LESON 42
Ki sa Bib la di konsènan seliba ak maryaj?
Nan kèk kilti moun yo panse yon moun pap gen kè kontan si l pa marye. Poutan, se pa tout moun ki marye ki gen kè kontan, ni se pa tout moun ki selibatè ki pa gen kè kontan. An reyalite Bib la montre ni maryaj ni seliba se kado Jewova bay.
1. Ki avantaj yon moun genyen lè l selibatè?
Bib la di: “Yon moun ki marye byen fè […], men, yon moun ki pa marye ap fè pi byen toujou.” (Li 1 Korentyen 7:32, 33, 38.) Nan ki sans yon moun ki selibatè fè pi byen pase yon moun ki marye? Moun ki selibatè yo pa gen pou yo pran swen yon mari oswa yon madanm, sa vin fè an jeneral yo vin gen plis libète. Pa egzanp, gen nan yo ki rive fè plis nan travay predikasyon an e ki rive fè yon seri bagay enteresan, tankou vwayaje al nan yon lòt peyi pou yo preche bon nouvèl la. Sa k pi enpòtan an, sèke yo kapab pase plis tan nan yon seri aktivite k ap ede yo vin pi pwòch ak Jewova.
2. Ki avantaj ki genyen lè de moun marye selon lalwa?
Menm jan ak seliba, maryaj pèmèt moun jwenn anpil avantaj ki san parèy. Bib la di: “De pi bon pase youn.” (Eklezyas 4:9). Kretyen ki aplike prensip ki nan Bib la nan maryaj yo kapab wè verite sa a aklè. Selon lalwa, de moun ki marye fè pwomès pou youn renmen lòt, pou youn respekte lòt e pou youn demontre afeksyon pou lòt. Konsa, byen souvan, yo santi yo pi byen e yo pi an sekirite pase moun ki annik ap viv ansanm san yo pa marye. E pitit yo santi yo pi byen e yo pi an sekirite tou.
3. Ki jan Jewova wè maryaj?
Lè Jewova t ap marye de premye moun yo li te di: “Yon gason ap kite papa l ak manman l, li pral atache ak madanm li.” (Jenèz 2:24). Jewova vle pou yon mari ak madanm renmen youn lòt epi ret atache youn ak lòt pou tout vi yo. Li pèmèt divòs pou yon sèl rezon, se lè youn nan moun ki marye yo fè adiltè. Lè sa a, Jewova bay moun ki inosan an dwa pou l deside si l ap divòse a (Matye 19:9). Jewova pap dakò pou yon kretyen gen plis pase yon mari oswa yon madanm. — 1 Timote 3:2.
FOUYE PLIS
Aprann ki jan w ka gen kè kontan e ki jan w ka fè kè Jewova kontan kit ou pa marye, kit ou marye.
4. Byen pwofite seliba a ki se yon kado
Jezi te konsidere seliba kòm yon kado (Matye 19:11, 12). Li Matye 4:23, epi reponn kesyon sa a:
-
Ki jan Jezi te byen pwofite sitiyasyon l antanke moun ki pa marye pou l sèvi Papa l e pou l ede lòt moun?
Kretyen ki pa marye yo ka gen kè kontan lè yo byen pwofite sitiyasyon yo antanke moun ki pa marye menm jan ak Jezi. Gade VIDEYO a, epi reponn kesyon ki vin apre a.
-
Ki jan kretyen ki pa marye yo ka byen pwofite sitiyasyon yo?
Èske w te konnen?
Bib la pa bay laj pou moun marye. Men, li pa ankouraje yon moun pou l marye pandan l “twò jèn”, peryòd kote gwo dezi seksyèl li genyen ka anpeche l pran bon desizyon. — 1 Korentyen 7:36.
5. Byen chwazi moun w ap marye avè l la
Youn nan pi gwo desizyon w ap gen pou w pran lavi w se chwazi ak kiyès w ap marye. Li Matye 19:4-6, 9, epi reponn kesyon sa a:
-
Poukisa yon kretyen pa ta dwe kouri marye?
Bib la ka ede w konnen ki kalite ki kapab fè yon moun vin yon bon mari oswa yon bon madanm. Sa k pi enpòtan an, se pou w chèche yon moun ki renmen Jewova b. Li 1 Korentyen 7:39 ak 2 Korentyen 6:14. Epi reponn kesyon sa yo:
-
Poukisa se ak kretyen parèy nou sèlman nou dwe marye?
-
Ki jan w panse Jewova t ap santi l si nou ta marye ak yon moun ki pa renmen l?
Si yo mete de bèt ki diferan anpil anba menm jouk, y ap soufri. Menm jan an tou, yon kretyen ki marye ak yon moun ki pap sèvi Jewova ap gen anpil pwoblèm.
6. Se pou w gen menm pwennvi ak Jewova sou maryaj
Nan Izrayèl tan lontan an, gen yon seri mesye ki te konn divòse ak madanm yo paske mesye sa yo se tèt yo sèlman yo te wè. Li Malachi 2:13, 14, 16, epi reponn kesyon sa a:
-
Poukisa Jewova rayi lè gen moun ki divòse pou rezon ki pa nan Bib la?
Adiltè ak divòs fè ni mari oswa madanm ki inosan an, ni timoun yo soufri.
Gade VIDEYO a, epi reponn kesyon ki vin apre a.
-
Si w marye ak yon moun ki pap sèvi Jewova, ki sa w ka fè pou maryaj ou reyisi?
7. Obeyi prensip Jewova bay konsènan maryaj yo
Yon moun gendwa bezwen fè anpil efò pou l obeyi prensip Jewova bay anrapò ak maryaj c. Men, ou mèt sèten Jewova ap beni moun ki obeyi prensip sa yo. Gade VIDEYO a.
Li Ebre 13:4, epi reponn kesyon sa yo:
-
Èske w panse prensip Jewova bay sou maryaj yo rezonab? Sa k fè se konsa w reponn?
Jewova atann pou kretyen yo anrejistre maryaj yo oswa divòs yo devan Leta, jan pifò peyi mande pou sa fèt. Li Tit 3:1, epi reponn kesyon sa a:
-
Si w marye, èske w sèten Leta rekonèt maryaj ou?
SI YON MOUN TA MANDE W: “Èske de moun pa ka annik viv ansanm, san yo pa oblije marye?”
-
Ki repons ou t ap bay?
SA W TE APRANN
Ni seliba, ni maryaj se kado Jewova bay. Ni moun ki selibatè, ni moun ki marye ka gen kè kontan si yo viv ann amoni ak volonte Jewova.
Revizyon
-
Ki jan w ka byen pwofite sitiyasyon w antanke moun ki pa marye?
-
Poukisa Bib la di se ak yon kretyen menm jan avèk nou sèlman nou dwe marye?
-
Ki sèl rezon Bib la bay pou moun divòse?
APRANN PLIS
Ki sa sa vle di pou yon moun marye nan Seyè a sèlman?
Gade de videyo ki ka ede w pran bon desizyon anrapò ak frekantasyon ak maryaj.
Gade poukisa yon frè santi sa Jewova ba li gen plis valè lontan pase tout sa l te kite dèyè.
Sou ki sa yon moun ta dwe reflechi anvan l deside divòse oswa separe?
“Onore maryaj: Yon dispozisyon Bondye pran” (Toudegad desanm 2018)
b Nan kèk kilti, se paran yo ki chwazi mari oswa madanm pou pitit yo. Lè konsa, sa k plis enterese paran ki gen lanmou yo se chwazi yon moun ki renmen Jewova. Yo pap chwazi yon moun pou lajan li posede, ni pou pozisyon l nan sosyete a.
c Si w ap viv ak yon moun san ou pa marye avèk li, se ou menm ki pou deside si w ap kite l oubyen si w ap marye avè l.
Lòt sijè ki enteresan
KESYON MOUN POZE SOUVAN
Ki sa etid Labib Temwen Jewova yo ofri a ye?
Temwen Jewova yo ofri yon pwogram etid Labib gratis ki pèmèt yon etidyan patisipe nan etid la. Pwogram sa a pèmèt ou itilize nenpòt tradiksyon Labib. Ou kapab envite nenpòt fanmi oswa zanmi patisipe nan etid la.
