ARUFUDAHANI 42
Ka tariñagubei Bíbülia luagu maríei luma luagu lerederun gürigia lábugua?
Anihein fulasu le ñein lumuti hasaminara gürigia mosu lan hamarieidun lun gunda hamá. Lau sun lira, mama sun maríeitiña lun gunda hamá, mama giñe sun ha erederubaña hábugua lun magundan hamá. Le linarün katei, ariñagatu Bíbülia aban lan idewesei lúmagiñeti Heowá dandu lerederun gürigia lábugua kei lamarieidun.
1. Ka buiti ibihúbei lídangiñe lerederun gürigia lábugua?
Ariñagatu Bíbülia buidu lan hadüga ha amarieidubaña, ánhañati ha erederubaña hábugua, “buítimati hadüga” (aliiha huméi 1 Korintuna 7:32, 33, 38). Ka uagu buídutima lubéi hadüga gürigia ha erederubaña hábugua? Ladüga mama lan mosu ladiheridun aban kristiánu le mamarieidunbei luagu le temegeirubei aban weiriou, ani mama mosu tadiheridun aban kristiána to mamarieidunboun luagu le lemegeirubei aban weiriei. Ligíati gadaanitima habéi liibe-agei dan. Añahein hádangiñe, gayaraati hadügün lubuidun burí katei lidan heseriwidun lun Heowá, kéiburi haweiyasuhan lidoun burí amu fulasu lun hapurichihani uganu buiti. Ani lóugiñe sun katei, gadaanitimatiña lun hederebudagüdüni hamadagua luma Heowá.
2. Ka buiti lanügübei bürüwañu lan wamarieidun gabilidurugu?
Ítara kei barǘ lan lerederun gürigia lábugua buiti, barüti lamarieidun gürigia buiti. Ariñagatu Bíbülia: “Buítimatiña biama luéi aban” (Apurichihati 4:9). Ítara liña, dántima le hafalaruni maríeitiña adundehani le tídanbei Bíbülia. Gürigia ha maríeibaña lábugiñe lúrudu, füramasetiña hínsiñeguabaña lan hámagua, inebeguabaña lan hámagua ani hóunigiraguba lan hámagua. Ligíati chóurutima lubéi hasandiragun houngua sügǘ hau ha awinwandubaña úara mamarieidunga. Ani ídehati giñe maríei lun chouru lan hasandiragun isaanigu houngua.
3. Ka lasaminarubei Heowá luagu maríei?
Dan le lamarieidagüdünbalin Heowá furumiñeti wügüri tuma furumiñetu würi, ariñagati: “Ligía lígirubei lubéi wügüri lúguchi tuma lúguchu, lun laganóun tuma lúmari” (Agumesehani 2:24). Busenti Heowá lun hínsiñegua hamá maríeitiña hámagua luma lun hawinwandun úara lidan sun habagari. Ani dánrügüñein lagabarahan aban hádangiñe lánhara Heowá lun hígiragun. Anhein ítara liña lubéi, ígirati Bungiu lun lanúadirun maríeiti le madurunbei anhein lígiraguba lubéi o mígiragunbei lan (Matéu 19:9). a Busenti Heowá lun ábanrügü tan lani kristiánu weiriou (1 Timotéu 3:2).
SIGÍ HUMÁ AFURENDEIRA
Furendei humá ida luba lan gunda humá ani gúndaagüda humeime Heowá, meberesenga anhein maríei hubéi o hábuguarügüñadün lan.
4. Anhein hábuguarügüñadün lubéi, yusu huméi idewesei le buidu
Ariha lumuti meha Hesusu lerederun lábugua kei aban idewesei (Matéu 19:11, 12). Aliiha huméi Matéu 4:23, ábameti hayanuhan luagu álügüdahani le:
-
Kei meha mamarieidun lan Hesusu, ida liña layusuruni lidaani lun leseriwidun lun Lúguchi luma lun líderagun amu?
Gayaraati gunda hamá kristiánugu mamarieiduntiña ha ayusurubalin hadaani kei meha Hesusu. Ariha huméi BIDÉU, ábameti hayanuhan luagu álügüdahani le:
-
Ida luba hasagaruni kristiánugu mamarieiduntiña sun buiti le hayaraati lídangiñe le gádanbaliña?
Subuditi san hun?
Mariñagun tumuti Bíbülia átiribei lan irumu lau gürigia lubá lamarieidun. Lau sun lira, ariñagatu woun lun wagurabahan lásügürün “dan le ídanbei wéiritima lan hayumahan nibureintiña hagamaridun”, lugundun gayara lan ladügün lira lun hénrengu lan houn hanúadirun lau lichú aau (1 Korintuna 7:36, TNM).
5. Anúadira huméi lau lichú aau kaba lan uma hamarieida
Lanúadirun gürigia kaba lan uma lamarieida, ligíatima aban lídangiñe katei le lunbei lasaminaruni gürigia buidu. Aliiha huméi Matéu 19:4-6, 9, ábameti hayanuhan luagu álügüdahani le:
-
Ka uagu lunti lubéi lasaminaruni aban kristiánu buidu lubaragiñe lamarieidun?
Íderagua tumutiwa Bíbülia asubudirei kaba burí lan igaburi wáluaha luagu o tuagu gürigia to úmaboun wasaminara wamarieidun. Ani lóugiñe sun katei, áluaha humá aban gürigia le hínsiñehabuti lun Heowá. b Aliiha huméi 1 Korintuna 7:39 luma 2 Korintuna 6:14, ábameti hayanuhan luagu álügüdahani burí le:
-
Ka uagu lunti lubéi hamarieidun kristiánugu hámarügü kristiánugu háledi?
-
Anhaün amarieida tuma o luma aban gürigia le meseriwidunti lun Heowá, ida luba lasandiragun Heowá lungua?
Anhein ichugúa bián animaalugu ha ámuñegueinarügütiña hawariuagua lábugiñe ligiaméme yugu, hasufuriruba biángubei. Ítarameme, gíbetimabei giñe haturobulin kristiánugu ha amarieidubaña hama ha meseriwidunbaña lun Heowá.
6. Ariha waméi maríei kei larihini Heowá
Lidan meha binadu Ísüraeli, añahein meha wügüriña ígiragutiña tuéi hani weiriou ladüga hawouguounrügüñein lan haritagua. Aliiha huméi Malakíasi 2:13, 14, 16, ábameti hayanuhan luagu álügüdahani le:
-
Ka uagu iyereegu lubéi ígiraguni lun Heowá dan le mama lan luagu resun le tíchugubei Bíbülia?
Barüti agabarahani luma ígiraguni saragu igarigu houn maríeitiña ha madurunbaña luma houn hasaanigu.
Ariha huméi BIDÉU, ábameti hayanuhan luagu álügüdahani le:
-
Anhein maríei hubéi luma aban gürigia le meseriwidunti lun Heowá, ka gayaraabei hadügüni lun gunda lan hibagari húmagua?
7. Gaganbadi humá lun lilurudun Heowá luáguti maríei
Añahein gürigia ha únbaña hénrengu lan gaganbadi hamá lun lilurudun Heowá luáguti maríei. c Lau sun lira, biní lumutiña Heowá ha áfaagubaña lun hadügüni. Ariha huméi BIDÉU.
Aliiha huméi Ebüréu 13:4, ábameti hayanuhan luagu álügüdahani burí le:
-
Afiñetün san gayara lan lagunfulirúniwa lau lilurudun Heowá luáguti maríei? Ka uagu hasaminara ítara?
Agurabati Heowá lun labürüdagüdüni kristiánu dandu lamarieidun kei lígiragun gabilidurugu, lugundun ligía lúrudubei lidan liibe-agei fulasu ubouagu. Aliiha huméi Titu 3:1, ábameti hayanuhan luagu álügüdahani le:
-
Anhein maríeihadün lubéi, chouru humuti san bürüwañu liña lan hamarieidun gabilidurugu?
ÁLÜGÜDAHANI LE HADÜGÜBEI FIU GÜRIGIA: “Kaba san uagu namarieida? Le san lúgubu mégeiwa tan aban gárada?”.
-
Kaba hamuga hóunaba?
LE HAFURENDEIRUBEI
Aban idewesei lúmagiñeti Heowá dandu maríei kei lerederun gürigia lábugua. Dandu maríeitiña kei ha erederubaña hábugua, gayaraati gunda lan habagari anhein hadüga katei kei aubei lariñagei Heowá.
Águyuguagüdüni
-
Ida luba hayusuruni ha erederubaña hábugua hadaani buidu?
-
Ka uagu tariñaga Bíbülia hámarügübei lan kristiánugu wáledi wamarieida?
-
Kárügüñein resun tíchiga Bíbülia lun ñein lan ígiraguni?
FURENDEI HUMÁ LANWOUN
Ka tabusenrubei Bíbülia tariñagun lau dimurei “afiñetirügaali ligía luagu Kristu”?
“Preguntas de los lectores” (La Atalaya, to lánina 1 lidan sedü-hati, irumu 2004)
Ariha humá bián bidéu luáguti adarigu luma maríei le gayaraabei líderagunün anúadira buidu.
Ariha huméi ka lan uéigiñe chouru lubalin aban íbiri rúhali lan Heowá aban katei buídutimati lun sügǘ lau le lígirubei.
Ka lunbei gabaroun lani aban kristiánu lubaragiñe lasaminarun lígiragun o lafanreinragun?
“Inebelá woun ‘le lóundarubei Bungiu’” (Garüdia Awisahatu, to lánina duusu-hati, irumu 2018)
a Lidan lanwoun ariñahani 4 hadariruba ariñahani luáguti fánreinguaü dan le ua lan agabarahani.
b Anihein ageiraü le ídanbei agübürigu lan anúadirubalin kaba lan uma hamarieida hasaanigu. Anhein ítara liña lubéi, mámaba lun seinsu ni lun lubuidun dan hetenira agübürigu, heteniruba lun anhein hínsiñe lubéi Heowá tun würi to hanúadiruboun lun hasaani o lun wügüri le hanúadirubei tun hasaani.
c Anhein hawinwanduña lubéi húmagua mamarieidunga, huguyaba anúadira anhein hígiraguba lubéi o hamarieiduba lan.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
