JOKWA 42
Nje Bibe̱l e makwalano̱ jombwea be̱ la mulamba na diba e?
O bepolo bō̱, bato ba mo̱nge̱le̱ ná moto a titi ná a be̱ bonam yete̱na a si bai to̱ babe̱. Nde seto̱ bato be̱se̱ ba bai to̱ ba babe̱ nde be bonam, seto̱ pe̱ to̱ bato be̱se̱ be mulamba nde ba titi bonam. Mbale̱ ńe nde ná Bibe̱l e makwala ná be̱ la mulamba na diba be nde mabea ma Loba.
1. Njika tombwane̱ le o be̱ mulamba e?
Bibe̱l e makwala ná nu nu maba “a mabola bwam,” nde ná nu nu si maba “a mabola bwam buka nika.” (Langa 1 Korinto 7:32, 33, 38.) O njika mbadi moto ńe mulamba a mabolano̱ “bwam buka nika” e? Kriste̱n ye mulamba i si be̱n mome to̱ muto yangame̱nno̱ jombwea. Ye so̱ wonja buka yi i bai to̱ i babe̱. K’eyembilan, iwo̱ ye ná i lańse̱ ebol’abu ya dikalo o mbadi jita, ka wala te̱ dikalo la myango ma bwam o mindi mipe̱pe̱. Omo̱ń a me̱se̱, ye ná i tombise̱ ponda jita o jouse̱ diko̱m labu na Yehova.
2. Njika tombwane̱ le ke̱ mome na muto ba latise̱ diba labu e?
Tombwane̱ le o diba kana leno̱ pe̱ o be̱ la mulamba. Bibe̱l e makwala ná “baba ba do̱li buka mō̱ na mune.” (Mulangwedi 4:9) Nika ńe mbale̱ tobotobo ońola kriste̱n i mabupe̱ bete̱sedi ba Bibe̱l o diba labu. Mome na muto bena ba malatise̱ diba ba mano̱ngo̱ nde ngaban o to̱ndo̱ne̱ na o bola mō̱ na nune̱ edube. Nik’e mabola ná mulema mu mabe̱ babo̱ musango buka ba bena ba jai nde mwemba esibe̱ latise̱ diba. Diba labu di maboka pe̱ nde mboa ńe mbo̱le̱ ońola bana ba me̱nde̱no̱ be̱ne̱.
3. Ne̱ni Yehova a me̱ne̱no̱ diba e?
Ponda Yehova a latise̱no̱ diba laboso, a kwali ná: “Moto a me̱nde̱ dia sango na ńango, a tingame̱ na munj’ao.” (Bebotedi 2:24) Yehova a mapula ná babaedi ba to̱ndo̱ne̱, ba tingame̱ pe̱ mō̱ na nune̱ etum te̱ beno̱ longe̱. A memea nde ná kwed’a diba e be̱ buka te̱ ke̱ mō̱ ńabu a wite̱ musonje. Nik’e bolan te̱, Yehova a mabola nu nu si be̱n njo̱m wonja o bwa diba to̱ ke̱m. a (Mateo 19:9) Yehova a si mabola kriste̱n wonja o ba bito jita.—1 Timoteo 3:2.
ALA O NJIBA
Okwa ne̱ni weno̱ ná o be̱ bonam o bwese̱ pe̱ Yehova muńe̱nge̱, e be̱ ná we mulamba to̱ ná o bai to̱ o babe̱.
4. Bolane̱ jabea la be̱ mulamba bwam
Yesu a ta nde e̱ne̱ be̱ la mulamba ka jabea. (Mateo 19:11, 12) Langa Mateo 4:23, nde lo kwaleye pe̱ ońola min myuedi:
-
Ne̱ni Yesu a bolane̱no̱ jabea la be̱ mulamba o bolea Sango ao na o jongwane̱ bape̱pe̱ e?
Kriste̱n ye ná i be̱ bonam ke̱ i bolane̱ be̱ labu la mulamba kapo̱ ka Yesu. Ombwa SINIMA, nde lo kwaleye pe̱ ońola myuedi mi mabupe̱.
-
O njika mbadi i mawane̱ bonam kriste̱n yeno̱ ná i bolane̱ be̱ labu la mulamba e?
Mo̱ o ta o bia nika e?
Bibe̱l e si mate̱se̱ botea njika mimbu moto eno̱ ná a ba to̱ babe̱. Nde e mome̱le̱ ná moto enge̱le̱ natē̱ “pond’a diba” e po̱, ke̱ a mátomba ponda ńo̱ng’a lata ńe ngińa ńeno̱ ná e bola ná e be̱ eso̱mbe̱ ndutu o no̱ngo̱ bedomsedi ba bwam.—1 Korinto 7:36.
5. Po̱so̱ mom’ango̱ to̱ munj’ango̱ na dibie̱
Po̱so̱ la mom’ango̱ to̱ munj’ango̱ le nde bedomsedi bō̱ ba be be mweńa buka be̱se̱ o be̱nno̱ ná o no̱nge. Langa Mateo 19:4-6, 9, nde lo kwaleye pe̱ ońola min myuedi:
-
Ońola nje kriste̱n ńangame̱nno̱ no̱ngo̱ ponda o dutea obiana e maba to̱ babe̱ e?
Bibe̱l ńe ná ńongwane̱ wa o bia njika bede̱mo be mabole̱ ná moto a be̱ mom’a bwam to̱ mut’a bwam. Ka lambo laboso, wasa nde mome to̱ muto nu to̱ndi Yehova. b Langa 1 Korinto 7:39 na 2 Korinto 6:14. Ombusa nika kwalea ońola min myuedi:
-
Ońola nje jangame̱nno̱ nde ba to̱ babe̱ na muboled’a Yehova buka te̱ e?
-
O mo̱nge̱le̱ ná Yehova a masenga nde ne̱ni ke̱ di bai to̱ di babe̱ na moto nu si to̱ndi mo̱ e?
Byembe beba be diwengisan be te̱ o mulemlem m’eko̱ko̱so̱ be mataka. Nika pe̱ nde kriste̱n ni maba moto nu si mowe̱ Yehova e me̱nde̱no̱ kusa mitakisan jita
6. E̱ne̱ diba kana Yehova a me̱ne̱no̱ mo̱
O Israel ńa kwaṅ bome bō̱ ba ta ba to̱bo̱ bito babu, ońolana ba ta nde ba wasa bwam ba babo̱me̱ne̱. Langa Maleaki 2:13, 14, 16, nde lo kwaleye pe̱ ońola min myuedi:
-
Ońola nje Yehova a singe̱no̱ ná bato ba bwe diba ońola njo̱m i si se̱medi o Bibe̱l e?
Musonje na kwed’a diba ba mabwese̱ mubaedi nu si be̱n njo̱m na bana ndutu
Ombwa SINIMA, nde lo kwaleye pe̱ ońola myuedi mi mabupe̱.
-
Yete̱na mom’ango̱ to̱ munj’ango̱ a titi muboled’a Yehova, nje weno̱ ná o bola ná diba lańu di tongwe e?
7. We̱le̱ bete̱sedi ba Yehova ońola diba o ebolo
Ye ná e pula ná moto a po̱nge miwe̱n jita ná a we̱le̱ bete̱sedi ba Yehova ońola diba o ebolo. c Nde Yehova a manamse̱ ba bena ba mapo̱nge̱ mi miwe̱n. Ombwa SINIMA.
Langa Bonahebe̱r 13:4, nde lo kwaleye pe̱ ońola min myuedi:
-
Mo̱ o mo̱nge̱le̱ ná bete̱sedi ba Yehova ońola diba be te̱nge̱n e? Ońola nje pe̱ o makwalano̱ nika e?
O jita la bekombo manea ma te̱se̱ ná bato ba be̱ne̱ mapapa ma diba na ma kwed’a diba. Yehova a mengane̱ kriste̱n ná i bupe̱ ma mambenda. Langa Tito 3:1, nde lo kwaleye pe̱ ońola min myuedi:
-
Yete̱na o bai to̱ o babe̱, mo̱ we mbaki ná diba lo̱ngo̱ di be̱n mapapa ma go̱bina e?
MOTO E NÁ A BAISE̱ NÁ: “Mo̱ mome na muto ba maje̱ mwemba be eto̱m o latise̱ diba e?”
-
O me̱nde̱ nde jalabe̱ ná nje e?
EBONGOLO
Be̱ la mulamba na diba be nde mabea ma Yehova. Ma mabea mabane̱ me ná ma bola ná bato ba be̱ muńe̱nge̱ na bonam, yete̱na ba bupe̱ bete̱sedi ba Yehova.
Ndimbisedi
-
Ne̱ni moto eno̱ ná a bolane̱ be̱ lao la mulamba bwam e?
-
Ońola nje Bibe̱l e makwalano̱ ná di ba to̱ babe̱ nde buka te̱ na moto nu mowe̱ Yehova e?
-
Nje ye mpo̱m ma njo̱m a kwed’a diba ni se̱medi o Bibe̱l e?
BATA WASA
Nje ba to̱ babe̱ “o Sango mo̱me̱ne̱” di mapulano̱ kwala e?
“Myuedi ma balangedi” (Njongo a Betatedi, Madibe̱dibe̱ 1, 2004)
Ombwa sinima iba yena ye ná yongwane̱ wa o no̱ngo̱ bedomsedi ba bwam jombwea yengea la moto ońola diba na diba.
E̱ne̱ ońola nje munasango mō̱ a mo̱nge̱le̱no̱ ná nje Yehova a bolino̱ mo̱ ye mweńa jita buka nje ye̱se̱ ese̱le̱no̱.
Njika mambo mō̱ moto angame̱nno̱ se̱le̱ jombwea yete̱na a mo̱nge̱le̱ o bwa diba to̱ jabane̱ e?
“Lee̱le̱ edube ońola ‘di Loba a latino̱’ ” (Njongo a Betatedi, Elaṅe̱ 2018)
b O bepolo bō̱, bayedi nde ba mapo̱se̱ muto ońola mun’abu ńa mome, mome pe̱ ońola mun’abu ńa muto. Ye te̱ nika, nje bayedi be ndolo ba me̱nde̱no̱ jombwea ye nde nga nu mome to̱ nu muto a to̱ndi Yehova, seto̱ mo̱ni mao to̱ dina la mbia mao.
c Yete̱na o maja na moto esibe̱ ná lo bane̱, wame̱ne̱ nde o be̱n ná o no̱nge bedomsedi ba jese̱le̱ mo̱ to̱ latise̱ diba lańu.
