IRUẸMWI 42
De Emwi Ne Baibol Khare Vbekpa Okhiọnkpa Kevbe Orọnmwẹ?
Vbe ihe eso, emwa yayi wẹẹ ọmwa nọ ma ru orọnmwẹ i sẹtin gha ghọghọ. Sokpan ẹi re emwa hia ni ru orọnmwẹ nẹ, ẹre ọ ghọghọ. Ọ wa vbe mwẹ emwa eso ni re okhiọnkpa ni ghọghọ. Vbene ẹmwata, e Baibol wẹẹ, deghẹ okhiọnkpa ẹre u khin, ra u ru orọnmwẹ nẹ, ẹse ọhẹ ẹre ehia khin.
1. De afiangbe na miẹn vbọ vbe a ghaa re okhiọnkpa?
E Baibol wẹẹ: ‘Ọmwa nọ rhie okhuo yin ẹse, sokpan nọ ma rhie okhuo, ẹre ọ yevbe yin ẹse sẹ.’ (Tie 1 Kọrinti 7:32, 33, 38.) De odẹ eso ne okhiọnkpa ya “yin ẹse sẹ” ọmwa nọ ru orọnmwẹ nẹ? Avbe okhiọnkpa i mwẹ ọdọ ra amwẹ ne iran gbaroghe. Te ẹkpotọ wa kie ne iran ya ru emwi nibun. Vbe igiemwi, eso rhie egbe ye ugamwẹ e Jehova sayọ. Eso yo otọ ẹvbo ọvbehe ya gha kporhu. Sẹ ehia, ẹkpotọ kie ne iran ya sikẹ e Jehova sayọ.
2. De afiangbe na miẹn vbọ vbe a gha ru orọnmwẹ vbe odẹ nọ khẹke?
Ere rrọọ vbe a ghaa re okhiọnkpa, ere wa vbe rrọọ vbe a gha ru orọnmwẹ. E Baibol wẹẹ “eva ẹre ọ maan sẹ ọkpa.” (Asan-Ibo 4:9) Ivbiotu e Kristi ni ya ilele Baibol ru emwi, ẹre ọ mobọ sọyẹnmwẹ orọnmwẹ ọghe iran. Ọdọ vbe amwẹ ni ru orọnmwẹ vbe odẹ nọ gua uhi arriọba ro keghi yan ma egbe wẹẹ, te iran khian hoẹmwẹ egbe, iran ghi vbe gha rhie ọghọ ne egbe ya sẹ ota. Iran ẹre ẹkun sẹ ọre otọ sẹ emwa ni wa rrọọ kugbe kẹkan zẹvbe ọdọ vbe amwẹ. A gha ru orọnmwẹ vbe odẹ nọ khẹke, egbe ghi rọkhọ emọ.
3. De aro ne Jehova ya ghee orọnmwẹ?
Vbe Jehova mu orọnmwẹ nokaro gbọọ, ọ na wẹẹ: “Okpia [ghi] sẹ erhae kevbe iyẹe rae, ọ ghi rhikhan mu amwẹ ọnrẹn.” (Gẹnẹsis 2:24) E Jehova hoo ne ọdọ vbe amwẹ hoẹmwẹ egbe, ne iran vbe rhikhan mu egbe ya sẹ ota. Emwi ọkpa nọ gha ya iran sọ ebe orọnmwẹ, ọre deghẹ ọkpa vbe iran na fi owẹ ye oha. Ọna gha sunu, nọ ma fi owẹ ye oha vbọ, sẹtin sọ ebe orọnmwẹ, ọ sẹtin vbe yabọ ogieva re. a (Matiu 19:9) Okhuo ọkpa ẹre Jehova wẹẹ ne okpia gha rhie, okhuo ghi vbe rọnmwẹ ọdọ ọkpa.—1 Timoti 3:2.
GUALỌ OTỌ RE SAYỌ
Gia ziro yan vbene u khian ya sẹtin gha sọyẹnmwẹ hẹ kevbe vbene u khian ya gha ya ẹko rhiẹnrhiẹn e Jehova hẹ, deghẹ okhiọnkpa ẹre u khin, ra u ru orọnmwẹ nẹ.
4. Loo ẹghẹ okhiọnkpa ruẹ ẹse
Vbe aro e Jesu, afiangbe nọkhua wa nọ, vbe ọmwa ghaa re okhiọnkpa. (Matiu 19:11, 12) Tie Matiu 4:23, iyeke ọni, uwa ghi ziro yan avbe inọta na:
-
De vbene Jesu ya loo ẹghẹ okhiọnkpa ọghẹe, ya ga e Jehova hẹ? De vbene ọ ya loo ẹre ya ru iyobọ ne emwa ọvbehe hẹ?
Vbe na ghee Jesu, Ivbiotu e Kristi gha vbe sẹtin sọyẹnmwẹ ẹghẹ okhiọnkpa ọghe iran. Kpee VIDIO na, iyeke ọni, uwa ghi ziro yan inọta nọ lelẹe.
-
De odẹ nọ khẹke ne Ivbiotu e Kristi ya gha loo ẹghẹ okhiọnkpa ọghe iran?
U ka rẹn ra?
E Baibol ma wa ya unu kaẹn rẹn taara, ukpo nọ khẹke ne ọmwa gha ye, ọ ke ru orọnmwẹ. Vbọrhirhighayehẹ, ọ rhie igiọdu ne ima, na “gi ẹre gberra nẹ, ẹghẹ ne egbe ya fifi ọmwa na ru emwi ọdọ vbe amwẹ,” rhunmwuda, ọ lọghọ na sẹtin ru azẹ nọ maan vbe ẹghẹ vbenian.—1 Kọrinti 7:36, NW.
5. Ya ẹwaẹn zẹ ọmwa ne u gha rọnmwẹ
Na do zẹ ọmwa na gha rọnmwẹ keghi re ọkpa vbe usun azẹ nọ ghi ru ekpataki sẹ, ne ọmwa gha ru. Tie Matiu 19:4-6, 9, iyeke ọni, uwa ghi ziro yan inọta na:
-
Vbọzẹ nọ ma na khẹke ne Ovbiotu e Kristi khirhi la orọnmwẹ?
E Baibol gha ru iyobọ nuẹn ya rẹn emwi nọ khẹke ne u rhie aro tua vbe u ghaa gualọ ọmwa ne u gha rọnmwẹ. Sẹ ehia, zẹ ọmwa nọ hoẹmwẹ e Jehova. b Tie 1 Kọrinti 7:39 kevbe 2 Kọrinti 6:14. Iyeke ọni, uwa ghi ziro yan avbe inọta na:
-
Vbọzẹ nọ na khẹke ne ima rọnmwẹ ọmwa ne ima gba ga e Jehova?
-
Vbọ khian gha ye hẹ vbe ekhọe Jehova, deghẹ ima na ya rọnmwẹ ọmwa nọ ma hoẹmwẹ e Jehova?
A gha rrọ aranmwẹ eva ni lughaẹn ne egbe kugbe, te agbọn wa lọghọ iran. Erriọ ẹre agbọn vbe ya lọghọ Ovbiotu e Kristi nọ ya rọnmwẹ ọmwa nẹi ga e Jehova
6. Gha ya aro ne Jehova ya ghee orọnmwẹ ghee ẹre
Vbe otọ Izrẹl nẹdẹ, ikpia eso kegha khulo ọvbokhan iran ba ẹmwẹ emwi nọ ma sẹ emwi. Tie Malakai 2:13, 14, 16, iyeke ọni, uwa ghi ziro yan inọta na:
-
Vbọzẹ nọ na sọnnọ e Jehova vbe emwa ghaa sọ ebe orọnmwẹ vbe odẹ nọ ma gua ilele ọghe Baibol ro?
Okpia ra okhuo gha fi owẹ ye oha, ra iran na sọ ebe orọnmwẹ, ogieva iran nọ ma rẹn ọkpa rẹn eva vbọ, kevbe ivbi iran, keghi rri oya
Kpee VIDIO na, iyeke ọni, uwa ghi ziro yan inọta nọ lelẹe.
-
Deghẹ u rọnmwẹ ọmwa nẹi ga e Jehova, de emwi ne u gha ru, ne u mieke na ye gha sọyẹnmwẹ orọnmwẹ nii?
7. Gha lele ilele ọghe Jehova nọ dekaẹn orọnmwẹ
Ne ọmwa mieke na sẹtin gha lele ilele ọghe Jehova nọ dekaẹn orọnmwẹ, ẹi re ẹrhiọn nekherhe ẹre a loo. c Sokpan e Jehova keghi fiangbe emwa ni ru vberriọ. Kpee VIDIO na.
Tie Hibru 13:4, iyeke ọni, uwa ghi ziro yan avbe inọta na:
-
Uwẹ yayi wẹẹ, ima gha gele sẹtin lele ilele ọghe Jehova nọ dekaẹn orọnmwẹ ra? Vbua gu kha vberriọ?
E Jehova hoo ne Ivbiotu e Kristi gha lele uhi arriọba vbe iran gha khian ru orọnmwẹ, ra vbe iran gha khian sọ ebe orọnmwẹ; vbe otọ ẹvbo nibun, arriọba ẹre ọ dia emwamwa na. Tie Taitọs 3:1, iyeke ọni, uwa ghi ziro yan inọta na:
-
Deghẹ u ru orọnmwẹ nẹ, uwẹ yayi wẹẹ orọnmwẹ ruẹ gua ilele ọghe arriọba ro ra?
ỌMWA SẸTIN NỌ WẸẸ: “Esa rrọọ na ru orọnmwẹ ra? Emwi dan nọ deghẹ okpia vbe okhuo na gba gha rrọọ, ọ gha khọnrẹn wẹẹ iran ma ru orọnmwẹ ra?”
-
De ewanniẹn ne u gha rhie ne ọmwa vberriọ?
OLIKA ẸMWẸ
Deghẹ okhiọnkpa ẹre u khin o, ra u ru orọnmwẹ nẹ, ẹse ọhẹ nọ ke obọ e Jehova rre, ẹre ehia khin. Ai miẹn nẹi ya ọmwa mwẹ oghọghọ kevbe agbẹkunsotọ, sokpan na gha lele ilele ọghe Jehova.
Ogbewerriẹ
-
De vbene ọmwa gha ya sẹtin loo ẹghẹ okhiọnkpa ọghẹe ẹse hẹ?
-
Vbọzẹ ne Baibol na wẹẹ ne ima rọnmwẹ ọmwa ne ima gba ga e Jehova?
-
De emwi ọkpa ne Baibol wẹẹ ọ gha sẹtin ya ọdọ vbe amwẹ sọ ebe orọnmwẹ?
RUẸ SAYỌ
Vbe a yae kha, na ru orọnmwẹ “vbe uwu e Nọyaẹnmwa”?
Ghee vidio eva ni gha ru iyobọ nuẹn ya ru azẹ nọ maan, nọ dekaẹn ne a na si egbe obọ kevbe orọnmwẹ.
Ghee emwi nọ ya ọtẹn nokpia ọkpa kha wẹẹ, afiangbe ne irẹn miẹn vbe obọ e Jehova, sẹ emwi hia ne irẹn sẹrae.
I Na Ye Gha Roro Ẹre Wẹẹ Egbọre Ọ Gha Rre Do Ga E Jehova (1:56)
De emwi eso nọ khẹke ne ọmwa mu roro, ọ ke sọ ebe orọnmwẹ, ra irẹn vbe ọmwa ne iran gba ru orọnmwẹ ke sẹ egbe rae?
“Gha Ya Aro Nọ Ghaan Ghee Emwamwa Ọghe Orọnmwẹ Ne Osanobua Mu Gbọọ” (Owa Ọkhẹ, December 2018)
b Vbe ihe eso, evbibiẹ emọ, ẹre ọ zẹ ọmwa ne ovbi iran gha rọnmwẹ. Ọ ghaa yerriọ, emwi ne evbibiẹ emọ ni hoẹmwẹ ivbi iran gha rhie aro tua, ọre deghẹ ọmwa nii hoẹmwẹ e Jehova, ẹi re deghẹ ọ mwẹ igho, ra deghẹ ọmwa na họn usi ẹre rre nọ vbe ẹvbo.
c Deghẹ uwẹ vbe ọmwa ne uwa ma gba ru orọnmwẹ ẹre ọ gba rrọọ, uwẹ ẹre ọ khian tobọ ruẹ zẹ ne egbuẹ, deghẹ u gha sẹrae, ra deghẹ u gha rọnmwẹ ọnrẹn.
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
