ZASEŊƆ 42
Baabule La Tɔɣɛ Nɛreyone La Pɔɣedire Yele La Wani?
Tisi ase’a poan, nɛreba ti’isɛ ti nɛra san ka di pɔɣa bii ele sira a kan ta’an tara pupeelum. Ge daɣɛ sɛba woo n ele sireba bii di pɔɣeba n tari pupeelum. Bala mea nɔɔ ti daɣɛ sɛba woo n de nɛreyɔna n ka tari pupeelum. Yelemɛŋɛrɛ la dela, Baabule la yeti nɛreyone la pɔɣedire dela yelesonɛ.
1. Nɛra san dɛna nɛreyone, bem nyuurɔ n boi bim?
Baabule la yeti: “Se’emdaana n di pɔɣa bii ele sira eŋɛ soŋa mɛ ge se’emdaana n ka di pɔɣa bii ele sira bɔŋa wan ana soŋa gana.” (Kaalɛ 1 Korint 7:32, 33, 38.) Nɛreyone ‘gani’ la wani? Kristabia n de nɛreyone ka fabeli ti a bisɛ a pɔɣa bii a sira. Bala zuo la, ba boi la fai. Makerɛ, basɛba ta’an yalegɛ ba na’am tuuma sarɔtɔ zo’e zo’e poan maɣesɛ wuu ba ta’an keŋɛ tiŋa kayima poan ta mɔɔla yelesoma la. Sɛla n gani za’a la, ba wan ta’an nyɛta nɛŋa du’ura Yehowa.
2. Pɔɣedire n makɛ la tiŋa la lɔɔ tari la bem nyuurɔ?
Pɔɣedire tari la nyuurɔ n boi de to’ore wuu nɛra n de nɛreyone n tari nyuurɔ se’em la. Baabule la yeti “bayi nyani ayima.” (Pa’ala 4:9) Yele wa sirum dela yelemɛŋɛrɛ bɔ’ɔra Kristakɔma n tari Baabule naresum yɛla tuna tuuma ba pɔɣedire poan. Nɛra la a pɔɣa pɔɣedire san makɛ la tiŋa la lɔɔ, ba ni ku la nɔɔrɛ ti ba nɔŋɛ ge bɔ’ɔra taaba gilema. Wana wa zuo la, ba ni bɔna la fai nyana buraa n naɛ la pɔka bɔna ge ka maalɛ a yɛla. La me ni basɛ ti kɔma la bɔna la fai.
3. Yehowa geele pɔɣedire la wani?
Yehowa n yuun maalɛ yia pɔɣedire la, a yuun yeti: “Buraa wan basɛ a sɔ la a ma ge ana tapilapi la a pɔɣa.” (Pin’ileŋɔ 2:24) Yehowa boti la nɛra la a pɔɣa nɔŋɛ taaba ge ana tapilapi la taaba ba vom dabesa za’a. A bo yɔ’ɔ ti pɔɣa bii sira san tum pɔɣedisa’aŋɔ, ba ta’an basɛ taaba. La san ta dɛna bala, Yehowa bo se’em n ka tum pɔɣedisa’aŋɔ la yɔ’ɔ mɛ ti a loe ti a basɛ a tadaana la bii a da basɛ en. a (Matu 19:9) Yehowa ka boti Kristakɔma di pɔɣeba zo’e zo’e.—1 Timoti 3:2.
VIISƐ PA’ASƐ
Ho de nɛreyone bii ho tari la pɔɣa bii sira woo, zamesɛ baŋɛ hon wan eŋɛ se’em ta’an tara pupeelum ge me basɛ ti Yehowa puurɛ pee.
4. Dekɛ hon de nɛreyone la tum tuuma soŋa soŋa
Yezu yuun bisɛ ti hon de nɛreyone dela bo’olum. (Matu 19:11, 12) Kaalɛ Matu 4:23 ge nyaa sɔsɛ sokere wa:
-
Yezu n yuun ka tari pɔɣa la yuun soŋɛ en la wani ti a ta’an pu’usa a Sɔ ge soŋera nɛreba?
Wuu Yezu la, Kristakɔma n de nɛreyɔna ta’an tara pupeelum pu’usa Yehowa. Ŋmɛ VIDIYO la ge nyaa sɔsɛ sokere wa:
-
Sore kani poan ti Kristakɔma n de nɛreyɔna wan ta’an tum tuunse’a n tari soŋerɛ?
Hon mi?
Baabule la ka pa’alɛ yuunɛ wana mɔpi ti nɛra wan ta’an di pɔɣa bii ele sira. Ge Baabule la pa’alɛ ti nɛra nari ti a gura ta “zɔɛ bunbilipaalumen kunkoma’asum saŋa” la. Sankaŋa n bala ti ga’aregɔ konkoma’asum ta’an basɛ ti bunbilipaalega kan loe loesonɛ.—1 Korint 7:36.
5. Bisɛ homea soŋa ta’an loe hon wan ele siresɛka bii di pɔɣesɛka
Hon wan loe siresɛka bii pɔɣesɛka dela ninmɔ’ɔrɛ yele. Kaalɛ Matu 19:4-6, 9 ge nyaa sɔsɛ sokere wa:
-
Beni n sɔi ti Kristabia ka nara ti a kabela ti a di pɔɣa bii ele sira?
Baabule la ta’an soŋɛ hɔ ti ho baŋɛ se’em ti ho wan di bii ele n nari ti a ana se’em. Sɛla n gaŋɛ za’a la, di bii ele nɛresɛka n nɔŋɛ Yehowa. b Kaalɛ 1 Korint 7:39 la 2 Korint 6:14 ge nyaa sɔsɛ sokere ana wa:
-
Beni n sɔi ti la nara ti Kristabia ele bii di mina n de Kristabia?
-
Hon ti’isɛ ti la wan ana Yehowa la wani to san di bii ele nɛresɛka n ka nɔŋɛ En?
Ho san dekɛ dusi to’ore to’ore yɔɣɛ taaba, ba wan namesɛ. Bala mea nɔɔ, Kristabia san ele bii di nɛra n ka pu’useri Yehowa, a wan nyɛ daaŋɔ zo’e zo’e
6. Geele pɔɣedire wuu Yehowa n geele de se’em la
Diimi Israel tiŋa poan, buraasi basɛba yuun ni basɛ ba pɔɣeba mɛ ge ita bamesi n boti sɛla. Kaalɛ Malaki 2:13, 14, 16 ge nyaa sɔsɛ sokere wa:
-
Beni n sɔi ti Yehowa yaɛ pɔɣedibasega n ka makɛ la Baabule la n pa’alɛ se’em la?
Pɔɣedisa’aŋɔ la pɔɣedibasega tari la daaŋɔ paara kɔma la, la pɔɣa la bii buraa la n ka tum pɔɣedisa’aŋɔ la
Ŋmɛ VIDIYO la ge nyaa sɔsɛ sokere wa:
-
Ho sira bii ho pɔɣa san ka pu’usa Yehowa, ho wan eŋɛ la wani ti ho pɔɣedire la ana soŋa?
7. Dɔla Yehowa n pa’alɛ pɔɣedire yele se’em la soŋa
Nɛra nari ti a tiregɛ mɛ ta’an dɔla Yehowa n pa’alɛ pɔɣedire yele se’em la. c Yehowa me wan kã bo sɛba n iti bala la. Ŋmɛ VIDIYO la.
Kaalɛ Hebru 13:4 ge nyaa sɔsɛ sokere ana wa:
-
Hon ti’isɛ ti yɛm boi bim la Yehowa n pa’alɛ pɔɣedire yɛla se’em la? Bem zuo?
Yehowa boti la Kristakɔma ni di’e nu’o pa’alɛ ti ba di taaba bii ba basɛ taaba wuu tisi zo’e zo’e n yeti nɛreba nari ti ba ni di’e nu’o yele ana wa poan se’em la. Kaalɛ Titus 3:1 ge nyaa sɔsɛ sokere wa:
-
Hon pɔɣedire la makɛ la tiŋa la lɔɔ n pa’alɛ se’em la?
NƐRA TA’AN SOKE YETI: “Beni n sɔi ti la nara ti nɛra ele sira bii di pɔɣa? Buraa la pɔka kan ta’an naɛ taaba bɔna me yoi?”
-
Hon wan lebese la wani?
YELEKPINE
Nɛreyone la pɔɣedire dela bo’olum ti Yehowa dekɛ bo to. Ho de nɛreyone bii ho ele mɛ bii ho di la pɔɣa woo, ho ta’an tara pupeelum ho san tuna Yehowa puti’irɛ n boti sɛla.
Tiisegɔ Sokere
-
Ho wan eŋɛ la wani tara hon de nɛreyone la tuna tuuma soŋa soŋa?
-
Beni n sɔi ti Baabule la yeti ho ele bii di ho Kristabia tadaana ma’a?
-
Baabule la pa’alɛ ti bem ma’a n wan ta’an basɛ ti nɛra la a pɔɣa basɛ taaba?
Ɛ BISƐ
La vuurɛ dela bem ti ho ele sira bii di pɔɣa “Daana la poan ma’a”?
Bisɛ itipa’alegɔ vidiyo bayi n wan ta’an soŋɛ hɔ ti ho loe loesonɛ doose la pɔɣelɛka la pɔɣedire yɛla poan.
Zamesɛ baŋɛ sɛla n sɔi ti mabia ayima ti’isɛ ti Yehowa n bo en sɛla la gani eŋa n basɛ sɛla la mɛ.
Bem yɛla n nari ti nɛra geele ge nyaa ti’isa yelesego bii pɔɣedibasega yele?
“Na’asa ‘Sɛla Ti Naayinɛ Dekɛ Laɣum Taaba La’” (The Watchtower, December, 2018)
a Bisɛ Ki’ileŋɔ Yelesum 4 n tɔɣeri yelesego yɛla se’em ma’a ti sira la bii pɔɣa la ka tum pɔɣedisa’aŋɔ.
b Tisi ase’a poan, dɔɣereba n ni loe nɛra bo ba bia ti a di bii ele. La san dɛna bala, dɔɣereba ni bisɛ la nɛra la n nɔŋɛ Yehowa se’em ge daɣɛ eŋa n tari ligeri se’em.
c Ho san naɛ la nɛra bɔna ge ti ya ka maalɛ ya pɔɣedire la yɛla, homea n nari ti ho loe ti ho wan basɛ en bii ho ele bii di en.
Ho Me Ta'an Bɔta Yele Ana
SOKESE’A TI NƐREBA SƆKERA
Bem Baabule Zamesegɔ N Bala Ti Yehowa Sɛɛradoma Ita La Nɛreba?
Hon la Yehowa Sɛɛradoma san zamesa Baabule la, ho ta’an tara homea Baabule la kaala, zamesegɔ la poan. Ho ta’an yele ho yire nɛreba za’a la ho zɔdoma ti ba laɣum kelese zamesegɔ la.
