ZANNOO 42
Bo Ka A Baabole Yel Kyaare Noba Naŋ Ba Kpɛ Kultaa Poɔ Ane Kultaa?
A yi noba mine sããkommine yelwulii poɔŋ, noba maŋ yeleŋ ka, ka neɛŋ boɔrɔ ka o taa popeɛloŋ meŋɛmeŋɛ, aseŋ ka o de pɔge bee a kuli serɛ. Kyɛ, ka neɛŋ de pɔge bee a kuli serɛ, lɛ ba wuli ka o na taaɛ popeɛloŋ meŋɛmeŋɛ. Noba naŋ ba kpɛ kultaa poɔ meŋ maŋ taaɛ popeɛloŋ. A Baabole yeleeŋ ka, ka neɛŋ ba kpɛ kultaa poɔ a eɛ kyɔɔtaa, a kyɛ lɛ yelka kultaa meŋ eɛ kyɔɔtaa.
1. Ka neɛŋ naŋ ba kpɛ kultaa poɔ, bo yɛlɛ mine oŋ na baŋ e?
A Baabole yeleeŋ ka: “Soba na naŋ de pɔgsarlee o naŋ eŋ noɔre ka o na de la, e la velaa; kyɛ neɛ naŋ ba de pɔge la mɔ yaga.” (Kanne 1 Korinti 7:32, 33, 38.) Bonso ka a Baabole yelka neɛ naŋ ba de pɔge, bee a kuli serɛ la “mɔ yaga”? Kristabiiri naŋ ba kpɛ kultaa poɔ ba maŋ taa toma yaga ka ba toŋ aŋa kultaa deme. Azuŋ, ba maŋ taaɛ wagre ka ba e yɛlɛ yaga. Aŋa mannoo poɔŋ, ba mine maŋ toɔ̃ toŋɛɛ a naaŋ moɔloo toma soe yaga zaa poɔŋ. Ba mine meŋ maŋ toɔ̃ tu la sori a gaa paaloŋ yuo kaŋa a te moɔlɔ a duorisoŋ. A gaŋ a zaa, ba na toɔ̃ de la wagre na baŋ taa na toŋ neŋ toma soŋ, ka lɛ vɛŋ ka ba toɔ̃ tage peɛle Jehoova yaga.
2. Ka neɛŋ tu sori naŋ seŋ neŋ poɔ a de pɔge bee a kuli serɛ, bo tɔnɔ oŋ na nyɛ?
Aŋa lɛ na noba naŋ ba kpɛ kultaa poɔ naŋ maŋ nyɛrɛ tɔnɔ yaga zaa na, lɛ meŋ la ka kultaa meŋ taa tɔnɔ yaga zaa. A Baabole yeleeŋ ka “noba bayiŋ seɛ neŋyeni.” (Ikilisiasitiz 4:9) Ka Kristabiiri naŋ kpɛ kultaa poɔŋ wa de Baabole kawane tonɔ neŋ toma, ba na nyɛɛ a maaloo ŋa yaga zaa. Kultaa deme naŋ tu sori naŋ seŋ neŋ poɔŋ a kultaa maŋ eŋɛɛ noɔre ko taa ka ba na nɔnɛɛ taa, a wulo taa gyeremɛ, a kyɛ de taa meŋ tegroŋ yaga zaa. Ba naŋ eŋ noɔre ko taa na zuŋ, ba maŋ taaɛ gomeŋɛ a gaŋ noba naŋ ba maale taa yɛlɛ kyɛ laŋ kpeɛrɛ. Ba naŋ tu sori naŋ seŋ neŋ kyɛ kultaa na zuŋ, a maŋ lɛ vɛmeŋ ka ba biiri na taa gomeŋɛ.
3. Bo teɛroŋ ka Jehoova taa kyaare kultaa?
Saŋa na Jehoova naŋ da sɛgre a dɛndɛŋ kultaa baare na, o da yeleeŋ ka: “Lɛ zuŋ ka dɔɔ na maŋ bare o saa ane o ma, a kyɛ wɛl te mari o pɔge.” (Munpiilee 2:24) Jehoova boɔrɔŋ ka dɔɔ neŋ pɔge nɔnɔ taa a kyɛ kpimare taa a te ta ba kũũ saŋa. Jehoova yeleeŋ ka yelbonyenii yoŋ na baŋ vɛŋ ka a dɔɔ bee a pɔge bare a kultaa, o na la a dɔɔ bee a pɔge naŋ yi o tɔsoba na puoreŋ a te toŋ peɛ̃mo toma. Ka lɛŋ wa e, Jehoova terɛɛ sori ka, ka a kultatɔ na naŋ ba taa sããnaa naŋ wa boɔrɔ, o na baŋ barɛɛ a kultaa. a (Matio 19:9) Jehoova ba boɔrɔ ka Kristabiiri taa pɔgeba yaga, bee sereba yaga.—1 Timoti 3:2.
ZANNE YƐLƐ YAGA POƆ
Ho na zanne nyɛɛ lɛ hoŋ na toɔ̃ e a taa popeɛloŋ, a kyɛ vɛŋ ka Jehoova meŋ poɔ pɛle, ka hooŋ kpɛ kultaa poɔ bee ka hooŋ ba kpɛ kultaa poɔ.
4. Ka hooŋ naŋ ba kpɛ kultaa poɔ, wala hoŋ na toɔ̃ e a de a kyɔɔtaa ŋa toŋ neŋ toma soŋ?
Yezu yeleŋ ka, ka neɛŋ de biŋ o nimitɔɔreŋ ka o koŋ kpɛ kultaa poɔ, lɛ wuleeŋ ka o soba taaɛ kyɔɔtaa kaŋa. (Matio 19:11, 12) Kanne Matio 4:23, a kyɛ gyieli a soorebiri ŋa yɛlɛ:
-
Yezu da e la dɔɔ naŋ da ba de pɔge, sobuo oŋ da de a kyɔɔtaa ŋa toŋ neŋ toma Jehoova puoruu poɔŋ, a kyɛ da lɛ sonnɔ noba meŋ?
Ka Kristabie naŋ ba kpɛ kultaa poɔŋ de o kyɔɔtaa na tonɔ neŋ toma soŋ Jehoova puoruu poɔŋ, o na taaɛ popeɛloŋ aŋa lɛ na Yezu naŋ da taa popeɛloŋ na. Ŋmɛ a VIDIO, a kyɛ gyieli a soorebiri naŋ tu na yɛlɛ.
-
Ka Kristabie kaŋaŋ naŋ ba kpɛ kultaa poɔ, bo yɛlɛ mine la oŋ na toɔ̃ e?
Ho da baŋɛɛŋ?
A Baabole ba wuli yuomo neɛ naŋ seŋ ka o ta sɛre kyɛ kpeɛrɛ kultaa poɔŋ. Kyɛ, a Baabole yeleeŋ ka a na somaŋ ka o soba di kannyiri a vɛŋ ka o ‘baapaaloŋ saŋa gaŋneŋ taa vɔlaa na sigi teŋɛ,’ sɛre kyɛ ka o soba kpeɛrɛ kultaa poɔ. A ananso la ka, o soba baapaaloŋ saŋa gaŋneŋ taa vɔlaa na na toɔ̃ vɛmeŋ ka a e kpeɛŋaa ko o soba ka o de gbɛre naŋ soma.—1 Korinti 7:36.
5. Kaa iri ho kultatɔ soŋ
Ka neɛŋ boɔrɔ ka o kpɛ kultaa poɔ, a eɛ nimizeɛ ka o soba teɛre yɛlɛ gaa tɔɔre sɛre kyɛ iri o kultatɔ. Kanne Matio 19:4-6, 9, a kyɛ gyieli a soorebiri ŋa yɛlɛ:
-
Bonso aŋ ba seŋ ka Kristabie kyerɛ o meŋɛ ka o kpɛ kultaa poɔ?
Wala hoŋ na toɔ̃ baŋ ka a dɔɔ na bee a pɔge na hoŋ boɔrɔ ka ho kuli na na e la sere-soŋ bee pɔge-soŋ? A Baabole na toɔ̃ soŋ boŋ. Kyɛ, yɛlɛ naŋ e nimizeɛ meŋɛ la ŋa, aseŋ ka ho kuli neɛ naŋ nɔŋ Jehoova. b Kanne 1 Korinti 7:39 ane 2 Korinti 6:14. Ka yɛneeŋ wa kanne baare, yɛ gyieli a soorebie naŋ tu na yɛlɛ:
-
Ka Kristabieŋ boɔrɔ ka o kpɛ kultaa poɔ, bonso aŋ seŋ ka o kuli o Kristabitɔ?
-
Ka teneeŋ kuli neɛ naŋ ba nɔŋ Jehoova, bo teɛroŋ ka Jehoova na taa kyaare te?
Ka hooŋ de dunni ayi faŋa naŋ ba seŋ taa eŋ yoki bonyeni eŋɛŋ ka a laŋ kɔ, a zaaŋ na dire dɔgɛɛ. Lɛ neŋ o zu la, ka Kristabieŋ kuli neɛ naŋ ba e o Kristabitɔ, o na tuoree yelkpeɛne yaga
6. Ho taaɛ teɛroŋ na Jehoova naŋ taa kyaare kultaa na bee?
A yi a takoreŋ saŋa Izerayɛl paaloŋ na poɔŋ, a dɔbɔ da maŋ arɛɛ yelzaa baŋ boɔrɔ eŋɛŋ kyɛ bare ba pɔgeba. Kanne Maalakai 2:13, 14, 16, a kyɛ gyieli a soorebiri ŋa yɛlɛ:
-
Ka neɛŋ tu sori naŋ ba seŋ neŋ eŋɛŋ kyɛ bare o pɔge bee o serɛ, bonso ka a yɛlɛ ŋa ba maŋ pɛle Jehoova poɔ?
Kulta-sãã ane kulta-bare ba soma fẽẽ zaa, bonso, a maŋ de la toɔrɔ yaga waneŋ a dɔɔ bee a pɔge naŋ ba taa sããnaa na ne a biiri zuŋ
Ŋmɛ a VIDIO, a kyɛ gyieli a soorebiri naŋ tu na yɛlɛ.
-
Ka hooŋ kuli neɛ kaŋa naŋ ba nɔŋ Jehoova, wala hoŋ na toɔ̃ e ka popeɛloŋ be a kultaa poɔŋ?
7. De bege na Jehoova naŋ biŋ a kyaare kultaa na tonɔ neŋ toma ho kultaa poɔŋ
A ba maŋ e mɔlɔ ka neɛ de bege na Jehoova naŋ biŋ a kyaare kultaa na tonɔ neŋ toma, azuŋ, aseŋ ka te mɔɔ te mɔɔbo zaa kyɛ toɔ̃ e lɛ. c Ka teneeŋ e lɛ, Jehoova na maale teŋ yaga. Ŋmɛ a VIDIO.
Kanne Hiburu 13:4, a kyɛ gyieli a soorebie naŋ tu na yɛlɛ:
-
Ho teɛre ka bege na Jehoova naŋ biŋ a kyaare kultaa na seŋ nɛɛŋ bee? Bonso hoŋ yel lɛ?
Ka hooŋ gaa paalonne mine, ba biŋee bege ka, ka hooŋ boɔrɔ ka ho kpɛ kultaa poɔ, kyɛbee a bare kultaa, aseŋ ka ho tu bege sori kyɛ e lɛ. Jehoova boɔrɔŋ ka Kristabiiri zaa de a bege na a paalonne naŋ biŋ na tonɔ neŋ toma. Kanne Tiitu 3:1, a kyɛ gyieli a soorebiri naŋ tu ŋa yɛlɛ:
-
Ka a gɔmenanteŋ biŋ bege ka a aseŋ ka ho register ho kultaa, ho mɔɛ̃ kyɛ e lɛ?
AMINEKAŊAŊ NEƐ KAŊA NA SOOREŊ KA: “Bonso aŋ seŋ ka te kultaa? Ka teneeŋ kpeɛrɛ aŋa dɔɔ neŋ pɔge ma yelfaa zaa kyebe?”
-
Wala hoŋ na iri a noɔre?
A ZANNOO YELNIMIZEERE
Ka neɛŋ naŋ ba kpɛ kultaa poɔ, lɛ e la kyɔɔtaa naŋ yi Jehoova zie. Lɛ meŋ la ka kultaa e kyɔɔtaa naŋ yi Jehoova zie. Noba naŋ ba kpɛ kultaa poɔ ane noba naŋ kpɛ kultaa poɔ na toɔ̃ taaɛ popeɛloŋ ba zemmo poɔŋ ka banaŋ erɛ Jehoova boɔbo.
Bo Hoŋ Zanne
-
Ka neɛŋ naŋ ba kpɛ kultaa poɔ, sobuo oŋ na toɔ̃ de wagre na oŋ taa na tonɔ neŋ toma soŋ?
-
Bonso ka a Baabole yelka te maŋ kulo te Kristabitaaba yoŋ?
-
A Baabole yeleeŋ ka bo yɛlɛ eŋɛŋ yoŋ la ka dɔɔ bee pɔge na baŋ are kyɛ bare kultaa?
YƐLƐ MINE NAŊ LƐ BEBE
Ka ba naŋ yelka te kulo taa “a Daana eŋɛ” yoŋ, a tɛgɛ la bo?
“Soorebie Naŋ Yi Noba Naŋ Kanna Te Gama Na Zie” (A Watchtower, July 1, 2004)
Kaa a vidiori ayi ŋa a nyɛ yɛlɛ naŋ na toɔ̃ soŋ bo saŋa na hoŋ boɔrɔ ka ho de gbɛre ka ho neŋ pɔge kaŋa, bee dɔɔ kaŋa piili tuuro taa na. A vidio na toɔ̃ lɛ soŋ boŋ ka hooŋ boɔrɔ ka ho de gbɛre a kyaare kultaa yɛlɛ.
Lɛ Hoŋ Na Toɔ̃ E Nare Ho Meŋɛ Sɛre Kyɛ Kpeɛrɛ Kultaa Poɔ (11:53)
Te yɔɔdɔɔ kaŋa da de la yɛlɛ mine iri sareka sɛre kyɛ na toɔ̃ puore Jehoova soŋ, kaa a vidio a nyɛ bon naŋso oŋ teɛre ka Jehoova kooŋ bon naŋ e tegroŋ yaga zaa a gaŋ boma na oŋ de iri sareka na.
Ka neɛŋ boɔrɔ ka o bare o kultaa, bee a wɛle yi o serɛ bee o pɔge zie, bo yɛlɛ aŋ seŋ ka o daŋ de weɛ a teɛre gaa tɔɔre?
“De Nanoo Ko ‘Bonna Naaŋmen Naŋ De Lantaa’” (A Watchtower, December 2018)
a A yi moɔrɔ toma bee peɛ̃mo toma puoreŋ, yɛlɛ mine bebeŋ a na toɔ̃ sãã kultaa bee? Kanne Yɛlɛ Mine Ba Naŋ Wuli A Muni 4 a nyɛ a noɔre iribo.
b A yi paalonne mine poɔŋ, bidɔgrebaŋ maŋ kaa iri kultatɔ ko ba bidɔɔ, bee ba bipɔge. Ka a naŋ waa lɛ paaloŋ na hoŋ be na poɔŋ, bo yɛlɛ aŋ seŋ ka a bidɔgreba maŋ kaa sɛre kyɛ iri kultatɔ ko ba bie na? A ba seŋ ka ba kaara libie o soba naŋ taa, bee arezie o soba naŋ taa. Kyɛ, aseŋ ka ba peɛre a nyɛ ka o soba sereŋ nɔŋɛɛ Jehoova bee. Ka ba naŋ e lɛ, a na wuliŋ ka ba nɔŋɛɛ ba bie na.
c Ka dɔɔ neŋ pɔgeŋ laŋ kpeɛrɛ kyɛ ba kuli taa, a be la ba zieŋ ka ba de gbɛre ka ba na kulee taa, bee ba koŋ kultaa.
