REIREI 42
Tera ae E Taekinaki n te Baibara Ibukin te Aki Iein ao te Mare?
Ni katei tabeua, ao a kakoauaa tabeman bwa e aki kona ni kukurei temanna ni karokoa e reke buuna. Ma a aki bane ni kukukurei naake iai buuia, ao bon iai naba aika akea buuia ae a kukukurei. Ni koauana, e taekinna te Baibara bwa te aki iein ao te mare, boni bwaintangira mairoun Iehova.
1. Baikara kakabwaia tabeua man te aki iein?
E kangai te Baibara: “E kabwaia ane e karekea buuna ni mare, ma e kabwaia riki ane e aki karekea buuna.” (Wareka 1 I-Korinto 7:32, 33, 38.) N aanga raa ae e a “kabwaia riki” ane e aki iein? A aki tabetabe Kristian aika aki iein ibukin tararuaan temanna. Ma e mwawaawa riki aia tai. N te katoto, a kona tabeman ni karaababai riki aia tai n te mwakuri ni minita n aanga aika kakaokoro, n aroia ni mwananga nakon te aba teuana ao n tataekina te rongorongo ae raoiroi iai. Ma ae kakawaki riki, a kona ni kabanea riki aia tai ni kaania Iehova.
2. Baikara kakabwaia tabeua aika reke ngkana ko mare i aan te tua?
E karekei kakabwaia aika okoro te mare n aron naba te aki iein. E kangai te Baibara “a raoiroi riki uoman nakon temanna.” (Te Minita 4:9) E noraki raoi koauan aei irouia Kristian ake a maiuakini booto n reirei man te Baibara n aia mare. Taanga aika a mareaki i aan te tua, a berita bwa a na tangiriia, a na karineia, ao a na nabeiia i marenaia. A namakina riki te mweraoi nakoia taanga ake a bon kaai naba ni maeka ao n aki mare. Ao a namakina naba iai te mweraoi natiia.
3. Tera ana iango Iehova n te mare?
E taku Iehova ngke e karaoa te moani mare: “E na kitana tamana ma tinana te mwaane ao e na nim ma buuna.” (Karikani Bwaai 2:24) E tangira te buu te mwaane ao te buu te aine Iehova bwa a na tangiriia ao n nim ma buuia ni uaa mateia. E kariaia te buuraure tii ngkana te rao are temanna e karaoa te wene ni kimoa. Ngkana e riki anne, ao Iehova e angan te rao are e aki bure karaoan ana motinnano i bon irouna bwa e na buuraure a ke e na aki. (Mataio 19:9) E aki kariaia Iehova kabatiaan te buu irouia Kristian.—1 Timoteo 3:2.
REIAKINA AE BATI RIKI
Noria bwa ko na kangaa ni karekea te kukurei ao ni kakukureia naba Iehova e ngae ngkana ko aki iein ke ngkana ko mare.
4. Kamanena raoi te bwaintangira ae te aki iein
E iangoia Iesu bwa bon te bwaintangira te aki iein. (Mataio 19:11, 12) Wareka Mataio 4:23, ao maroroakina te titiraki aei:
-
E kangaa Iesu ni kamanena te bwaintangira ae te aki iein ni beku iai ibukin Tamana ao ni buokiia aomata?
A kona naba Kristian ni kukurei ngkai a aki iein n aron Iesu. Kaota te TAAMNEI, ao maroroakina te titiraki aei.
-
N aanga raa ae a kona iai Kristian ni kamanenai raoi aia tai ngkai a aki iein?
Ko ataia?
Akea n te Baibara te ririki ae katauaki iai te mare. Ma e kaungaaki iai te aomata bwa e na tataninga ni karokoa “e a tia ni bwakanako ana bongi n roro n rikirake,” ae te tai ae korakora iai tangiran te kani wene n taanga ao ni kangaanga irouna karaoan ana motinnano ma te wanawana.—1 I-Korinto 7:36.
5. Bwaina te wanawana ngkana ko rinea raom
Rinean raom bon te motinnano teuana ae rangi ni kakawaki ae ko na karaoia. Wareka Mataio 19:4-6, 9, ao maroroakina te titiraki aei:
-
E aera ngkai e aki riai te Kristian n ienikuria te kani mare?
E kona ni buokiko te Baibara n ataia bwa baikara aroaro aika ko riai n tarai iroun raom ni mare. Ma ae kakawaki riki, kakaaea raom ae tangira Iehova. b Wareka 1 I-Korinto 7:39 ao 2 I-Korinto 6:14. Ao maroroakin titiraki aikai:
-
E aera bwa ti riai ni mare ma ae tii raora ni Kristian?
-
E na tera ana namakin Iehova ngkana ti mare ma te aomata ae e aki tangiria?
Ngkana a kaai n uota te amo maan aika uoman aika rangi ni kaokoro, a na boni rawawata iai. N aron anne, e na boni bati naba ana kangaanga te Kristian ae mare ma ae tiaki kaain te onimaki
6. Iangoa te mare n aron iangoana iroun Iehova
Iai mwaane tabeman i Iteraera rimoa, aika a buuraure ma buuia i aani bukina aika aki riai. Wareka Maraki 2:13, 14, 16, ao maroroakina te titiraki aei:
-
E aera ngkai e ribaa Iehova te buuraure i aani bukina aika aki riai?
Te wene ni kimoa ao te buuraure e karawawataa te rao are e aki karaoa te bure ao nakoia naba ataei
Kaota te TAAMNEI, ao maroroakina te titiraki aei.
-
Ngkana ko mare ma ae tiaki kaain te onimaki, tera ae ko kona ni karaoia bwa e aonga ni kakukurei am mare?
7. Maiuakin ana kaetieti Iehova ibukin te mare
E bae ni kainnanoa te kakorakora ae bati maiuakinan ana kaetieti Iehova ibukin te mare. c Ma e kakabwaiaia Iehova ake a karaoa anne. Kaota te TAAMNEI.
Wareka Ebera 13:4, ao maroroakin titiraki aikai:
-
N am iango, a riai ana kaetieti Iehova aikai ibukin te mare? Kabwarabwaraa.
E kantaningaiia Kristian Iehova bwa a na karin n te tua mwin aia mare ke aia buuraure, ngkai angiin aaba a tangiriia aomata bwa a na karaoa anne. Wareka Tito 3:1, ao maroroakina te titiraki aei:
-
Ngkana ko a tia ni mare, ko kakoauaa raoi bwa e a tia n rin mwina i aan te tua?
E KONA NI KANGAI TEMANNA: “E aera bwa ko na mare? Tera buren ae a kaai naba ni maeka taanga n aki mare?”
-
Ko na kangaa ni kaeka?
KAKIMOTOTOANA
Te aki iein ao te mare boni bwaintangira mairoun Iehova. Ko kona ni kukurei n aki ongeia bwa ko iein ke ko aki, ngkana ko maiuakina ae boraoi ma nanon Iehova.
Kauring
-
E na kangaa te aomata ni kamanena raoi ana tai ngkai e tuai n iein?
-
E aera ngkai e taekinaki n te Baibara bwa ti riai ni mare ma ae tii raora ni Kristian?
-
Tera bukina ae tii teuana ae kariaiakaki iai te buuraure n te Baibara?
NORI NABA AIKAI
Mataku n te taamnei ae tenua kanoana ae kona ni buokiko ni karaoi am motinnano aika raraoi ni kaineti ma te iraorao ni karekenano ao te mare.
Noria bwa e aera ngkai e namakinna te tari te mwaane temanna bwa e rangi ni kakawaki riki te baere e anganna Iehova nakoni baike e kakeai.
Baikara bwaai tabeua aika e riai n iaiangoi te aomata imwain ae e iangoa te buuraure ke te raure?
“Karinea Ana Babaire te Atua Ibukin te Mare” (Te Taua-n-Tantani, Ritembwa 2018)
a Nora Kabwarabwaraana 4 ae taekan te raure ngkana e aki karaoaki te wene ni kimoa.
b Ni katein aaba tabeua, ao kaaro a matana raon natiia are e na mare ma ngaia. Ngkana e riki anne, ao a riai kaaro aika a tatangira n iangoia moa bwa e tangira Iehova te aomata anne ke e aki, ao tiaki ana mwane ke nakoana.
c Ngkana ko maeka ma te aomata ae ko tuai ni mare ma ngaia, boni ngkoe ae ko riai ni motinnanoia bwa ko na kitanna ke ko na mare ma ngaia.
Ko Bae Naba n Tangira
TITIRAKI AIKA TATABEKAKI
Tera te Reirei n te Baibara?
Karekei kaekaan titiraki ni kaineti ma kairan te reirei n te Baibara iroura.
