TOLI 42
San Beibel e taki fu sama di toow anga sama di á toow?
Aini son kondee, sama e si enke a te wan sama toow wawan aw man de koloku. Ma a ná ala sama di toow e de koloku. Boiti dati, son sama di á toow e piisii. Beibel taki winsi i toow efuso ya toow, i poi de koloku.
1. San a wantu wini di a abi te wan sama á toow?
Beibel taki: ‘Efu wan sama toow, a wan bun sani a du, ma a sama di á toow e du wan moo bun sani.’ (Leisi 1 Korentesama 7:32, 33, 38.) Saide u sa taki wan sama di á toow ‘e du wan moo bun sani’? Wan sama di á toow naabi toowpaa di a mu booko en ede anga en. Neen meke a omen sani a abi a okasi fu du. Wan sama di á toow sa du moo gi Yehofa. A sa go yeepi a peesi pe moo peleikiman de fanowdu. A moo abi ten fu du sani di o yeepi en fi en anga Yehofa toon mati.
2. Sowtu wini a abi te wan sama toow?
A omen wini a toowlibi abi. Beibel taki ‘tu sama bun moo wan’ (Peleikiman 4:9). Te tu sama di toow e wooko anga san Beibel taki, a omen wini den e fende. Wan man anga wan uman di toow, e paamisi denseefi a lanti fesi taki den o lobi denseefi den hii libi langa. Den o lesipeki denseefi tu. Te tu sama toow, a sani ya e yeepi den fu den fitoow denseefi, moo enke te tu sama e libi anga denseefi sondee fu toow. Ai moo makiliki gi den fu kiya den pikin fu den tu.
3. Fa Yehofa e si a toowlibi?
Di Yehofa toow a fosi man anga uman, a taki: ‘Wan man o gwe fika en mma anga en dda. Aw tan anga en uman’ (Genesesi 2:24). Yehofa wani man anga uman lobi denseefi. A wani den tan anga denseefi den hii libi langa tu. A te wan fu den toowpaa waka gi a taawan fosi den sa booko a toow. Ma Yehofa taki na a sama di naabi a fowtu, mu taki efu a wani booko a toow (Mateyesi 19:9). a Yehofa á lobi te wan man abi moo enke wan uman efuso wan uman abi moo enke wan man.—1 Timotiyesi 3:2.
LUKU A TOLI YA MOO FINI
Meke u luku san o yeepi i fu piisii winsi i toow efuso ya toow. Wo si tu faw sa meke Yehofa piisii winsi wa toow.
4. Koboloiki a pisiten di ya toow a wan bun fasi
Yesesi be e si a toow di wan sama á toow enke wan kado (Mateyesi 19:11, 12). Leisi Mateyesi 4:23, da i luku efii poi piki a akisi ya:
-
A pisiten di Yesesi be de a goontapu aa be toow. Fa a sani ya be yeepi en fu du a wooko di en Dda be gi en anga fu yeepi taawan?
Leti enke Yesesi sama di á toow sa piisii te den e koboloiki den ten a wan bun fasi. Pee a FELON, da i luku efii poi piki a akisi ya.
-
Fa Kelesten di á toow sa koboloiki den ten a wan fasi di o meke den piisii?
I be sabi a sani ya?
Beibel nai taki omen yali wan sama mu abi fosi a sa toow. Ma Beibel e taigi u taki wan sama di o toow, á mu yonkuu tumisi. Te wan sama yonkuu tumisi den seks fii fi en e taanga. Neen meke ai taanga gi en fu teke bun bosoloiti.—1 Korentesama 7:36.
5. Luku bun anga sama yo toow
Te i piki wan sama taki yo toow anga en, a wan fu den moo gaan sani di yo du aini i libi. Leisi Mateyesi 19:4-6, 9, da i luku efii poi piki a akisi ya:
-
Saide wan Kelesten á mu feti fu toow?
Beibel e taigi u san a wantu pelensipali manii di wan sama di i wani toow anga en mu abi. Ma a moo pelensipali sani, i mu suku wan sama di lobi Yehofa. b Leisi 1 Korentesama 7:39 anga 2 Korentesama 6:14, da i luku efii poi piki den akisi ya:
-
Saide anga wan sama di e dini Yehofa wawan u mu toow?
-
Fa Yehofa be o fii efu wan Kelesten toow anga wan sama di nai dini en?
Efu tu meti di á bigi aseefi e sow wan tyatyali, ala den tu man o fooseli. Efu wan Kelesten toow anga wan sama di nai dini Yehofa, a letiso aw lai polobelema tu
6. I mu e si a toowlibi enke fa Yehofa e si en
Aini a ten fu den Islayelisama den man be e booko toow anga den uman fu lawlaw sani ede. Leisi Maleyaki 2:13, 14, 16, da i luku efii poi piki a akisi ya:
-
Saide Yehofa e buuse a booko di sama e booko toow fu lawlaw sani ede?
Te wan sama waka gi en toowpaa, efuso a booko a toow, ná pikin hati ai hati a taa toowpaa anga den pikin
Pee a FELON, da i luku efii poi piki a akisi ya.
-
Efii man efuso uman nai dini Yehofa, sai sa du fu a toowlibi waka bun?
7. Wooko anga den weiti fu Yehofa te i toow
A ná ala yuu a makiliki fu wooko anga den weiti fu Yehofa aini a toowlibi. c Ma Yehofa e belesi den sama di e meke muiti fu du a sani ya. Pee a FELON.
Leisi Hebrewsama 13:4, da i luku efii poi piki a akisi ya:
-
I si enke den weiti fu Yehofa di abi fu du anga a toowlibi taanga tumisi? Saide i taki so?
Te tu sama toow, Yehofa wani den sikiifi den nen poti a lanti buku. Na aseefi sani mu pasa tu te den booko-toow. Aini omen kondee efu den á du a sani ya, lanti nai si den enke sama di toow. Leisi Titesi 3:1, da i luku efii poi piki a akisi ya:
-
Efii toow, i sabi efu lanti sabi taki i toow tuutuu?
KANDE WAN SAMA AKISI I TAKI: ‘Solanga den gaansama fu u sabi taki we libi, aa de fii toow namonamo.’
-
Fai be o piki sowan sama?
SAI LELI?
Efii toow efuso ya toow i sa abi wan bun libi solanga ye libi enke fa Yehofa wani.
Sai be o piki?
-
Fa wan sama di á toow sa koboloiki en ten a wan bun fasi?
-
Saide Beibel taki anga wan sama di e dini Yehofa wawan i mu toow?
-
Enke fa Beibel e soi, da san na a wan kodo sani di sa meke wan sama booko-toow?
MOO SANI FU A TOLI YA
San a wani taki fu toow aini Masaa?
‘Sani di leisiman akisi’ (A Saanantongo Wakititolen fu 1 yuli 2004)
Luku den tu felon ya. Den o yeepi i fu du sani anga koni te i mu luku anga sama yo toow.
Luku a felon ya, da yo si den wini di wan baala fende di a fika wan uman fu Yehofa ede.
San wan sama mu teke ten pakisei fosi a paati efuso booko-toow?
‘Lesipeki san Gadu tyai kon a makandii’ (A Wakititolen december 2018)
a Luku Ete wantu sani 4, da yo si san mu pasa te wan toowpaa paati sondee fu wan fu den waka gi denseefi.
b Aini son kondee, na a mma anga a dda e suku wan sama gi a pikin fu den. Efu a so a de na a pisi pe ye tan, da i mma anga i dda mu suku wan sama di lobi Yehofa. Den á mu luku efu a sama gudu, efu a abi balinen.
c Efu tu sama e libi sondee fu toow, a den tu man mu luku efu den wani toow efuso paati.
