AYÈGÈ 42
Dzé Bibel a dzo é bebege étié nkoé ai belug?
Abui mevom, bot be bele fulu ya tsog na asu yi na o tòbò mintak, wò yeane tòbò nlugen. Dzam da, belug bezing be ne bingongòl ve minkoé be toa a mintak éteré. Mfaa woé Bibel a lere na, étié nkoé ai alug bise bi ne éfaa Zamba.
1. Nfi mbé é mot a ne nkoé a bele?
Bia lang a Bibel na: “é mot a lug a bò mbeng, ve ényò a lug ki nnye a dang bò mbeng” (Langʼa 1 Kòrinti 7:32, 33, 38). Asu dzé Bibel a dzo na é mot a ne nkoé nnye “a dang bò mbeng”? Mbol a seki nlugen, a bele abui abog. A ne ébugubu asu dié na a nòng ntsigen ya ke bò ésié ékat foé a nnam mfe ngeki abora si afe. A dang dang fe na, a bele abui abog asu yi na a wono amvoé dié ai Yéhova.
2. Nfi mbé é mot a ne nlugen a bele?
Dzam deda ane étié nkoé, alug a bele fe nfi woé. Bibel a dzo na “bot bebè be ne mbeng aloro mbòk” (Ékklésiast 4:9). Nala a dang yené éyòng belug ba baala memvéndé ya Bibel. É fam ai é mininga ba lug, ba nòng ntsigen ya dingʼen ai a bi ésémé a zang dzaba. Minnem mi boo bò a si amieng aloro é ba ba nying fufulu ve tegè ai bò nlugen. Nde fe, élat dzaba ya bò na bòn baba be nying évovoé éteré.
3. Yéhova a yen alug akia afé?
Éyòng Yéhova a nga lat alug osu a nga dzo na: “Asu té nde fam ya yi lig ésia ban nnyia a ke lat ai ngal” (Yénésis 2:24). Yéhova a yi na fam ai mininga be dingʼen, be baala fe élat dzaba ntié ose be ngene be vee. Yéhova a ne yebe na alug a tsamben nge he nlug mbòk a he bò ngòbinda. Nge nala a kui, Yéhova a ve nlug a ndziki sem ngul yi na a ne tsam alug daba a (Matéus 19:9). Yéhova a yebe ki alug mbama (1 Timotéus 3:2).
TUENE FAG
Bi tam yen ane minkoé ai belug be ne dzam tòbò mintak, ai a fû Yéhova nnem.
4. O ne nòng nfi étié nkoé dzoé
Asu Yésus, étié nkoé é ne éfaa (Matéus 19:11, 12). Langʼa Matéus 4:23 ai yalen a nsili hi:
-
Akia afé Yésus a nga belen ai étié nkoé dzié asu yi na a bò Ésia woé ésié a vòligi fe é bot bevòk?
Ane Yésus, kristen é ne dzam bi mintak étié nkoé dzié. Bebege VIDÉO ai yalen a nsili hi:
-
Ye o mbe yeme dò?
Tò ane Bibel a tsig ki nguma okala ya mot a yeane bi asu yi na a lug, a leb bia na é mot a yi na a lug a yeane yanga na a lot étié ba loé na “okala énanga” abog ya ngong bisok é ne ngul abui akia yi na a seki tuene yem tòb é mot a yi lug (1 Kòrinti 7:36).
• Bisié bifé bia ve mintak a bekristen be ne minkoé be ne dzam buguben ai biè?
5. Tuene tòb é mot mina ai nyè mia yi lug
A tòb é mot wò yi lug o ne ngul ntsigen dzia wò yi nòng énying dzoé. Langʼa Matéus 19:4-6, 9 ai yalen a nsili hi:
-
Asu dzé kristen ya yeane nòng abog ya tuene fas osusua yi na a lug?
Bibel a vòli bia na bi yem mimbembe mefulu bia yeane dzeng abe é mot bia yi na bia lug. É fulu osu é toa na, mot té a yeane ding Yéhova nya ndingʼen b. Langʼa 1 Kòrinti 7:39 ai 2 Kòrinti 6:14, ai yalen minsili mi tsaa mi:
-
Asu dzé wò yeane lug ve ai mbò ésié Yéhova?
-
Wò yen ya, dzé Yéhova a woren éyòng kristen ya nòng ntsigen na a lug é mot a sié ki nyè?
Nge ba bamen betsit ba selen mengul, ése ébè ya dzugi. Dzam deda fe nge wò lug ai é mot a sié ki Yéhova, wò yi dzugi
6. Yene alug akia ya Yéhova a yen dò
A nga kui abog zing ayòng Israel na, befam be tsam melug akia ba ding. Langʼa Malakias 2:13, 14, 16 ai yalen a nsili hi:
-
Asu dzé Yéhova a kili na te ba tsam alug asu bamu be seki a Bibel?
Ngòbinda ai ntsamen alug bia zu ai abui mindzug
Bebege VIDÉO ai yalen a nsili hi:
-
Nge o ne nlugen ai é mot a sié ki Yéhova, dzé o ne dzam bò asu yi na alug doé a wulu mbeng?
7. Tongʼo memvéndé me Yéhova me bebege alug
Mbol yi na o tong memvéndé me Yéhova me bebege alug, da sili na o ve mengul c. Ve é mot a tong mò a yi bi bemaa ba sò abe Yéhova. Bebege VIDÉO.
Langʼa Hébréa 13:4 ai yalen minsili mi tsaa mi:
-
Ye memvéndé me Yéhova me bebege alug me ne susuo? Asu dzé wò dzo nala?
Abui minnam, memvéndé me ne a ma bebe élat melug ai ntsamen melug. Yéhova a yi na bekristen be baala memvéndé meté. Langʼa Titus 3:1 ai yalen a nsili hi:
-
Nge o ne nlugen, ye ngòmena a yem fò alug doé ngaa?
MOT A NE WÒ DZAM SILI NA: “Asu dzé bia yeane lug? Ye bi seki dzam tòbò nala?”
-
Wò yi yalen ya?
OBALBAS
Étié nkoé ai é dzi alug bi ne éfaa ya sò abe Yéhova. Bi ne dzam bi mintak a bitié bité bibè nge bia tong memvéndé me Yéhova.
Dzé bia baala
-
Akia afé é mot a ne nkoé a ne dzam nòng nfi étié dzié?
-
Asu dzé Bibel a dzo na o lug ve nyène ai é mot a sié Yéhova?
-
Bibel a lere na dzé étam é ne bò na mot a tsam alug?
O NE FE BEBE
Dzé ya tilen na a lug ve “abe Nti”?
“Questions des lecteurs” (La Tour de Garde, 1er juillet 2004)
Bebege abeng melebega Bibel a ve me bebege alug é vidéo é ne mengab mebè nyi.
Yene akia ya Yéhova a nga maa é madzang a nga tòbò azombo.
Dzé wò yeane tam fas osusua yi na wò tsam alug nge a kèène ai é mot mina ai nyè mi ne nlugen?
“Honore ‘ce que Dieu a uniʼ” (La Tour de Garde, décembre 2018)
a Bebege atòn 4 ya ngab é ne nlo adzo na “É mam wò yeane yem” a da lere bamu be ne bò na belug be tam kèène tò mbòk ya abe bò a ndziki bò ngòbinda.
b Bevom bebondé mbò ba yeane tòb é mot a yi lug mòn waba, ba yeane tari dzeng na be yem nge mot té a ding Yéhova. Ba yeane ki dang bebe é mòni ai akuma mot té a bele ngeki nkong woé.
c Nge o toa ai é mot mina ai nyè mi seki nlugen, wò wò yeane nòng ntsigen nge wò yi kèène ai nyè ngeki na mina yi lug.
