Kɛɛnaa taɠaa ɓa a kɛ nua di wɔ kili ɓa nu ya wala húlulɔ hwá pɛli kwəinɛɛ hɔlɔɓoi. Kəlaa gwa gaa nua daa húlulɔ, di kəlee hwəi kwəinɛɛ kaa di yəi ə lɛɛ kwea taɠaa kaa laa kwəinɛɛ kaa di yəi ə tɛɛ la húlulɔnua taɠaa diɛ. Biblə nwɛi a nɛ yɛ ma ə kɛ a kwealaa, ə kɛ a húlulɔ mɛni, gəlee kaa a Yálá ŋɔ mɛinɛɛ.

1. Kwealaa dɔlɔ ɓaa lə ?

Biblə kaa kɛi ma : ‘ Yii gáá moi kwɛaɠaa da kalaninŋaa diɛ, ya ɓaa : Akɛ da hwaa ma di lɛɛ lɔ tii di kpɔɔ ɓa yɛ pələi gáá laa a kwea, yili ɓə vialaɓoɔ ’ (Korɛntə dɔlɔɔ 7:8, 32, 33, ɓo). “ Kwealaa ” hwialaɓoɔi ləi ? Kilistalon yii a kwea nɛa liiɓa kɛ mɛni awala kɛtii ɉilɛ liiɓa kɛ mɛni ŋɔ liihɛlɛn va kɛ ma. Akɛ bɔ a pɛli ə ŋɔ Yálá Lawoo laahəli kóló ta pɛlɛ ma, a pɛli ə li lɔi takpɛli hu kɛɛnaa takpɛli ɓa ə gɛ ə Yálá Lawoo laahəli laa. Yii kpɔ nwɔnɔ nɛlɛɛ, lowai kɛnɛ kaa ɲəi yɛ pɛli da Zehova di wɔ ɓəlannaa huwala-walai.

2. Gwa húlulɔ nwun namənaa ɲɛi ɓa yili dɔlɔ ɓaa lə ?

Ə kɛ a kwealaa, ə kɛ a húlulɔ mɛni gəlee dɔlɔɔ kaa ma. Biblə kaa kɛi ma “ nu hweelɛ yee a kɛ nɔɔ gee hu da kɛ di nɛɛ hu, ə tɛɛ la nu kɛɛ tɔnɔ koɉu ɓa ” (Kilimaamun 4:9). Kilistaleai da kɛ Biblə ŋɔ tɔn-nwooɠaa pɔ tuwɔɓoi di wɔ húlu yii hu daa gaa diɛ ma yili kaa a teɲa. Nuai da húlulɔ nwun namənaa ɲɛi ɓa da di kpəndee di keeni wɛlilakɛ mɛni hu, di keeni maawiɛ mɛni hu, ə lɛɛ di keeni hon mɛni ɓa a nɛlɛɛ. Nuai da húlulɔ nwun namənaa ɲɛi ɓa gɛ laa walaai mɛni ə həli di wɔ húlu yii ɓa, ə tɛɛ la nuai di kee ɓa húlu ho di lowai. Ə lɛɛ nuai daa húlulɔ di wɔ húlu yii a di lonnii maakpɛ.

3. Zehova a húlulɔɔ kaa ləi ?

Ɓɛlowai Zehova ə húlu toloo hee la gbaŋa, ə kɛ ma : “ Hulɔnu a həɠə nan bɔ ə həɠə nee pɔ ə yili nɛa ɓa da yaa di kɛ tanɔn ” (Gɔwɔtɔɔi 2:24). Zehova kaa bɔ hulɔnu da nɛa di di keeni wɛlilakɛ, di yili di kee ɓa di wɔ yɛnɛɛ kəlee yee mu. Nuai daa húlulɔ di ta a wɛlimɛni maanɛŋɛn ɉəɠə yili lɔ ɓə a gɛ Zehova yɛ hwaa húlu taɠa mɛni ɓa. Yili akɛtii, Zehova ɲɛi mu nui ɉɔn və ɉu maalaa kaa ɲəi ə hwaa ma di lɛɛ di kee ɓa, awala kɛtii di wɔ húlu ə taɠa a (Matie 19:9). Zehova kaa bɔ kilistalon nɛa ə kɛ lɔ tanɔn gbən awala kɛtii ɉilɛ ə kɛ lɔ tanɔn gbən (Timote dɔlɔɔ 3:2).

 Ə́ WƆ MƐNIKƆLƆNŊAA TA PƐLƐ MA

5. Nui ə́ kaa bɔ ka yaa ka húlulɔ ɉəɠə ɉu a nɛlɛɛ

Mɛniɠaa kpɔ nu ya pɛli ə́ ɉəɠə ɉu yii maamɛni wala-walaa dɔnɔ ɓaa nui ə́ kaa bɔ ə́ ɉəɠə ɉu ka yaa ka húlulɔ. Matie 19:4-6, 9 ɓo, ə lɛɛ ka lono kɛ gɛɛmaalən ŋɛi mɛi :

• Lə mɛni ɓa maahonɛɛli kilistalon ho kpɛlin gbɔwɔ ɓa húlulɔ mɛni hu ?

Biblə a pɛli ə kpɔnmaa tɛɛ ə́ pɔ túwɔ́ pələ yii a pɛli kɛi nu yee pɔ, yɛ pɛli kɛi a húlulɔmun nɛlɛɛ yɛ́ pɛli gɔlɔn ɉii. Yii kpɔ nɛlɛɛ ya ɓaa Zehova b wɛli ə kɛ maanu ɓa. Korɛntə dɔlɔɔ 7:39 da Korɛntə veelɛ 6:14 ɓo, ə lɛɛ ka lono kɛ gɛɛmaalənŋaa ŋɛi mɛi :

• Lə mɛni ɓa nuai da Zehova ɓatoo diɛ lɔ ɓə maanɛɛ gwa diɛ ni gu húlulɔ ?

• Nui Zehova wɛli ho ma gwa maanu gwa húlulɔ, ə́ wɔ kili ɓa Zehova a yili kaa ləi ?

 6. Pələi Zehova a giliŋahiɛ la yɛ hwilɛn na húlulɔ mɛni ɓa, ə́ kiliŋahiɛ pələ ə kɛ tii

Israɛlə lonnii tolooɠaa di wɔ lowai hinaa taɠaa di kɛi lɔ di kiliŋahiɛ di kpɔɔ tɔnɔ maamɛni ɓa diɛ di wɔ húlu yii taɠa. Malasi 2:13, 14, 16 ɓo, ə lɛɛ ka lono kɛ gɛɛmaalən ŋɛi mɛi :

• Gwa gu wɔ húlu taɠa a kpaalə ta yii ho pɛli li ɉu lə mɛni ɓa yili wɛli ho Zehova ɓa ?

VIDIO kaa, ə lɛɛ ka lono kɛ gɛɛmaalən ŋɛi mɛi.

• Nui ka yaa kaa húlulɔ akɛ maanu ho a Zehova ɓatoomun lə ɓə ya pɛli gɛi yii yaan ə́ wɔ húlu yii ɲaa ə nɛɛ ?

7. Zehova ŋɔ tɔnŋaai vilɛnŋaa húlu yii ɓa bɔ tuwɔɓo

 YII GU GALAN

Kwealaa da húlulɔɔ di kaa a Zehova ŋɔ mɛinɛɛ. Yii lɔ maamɛni wala-walaa ya ɓaa gwa kɛi hiɛ a Zehova ŋɔ tɔn-nwooɠaa. Yili ɓa, ə kɛ a húlulɔɔ, ə kɛ a kwealaa kwəinɛɛ kaa gəlee hu.

Nɛɛ ə́ kili pɔ

• Nu a pɛli ŋɔ kwealaa dɔlɔ kulɔi ləi ?

• Nui gaa a Zehova ɓatoomun lə mɛni ɓa Biblə a kɛ ma ya lɔ ɓə maanɛɛ gwa yaa gu húlulɔ ?

• Biblə a nɛ yɛ ma mɛni tɔnɔ gbən lɔ ɓə a pɛli ma ə gɛ húlu ə taɠa. Mɛnii tii ɓaa lə ?