42 NU GÈ NÒ
Éé Ní E Kpá Káí Kọ́ Kilma Ló Gè Kọọ̀ Nen Náa Ílí Àbèè Ge Iá Nè Ílà Dóm Nè Va Ẹ́?
Sìgà gbò ólò tuumá kọọ̀, nyíè nen náa é láá ẹẹ be náa ílí va àbèè ge iá dóm. Sõò, níì nyíè dénè nen ea ílí àbèè ge iá ní ea ólò ẹẹẹ́ nì, vaá níì nyíè dénè nen e bè náa ílí àbèè ge iá ní ea ólò bììlàẹ nì. Kà kà bel ea dì dú kọọ̀ ílà dóm nè va nè ge kọọ̀ nen náa ílí àbèè ge iá dú dõ̀ònù ea aa bá Jìhóvà.
1. Mókà gbò bélè ní ea di ló gè kọọ̀ nen náa ílí àbèè ge iá ẹ́?
Kpá Káí kọ́ọ̀: “Págbálà ea ílí va [àbèè pábia ea íá dóm] náa lé nu, sõò nen e bè náa ílí va [àbèè ge iá dóm] náa kà lé nu.” (Bugi 1 Kọ́rìnt 7:32, 33, 38.) Mókà gbò sĩ́deè ní e nen e bè náa ílí àbèè ge iá é láá “naa kà lé nu” ẽ́? Gbò e bà gé nyoone nvéè Kráìst e bà náa ílí àbèè ge iá náa íe dóm àbèè va e bàé ẹb nú ea kil ló. Vó ólò gbóó naa kọ bàá ié gã́bug dì pọ́ì. Dì belí nu dòòmà bá, sìgà gbò á láá bọ̀ọ̀vẹ̀ gbàà ba sìtóm kọ̀ kpẹ̀a, dì belí gè àà kil dõòna kà dó gé kọ́ kpẹ̀a. Bọọ èlmà vó, bàé láá ié gã́bug tṍó gè naamá gbò nú ea é náa kọ bàá palàge tõo bã ló Jìhóvà.
2. Mókà gbò bélè ní ea di ló gè ilá mm̀ sĩ́deè e log ténmá ẽ́?
À íe gbò bélè ea di ló ílà dóm nè va, belí nágé bé ea dì naa tṍó e nen náa náa vó naaá. Kpá Káí kọ́ọ̀ “bàà nen léè èl enè nen.” (Ẹ̀klìzíástìs 4:9) Níí palàge dú kà kà kilma ló gbò nyòòne nvéè Kráìst e bà tú gbò nòòkúu ea di mm̀ Kpá Káí siimá tóm mm̀ ba ílà dóm nè va. Dóm nè va e bà ílá mm̀ sĩ́deè e log ténmá beè zilá zíl kọọ̀ bàé kilìè sĩ́ gè vulèè, fãè dẽe, vaá tuè lé bá sẹẹmàè ene. Níá ólò naa kọọ̀ bàá ié kpènà èl gbò e bà dõogẽ tõ̀òà. Ge ilá mm̀ sĩ́deè e log ténmá ólò naa kọọ̀ bàá láá bumá ba gbò nvín mm̀ sĩ́deè e bàé íe kpènà.
3. Mósĩ́ deè ní e Jìhóvà ẹb ílà dóm nè va ẹ́?
Tṍó e Jìhóvà beè noo túá kà ílà dóm nè va, a beè kọọ̀: “Págbálà é aa ló a tẹ̀ nè a kà vaá davá gbẹá ló a va.” (Jénesìs 2:24) Jìhóvà gbĩ́ kọọ̀ dóm nè va á tõ̀òa mm̀ vulà vaá davá gbẹá ló ene dénè deé mm̀ ba dùm. À sọtọ́ deè zààlà dóm nè va áá tṍó e dóm àbèè va kúná gã̀. Tṍó ea meà naa vó, Jìhóvà sọtọ́ deè kọọ̀ nen e bè náa beè sí pọ́lọ́á á beeláfùl be bàé zaalà. a (Máátìù 19:9) Jìhóvà náa ténmá kọọ̀ gbò e bà gé nyoone nvéè Kráìst á ilí àbèè ge iá zelmá boo ene kà va àbèè dóm.—1 Tímotì 3:2.
KPÁÁ NÓ BỌ̀Ọ̀VẸ̀
Nyimá nú eo é láá naa kọbé nyíé ni ẹ́ẹ —vaá naa kọọ̀ nyíè Jìhóvà á ẹ́ẹ—kọbèè o ílí àbèè ge iá àbèè kọ ò gáà naa vó.
4. Tú dõ̀ònù ge kọọ̀ nóo ílì àbèè ge iá siimá tóm leevè
Jíízọ̀s beè ẹ̀b ge kọọ̀ nen náa ílí àbèè ge iá naamá dõ̀ònù. (Máátìù 19:11, 12) Bugi Máátìù 4:23, vaá ò gbóó aalai nakà bíbví:
-
Mósĩ́ deè ní e Jíízọ̀s beè tú a dõ̀ònù ge kọọ̀ náa beè ilí va siimá tóm nè a Tẹ̀ vaá nvèèmà bá nè dõòna gbò e?
Gbò e bà gé nyoone nvéè Kráìst e bà náa ílí àbèè ge iá é láá dé kpéè ló gè tú ba dìtõ̀ò siimá tóm leevè dì belí Jíízọ̀s. Bìlà VÍDIÒÍ, vaá ò gbóó aalai bíb ea nyoone.
-
Mókà gbò sĩ́deè ea é dọ bélè ní e gbò e bà gé nyoone nvéè Kráìst é láá tú gè kọọ̀ bà náa ílí àbèè ge iá siimá tóm ẽ́?
O beè nyimá gé?
Kpá Káí náa kọ́ kà lèlà gbáá e nen é tóólá besĩ́ à kálá ilí va àbèè ge iá dóm. Sõò, à kọ́ọ̀ nen á elá dọ̀ọ̀mà tṍó e ‘tàn ea ólò di mm̀ gbò nvín ãa kil kẽ,’ boo béè kọọ̀ tṍóá tàn gbaa ló mà kẽ ólò palàge agabá vaá àé láá naa kọọ̀ nen á gá nè lé béèlàfùl.—1 Kọ́rìnt 7:36.
5. Tú ọ̀ẹ̀ dẽe sààmà nen eo é ílí àbèè ge iá
Ge sà nen eo é ílí àbèè ge iá dú ene kà gbàà gbò béèlàfùl ea bọọ lọ̀l vaá à lee eo é né mm̀ dùm. Bugi Máátìù 19:4-6, 9, vaá ò gbóó aalai nakà bíbví:
-
Éé ní ea náa vaá nen ea gé nyoone nvéè Kráìst náa é gbálá bã mm̀ ílà dóm nè va ẹ́?
Kpá Káí é láá nvèè bá nè ni kọ ó nyimá gbò kpãa ea bọ́ló kọọ̀ nen eo gbĩ́ gè ilí àbèè ge iá á ié. Nú ea palàge bọọ dú gè kọọ̀ nená á vùlè Jìhóvà. b Bugi 1 Kọ́rìnt 7:39 nè 2 Kọ́rìnt 6:14, vaá ò gbóó aalai gbò bíbví:
-
Éé ní ea náa vaá èé ílí àbèè ge iá áá nen ea gé nyoone nvéè Kráìst e?
-
Olo bulà kọọ̀ àé tõó ló Jìhóvà naa vàẹ, be è ílí àbèè ge iá nen e náa vulèe é?
Be à gá náa vaá bà tú bàà kà nom e bà náa kuna kẽ́é nvee dáà tẽ̀ènè kà kọ̀, bàé moǹ tã̀àgã̀. Mm̀ tẽ̀ènè sĩ́deèá, nen ea gé nyoone nvéè Kráìst ea ílí àbèè ge iá nen e náa ólò fã̀ Jìhóvà é mon gã́bug tã̀àgã̀
6. Ẹ̀b ílà dóm nè va belí bé e Jìhóvà ẹb naa
Mm̀ tṍó pá Ízràẹ̀la, sìgà gbò gbálà beè olòó kpó ba va lọa ló boo béè ba lee ló. Bugi Málakaì 2:13, 14, 16, vaá ò gbóó aalai nakà bíbví:
-
Éé ní ea náa vaá Jìhóvà à ọbví zààlà dóm nè va e Kpá Káí náa nveè sãa kúm ẽ́?
Ge kọọ̀ nen ea beè ilí àbèè ge iá kúná gã̀ nè zààlà dóm nè va ólò naa kọọ̀ nen e náa beè sí pọ́lọ́á nè gbò pá nvin á mòn tã̀àgã̀
Bìlà VÍDIÒÍ, vaá ò gbóó aalai bíb ea nyoone.
-
Be à gá náa vaá o dóm àbèè va náa ólò fã̀ Jìhóvà, éé ní eo é láá naa kọbé ò íei ẹ́ẹ́ nyíe mm̀ bọọ ílà dóm nè va ẹ́?
7. Tú gbò nòòkúù Jìhóvà ea kil ló ílà dóm nè va siimá tóm
Àé bĩ́íná kọ nen á palàge pììgà kọbé à láá tú gbò nòòkúù Jìhóvà ea kil ló ílà dóm nè va c siimá tóm. Sõò, Jìhóvà ólò tãanè dee bá gbò e bà náa vó. Bìlà VÍDIÒÍ.
Bugi Híbrù 13:4, vaá ò gbóó aalai gbò bíbví:
-
É kọọ̀ ò bulà kọọ̀ nyìmànù di mm̀ gbò nòòkúù Jìhóvà ea kil ló ílà dóm nè va? Be ò náà ẽei àbèè ẽ́èe, ló éé?
Jìhóvà gbĩ́ kọọ̀ gbò e bà gé nyoone nvéè Kráìst á tú kpá ílà dóm nè va àbèè kpá zààlà dóm nè va lọl bá kpóó ea gé bẹl beè log ba dó ténmá naa vó. Bugi Táítọ̀s 3:1, vaá ò gbóó aalai nakà bíbví:
-
Be o ílí àbèè ge iá, é kọọ̀ bọọ ílà dóm nè va beè naaá mm̀ sĩ́deè e log ténmá?
NEN É LÁÁ BĨINÁ KỌỌ̀: “Éé ní ea náa vaá à bọ́ló gè ilá ẹ́? É kọọ̀ págbálà nè pábia náa é láá dõogẽ tõ̀òà?”
-
Òó láá aalá naa vàẹ?
NÚ E NI NÓ
Ge ilí àbèè ge iá àbèè kọọ̀ nen náa náa vó dú dõ̀ònù ea aa bá Jìhóvà, vaá bàé láá ié ẹ́ẹ́ nyíe be bà tõó dùm ea gbááá ló bùlà Jìhóvà.
Ge Òòa Boo
-
Mósĩ́ deè ní e nen é láá tú a dìtõ̀ò ge kọọ̀ náa ílí àbèè ge iá siimá tóm leevè e?
-
Éé ní e Kpá Káí kọ́ kilma ló gè ilí àbèè ge iá áá nen ea gé nyoone nvéè Kráìst e?
-
Áá éé ní e Kpá Káí sọtọ́ deè kọọ̀ àé láá màn zààlà dóm nè va ẹ́?
KPÁÁ GBĨ́ TẼ́ LÓ
Éé ní e gè kọọ̀ nen “á mòn kọ à íàè [àbèè ge ilìè] neǹ Kráìst” tõó dọ̀ ẹ?
Ẹ̀b bàà kà vídiò ea é nveè bá nè ni kọ ó láá nè lé béèlàfùl ea kil ló gè nyimá ló nen eo gbĩ́ gè ilí àbèè ge iá nè ílà dóm nè va.
Nyimá nú ea náa vaá à tõó ló ene kà vígà págbálà kọọ̀ Jìhóvà a neèe nú ea el kọ̀láá kà nú ea beè sọẹ̀ bá.
Sìgà éé ní ea bọ́ló kọọ̀ nen á nyimá besĩ́ à kálá bugi togó boo gè zaali ba ílà dóm nè va àbèè ge pòòà ẹ?
“Honor ‘What God Has Yoked Together’” (Kpá Tọ Kùdẽe Ló, December 2018)
a Ẹ̀b 4 Émì Nu Ea Di Dee Deè Nvéè Kpáí ea ló bel boo tṍó e dóm nè va zẹ́ẹ́ pòòà tṍó e tọ́ọ̀ ọ̀và náa kúná gã̀.
b Sìgà nàànù kunukẽ̀ sọtọ́ deè kọọ̀ tẹ̀ nè kà á sà nen e ba nvín é ílí àbèè ge iá. Tṍó ea meà naa vó, túá nú e tẹ̀ nè kà e bà vulè ba nvín é náa dú gè nyimá beè nen e bà gbĩ́ kọ á ilí àbèè ge iá ba nvíná vulè gé Jìhóvà, e bè níì kpègè àbèè dọ̀ ea íe nì.
c Be ò di tọ ló nen eo gáà ilai, àé bọ́ló kọ ó beeláfùl be òó zaalai àbèè òó ílai.
