NUPINPLỌN 42
Etẹwẹ Biblu Dọ Gando Tlẹnmẹninọ po Alọwle po Go?
To aṣa kavi lẹdo delẹ mẹ, gbẹtọ lẹ nọ lẹndọ mẹde ma gán do ayajẹ to gbẹ̀mẹ adavo e dà asu kavi dà asi. Etomọṣo, e ma yin alọwlemẹ lẹpo wẹ nọ do ayajẹ dandan, podọ e ma yin tlẹnnọ lẹpo wẹ nọ to awubla mẹ. Nugbo lọ wẹ yindọ, Biblu do tlẹnmẹninọ po alọwle po hia taidi nunina lẹ sọn Jehovah dè.
1. Ale tẹlẹ wẹ tin to tlẹnmẹninọ mẹ?
Biblu dọmọ: “Mẹdepope he wlealọ wà dagbe, ṣigba mẹdepope he ma wlealọ na wà dagbe hugan.” (Hia 1 Kọlintinu lẹ 7:32, 33, 38.) Aliho tẹlẹ mẹ wẹ mẹhe yin tlẹnnọ de sọgan “wà dagbe hugan” te? E ma nọ biọ dọ Klistiani he yin tlẹnnọ lẹ ni vánkan nado penukundo nuhudo alọwlemẹ de tọn lẹ go. Ehe nọ zọ́n bọ to paa mẹ, yé nọ do vivò susu. Di apajlẹ, delẹ to yé mẹ nọ penugo nado gbloada na lizọnyizọn yetọn to aliho vonọtaun lẹ mẹ, taidi nado zingbejizọnlin yì lẹdo kavi otò devo mẹ nado lá wẹndagbe lọ. Hú popolẹpo, yé sọgan nọ mọ whenu susu dogọ nado hẹn haṣinṣan yetọn hẹ Jehovah sinyẹn deji.
2. Ale tẹlẹ wẹ to e mẹ nado wlealọ sọgbe hẹ osẹ́n?
Kẹdẹdile e yindo na tlẹnmẹninọ, alọwle nọ hẹn ale vonọtaun lẹ wá. Biblu dọ dọ “omẹ awe pọnte hú mẹdopo.” (Yẹwhehodọtọ 4:9) Klistiani he nọ hodo nunọwhinnusẹ́n Biblu tọn lẹ to alọwle yetọn mẹ lẹ nọ mọ nugbo-yinyin hogbe ehelẹ tọn taun. Asu po asi po he wlealọ sọgbe hẹ osẹ́n lẹ nọ dopà nado nọ do owanyi po sisi po hia ode awetọ, podọ nado nọ wlebòna yede. Ehe nọ zọ́n bọ yé nọ saba tindo numọtolanmẹ lọ dọ emi to hihọ́ glọ hugan asu po asi po he topọ matin alọwle lẹ. Podọ, alọwle nọ hẹn ẹn yọnbasi na yé nado plọn ovi yetọn lẹ whẹ́n to ninọmẹ dagbe mẹ.
3. Nukun tẹwẹ Jehovah nọ yí do pọ́n alọwiwle?
Whenue Jehovah ze alọwle tintan lọ dai, e dọmọ: “Sunnu na jo otọ́ etọn po onọ̀ etọn po do bo na sẹbọdo asi etọn go.” (Jenẹsisi 2:24) Jehovah nọ jlo dọ asu po asi po de ni yiwanna ode awetọ, bosọ gbọṣi opọ́ dile e na dẹnsọ bọ yé na togbẹ̀. Ewọ ma nọ kẹalọyi gbẹdai, adavo eyin dopo to alọwlemẹ lọ lẹ mẹ hùwhẹ ayọdide tọn. Eyin enẹ jọ, Jehovah nọ na dotẹnmẹ alọwlemẹ homẹvọnọ lọ nado de eyin vlavo e na basi gbẹdai kavi lala. a (Matiu 19:9) Humọ, Jehovah ma kẹalọyi dọ Klistiani lẹ ni nọ tindo hugan asu dopo kavi asi dopo.—1 Timoti 3:2.
DINDONANU DOGỌ
Gbadopọnna nuhe a gán wà nado do ayajẹ—bosọ hẹn homẹhun Jehovah—eyin vlavo a yin tlẹnnọ kavi alọwlemẹ.
4. Nọ yí nunina tlẹnmẹninọ tọn zan to aliho dagbe mẹ
Jesu dohia dọ nunina de wẹ tlẹnmẹninọ yin. (Matiu 19:11, 12) Hia Matiu 4:23, enẹgodo dọhodo kanbiọ ehe ji:
-
Nawẹ Jesu yí nunina tlẹnmẹninọ tọn zan nado yilizọn na Otọ́ etọn bosọ gọalọna mẹdevo lẹ gbọn?
Klistiani lẹ lọsu sọgan mọaleyi sọn tlẹnmẹninọ yetọn mẹ dile Jesu wà do. Hò VIDEO lọ, enẹgodo dọhodo kanbiọ he bọdego ji.
-
Aliho tẹlẹ mẹ wẹ Klistiani lẹ sọgan yí tlẹnmẹninọ yetọn zan bosọ mọaleyi sọn e mẹ te?
Be a yọnẹn ya?
Biblu ma dọ owhe he mẹde sọgan do taun whẹpo do wlealọ. Ṣigba, e na tuli jọja lẹ nado nọ nọte kakajẹ whenue yé ‘zẹ̀ owhe aflanmẹ tọn yetọn go whẹ́,’ yèdọ ojlẹ he mẹ ojlo zanhẹmẹ tọn nọ sinyẹn na jọja lẹ te, ehe sọgan zọ́n bọ nudide yetọn lẹ ma na sọgbe hẹ lẹnpọn dagbe.—1 Kọlintinu lẹ 7:36.
5. Nọ yí nuyọnẹn do de mẹhe a jlo na wlealọ hẹ
Dopo to nudide he sinyẹn hugan he a sọgan basi to gbẹ̀mẹ lẹ mẹ wẹ nado de mẹhe a na wlealọ hẹ. Hia Matiu 19:4-6, 9, enẹgodo dọhodo kanbiọ ehe ji:
-
Naegbọn Klistiani de ma dona zọ̀n plaplaji do wlealọ?
Biblu sọgan gọalọna we nado yọ́n nuhe a na pọ́n to mẹhe a jlo na wlealọ hẹ de go. Hú popolẹpo, hẹn ẹn diun dọ mẹhe a jlo na wlealọ hẹ lọ yiwanna Jehovah. b Hia 1 Kọlintinu lẹ 7:39 gọna 2 Kọlintinu lẹ 6:14. Enẹgodo dọhodo kanbiọ ehelẹ ji:
-
Naegbọn mẹhe yin Klistiani hatọ de kẹdẹ wẹ mí dona wlealọ hẹ?
-
Nawẹ a lẹndọ e na ṣí na Jehovah eyin a wlealọ hẹ mẹde he ma yiwanna Ẹn?
Eyin kanlin awe he gbọnvo taun na yede yin sìnsìn dopọ, yé omẹ awe lẹ na jiya. Mọdopolọ, Klistiani he wlealọ hẹ mayisenọ de na pehẹ nuhahun susu lẹ
6. Nọ pọ́n alọwle hlan dile Jehovah nọ wà do
To Islaeli hohowhenu tọn, sunnu delẹ gbẹ́ asi yetọn na whẹjijọ ṣejannabi tọn lẹ wutu. Hia Malaki 2:13, 14, 16, enẹgodo dọhodo kanbiọ ehe ji:
-
Naegbọn Jehovah do gbẹwanna gbẹdai he ma sọgbe hẹ Owe-wiwe lẹ?
Ayọdide po gbẹdai po nọ hẹn awugble sinsinyẹn wá na alọwlemẹ homẹvọnọ lọ po ovi lẹ po
Hò VIDEO lọ, enẹgodo dọhodo kanbiọ he bọdego ji.
-
Eyin mẹhe a wlealọ hẹ ma nọ sẹ̀n Jehovah, etẹwẹ a gán wà na mì nido do ayajẹ?
7. Nọ setonuna nubiọtomẹsi Jehovah tọn lẹ gando alọwle go
E sọgan biọ avọ́sinsan kavi vivẹnudido sinsinyẹn to mẹde si nado setonuna nubiọtomẹsi he Jehovah zedai gando alọwle go lẹ. c Amọ́ Jehovah nọ dona mẹhe wàmọ lẹ. Hò VIDEO lọ.
Hia Heblu lẹ 13:4, bo dọhodo kanbiọ ehelẹ ji:
-
Be a lẹndọ nubiọtomẹsi Jehovah tọn lẹ gando alọwle go sọgbe hẹ lẹnpọn dagbe ya? Naegbọn a do dọ mọ?
Jehovah nọ donukun dọ Klistiani lẹ ni yì ahọlu-whé nado basi kandai alọwle kavi gbẹdai tọn yetọn lẹ, na to otò susu mẹ nubiọtomẹsi de wẹ ehe yin sọn aṣẹpatọ lẹ dè. Hia Titu 3:1, enẹgodo dọhodo kanbiọ ehe ji:
-
Eyin a ko dà asu kavi dà asi, be mì hẹn ẹn diun dọ mì wlealọ sọgbe hẹ osẹ́n bọ ahọlu kẹalọyi pọninọ mìtọn ya?
MẸDE SỌGAN KANSE DỌ: “Be dandan wẹ dọ yè ni wlealọ ya? Be sunnu po yọnnu po de ma gán nọpọ́ domọ poun wẹ ya?”
-
Etẹwẹ a na gblọn?
BLADOPỌ
Nunina lẹ wẹ tlẹnmẹninọ po alọwle po yin sọn Jehovah dè. Vlavo mí yin tlẹnnọ kavi alọwlemẹ, mímẹpo wẹ sọgan duvivi ayajẹ po pekọ po tọn eyin mí nọ yinuwa to kọndopọ mẹ hẹ ojlo Jehovah tọn.
Dogbapọn
-
Nawẹ mẹde sọgan yí tlẹnmẹninọ etọn zan to aliho dagbe mẹ gbọn?
-
Naegbọn Biblu do dọ dọ Klistiani hatọ de kẹdẹ wẹ yè dona wlealọ hẹ?
-
Dodonu Owe-wiwe tọn dopo gee tẹwẹ sọgan zọ́n bọ mẹde na basi gbẹdai?
PỌ́N NUDỌNAMẸ DEVO LẸ
Etẹwẹ alọwiwle “to Oklunọ mẹ kẹdẹ” zẹẹmẹdo?
“Kanbiọ lẹ sọn Wehiatọ lẹ Dè” (Atọ̀họ̀-Nuhihọ́ lọ Tọn, 1er juillet 2004 tọn)
Pọ́n video wadohia tọn awe delẹ he gán gọalọna we nado basi nudide dagbe lẹ na nuhe dù họntọnmẹninọ po alọwle po.
Pọ́n nuhewutu mẹmẹsunnu de nọ mọdọ nuhe Jehovah na emi họakuẹ taun hugan nudepope he emi ko jodo godo.
Etẹlẹ ji wẹ mẹde dona lẹnnupọn do whẹpo do wá gbèta gbẹdai kavi kinklan tọn kọ̀n?
“Nọ Gbògbéna ‘Nuhe Jiwheyẹwhe Ko Kọndopọ’” (Atọ̀họ̀-Nuhihọ́ lọ Tọn, décembre 2018 tọn)
a Pọ́n Ayidonugo 4tọ he dọho gando kinklan go to whenue ode to alọwlemẹ lọ lẹ mẹ ma deayọ.
b To aṣa kavi lẹdo delẹ mẹ, mẹjitọ lẹ wẹ nọ de mẹhe visunnu kavi viyọnnu yetọn na wlealọ hẹ. To whẹho mọnkọ lẹ mẹ, onú tintan he mẹjitọ owanyinọ lẹ nọ pọ́n wẹ eyin mẹlọ yiwanna Jehovah, e ma yin akuẹ kavi ninọmẹ he mẹ mẹlọ wá sọn.
c Eyin a ko topọ hẹ mẹde he ma wlealọ hẹ we, hiẹ lọsu wẹ na basi nudide eyin a na jo mẹlọ do kavi wlealọ hẹ ẹ.
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
