushimbe?
Baibolo ilanda ukuti: “Uwaupa ninshi awamya, lelo uushupile ena awamya ukucilapo.” (Belengeni 1 Abena Korinti 7:32, 33, 38.) Ni mwi mwalola amashiwi ya kuti uushupile ne lyo ukuupwa ninshi “awamya ukucilapo”? Abena Kristu abashimbe tabakwata abena mwabo aba kusakamana. Kanshi balikwata ubuntungwa bwa kucita ifintu ifingi. Ku ca kumwenako, bamo balabombesha mu mulimo wa kubila imbila nsuma mu nshila ishaibela, pamo ngo kuya ku calo cimbi mu kubila imbila nsuma. Ne cacindamisha ca kutila abashimbe balakwata inshita iikalamba iya kukosha bucibusa bwabo na Yehova.
2. Busuma nshi ubwaba mu kuupana ukulingana ne funde?
Nga filya fine ubushimbe bwaba, icupo na co cisuma. Baibolo itila “ukuba babili kwawama ukucila ukuba weka.” (Lukala Milandu 4:9) Abena Kristu abaupana abakonka amashinte ya mu Baibolo balaba ne nsansa mu cupo cabo. Abopana ukulingana ne funde balayana ukuti bakalatemwana no kucindikana. Kanshi balomfwa ukuti balicingililwa, ukucila abekala fye pamo ukwabula ukuupana ukulingana ne funde. Nangu fye bana abo bakwata, balomfwa ukuti balicingililwa.
3. Bushe Yehova amona shani icupo?
IIyo Yehova aufishe umwaume no mwanakashi aba kubalilapo, atile: ‘Umwaume akasha wishi na nyina no kulambatila ku mukashi wakwe.’ (Ukutendeka 2:24) Yehova afwaya abalume na bakashi ukutemwana no kutwalilila ukuba pamo mpaka ne mfwa. Asuminisha fye abaupana ukulekana nga ca kuti umo acita ubucende. Nga ca kuti umo acita ubucende, Yehova alipeela uwa kaele insambu sha kusalapo nampo nga kuleka umwina mwakwe nelyo iyo. a (Mateo 19:9) Yehova tasuminisha Abena Kristu ukuupa impali nelyo ukuupwa ku mpali.—1 Timote 3:2.
SAMBILILENI NA FIMBI
Sambilileni ifyo mwingacita pa kuti muleba ne nsansa, ne fyo mwingalenga Yehova ukusekelela, nampo nga muli bashimbe nelyo mwalyupa nelyo ukuupwa.
4. Mulebomfya bwino ica bupe ca bushimbe
Yesu alandile ukuti ubushimbe bupe. (Mateo 19:11, 12) Belengeni Mateo 4:23, lyena lanshanyeni ici cipusho:
-
Bushe Yesu abomfeshe shani ica bupe ca bushimbe ku kubombela Wishi na bantu?
Abena Kristu abashimbe nabo kuti baba ne nsansa nga balebomfya bwino ica bupe ca bushimbe nga filya Yesu acitile. Tambeni VIDIO, lyena lanshanyeni icipusho cakonkapo.
-
Finshi fimo ifyo Abena Kristu abashimbe bengacita ifingalenga baba ne nsansa?
Bushe mwalishiba ici cishinka?
Baibolo tayalanda mu kulungatika imyaka umuntu afwile ukukwata pa kuti ope nelyo ukuupwa. Na lyo line, ilanda ukuti umuntu afwile ukulolela mpaka acila “pa mushinku wa bwaice,” lilya aba sana ne nsuna kabili ilyo ashingapingula bwino pa fintu.—1 Abena Korinti 7:36.
5. Mulesala bwino uwa kuupana nankwe
Ukusala uwa kuupana nankwe kwaba pa fintu ifyacindama ifyo mulingile ukubikako sana amano. Belengeni Mateo 19:4-6, 9, lyena lanshanyeni ici cipusho:
-
Mulandu nshi Umwina Kristu afwile ukubela uwatekanya ilyo alesala uwa kuupana nankwe?
Baibolo kuti yamwafwa ukwishiba ifyo umuntu mulefwaya ukuupa nelyo ukuupwako alingile ukuba. Icacindamisha kusala uwa kuupana nankwe uwatemwa Yehova. b Belengeni 1 Abena Korinti 7:39 na 2 Abena Korinti 6:14, lyena lanshanyeni aya mepusho:
-
Cinshi tufwile ukuupanina fye na Bena Kristu banensu?
-
Bushe muletontonkanya ukutila Yehova kuti aumfwa shani nga mwaupana no muntu uushatemwa Yehova?
Nga ca kuti inama ishapusana ubukulu na maka bashibika kwi koli limo line kuti shacula. Ifi fine e fyo cingaba nga ca kuti Umwina Kristu aupa nelyo ukuupwa ku uushili Mwina Kristu munankwe. Kuti baleba na mafya ayengi mu cupo cabo
6. Mulemona icupo nge fyo Yehova acimona
Abaume bamo abena Israele baleleka abena mwabo pa mulandu wa bukaitemwe. Belengeni Malaki 2:13, 14, 16, lyena lanshanyeni ici cipusho:
-
Mulandu nshi Yehova apatila ukulekanina pa milandu iyo Baibolo ishisuminisha?
Abaupana nga balekana nelyo umo acita ubucende, umwina mwakwe uwa kaele na bana balaba no bulanda sana
Tambeni VIDIO, lyena lanshanyeni icipusho cakonkapo.
-
Nga ca kuti abena mwenu tababombela Yehova, finshi mwingacita pa kuti muleba ne nsansa mu cupo cenu?
7. Mulekonka amafunde ya kwa Yehova ayalanda pa cupo
Kwena umuntu afwile ukuibikilishako pa kuti alekonka amafunde ya kwa Yehova ayalanda pa cupo. c Na kuba Yehova alapaala bonse abakonka aya mafunde. Tambeni VIDIO.
Belengeni AbaHebere 13:4, lyena lanshanyeni aya mepusho:
-
Bushe mulemona ukutila kuti twakumanisha ukukonka amafunde ya kwa Yehova ayalanda pa cupo? Cinshi mwa-asukila ifyo?
Yehova enekela Abena Kristu ukulembesha icupo cabo nelyo ukulembesha ku buteko nga balelekana, pantu ifi e fyo amafunde ya mu fyalo ifingi yalanda. Belengeni Tito 3:1, lyena lanshanyeni ici cipusho:
-
Nga ca kuti mwalyupa nelyo ukuupwa, bushe mwaupana ukulingana ne funde lya buteko?
ABANTU BAMO BATILA: “Caliba fye bwino ukwikala no muntu nangu ca kuti tawaupana nankwe ukulingana ne funde.”
-
Finshi mwingeba abantu abalanda ifi?
IFYO MUSAMBILILE
Ubushimbe ne cupo fyonse fibili bupe ubo Yehova atupeela. Abashimbe na baupana kuti baba ne nsansa nga ca kuti balekonka amafunde ya kwa Yehova.
Ukupitulukamo
-
Bushe umuntu kuti abomfya shani bwino ica bupe ca bushimbe?
-
Cinshi Baibolo ilandila ukuti tufwile ukuupana fye no Mwina Kristu munensu?
-
Mulandu nshi umo fye uo Baibolo yalandapo ukuti e o abaupana bengapwishishapo icupo?
ISHIBILENIPO NA FIMBI
Bushe calola mwi ukuupila nelyo ukuupilwa “muli Shikulu epela”?
“Amepusho Ukufuma ku Babelenga” (Ulupungu lwa kwa Kalinda, July 1, 2004)
Tambeni amavidio yabili ayepi ayalalenga mwishibe nga ca kuti namufikapo ukutendeka ukwishishanya, e lyo ne fyo mwingacita pa kuti musale bwino uwa kuupana nankwe.
Moneni icalengele munyinefwe umo omfwe ukuti ifyo Yehova amupeela fyalicila pa fyo ashiile.
Nale-enekela Ukuti Umukashana Naleishishanya Nankwe Akatendeka Ukusambilila Baibolo (1:56)
Fintu nshi fimo ifyo umuntu afwile ukutontonkanyapo sana ilyo ashilasalapo ukulekana nelyo ukupaatukana no mwina mwakwe?
“Mulecindika ‘ico Lesa Alundenye’” (Ulupungu lwa kwa Kalinda, December, 2018)
a Moneni Ifyebo na Fimbi pa 4 pa kuti mwishibe ifingalenga Abena Kristu basalapo ukupaatukana.
b Mu ncende shimo abafyashi e basalilako umwana wabo uwa kuupana nankwe. Abafyashi nga e balesalilako umwana uwa kuupana nankwe, tabafwile ukubika fye amano ku ndalama umuntu balefwaya ukuti akopane no mwana wabo akwata nelyo ifyo alumbuka, lelo bafwile ukubika amano ku fyo atemwa Yehova.
c Nga ca kuti mwikala no muntu ukwabula ukuupana ukulingana ne funde, mufwile ukusalapo mwe bene, nampo nga kuupana no yo muntu nelyo iyo.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
