BAG I 42
Ke ze Ñwaʼni Nsi tshwèt ntshob mfà num nena ndà bo nebe ke na à?
Ntùm tsemoʼ ntenu, benntùn num nkwade mbe mènntùn tswe ke na ndà mba bʼa ke juʼ tsiañde. Là, a ke tse njoñ benntùn fa bo na ndà là bèn nke njuʼ mebwô, a ke bèn mbʼa njoñ benntùn fa bo keʼ na ndà la bèn nke njuʼ kebwô. Nenùn bʼa mbe Ñwaʼni Nsi tshwèt ndaʼde mbe, netswe ke na ndà bo nandà bʼa ba ndaʼ.
1. Tsemoʼ bin netswe ke na ndà bʼa tsile?
Ñwaʼni Nsi mbe: “Mèn zʼa na ndà là ghù a bwô, mèn zʼa keʼ na ndà là bèn ngù ntshùade.” (Siañ 1 Korintô 7:32, 33, 38, nwt-F.) Taʼ mèn zʼa tswe ke na ndà là num ngù ntshùade à ndùke? Mènkristô zʼa keʼ na ndà là keʼ ghù nelab wul i num nedunde nzi ndu i ke nzwi i lo. Ndùlà, a num ngù ngelañ yàme. Mba mfiʼ là, tsemoʼ netèt bo kuʼni nekwiʼde sub faʼ ntùm nàfaʼ, nèn ntùm ba ngô ke ba tañlaʼ lo num nesoñ nkùn mebwô. Nekwiʼde, bo num mbèn ngù ngelañ yàm neso neta num yub kushun bo Yaweh Nsi.
2. Tsemoʼ bin nena ndà mbwe ngomnaʼ bʼa tsile?
Nena ndà ke netswe ke na lo, mba zit lo ghù bin i. Ñwaʼni Nsi tshwèt ntshob mbe: “Ben bàa bʼa lab mbiag lag.” (Eklésia 4:9) Yenni bʼa nenùn kuaʼ num benkristô tse bo num nze tun ntshùʼ Ñwaʼni Nsi ntùm yub nandà là. Ben bo num na ndà mbwe ngomnaʼ là, num nkàn fe nekô, nekuʼni mba netomde wut tshob bo bo. Ntshoʼfaʼ bʼa mbe bo num njuʼ mebwô ntshùa benntùn bo keʼ na ndà mbwe ngomnaʼ là. Nandà bʼa taʼ mbwô dùʼ netomde mbèn nkwiagde bônkeʼ.
3. Yaweh Nsi nke njen nandà à ndùke?
Ngelañ Yaweh Nsi naʼ nte mbwe nandà là, a tshob mbe: “Mandum nsi fañ tàab bo màab lat num nzwi i, bo tamde ntùʼ taʼ wut ntshùʼ.” (Netoʼde 2:24) Yaweh Nsi kô mbe taʼ mandum bo nzwi i kô wut tshob bo bo mbèn ntswe ke fagde njoñ yôg sub fa. Yaweh Nsi num mbam mbe taʼ mèn fagde nandà à ndaʼ ngelañ ze ndu i, ke nzwi lo, ghù mandà là. Yen ngelañ nà, Yaweh Nsi num mfañ mbe mènnzwi ke mandum bo fù i là tshoʼ nefagde * nandà ke nebe ke fagde lo. (Matio 19:9) Yaweh Nsi keʼ be bam mbe benkristô ghù bènnzwi ke ndu yàm no.—1 Timôtio 3:2.
TSWEʼ NTUN MI
Yen mbʼo kuʼni nejuʼ tsiañde—mbèn ntsiañde ntù Yaweh Nsi—kʼo na ndà kʼo tswe ke na lo.
4. Loʼ ndaʼ nebe ke na ndà mfaʼ yi mebwô
Yésu naʼ nke njen nebe ke na ndà à mba taʼ ndaʼ là. (Matio 19:11, 12) Siañ Matio 4:23, mbèn mbùnde yen bètte li:
-
Mba Yésu naʼ mbe ke na ndà là, a naʼ loʼ ze ngelañ ngamde tàab mbèn njwimde tsemoʼ yi à ndùke?
Benkristô bo keʼ na ndà là kuʼni neloʼ yub ngelañ mfaʼ yi mebwô mba Yésu là. Lôde LAʼDE NETSHAÑ, mbèn mbùnde yen bètte li.
-
Benkristô kuʼni neloʼ yub nebe ke na ndà mfaʼ yi mebwô à ndùke?
O naʼ lèn ké?
Ñwaʼni Nsi keʼ yab taʼ nguʼnjù ze be mènntùn na ndà là. Là, a tshwèt nso kù num ghuan benntùn mbe bo béb kà “ntôg yub nguʼnjù nshum”, ngelañ ze nzi ntamde mandum bo mènnzwi yàm num bo là, mbèn nkuʼni netènde yub neloʼ mfiʼ kebwô là.—1 Korintô 7:36.
5. Tshoʼ mèn bin yi na ndà là bo zenu
Netshoʼ mèn bin yi na ndà là bʼa taʼ i netèt ba mfiʼ ndùb tsʼo loʼ ntùm yôg so là. Siañ Matio 19:4-6, 9, mbèn mbùnde yen bètte li:
-
A keʼ bètte taʼ mènkristô nànde nena ndà à numke?
Ñwaʼni Nsi kuʼni neywimdʼo nelèn ba mat tse bʼo diag num mèn ze bin yi na ndà là. Ju ndùb bʼa netshoʼ à mèn zʼa kô Yaweh Nsi là. * Siañ 1 Korintô 7:39 bo 2 Korintô 6:14, mbèn mbùnde tshen mbètte li:
-
Numke a mbètte nena ndà à ndaʼ bo taʼ mèn zʼa tshwèt ngamde Yaweh Nsi mba wù lʼà?
-
O kwade mbe Yaweh Nsi aʼ juʼ wul i à ndùke a be zʼo na ndà bo mènntùn zʼa keʼ kô i à?
Bo yab kan nyàm bàa num keleʼ ntshùʼ mba boaʼ yen ngeʼ neshu. Be ndañndañ ta mènkristô na ndà bo taʼ mèn zʼa ke tshwèt ngamde Yaweh Nsi là, mba boaʼ juʼ kebwô neshu
6. Yen nandà à mba Yaweh Nsi là
Ntùm Israél ngelañ mbwe, tsemoʼ bandum naʼ nke mfagde bo nzwi tshob num tshu bànbàn. Siañ Malashi 2:13, 14, 16, mbèn mbùnde yen bètte li:
-
Numke Yaweh Nsi nke mbàn nandà bo fagde ke yéʼdʼà num Ñwaʼni Nsi à?
Mandà bo nefagde nandà num nkag ngeʼ num mandum ke mènnzwi lo ze bo fù i là mba num bônkeʼ
Lôde LAʼDE NETSHAÑ, mbèn mbùnde yen bètte li.
-
A be zʼo yà na ndà bo taʼ mèn zʼa ke tshwèt ngamde Yaweh Nsi mba wù là, mba ke ze bʼo ghù nedù yu nandà bwô à?
7. Ze ntshùʼ Yaweh Nsi mfà num nandà
Bʼa bètte mènntùn ghù nkagtùn yàm num neze ntshùʼ Yaweh Nsi mfà num nandà. * Là, Yaweh Nsi num nañ mbotni num ben tse bo num ngù ndùlala là. Lôde LAʼDE NETSHAÑ.
Siañ Héber 13:4, mbèn mbùnde yen bètte li:
-
O kwade mbʼa taa neze ntshùʼ Yaweh Nsi mfà num nandà ké?
Yaweh Nsi tshwèt mbètte mbe benkristô na ndà ke nefagde yub nandà lo à mbwe ngomnaʼ, ndañndañ mba ngomnaʼ tshwèt mbètte ntùm mbeʼyàm ngô là. Siañ Titô 3:1, mbèn mbùnde yen bètte li:
-
Bʼo tshob ke magde mbʼo na ndà mbwe ngomnaʼ bo mèn bin yi tshwèt ntswe là ké?
BE MÈNNTÙN BÈTTE MBE: “Bo nke na ndà à numke? Be taʼ mandum ke tswe bo taʼ mènnzwi ke na ndà bo yi ké?”
-
Oaʼ bùndʼà ndùke?
JU NETSHÙBE
Netswe ke na ndà bo nandà bʼa ba ndaʼ tsʼa fe Yaweh Nsi là. Mba zit lo kuʼni nefà tsiañde mbèn ngù mènntùn juʼ mebwô a be zʼa ze ntshùʼ Yaweh Nsi là.
Mbètte nekwimde
-
Be mènntùn loʼ ze netswe ke na ndà mfaʼ yi mebwô à ndùke?
-
Numke Ñwaʼni Nsi nke ntshob mbe bo na ndà à ndaʼ bo taʼ mèn zʼa tshwèt ngamde Yaweh Nsi lʼà?
-
Ñwaʼni Nsi tshwèt mbam mbe bo fagde nandà à ndaʼ num zit ngelañ à?
DIAGE
Nena ndà à ndaʼ ntùm Tshùaben nke mbagdʼà mbe ke?
“Questions des lecteurs” (La Tour de Garde, 1er juillet 2004)
Lôde laʼde netshañ bàa tsʼa kuʼni neywimdʼo neloʼ mbwô mfiʼ mfà num netede bo nandà là
Ziʼde ju zʼa ghù taʼ mvèt tshob mbe ju ze Yaweh Nsi fà yi là tshùa njoñ tshu fa tsʼa bi là.
Tsit tshu a bètte taʼ mènntùn siañde nu mfà num bwe kà nkwade nefag ñwaʼni nandà ke nenèn tswe num ze bag tùʼ i lo à?
“Honore ‘ce que Dieu a uniʼ” (La Tour de Garde, décembre 2018)
^ Lôde kide tun fe 4, Netum nandà nèn ntswe num yu bag tùʼ o.
^ Ntùm tsemoʼ ntengô, a ba tà bon bèn nke ntshoʼ mèn zʼa na ndà bo ngon yub ke nshum yub là lo. Yen ngelañ nà, ba tà bo kô bon tshob là ke diag à mèn zʼa ghù fuʼ yàm, ke taʼ mbwô dùʼ ntùm njù lo, là, ndiag à mèn zʼa kô Yaweh Nsi là.
^ O nke ntswe bo mènntùn ze bin yi keʼ na ndà là, mbʼa bʼa wù bèn ntshoʼ a be zʼo na ndà bo yi kʼoaʼ fañ i lo.
