EHONGWA 42
Ombeibela i tja vi ohunga norukupo noukombe?
Mozombazu tjiva, ovandu ve kambura kutja omundu komoo yenene okukara nondjoroka indu tji u hi ya kupa poo okukupwa. Posi yokutja, kaavehe mba kupa poo okukupwa mbe nondjoroka nu kaavehe mbe ri ovakombe mbe hi nondjoroka. Ouatjiri owombwi wokutja Ombeibela i tja oukombe norukupo oviyandjewa okuza ku Jehova.
1. Ouwa waye mbu za mokurira omukombe?
Ombeibela i tja: “Ingwi ngu ma kupu ma tjiti nawa, nungwari ingwi ngu hi nokukupa ma tjiti nawa kombanda yanao.” (1 Ovakorinte 7:32, 33, 38, NWT) Omomiano viṋe omundu omukombe mu ma tjiti “nawa kombanda yanao”? Ovakriste ovakombe kave nomundu ngu mave sokurikendera ko. Ku nao, owo ve kara nouyara ouingi. Otjotjihorera, tjiva ve yenena okuungura ovingi motjiungura tjokuzuvarisa momiano pekepeke, tjimuna okutjindira kehi rarwe okukazuvarisa ombuze ombwa. Kombanda yanao, owo ve kara noruveze oruingi okutumbuka popezu na Jehova.
2. Ouwa waye mbu za mokukupasana kotjiveta?
Orukupo ru eta ozondaya ozombwa, tjimuna oukombe. Ombeibela i tja: “Okokuwa tji mu ri mu vevari.” (Omuzuvarise 4:9) Nu ihi tji rira ouatjiri kOvakriste mbe ṱakamisa omirari vyOmbeibela morukupo rwawo. Ovakupasane mbe kupasana kotjiveta ve tjita oruyano kutja mave suverasana nokuraisasana ondengero. Mena ranao, owo ve rimuna kutja ve ri mondjeverero pu imba mbe hupa pamwe nokuhinokukupasana. Nu wina, orukupo ru tjita kutja ovanatje ve kare mondjeverero.
3. Hapo Jehova u vara vi orukupo?
Indu Jehova tja kupisa ovandu ovatenga, eye wa tja: “Omurumendu opu ma zu okuisa ihe na ina na kakatere komukazendu we.” (Genesis 2:24) Jehova u vanga kutja omurumendu nomukazendu mba kupasana ve suverasane nokukara pamwe nga aruhe ngunda ave nomuinyo. Epu rimwe ariyerike eye nde yandjera omateyero worukupo, orondu umwe tja tjiti oruvakiro. Mongaro otja indjo, Jehova u yandja ousemba ku ingwi ngu hi nondjo okutoorora kutja ma teya orukupo poo indee. a (Mateus 19:9) Jehova ka yandjere Ovakriste kutja ve kupe poo okukupwa i yovandu vevari poo kombanda yanao.—1 Timoteus 3:2.
KONḒONONA OUKOTO
Rihonga omuano mu mo yenene okukara nondjoroka nomuano mu mo yenene okuyorokisa Jehova, kutja wa kupwa poo oove omukombe.
4. Ungurisa otjiyandjewa tjoukombe momuano omuwa
Jesus aa vara oukombe otjotjiyandjewa. (Mateus 19:11, 12) Lesa Mateus 4:23, nu okuzambo hungirira kepuriro ndi:
-
Jesus wa ungurisa vi otjiyandjewa tjoukombe okukarera Ihe nokuvatera varwe?
Ovakriste mbe ha kupwa mave yenene okukara nondjoroka mokuungurisa oukombe wawo tjimuna Jesus tjaa tjiti. Nyanda OKAVIDIO, nu okuzambo hungirira kepuriro ndi mari kongorere mba.
-
Omomiano viṋe omiwa Ovakriste mu mave yenene okuungurisa oukombe wawo?
Hapo ove oo tjiwa?
Ombeibela kai hungire kutja mo sokukara nozombura ngapi tji mo kupu poo okukupwa. Posi yokutja, oyo i tunduuza omitanda okuundja nga indu oruveze “ozonḓuma tji ze kara nomasa tjinene tji rwa kapita.” Oruveze ndwo ru tjita kutja i rire ouzeu komitanda okutjita ozondando ozombwa.—1 Ovakorinte 7:36, NWT.
5. Toorora epanga roye rorukupo nounongo
Okutoorora epanga roye romurukupo, ondando imwe onanḓengu ndji mo yenene okutjita. Lesa Mateus 19:4-6, 9, nu okuzambo hungirira kepuriro ndi:
-
Ongwaye Omukriste tje ha sokuhakahana okukupa poo okukupwa?
Ombeibela mai yenene okukuvatera okutjiwa kutja epanga ewa romorukupo mari sokukara novikaṋena viṋe. Otjiṋa otjinanḓengu tjinene, okupaha epanga romorukupo nda suvera Jehova. b Lesa 1 Ovakorinte 7:39 no 2 Ovakorinte 6:14. Okuzambo hungirira komapuriro nga:
-
Omena raye tji matu sokukupa omundu ngu ri Omukriste omukwetu uriri?
-
Mo munu kutja Jehova u fula vi indu tji twa toorora okukupa poo okukupwa i yomundu ngu he Mu suvera?
Ovinamuinyo mbi hi nonḓengu imwe tji vya kutirwa kumwe, mavi hihamisasana. Momuano otjingewo, Omukriste tja kupu poo tja kupwa i yomundu ngu ha karere Jehova ma kara nomauzeu omengi
6. Vara orukupo otja Jehova tje ru vara
MoIsrael otjikuru, ovarumendu tjiva aave teya otukupo twawo, mena romapu nge he ri omasemba. Lesa Maleaki 2:13, 14, 16, nu okuzambo hungirira kepuriro ndi:
-
Omena raye Jehova tja tonda omateyero worukupo, mena romapu nge ha zikamene kOmbeibela?
Oruvakiro nomateyero worukupo vi hihamisa ingwi omuhinandjo morukupo novanatje
Nyanda OKAVIDIO, nu okuzambo hungirira kepuriro ndi mari kongorere mba.
-
Indu tji wa kupa poo okukupwa i yomundu ngu ha karere Jehova, ovikwaye mbi mo yenene okutjita kutja orukupo rwoye ru kare nondjoroka?
7. Ṱakamisa omirari vya Jehova ohunga norukupo
Omundu mape ya a hepa okukondja nomasa kutja ma ṱakamise omirari vya Jehova ohunga norukupo. c Nungwari, Jehova u sera ondaya ku imba mbe tjita nao. Nyanda OKAVIDIO.
Lesa Ovaheberi 13:4, nu okuzambo hungirira komapuriro nga:
-
Hapo mo munu kutja matu yenene okuṱakamisa omirari vya Jehova ohunga norukupo? Omena raye?
Jehova u vanga kutja Ovakriste ve tjangise otukupo twawo nomateyero worukupo kotjiveta, mena rokutja momahi omengi ohoromende i undjira ko kutja ovandu ve tjite nao. Lesa Titus 3:1, nu okuzambo hungirira kepuriro ndi:
-
Ndoovazu ove wa kupa poo wa kupwa, hapo orukupo rwoye rwa kutwa kotjiveta?
OMUNDU MAPE YA A PURA KUTJA: “Ongwaye tji mamu sokukupasana? Okukara pamwe uriri ku noumba waye?”
-
Ove otjo zira vi?
OKUYARUKIRA PO OUSUPI
Oukombe norukupo oviyandjewa okuza ku Jehova. Ovyo vi yenena okueta ondjoroka indu tji twe vi ungurisa momuano Jehova me vanga.
Okurizemburukisa
-
Omundu ma yenene vi okuungurisa oukombe we momuano omuwa?
-
Omena raye Ombeibela tji tja matu sokukupa Omukriste omukwetu uriri?
-
Otja kOmbeibela epu riṋe ariyerike ndi mari ku yandjere okuteya orukupo?
RIHONGA OVINGI
Okukupa “omukriste” ku heya tjike?
Tarera okavidio ku make yenene okukuvatera okutjita ozondando ozosemba ohunga nokutarerasana norukupo.
Rihonga kutja omena raye omurumendu umwe omukambure tjaa muna kutja oviṋa Jehova mbye mu pa ovinanḓengu tjinene okukapita oviṋa mbya isa kongotwe.
Ovikwaye tjiva omundu mbi ma sokuripurira ko ngunda e hi ya toora omukambo wokuteya orukupo poo wokuhaṋika?
“Yozika ‘ihi tji tja kutwa kumwe i Ndjambi’” (Oruhungu, Desemba 2018)
a Tara kOmakahururiro 4 ohunga nokuhaṋika indu tji pe hi noruvakiro.
b Mozombazu tjiva, ovanene ve toorora kutja omuatje wawo omuzandu poo omukazona ma kupwa i uṋe. Indu tji pe ri nao, ovanene vorusuvero rutenga kave tara kutja omundu u novimariva poo u varwa vi i varwe, posi ya ve tara kutja omundu wa suvera Jehova, poo indee.
c Indu tji u kara pu nomundu ngu mu hi ya kupasana, ondando yoye omuini kutja ma mu kupasana poo ma mu haṋika.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
