KALANSEN 42
Bibulu be mun lo fɔ furu ani furubaliya koo la?
Dɔw b’a miiri ko n’i ma furu, i tɛ se ka hɛɛrɛ sɔrɔ. Nka koow b’a yira ko minw furula, u bɛɛ lo tɛ hɛɛrɛ la. Ani minw ma furu, u bɛɛ lo tɛ ninsɔngoya la. Bibulu b’a fɔ ko furu ani furubaliya ye Jehova ka nilifɛnw ye.
1. Nafa jumanw be cɛgwanaya wala musogwanaya la?
Bibulu b’a fɔ ko: “Mɔgɔ min be furu, o tigi ye koɲuman kɛ. Min ma furu fana, o tigi ye koɲuman kɛ kosɔbɛ.” (1 Korɛntikaw 7:32, 33, 38 kalan). Mun na a fɔra ko mɔgɔ min ma furu, “o tigi ye koɲuman kɛ kosɔbɛ”? Komi a furunin tɛ, a bolo labilanin lo sabu gwa kɔnɔ kunkanbaaraw t’a kun. Misali la, a ka nɔgɔ a ma ka yɛlɛma yɔrɔ wɛrɛ la walisa ka dɛmɛ don kibaro diiman waajuli baara la. Min yɛrɛ kɔrɔtanin lo, o ye ko wagati caaman b’a fɛ k’a magwɛrɛ kosɔbɛ Jehova la.
2. Nafa jumanw b’a la k’i ka furu siri faamanw fɛ?
Nafa be furu la fana. Bibulu b’a fɔ ko “mɔgɔ fila ka fisa mɔgɔ kelen ye.” (Waajulikɛla 4:9). O kuma ye tiɲɛn ye sanko ni furuɲɔgɔnmaw be Bibulu ka sariyakolow sira tagama. Minw b’u ka furu siri faamanw fɛ, u b’u daa di ɲɔgɔn ma k’u bena ɲɔgɔn kanu, ka ɲɔgɔn bonya ani ka ɲɔgɔn ladiya. O kama, u hakili siginin lo u ka furu kɔnɔ. Ani, deen minw sɔrɔla o furu kɔnɔ, o deenw be se ka lamɔ gwa hɛɛrɛman kɔnɔ. Nka minw siginin be ɲɔgɔn fɛ ten dɔrɔn, olu tɛ se k’o hakilisigi ɲɔgɔn sɔrɔ.
3. Jehova ka miiriya ye mun lo ye furu koo la?
Tuma min na Jehova ye furu fɔlɔ siri, a y’a fɔ ko: “Cɛɛ ben’a faa n’a baa to yen ka nɔrɔ a muso la.” (Zɛnɛzi 2:24). Jehova ko furucɛ n’a muso ka ɲɔgɔn kanu ani ka to ɲɔgɔn fɛ u sii bɛɛ la. Jehova tɛ sɔn furu ka sa fɔɔ ni u la dɔ ye ɲamɔgɔya kɛ. O la, a be sira di furuɲɔgɔn jalakibali ma a k’a latigɛ n’a bena a ka furu sa a (Matiyo 19:9). Jehova tɛ sɔn muso caaman furu ma.—1 Timote 3:2.
A ƝINI KA DƆ LƆN TUGUN
I furunin lo wo, i furunin tɛ wo, a filɛ i be se ka ninsɔndiya sɔrɔ cogo min na ani ka Jehova ninsɔndiya fana.
4. A ɲini ka nafa sɔrɔ i ka furubaliya koo la
Yezu tun be furubaliya jati nilifɛn ye (Matiyo 19:11, 12). Matiyo 4:23 kalan. O kɔ, a’ ye ɲiningali nin kɛ ani ka baro kɛ o kan:
-
Yezu tun furunin tɛ minkɛ, o y’a dɛmɛ cogo di k’a Faa sago kɛ ani ka mɔgɔw dɛmɛ?
Kerecɛn minw furunin tɛ, olu fana be se ka Yezu ladegi. A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
-
Kerecɛn minw furunin tɛ, u be se ka koo nafaman jumanw lo kɛ?
I b’a lɔn wa?
Bibulu t’a fɔ mɔgɔ ka ɲi ka sanda min sɔrɔ ka sɔrɔ ka furu. Nka, a be mɔgɔ jija a ka kɔnɔni kɛ fɔɔ wagati min na a “npogotigilama tɛmɛnna.” N’o tɛ, cɛnimusoko nege be se ka gwan a la ani k’a to a tɛ desizɔn ɲumanw ta.—1 Korɛntikaw 7:36, Bible senuma.
5. I furuɲɔgɔn sugandi ni hakilitigiya ye
Desizɔn minw kɔrɔtanin lo kosɔbɛ mɔgɔ ka ɲɛnamaya kɔnɔ, u la dɔ ye k’i furuɲɔgɔn sugandi. Matiyo 19:4-6, 9 kalan. O kɔ, a’ ye ɲiningali nin kɛ ani ka baro kɛ o kan:
-
Mun na kerecɛn ka kan ka wagati ta ka miiri koɲuman ka sɔrɔ ka furu?
Bibulu b’a yira jogo minw ka ɲi ka sɔrɔ furuɲɔgɔn ɲuman na. Jogo min kɔrɔtanin lo ka tɛmɛ u bɛɛ kan, o ye ko a tigi be Jehova kanu. b 1 Korɛntikaw 7:39 ani 2 Korɛntikaw 6:14 kalan. O kɔ, a’ ye ɲiningali nunu kɛ ani ka baro kɛ u kan:
-
Mun na an ka ɲi k’an furuɲɔgɔn sugandi Jehova batobagaw dɔrɔn lo cɛma?
-
N’an y’a latigɛ ka mɔgɔ dɔ furu min tɛ Jehova kanu, Jehova bena mun lo miiri o la?
N’u ye bɛgɛn sifa fila bila zuu kelen na, u bena tɔɔrɔ le! O cogo kelen na, ni kerecɛn ye dannabali dɔ furu, a bena gwɛlɛya caaman sɔrɔ.
6. A ɲini ka kɛ ni Jehova ka miiriya ye furu koo la
Galen Israɛl jamana na, cɛɛ dɔw tun b’u muso ka furu sa k’a sɔrɔ kuun bɛrɛ t’o la. Malasi 2:13, 14, 16 kalan. O kɔ, a’ ye ɲiningali nin kɛ ani ka baro kɛ o kan:
-
Ka furu sa k’a sɔrɔ kuun bɛrɛ t’o la, mun na o ka gwo Jehova ye?
Ɲamɔgɔya ni furusa be furuɲɔgɔn jalakibali ani denmisɛnw tɔɔrɔ kosɔbɛ.
A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
-
N’i furuɲɔgɔn tɛ Jehova sagokɛla dɔ ye, i be se ka mun lo kɛ walisa ka hɛɛrɛ sɔrɔ i ka furu kɔnɔ?
7. Jehova ka cikanw labato furu koo la
Ka se ka Jehova ka cikanw labato furu koo la, tuma dɔw la o tɛ ɲɛ jijaliba kɔ. c Nka minw b’o kɛ, Jehova b’u duga. A’ ye VIDEWO filɛ.
Eburuw 13:4 kalan. O kɔ, a’ ye ɲiningali nunu kɛ ani ka baro kɛ u kan:
-
Jehova ye cikan minw di furu koo la, e ka miiri la, u bɛnnin lo wa? Mun na i ko ten?
Jamanaw fanba la, furusiri ani furusa koow ka ɲi ka ɲɛnabɔ faamanw lo fɛ. Jehova b’a ɲini kerecɛnw fɛ u k’o sariyaw labato. Titi 3:1 kalan. O kɔ, a’ ye ɲiningali nin kɛ ani ka baro kɛ o kan:
-
N’i furunin lo, i ka furusiri kɛra faamanw lo fɛ wa?
NI MƆGƆ DƆ Y’I ƝININGA KO: “Mun na an ka ɲi k’an ka furu siri? An tɛ se ka sigi ɲɔgɔn fɛ ten dɔrɔn wa?”
-
I bena a tigi jaabi cogo di?
MIIRIYA JƆNJƆN
Furu ani furubaliya ye Jehova ka nilifɛnw lo ye. I furunin lo wo, i furunin tɛ wo, i be se ka ninsɔndiya sɔrɔ n’i b’i ka ɲɛnamaya kɛ Jehova sago la.
I ye mun lo faamu?
-
Furubaliya be se ka mɔgɔ nafa cogo di?
-
Mun na Bibulu b’a fɔ ko an ka ɲi k’an furuɲɔgɔn sugandi Jehova batobagaw dɔrɔn lo cɛma?
-
Bibulu ka fɔta la, koo kelenpe juman lo be se ka kɛ furusa sababu ye?
NUNU LAJƐ FANA
K’i ka furuɲɔgɔn sugandi “dannabaaw cɛma dɔrɔn,” o kɔrɔ ko di?
“Questions des lecteurs” (Saan 2004, zuwekalo tile fɔlɔ ka Kɔrɔsili Sangaso)
Ka teriya kɛ ni mɔgɔ dɔ ye furu kama wala ka furu, videwo nin be ladili nafaman dɔw di o koo la.
A filɛ Jehova ye balimacɛ dɔ duga cogo min na sabu a ye koow latigɛ ni jagwɛlɛya ye.
Mɔgɔ ka ɲi ka miiri mun lo la fɔlɔ ka sɔrɔ k’a latigɛ n’a bena faran a furuɲɔgɔn na wala n’a bena a ka furu sa?
“Bonya la furu kan” (Saan 2018, desanburukalo ka Kɔrɔsili Sangaso)
a Ka faran i furuɲɔgɔn na k’a sɔrɔ ɲamɔgɔya ma kɛ, Kunnafoni wɛrɛw no 4 lajɛ o koo la.
b Yɔrɔ dɔw la, bangebagaw lo be furuɲɔgɔn sugandi u deenw ye. N’o lo, bangebaga ɲumanw ka ɲi k’u janto min na, o ye k’a filɛ n’a tigi be Jehova kanu. Wariko wala a tigi lɔyɔrɔ lo man kan ka kɛ u ɲɛnako fɔlɔ ye.
c Ni e ni mɔgɔ dɔ siginin be ɲɔgɔn fɛ k’a sɔrɔ aw ma furu faamanw fɛ, e lo ka ɲi k’a latigɛ n’aw bena ɲɔgɔn bila wala n’aw bena aw ka furu siri.
