SOMO LYA 42
Bichi Ebiblia Ederhere oku Bilolere Obulamba n’Obuhya?
Mu micho miguma, abantu banawaza ok’omuntu arhakagwarha obusime nk’arhashabirwe changwa ashabe. N’obola arhali abashabire boshi ba bajira obusime, arhanali abalamba boshi ba barhajira busime. Obukweri buli oku Ebiblia ederhere oku obuhya n’obulamba zoshi mpembo.
1. Nyungu zihe ziguma okuba mulamba kuherhe?
Ebiblia ederhere: “Olala wajirire obuhya ajirire bwinja, aliko olala arhajirire obuhya aba ey’ajirire bwinja kulusha.” (Osome 1 Wakorinto 7:32, 33, 38.) Mu njira nchi owayorhore mulamba akaba ajirire bwinja kulusha? Omukristu w’omulamba arhakawaza oku by’omulume changwa omukazi akenere na ntaye agwerhe. Ahubwe, ahanene ajira obuhuru bunene. Omufano, baguma banagala kujira binene omu kasi ka Mungu omu bulyo busimisize, nk’okuhamira omu chindi chihugo kuhubiri mw’emyazi minja. N’echilushire byoshi, bakageza bisanzi binene omu kukomeza obwira bwabo haguma na Yehova.
2. Nyungu zihe ziguma okujira obuhya omu njira eyemererwe kuherhe?
Obuhya, n’obulamba, buli chiguma chiherhe ezago-zago nyungu. Ebiblia ederhere oku: “babiri balushire muguma.” (Muhubiri 4:9) Ebila bili by’okuli ahanene oku Bakristu bali bakolesa amakanuni me Biblia omu buhya bwabo. Abashabene omu njira eyemererwe banalaganya oku bazigirana, bakengana, n’okulembana. Echo chinarhuma bachiyunva bali omu bulanzi bwenene kulusha omulume n’omukazi balamire haguma konyine. Kandi obuhya bunarhabala y’abana balembwa bwinja banachiyunve bali omu bulanzi.
3. Gurhe Yehova anabona obuhya?
Amango Yehova arhonderesaga obuhya burhanzi, aderha: “Omulume aleka eshe na nyina n’okuchishwekera ku mukage.” (Mwanzo 2:24) Yehova alonzeze omulume na mukage basimane banachishwekere haguma akalamo kabo koshi. Ayemerere okushanda obuhya nka muguma mubo amagera embuga. Omu hali eli nk’eyo, Yehova ahere oli mwerukweru obuhuru b’okuchishoga akaba ashanda obuhya changwa nanga. a (Matayo 19:9) Yehova arhayemerere oluhali omu Bakristu.—1 Timoteo 3:2.
HUMBA BWENENE
Lolaga nka gurhe wakagwarha omwishingo n’okusimisa Yehova; obe mulamba changwa oli omu buhya.
4. Okolese bwinja oluhembo l’obulamba
Yesu alibwene obulamba nka luhembo. (Matayo 19:11, 12) Osome Matayo 4:23, muje mwaganira kw’echila chibazo:
-
Gurhe Yesu alikoleseze oluhembo l’obulamba omu kukolera Eshe n’okurhabala abandi?
Abakristu bakagwarha obusime nka bamakolesa obulamba bwabo kuguma na Yesu. Ziha EVIDEO, muje mwaganira kw’echila chibazo.
VIDEO: Abalamba Bemana (3:11)
-
Mu njira zihe zinja Abakristu bakakolesa m’obulamba bwabo?
Walimenyere si?
Ebiblia erhaderhere omuntu akwanene kujira obuhya ey’agwerhe myaka enga. Aliko ehebere omuntu omurhima alindire mpaka omudugurho g’obusole gugere, amango enyifinjo y’echijiro ch’obuhya eba ekalihire bwenene omu kuntu yakarhuma ochili musole arhola esimikiro mbi.—1 Wakorinto 7:36.
5. Ochishoge n’obwengehe eyi washabana naye
Okuchishoga eyi washabana naye chili chiguma omu simikiro z’akamaro bwenene wakajira omu kalamo. Osome Matayo 19:4-6, 9, muje mwaganira kw’echila chibazo:
-
Bulagurhe Omukristu arhakwanene kuhubira obuhya?
Ebiblia yakakurhabala omenye eyi washabana naye akwanene kuba ey’ali gurhe. Olonze eyi washabana naye ozigiire Yehova. b Osome 1 Wakorinto 7:39 na 2 Wakorinto 6:14. Muje mwaganira kw’ebila bibazo:
-
Bulagurhe owerhu Mukristu yenyine yi rhukwanene kushabana naye?
-
Gurhe owazize Yehova akachiyunva nka rhwamashabana n’omuntu orhamuzigire?
Nka bamashwekera haguma nyama ebiri zirhali kuguma, zombi zalibuka. Intyo kon’oko nk’Omukristo amashabana n’orhali mwemezi, ahurana bibazo binene
6. Obone obuhya nk’oku Yehova naye anabubona
Omu Izraeli ya mira, hali balume baguma baliri bashanda na bakabo eju y’obwikazize. Osome Malaki 2:13, 14, 16, muje mwaganira kw’echila chibazo:
-
Chirhuma Yehova ashomba okushanda obuhya k’obulyalya?
Obugonyi n’okushanda obuhya binababaza bwenene oli mwerukweru n’abana
Ziha EVIDEO, muje mwaganira kw’echila chibazo.
VIDEO: Obuhya—Chifundo ch’Amango Moshi (4:30)
-
Akaba ey’oshabene naye arhali mwemezi, bichi wakajira y’olerha obusime omu buhya bwawe?
7. Okolese amakanuni ma Yehova malolere obuhya
Hali oku byakahema omuntu achihangane bwenene y’agala kukulikiza amakanuni ma Yehova malolere obuhya. c Aliko Yehova anagisha bala banamakolesa. Ziha EVIDEO.
VIDEO: Wakagala Kukulikiza Amakanuni ma Yehova Malolere Obuhya (4:14)
Osome Waebrania 13:4, muje mwaganira kw’ebila bibazo:
-
Owazize okw’amakanuni ma Yehova malolere obuhya mashwekere abantu si? Akaba nechi, bulagurhe? N’akaba nanga, bulagurhe?
Yehova ahemere Abakristu bayandikise obuhya bwabo emwa leta; n’akaba bashanda, baje kushanda emwa leta. Bulala m’amarhegeko amola maba mu bihugo binene. Osome Tito 3:1, muje mwaganira kw’echila chibazo:
-
Akaba oli omu buhya, oli sire ok’obuhya bwawe bumenyikene emwa leta?
HALI OWAKABAZA: “Bulagurhe bihemere okw’abantu bashabane? Omulume n’omukazi barhakafi bera haguma barhanashabene si?”
-
Gurhe wakamushubiza?
OKU BUGEKE
Obulamba n’obuhya zili mpembo zirhengere emwa Yehova. Zoshi zakalerha omwishingo n’obusime nk’abantu bazikoleseze nk’oku Yehova alonzeze.
Rhuchiyibusye
-
Nka gurhe omuntu okakolesa obulamba bwage bwinja?
-
Bulagurhe Ebiblia ederhere ok’Omukristu akwanene kushaba owabo Mukristu yenyine?
-
Bichi biguma byonyine Ebiblia eyemerere byakarhuma omuntu ashanda obuhya?
EYINDI MYAZI
Okujira obuhya muli Waliha konyine k’okuderha gurhe?
“Ebibazo by’Abanasoma Ebitabu Byerhu” (Omunara g’Omulanzi, Lusiku 1, Mwezi gwa 7, 2004)
Lola evideo ya bigabi bibiri yakakurhabala omenye gurhe wakarhola esimikiro zinja oku bilolere okushambaza n’obuhya.
Okuchirheganya Kujira Obuhya (11:53)
Lola bulagurhe mwene-werhu muguma anachiyunva okw’ebi Yehova amuhere bili by’akachiro kanene kulusha byoshi alekene nabyo.
Nalinihire oku Lusiku Luguma nj’Ayiga Okuli (1:56)
Bichi omuntu akwanene kurhanga menya embere achishoge okushanda obuhya changwa okulekana n’owabo?
“Okenge ‘Echi Mungu Ahebere Haguma’” (Omunara g’Omulanzi, Mwezi gwe 12, 2018)
a Olole Amahugulo ma 4 mashambere oku bilolere okulekana na ntaye wajirire obugonyi.
b Mu micho miguma, abazere banachishogera abana babo omuntu bashabana naye. Omu hali eli nk’eyo abazere baherhe obuzigire banabona oku, arhali ogwerhe efuranga ye -mukazi changwa mulume mwinja, s’ozigiire Yehova.
c Akaba olamire n’eyi murhashabene naye, wenyine wakachishoga akaba wamuleka changwa mwaja mwashabana naye.
