KAPITE 42
Le Manatu a Le Tosi-Tapu o Uiga Mo Le Nofo Selipatea Ti Mo Le Nofo Āvaga
I ʼiki agaifenua, e manatu le kakai e tonu ke lotou āvaga ke lotou fiafia ai. Kae e iai a ʼiki kakai ku āvaga, e lotou maʼuli mamae kae ko lātou e nofo selipatea e lotou maʼuli fiafia. E pati i le Tosi-Tapu, ko le nofo selipatea mo le nofo āvaga ko ni neʼa alofa mei le Atua.
1. Koā mālilie e tou maʼua mei le nofo selipatea?
E pati i le Tosi-Tapu: ‘Ko le tagata leia e āvaga e fai e ia se tonu e mālie, kae ko leia e leʼese āvaga e fai e ia se tonu e toe mālie ake.’ (Lau 1 Kolinito 7:32, 33, 38.) Koleā leia e pati ai ko se tasi e nofo selipatea e fai e ia se tonu e toe ‘mālie ake’? Talie e leʼese iai ni ona maʼua fakafāmili. E leʼese sona āvaga ko ia leia e lauātea ai. E mafai ke lasi ake lona temi ki lana tausi kia Seova. Sakinake la, e mafai ke ano o fakasā le logo mālie i se tasi ake fenua. Ko ia e lasi ake le temi e maʼua e se tasi e nofo selipatea ke fakafeofi ai kia Seova.
2. Koā mālilie e tou maʼua mei le nofo āvaga?
E iai a mālilie o le nofo āvaga o fai pe le nofo selipatea. E pati i le Tosi-Tapu: “E malie ake le toka lua i le toka tasi.” (Ekelesiasi 4:9) E māʼoki le koga lenā mo kāpau e maʼuliʼi e le taumātuʼa a pelesepeto o le Tosi-Tapu. E fakapapau e le tagata mo le fafine āvaga ke lā fealofani ti mo lā fefakaʼapaʼapaʼaki. Ko ia e makeke ake ai lalā fefānakiʼaki o leʼaise fai pe se fa tokalua e maʼuli fakatasi kae lekise lā āvaga. Ti ka āvaga se taumātuʼa, e toe tokoi ki le maʼuli mālie o alā fānau.
3. Koleā le manatu a Seova o uiga mo le nofo āvaga?
I le fakatapuʼi e Seova le ʼuluaki taumātuʼa, na pati feneʼeki aia: “Ke mavae loa le tagata i lona tamana mo lona tinana, ti ke pipiki loa a ia ki lana avaga.” (Senesi 2:24) E loto a Seova ke fealofani a tagata mo fafine āvaga, ti ke lā maʼuli fakatasi o kaku ki le mate. E fakataga faʼi e ia le māvete, mo kāpau e faifeʼauʼaki se tasi ia lāua. E tuku e Seova kiate ia leia na leʼaise ʼagasala, ke ʼaga aia o filifili pe lā māvete pe leʼai. a (Mateo 19:9) E leʼaise tali e Seova ke āvaga le kau Kilisiteano mo ni fafine e tokaʼapi.—1 Timoteo 3:2.
MANATU LOLOTO
Ta tioʼi pe maʼua fefeʼaki e lātou alā e nofo selipatea mo lātou alā ku āvaga le fiafia, ti e fefeʼaki lalātou ʼaga o fakafiafiaʼi a Seova.
4. Fakaʼaogaʼi fakamālielie le neʼa alofa leia ko le nofo selipatea
Na matala kia Sesu, ko le nofo selipatea ko se neʼa alofa. (Mateo 19:11, 12) Lau Mateo 4:23, ti fai le vesili leinei:
-
Na fakaʼaogaʼi fefeʼaki e Sesu le neʼa alofa leia ko le nofo selipatea i lana tausi ki lona Tamana ti mo tokoi ki ʼiki?
E mafai ki se taina pe ko se tuagaʼane ke fiafia i lana nofo selipatea o fai pe Sesu. Tioʼi le GĀ ʼATA, ti fai le vesili e soa atu ki ai.
-
Koā gaʼoi e mafai ke fai e le kau Kilisiteano alā e nofo selipatea?
E ke iloa ko ia?
E leʼaise fakasā i le Tosi-Tapu le fētuʼu leia ke ke āvaga ai. Kae e fakalotomakekeʼi i ai le kau tupulaga, ke lotou talitali o kaku ‘ki le fakalaka leia o lolātou temi tupulaga,’ le temi e makeke ai a oli ki felāvei fakatino. Ti e faigataʼa ai lalātou toʼo ni tonu fakapotopoto.—1 Kolinito 7:36.
5. Filifili fakamālielie lou āvaga
Ko le filifili o lokita āvaga, ko se tonu maʼuiga e kita fai i lokita maʼuli. Lau Mateo 19:4-6, 9, ti fai le vesili leinei:
-
Koleā leia e tonu ai ki se taina pe ko se tuagaʼane, ke fakakaukau fakamālielie aia i muʼa o lana āvaga?
E tokoi atu le Tosi-Tapu, ke ke iloa a agaaga e ke afa i se tasi e ke fia āvaga mo ia. Kae ko le koga leia e maʼuiga la, ke alofa aia kia Seova. b Lau 1 Kolinito 7:39 mo 2 Kolinito 6:14, ti fai a vesili anei:
-
Koleā e tonu ke tou āvaga faʼi mo se tasi e tausi kia Seova?
-
Ki lau manatu, koleā e logoʼi e Seova mo kāpau e filifili e se taina pe ko se tuagaʼane, ke āvaga mo se tasi e leʼese tausi kia Seova?
Kāpau e tou fakatasiʼi ni manu kesekese e tokalua, ti e lā mamae tokalua loa. Tie toe felaʼaki mo kāpau e tou āvaga mo se tasi e leʼaise tausi kia Seova, e tou tau loa mo ni faigataʼaʼia
6. Ke ke maʼua le faʼasiga manatu a Seova o uiga mo le nofo āvaga
I le temi o le kau Iselaele, na māvete a ʼiki tagata mo olātou āvaga talie na lotou manatu faʼi kia lātou totonu. Lau Malakia 2:13, 14, 16, ti fai le vesili leinei:
-
Koleā e vesiʼa ai Seova mokā tou māvete i ni neʼa noa?
Ko le faiaga mo le māvete ʼoki, e fakatupu ai ni mamae lasi
Tiʼoi le GĀ ʼATA, ti fai le vesili e soa atu ki ai.
-
Kāpau ku ke āvaga mo se tasi e leʼese tausi kia Seova, koleā loa e mafai ke ke fai ke fiafia ai lokolua maʼuli fakataumātuʼa?
7. Fakalogo ki lao a Seova o uiga mo le nofo āvaga
I ʼiki a temi e ʼaoga ke tou faiga makeke ke tou fakalogo ki lao a Seova o uiga mo le āvaga. c Kae e tapuakiʼi e Seova a ia leia e fakalogo. Tioʼi le GĀ ʼATA.
Lau Epeleo 13:4, ti fai a vesili anei:
-
E mālilie ko ia a tonu a Seova o uiga mo le nofo āvaga? Koleā lona tupuʼaga?
E lasi a fenua e fakamaʼua ai e le puleʼaga ke tosi e le kakai le aso na lotou āvaga ai pe māvete. Ko ia e loto a Seova ke fakalogo a le kau Kilisiteano ki lao anā. Lau Tito 3:1, ti fai le vesili leinei:
-
Kāpau kua ke āvaga, kua kolua tioʼi ko ia pe kua fakamāʼoki i le puleʼaga lakolua āvaga?
SE LAGI PATI ATU LOA A ʼIKI: “Koleā le uiga o le āvaga? E mālie faʼi lamāua nonofo felaʼaki.”
-
Koleā loa lau tali ki ai?
MANATU TĀFITO
Ko le nofo selipatea mo le nofo āvaga, ko ni neʼa alofa meia Seova. E fiafia le kau selipatea mo lātou alā ku āvaga mo kāpau e lotou fakologo ki lao a Seova.
Fakamanatu
-
E fakaʼaogaʼi fakamālielie fefeʼaki ko ia e se tasi a lona temi selipatea?
-
Koleā e pati ai i le Tosi-Tapu, ke tou āvaga faʼi mo se tasi leia e tausi kia Seova?
-
Koleā le tupuʼaga e tasi i le Tosi-Tapu e fakataga ai le māvete?
A ʼIKI MANATU
Koleā le fakaʼuiga o le pati ke ‘āvaga faʼi i le Aliki’?
Ni tokoi ʼaoga ki le fakatasi mo le āvaga e maʼua i se gā ʼata e koga lua.
Na tapuakiʼi fefeʼaki e Seova se taina leia na faiʼia ni tonu e mālilie?
Koleā e tonu ke tou fakakaukau ki ai i muʼa o satātou māvete o tasi nofo pe māvete ʼoki?
“Tou fakaʼapaʼapa ‘ki le neʼa leia na fakatasiʼi e le Atua’” (Tule Leʼo o Tesepeli 2018)
a Tioʼi le Nota Fakaʼoki n°4 e tuʼu i le Koga 4, e māsau ai ki tupuʼaga e fakataga ai le tasi nofo logo ai na leʼaise faiaga se tasi ia lāua.
b I ʼiki agaifenua, ko mātuʼa alā e filifiliʼia le āvaga o lolā fānau. Kāpau ko ni mātuʼa e alofa, ti e lā ʼuluaki tioʼi muʼa pe alofa aia lenā ka āvaga mo lolā fānau kia Seova. Ti e leʼese lā afa loa pe paʼaga pe maʼua tuʼulaga.
c Kāpau e ke maʼuli mo se tasi kae lekise kolua āvaga, ti e tonu loa ke ke filifili pe ke ʼaga loa o veteki pe kolua ano o āvaga.
