LONGESO 42
Yika Mbimbiliya Yakwamba Hakutwala Utwamishi ni Ulo?
Ku minyachi yimwe, atu kakutayiza ngwo mutu kechi kuhasa kuwahilila nyi kambachile hanji kasombokele. Alioze hi malo eswe ko akwete uwahililo. Chikwo nawa, hi twamishi eswe ko akuwahilila. Mbimbiliya yakwamba ngwo, ulo ni utwamishi yili yawana ya Yehova.
1. Kuchi mutu mahasa kuyuka ha kupwa twamishi?
Mbimbiliya yakwamba ngwo: “Chocho kevwe, yoze mahangisa malinga kanawa; alioze shinaho yoze keshi kuhangisa.” (Tanga 1 A-Korindu 7:32, 33, 38.) Mu mulali uka twamishi apwa “shinaho”? Twamishi akwa-Kristu keshi ni chiteli cha kulisa pwo hanji lunga mumu keshi nenyi. Twamishi kakwete utuswilo unji. Chakutalilaho, amwe a kuli ayo kakulihana chinji mu mulimo wa Yehova, ngwe kuya ni kukwasa kuze kunafupiwa ukwaso. Chahiana ulemu, kakupwa ni mashimbu anji a kukundama kuli Yehova.
2. Kuchi mutu mahasa kuyuka ha kulimbata kulita ni shimbi?
Ulo ni utwamishi wakuneha uwahililo mu majila alisa. Mbimbiliya yakwamba ngwo, “shinaho aali, hi umuwika ko.” (Chilumbununyi 4:9) Chino chakulingiwa mu ulo wa akwa-Kristu waze akukaula shimbi ja mu Mbimbiliya mu ulo wo. Atu waze akulimbata kulita ni shimbi, kakulilakenya kulizanga ni kulivumbika umwe ni mukwo. Chocho, o kakulivwa kanawa kuhiana waze kalimbachile kulita ni shimbi. Chikwo nawa, ana no kakulivwa kanawa.
3. Kuchi Yehova akumona umbachiso?
Muze Yehova alingile umbachiso utangu, yamba ngwenyi: “Lunga akahichike tato ni naye akalalaminye kuli mukwo-pwo.” (Uputukilo 2:24) Yehova kanazange pwo ni lunga alizange ni kutwama chimuwika mashimbu eswe matwama ni mwono. Yehova kakutayiza wika hanga pwo ni lunga alilakule nyi umwe wa kuli ayo malinga utanji. Ha chikuma chino, iye kakwecha hanga mutu yoze kalingile utanji asakule nyi malilakula ni yoze alimbata nenyi nyi ka. a (Mateu 19:9) Yehova keshi kutayiza hanga akwa-Kristu ambate luhali.—1 Timoteu 3:2.
NYINGIKA NAWA
Nyingika chize muhasa kuwahilila ni chize muhasa kuvwisa Yehova kuwaha chipwe ngwe uli twamishi hanji ka.
4. Zachisa kanawa utwamishi we
Yesu kapwile nikumona utwamishi ngwe chawana. (Mateu 19:11, 12) Tanga Mateu 4:23, mba nushimutwine chihula chino:
-
Kuchi Yesu azachishile chawana chenyi cha utwamishi hanga alingile Yehova ni kukwasa akwo?
Akwa-Kristu mahasa kuwahilila ha kuzachisa utwamishi wo ngwe chize Yesu alingile. Tala CHINEMA, mba nushimutwine chihula chinahateho.
-
Mu mulali uka akwa-Kristu mahasa kuzachishilamo utwamishi wo?
Unachinyingika nyi?
Mbimbiliya kuyishi kusolola miaka yize mutu atamba kupwa nayo mba ambate hanji asomboke. Alioze yakutukolweza hanga tushimbwile ndo muze mutuhiana “kukula cha miaka” hanji ngwetu, mashimbu waze manyonga a kulisumbakenya akupwa ni tachi jinji kuli akweze ni kwalingisa hanga akwate yiyulo yipi.—1 A-Korindu 7:36.
5. Sakula kanawa mutu yoze mulimbata nenyi
Kusakula mutu yoze mulimbata nenyi chili chiyulo chilemu chinji ku mwono wa mutu mweswe. Tanga Mateu 19:4-6, 9, mba nushimutwine chihula chino:
-
Mumu liaka akwa-Kristu katambile kulipupwisa kumbata hanji kuya ulo?
Mbimbiliya muyihasa kukukwasa kunyingika yitanga yize atamba kupwa nayo mutu yoze unazange kulimbata nenyi. Chahiana ulemu, fupa mutu yoze wazanga chinji Yehova. b Tanga 1 A-Korindu 7:39 ni 2 A-Korindu 6:14, mba nushimutwine yihula yino:
-
Mumu liaka twatamba kulimbata wika ni akwa-Kristu-ni-akwetu?
-
Ku nyonga lie, kuchi Yehova mevwa nyi mutusakula kulimbata ni mutu yoze keshi kumuzanga?
Nyi tushitu aali alisa maakasa hanga endele hamuwika, eswe mamona lamba. Chizechene nawa, mukwa-Kristu yoze malimbata ni mutu yoze keshi kuwayila Yehova mamona lamba linji
6. Mona ulo ngwe chize Yehova akuumona
Ku Izalele ya ku shakulu, malunga amwe kapwile ni kulakula mapwo jo chamulakwila. Tanga Malakia 2:13, 14, 16, mba nushimutwine chihula chino:
-
Mumu liaka Yehova keshi kuzanga atu waze akulilakula chakuhona kukaula shimbi ja Mbimbiliya?
Utanji ni kulilakula yakuneha lamba linji kuli mutu yoze kaulingile ni kuli ana
Tala CHINEMA, mba nushimutwine chihula chinahateho.
-
Nyi hiunalimbata kulu ni mutu yoze keshi kuwayila Yehova, yuma yika muhasa kulinga hanga uwahilile mu ulo we?
7. Kaula shimbi ja Yehova mu ulo we
Muchihasa kufupiwa kusa tachi jinji hanga ukaule shimbi ja Yehova mu ulo we, c mumu, Yehova kakuwahisa waze akusa tachi jacho. Tala CHINEMA.
Tanga A-Hepreu 13:4, mba nushimutwine yihula yino:
-
Ku nyonga lie, shina shimbi ja Yehova hakutwala ku ulo jalita? Mumu liaka wamba chocho?
Yehova kakushimbwila hanga akwa-Kristu asonekese ulo wo, chipwe muze malilakula, kulita ni shimbi ja mu chifuchi chize atwama. Tanga Titu 3:1, mba nushimutwine chihula chino:
-
Nyi hiunambata, shina uli ni shindakenyo ngwe ulo we uli wakusonekesa ku nguvulu?
AMWE MAHASA KUKUHULA NGWO: “Mumu liaka natamba kusonekesa ulo wami? Shina atu kechi kuhasa kutwama chizechene?”
-
Kuchi muhasa kukumbulula?
YIZE WALILONGESA
Utwamishi ni ulo yili yawana ya Yehova. Chipwe twamishi hanji waze alimbata, mahasa kuwahilila ku mwono wo nyi makaula shimbi ja Yehova.
Kuhitulula
-
Kuchi mutu mahasa kuzachisa kanawa utwamishi wenyi?
-
Mumu liaka Mbimbiliya yakwamba ngwo twatamba kulimbata wika ni akwa-Kristu-ni-akwetu?
-
Kulita ni Mbimbiliya, chuma chika chize muchihasa kulingisa hanga atu alilakule?
HENGWOLA NAWA
Kupwa “musunya umuwika” yika chinalumbunuka?
“Yihula ya Waze Akutanga Mikanda Yetu” (Kaposhi wa Kutalila 1 wa Julho, 2004)
Tala yikuma yaali yize muyihasa kukukwasa kukwata yiyulo yipema muze unalinyingika ni mutu yoze mulimbata nenyi ni hakutwala ku umbachiso.
Nyingika mumu liaka umwe ndumbu akumona ngwenyi, Yehova kamwaha yuma yinji yilemu kuhiana yize ahichikile kunyima.
Napwile ni Kushimbwila Ngwami Iye Kumanyingika Umwenemwene (1:56)
Yuma yika yize mutu atamba kunyonga shimbu kanda achililakula hanji kulihandununa ni yoze alimbata nenyi?
“Lemesa ‘Chize Zambi Hananungu’” (Kaposhi wa Kutalila Dezembro, 2018)
a Tala Maliji Akusongo 4 hanga unyingike hakutwala ku kulilakula nyi niumwe mu ulo kalingile utanji.
b Ku minyachi yimwe, yisemi e akusakula mutu yoze malimbata ni mwano. Ha chikuma ngwe chino, yisemi waze akwete zango, keshi kulihulikila ha upite ni mbongo jize mutu yoze malimbata ni mwano akwete. Alioze, kakutala nyi mutu wacho kakuzanga Yehova.
c Nyi watwama ni mutu yoze kuwalimbachile nenyi kulita ni shimbi, mba munuliecha ni kulimbata ni mutu mweka, achi chili chiyulo che.
