PARLAJARAN 42
Na Ihatahon Bibel pasal Halak na Marhajabuan pakon na Lape?
Bahat do halak na mangkatahon maningon marhajabuan do sidea ase boi marmalas ni uhur. Hape bahat do halak na marhajabuan na lang marmalas ni uhur. Sasintongni Bibel mangkatahon dear do haduasi age na marhajabuan atap na lang. Ganup do sidea boi marmalas ni uhur.
1. Aha do gunani anggo lape marhajabuan?
Bibel mangkatahon, “Dear do anggo sasahalak marhajabuan, tapi dearan do anggo sasahalak lang marhajabuan.” (Basa 1 Korint 7:32, 33, 38.) Aha do maksudni “dearan” do halak na lape marhajabuan? Halani lang dong pasangan na maningon iurus sidea, gabe lambin bahat ma panorang ni sidea mangidangi Naibata. Umpamani, boi do pindah sidea hu ianan na mamorluhon bahat parbarita. Anjaha boi do homa igunahon sidea panorangni ase lambin dohor bani Jahowa.
2. Aha do gunani anggo domma sah marhajabuan?
Na marhajabuan pe boi do marmalas ni uhur. Bibel mangkatahon, “Dearan do dua halak marimbangkon na sandirian.” (Parambilan 4:9) On boi iahapkon sidea anggo idalankon suami istri podah ni Bibel ibagas kaluargani. Sanggah isahkon sidea parhajabuanni, marpadan do sidea ase setia janah marsihaholongan. Halani ai, gabe pos ma uhur ni sidea bani pasanganni. Anjaha bahat do homa gunani ai bani niombah ni sidea.
3. Aha do aturan ni Jahowa pasal parhajabuan?
Sanggah ipasada Jahowa si Adam pakon si Hawa, ihatahon Ia do, “Tadingkonon ni dalahi do bapa pakon inangni ase tongtong ia rap pakon istrini.” (1 Musa 2:24) Marosuh do Jahowa ase marsihaholongan suami pakon istri janah tongtong marsada. Tapi Bibel mangkatahon boi do sidea marsirang anggo dong sidea na mangkorjahon seks pakon halak na legan. Age pe sonai, pasangan na lang marsalah ai boi mamilih ra do ia marsirang atap lang. a (Mateus 19:9) Leganni ai, lang marosuh Jahowa anggo halak Kristen dong lobih humbani sada suami atap istrini.—1 Timoteus 3:2.
PARLAJARI ROH BAHATNI
Ulas hita ma sonaha halak na dob marhajabuan pakon na lape, boi martuah goluhni janah mambahen malas uhur ni Jahowa.
4. Halak na lape marhajabuan boi do martuah
Jesus mangkatahon pasu-pasu humbani Jahowa do anggo lape marhajabuan sasada halak. (Mateus 19:11, 12) Basa ma Mateus 4:23, janah ulas ma sungkun-sungkun on:
-
Halani lang marhajabuan Jesus, aha do na boi ibahen ia laho mangidangi Naibata ampa mangurupi halak na legan?
Halak Kristen na lape marhajabuan boi do martuah goluhni songon Jesus. Tonton ma VIDEO, dob ai ulas ma sungkun-sungkun on.
-
Aha do na boi ibahen halak Kristen na lape marhajabuan?
Ai ibotoh ham do?
Age pe lang ipatugah bani Bibel umur sadiha do sasahalak boi marhajabuan, tapi ihatahon dearan do “dob matoras” ia ase marhajabuan. Halani anggo poso ope, ra do pitah mangihutkon hisap-hisap ni dagingni dassa ia. Jadi lape boi ia mambahen haputusan na dear.—1 Korint 7:36.
5. Dear ma pilih na laho gabe istri atap suamimu
Sada haputusan na ponting do laho mamilih ise na gabe istri atap suamimu. Basa ma Mateus 19:4-6, 9, janah ulas ma sungkun-sungkun on:
-
Mase maningon nanget ipingkiri halak Kristen haputusanni laho marhajabuan?
Bibel boi mangurupi ham laho mambotoh halak na sonaha do na dear ibahen ham gabe pasanganmu. Na sipontingan, pilih ma halak na mangkaholongi Jahowa. b Basa ma 1 Korint 7:39 pakon 2 Korint 6:14. Anjaha ulas ma sungkun-sungkun on:
-
Mase hita maningon marhajabuan pakon hasoman sahaporsayaon?
-
Anggo iahap ham, sonaha ma pangahap ni Jahowa anggo hita marhajabuan pakon halak na lang mangkaholongi-Si?
Anggo dua pinahan na legan jenisni ibahen rup mambajak, gabe borat ma ai bani haduasi. Sonai homa anggo hita marhajabuan pakon halak na lang sahaporsayaon, gabe bahat ma sitaronon
6. Na iharosuhkon Jahowa bani halak na marhajabuan
Hinan, urah-urah do halak Israel mansirangkon istrini. Basa ma Maleaki 2:13, 14, 16, janah ulas ma sungkun-sungkun on:
-
Mase magigi Jahowa bani halak na urah-urah mansirangkon pasanganni?
Anggo dong na lang setia janah marsirang sidea, gabe pusok ma uhur ni pasanganni ai pakon niombah ni sidea
Tonton ma VIDEO, dob ai ulas ma sungkun-sungkun on.
-
Anggo pasanganmu lang sahaporsayaon, aha do na boi ibahen ham ase martuah kaluargamu?
7. Dalankon ma aturan ni Jahowa pasal parhajabuan
Maningon marusaha do hita mangihutkon aturan ni Jahowa pasal parhajabuan. c Ipasu-pasu Jahowa do hita anggo ihorjahon hita sonai. Tonton ma VIDEO.
Basa ma Heber 13:4, janah ulas ma sungkun-sungkun on:
-
Pandapotmu, ai boi do ihorjahon hita aturan ni Jahowa pasal parhajabuan? Mase sonai balosmu?
Sihol do Jahowa ase unduk halak Kristen bani pamarentah. Umpamani, anggo dong na laho marhajabuan atap pe marsirang, maningon iurus sidea ma ai mangihutkon uhum ni pamarentah. Basa ma Titus 3:1, janah ulas ma sungkun-sungkun on:
-
Anggo domma marhajabuan ham, ai domma sah parhajabuanmu mangihutkon uhum ni pamarentah?
ANGGO DONG NA MANUNGKUN: “Ai lang rahanan ahu marsirang anggo lang sosok be ahu pakon pasanganku?”
-
Sonaha ma ham mambalosi ai?
RIMPUNAN
Age na marhajabuan atap na lang, boi mandapot pasu-pasu humbani Jahowa. Haduasi sidea boi do totap martuah goluhni anggo idalankon sidea harosuh ni Jahowa.
Na Dob Iparlajari
-
Aha do na boi ibahen halak Kristen na lape marhajabuan?
-
Mase ihatahon Bibel anggo halak Kristen maningon marhajabuan pakon hasoman sahaporsayaon?
-
Songon na isurat bani Bibel, pitah halani aha do halak Kristen boi marsirang?
TONGGOR HOMA
Aha do artini marhajabuan pitah pakon halak “na mangihutkon Tuhan”?
“Na Isungkun Pambasa” (Menara Pengawal 1 Juli 2004) (dong bani bahasa Indonesia)
Tonton ma video na boi mangurupi ham mambahen haputusan na dear pasal marhallet ampa marhajabuan.
Persiapan Laho Marhajabuan (11:53) (Dong bani bahasa Indonesia)
Basa ma mase sada hasomanta mangahapkon bahatan do pasu-pasu na ijalo ia marimbangkon na dob itadingkonni.
Mangarap do Ahu Ase Ra Ia Marlajar Hasintongan (1:56) (Dong bani bahasa Indonesia)
Aha do na porlu ipingkirhon sasada halak paima iputuskon ia laho marsirang atap padaoh-daoh pakon pasanganni?
“Hargai ma Pangaturan ni Naibata pasal Parhajabuan” (Ambilan na Madear Desember 2018)
a Tonggor ma Hatorangan Tambahan 4 laho mambotoh mase suami pakon istri boi marsipadaoh-daoh.
b Bani piga-piga ianan, namatoras do na mamilih pasangan bani niombahni. Idingat namatoras ma halak na mangkaholongi Jahowa do na sipontingan na ipilih sidea, marimbangkon halak na bayak atap na dong jabatanni.
c Anggo sarumah ope ham pakon halletmu, bahen ma haputusan na laho marhajabuan do ham pakonsi atap itadingkon ham ia.
