TOƁƁERE 42
Ko honɗun Deftere Alla nden haali fii ɓe jommbaali e fii ɓe jommbaaka, e fii dewgal ?
E naamuuji goo, si on heɓay weltaare, ko yo tawu hiɗon jommbi maa hiɗon jommbaa. Kono no woodi jommbindirɓe ɓe aldaa e weltaare e no woodi kadi ɓe jommbaali e ɓe jommbaaka wonduɓe e weltaare. Tigi tigi on, Deftere Alla nden wi’i woni jommbindirɓe, ɓe jommbaali e ɓe jommbaaka, ɗun fow ko dokke Alla.
1. Ko nafa honɗun ɓee ɓe jommbaali e ɓe jommbaaka heɓata ?
Puulusa winnduno « mi faalaaka yo on wondu e annde » (janngee 1 Korenti 7:32, 33). Fii honɗun Deftere Alla nden wi’i on mo jommbaali maa jommbaaka ’aldaa e annde ko ɗuuɗi’ ? Ɓay haray o alaa mo o dankoo, o ɓurtay heɓude saa’i. E piide misal, himo waawi heɓude feere fii yahugol e nokkeeli maa leyɗe goo fii waajagol kibaaru moƴƴo on. E ko ɓuri hittude kon, o ɓurtay heɓugol saa’i fii tiiɗingol weldigal makko ngal e Yahuwah Alla.
2. Ko nafa honɗun jommbindirɓe heɓata ?
Wano ɓee ɓe jommbaali e ɓe jommbaaka heɓirta nafa, ko non jommbindirɓe ɓen kadi heɓirta nafa. Deftere Alla nden wi’i « ɗiɗo no ɓuri gooto » (Waajotooɗo on 4:9). Ko non tigi wonirta si jommbindirɓe no huutorde tugaale Deftere Alla nden ka dewgal maɓɓe. Jommbindirɓe yeeso sariya no fodi ɓe yiɗindiray e ɓe yurmondiray e hoore teddungal. Ko ɗun waɗi, hiɓe mari hiwaare tiiɗunde ɓuri wonduɓe ɓe jommbindiraali. Dewgal okkay feere fii no fayɓe ɓen njanɗira e nder hiwaare.
3. Ko honɗun Yahuwah Alla miijii fii dewgal ?
Ko Yahuwah Alla humi dewgal aranal ngal, o daaluno : « gorko selay ben mun e yumma mun, ɓannita ɓeyngu mun » (Fuɗɗoode nden 2:24, VPFJ). Yahuwah Alla no faalaa gorko e ɓeyngu mun yo yiɗindir e ɓe wonda e nder ngurndan maɓɓe ɗan fow. Himo jaɓa helugol dewgal maɓɓe ngal tun, si tawii goɗɗo e maɓɓe waɗii jinaa. Si ko non woniri, Yahuwah Alla no acci on mo jeenaali suɓagol si ɓe wonday maa si ɓe helay dewgal a (Matta 19:9). Yahuwah Alla jaɓaali yo almasiiyaajo jommbu ko ɓuri debbo gooto (1 Timotee 3:2).
LUGGINEE
Anndee no waawirton heɓude weltaare, maa no weltinirton Yahuwah Alla, si hiɗon jommbi maa si hiɗon jommbaa, e si on jommbaali maa on jommbaaka.
4. Heɓee nafa e hoore wonugol mo jommbaali maa mo jommbaaka
Annabi Iisaa yiiruno wonugol mo jommbaali maa mo jommbaaka wa dokkal Alla (Matta 19:11, 12). Janngee Matta 4:23 e yewton fii ngal lanndal :
-
Ko honno annabi Iisaa huutornoo ngal dokkal wonugol mo jommbaali fii waɗugol faale Ben makko on e fii wallugol woɓɓe goo ?
Wano annabi Iisaa, almasiiyaaɓe ɓe jommbaali maa ɓe jommbaaka ɓen no waawi heɓude weltaare. Fijinee VIDIO on e yewton fii lanndal jokkitungal ngal.
-
Ko honɗun almasiiyaaɓe ɓe jommbaali e ɓe jommbaaka waawata suɓaade waɗugol ko nafata ɓe ?
Hari hiɗon anndi ?
Deftere Alla nden haalaali ko duuɓi jelu haanuɗen heɓude fii jommbugol maa jommbegol. Kono hinde waajii yo ontigi haɓɓo haa o feƴƴa « duuɓi kellefuyee », ɗun ko saa’i tawuɗo faale makko fii waalidugol e goɗɗo no tiiɗi, haɗayɗo mo fewjude no moƴƴiri (1 Korenti 7:36).
5. Suɓee moƴƴa
Suɓagol mo jommboton maa jommboowo mon on ko huunde ɓurnde hittude e nder ngurndan mon ɗan. Janngee Matta 19:4-6, 9 e yewton fii ngal lanndal :
-
Fii honɗun almasiiyaajo haanaa hawjude fii jommbugol maa jommbegol ?
Deftere Alla nden wallay on anndugol ko haanuɗon ndaarude fii mo jommbindirton on. Ko ɓuri hittude kon, ko yo tawu jommbindirton on ko yiɗuɗo Yahuwah Alla b. Janngee 1 Korenti 7:39 e 2 Korenti 6:14 e yewton fii ɗee lanndaale :
-
Fii honɗun hiɗen haani jommbindirde e rewoowo Yahuwah Alla tun ?
-
E miijo mon, ko honɗun Yahuwah Alla miijotoo si almasiiyaajo suɓike jommbindirgol e goɗɗo mo rewataa mo ?
Si mummunteeji ɗiɗi sertuɗi fes hawtindiraama, ɗi tampay. Ko wano non, almasiiyaajo jommbindirɗo e mo rewataa Alla heɓay satteendeeji buy.
6. Yiiree dewgal wa Yahuwah Alla
E saa’i Banii-Isra’iila’en ɓaawo ɗoo, worɓe goo helayno dewle maɓɓe fii nafa maɓɓe tun. Janngee Malakii 2:13, 14, 16 e yewton fii ngal lanndal :
-
Fii honɗun Yahuwah Alla no aɲi helugol dewgal ko yaadaa e Daaluyee makko on ?
Jinaa e helugol dewgal addanay mo jeenaali on e fayɓe ɓen tampere e sonnjaa.
Fijinee VIDIO on e yewton fii lanndal jokkitungal ngal.
-
Si tawii hiɗon jommbindiri e mo rewataa Alla, ko honɗun waɗoton fii heɓugol weltaare ka dewgal mon ?
7. Huutoree sariyaaji Yahuwah Alla ɗin fii dewgal
Wonnde, neɗɗo no haani wakkilaade moƴƴa fii huutorgol sariyaaji Yahuwah Alla ɗin fii dewgal c. Kala ɗoftiiɗo ɗun, Yahuwah Alla barkinay mo. Fijinee VIDIO on.
Janngee Yahuudiyankeeɓe 13:4 e yewton fii ɗee lanndaale :
-
Hiɗon miijii sariyaaji Yahuwah Alla ɗin fii dewgal no satti ɗoftaade ? Fii honɗun ?
Yahuwah Alla no faalaa yo almasiiyaaɓe ɓen maandin dewgal maɓɓe ngal maa helugol dewgal maɓɓe ngal ka sariya. E nder leyɗe buy, laamuuji ɗin no waɗi on sariya. Janngee Tiituusa 3:1 e yewton fii ngal lanndal :
-
Si on jommbii, maa on jommbaama, hiɗon felliti dewgal mon ngal no maandinaa ka sariya ?
NO GASA WOƁƁE NO LANNDOO : « Fii honɗun jommbindirten ? En waawataa wonndude tun ? »
-
Ko honno jaabortoɗon ?
RAWNOODE
Woni jommbindirɓe, ɓe jommbaali e ɓe jommbaaka, ɗun fow ko dokke Alla. Ɗun fow adday weltaare si no yaadi e faale Yahuwah Alla on.
Ndartannde
-
Ko honno goɗɗo heɓirta nafa si o jommbaali maa si o jommbaaka ?
-
Fii honɗun hiɗen haani jommbindirde e rewoowo Yahuwah Alla tun ?
-
Ko huunde honnde tun wonata sabu helugol dewgal ko yaadi e Deftere Alla nden ?
TASKEE
Ko honɗun firi jommbindirgol ko yaadi « e faale Joomiraaɗo on » ?
« Lanndaale janngooɓe ɓen » (Suudu Aynirdu ndun, 1 suwiye 2004)
Ndaaree vidio mo pecce ɗiɗi wallayɗo on fewjugol moƴƴa fii dewgal.
Anndee ko musiɗɗo men ka dewal miijii fii honɗun Yahuwah Alla okkori mo ɓuri ko o acci.
Ko piiji honɗi goɗɗo haani miijaade ado o fewjude helugol dewgal maa seedugol hara ɓe helaali dewgal ?
« Teddinee “ko Alla hawtindiri kon” » (Suudu Aynirdu ndun, deesaambur 2018)
a Tinndinoore 4 no holli fii honɗun jommbindirɓe no waawi suɓaade seedugol hara ɓe helaali dewgal hay si gooto e maɓɓe waɗaali jinaa.
b E naamuuji goo, ko mawɓe ɓen suɓantoo fayɓe maɓɓe ɓen mo ɓe jommbata maa jommboowo ɓe. Si ko non woniri, mawɓe yiɗuɓe ɓiɓɓe mun ɓen ndaaray taho si ontigi no yiɗi Yahuwah Alla hara ɓe ndaaraali jawdi maa piiji goo.
c Si hiɗon wondi e goɗɗo hara on jommbindiraali, ko onon haani suɓaade si on jommbindiray maa si on seeday.
