ƐLĀ Ō NWU ƆMƐ 42
Ɔdi Nɛ Ubáyíbu Ka Lɛyikwu Ācɛ Nōo Lɛ Ɔba Amāŋ Ɔnyā Mla Ācɛ Nōó Kē Lɛ Ŋ Ma?
Ipu uculo ōhī, ācɛ gbɛla ka ɔdaŋ ku ɔcɛ i lɛ ɔba amāŋ ɔnyā ɛ ŋ, ɔcɛ i gáā lɛ eeye gla ŋ. Naana kpɔ a, ó wɛ ɛjɛɛji ācɛ nōo lɛ ɔba amāŋ ɔnyā a gē gweeye a ŋ. Ó kē wɛ ɛjɛɛji ācɛ nōó lɛ ɔba amāŋ ɔnyā ɛ ŋ ma gē gweeye ŋ duu. Ubáyíbu da alɔ ku ācɛ nōo lɛ ɔba amāŋ ɔnyā mla ācɛ nōó kē lɛ ŋ ma wɛ ɛhi ŋma ɛgiyi Ujehofa.
1. Ɔdi wɛ itene ōhī nōo gē wa ɔdaŋ ka ɔcɛ i lɛ ɔba amāŋ ɔnyā ŋ ma?
Ubáyíbu kahinii: ‘Ɔcɛ nōo lɛ ɔba amāŋ ɔnyā gē ya lɔhi, amáŋ ɔcɛ ɛ̄nɛ̄ ō lɛ ɔba amāŋ ɔnyā ɛ ŋ géē ya lɔhi fiyɛ.’ (Jé 1 Ācɛ Ukɔ́rīnti 7:32, 33, 38.) Ɔwɛ ɛgɛnyá nɛ ācɛ nōó lɛ ɔba amāŋ ɔnyā ɛ ŋ ma ‘géē ya lɔhi fiyɛ’ a? Ācɛ O Yɛce Ukraist nōó lɛ ɔba amāŋ ɔnyā ŋ i lɛ obiye duuma néē gē teyi tu ɛgbá ku nu ŋ. Ohigbu ɛnyā a, é lɛ ɛga nwune tōōtɔ̄ɔ̄ fiyɛ. Ōhī ku uwa lɛ ɛga ō yuklɔ nwune lɛ Ujehofa fiyɛ. Ocabɔ, ōhī ku uwa gē gā ajɛ ɔhá kéē nyɔ i tɔɔna ku ɔkoolɔhi a. Ofiyɛ duu a, é gē lɛ ɛga ō tubla Ujehofa ajaajɛ.
2. Ɔdi wɛ itene ōhī nōo gē wa ɔdaŋ ka ɔba mla ɔnyā lɛ iyi uwa lɛ ɔkwɔɔkwɛyi a?
Obatɔha ku ɔba mla ɔnyā gē bi itene alɛwa wa, ɛgɛ nɛ Ācɛ O Yɛce Ukraist nōó lɛ ɔba amāŋ ɔnyā ɛ ŋ ma gē lɛ itene alɛwa duu a. Ubáyíbu ka “ācɛ ɛpa lɔhi fíyɛ́ ɔ̄cɛ ékpónú á.” (Ɔ̄cokóītá 4:9) Ɛnyā wɛ ɔkwɛyi ɛgiyi Ācɛ O Yɛce Ukraist nōo gē bi ukɔ́ ku Ubáyíbu le yuklɔ ipu obatɔha ku uwa. Ɔba mla ɔnyā nōo lɛ iyi uwa lɛ ɔkwɔɔkwɛyi gē cokonu kéē géē yihɔtu iyi uwa, kéē géē lɛ ojilima ce iyi uwa klla teyi tu iyi uwa. Ohigbu ɛnyā a, é gē lɛ ogbotu fiyɛ ɔba mla ɔnyā nōo lā mla iyi uwa anca. Ayi ku ɔlɛ uwa klla géē lɛ ogbotu duu.
3. Ɛgɛnyá nɛ Ujehofa gē leyi má obatɔha ku ɔba mla ɔnyā a?
Eko nɛ Ujehofa lɛ ōmiya ku obatɔha ku ɔba mla ɔnyā kwaajɛ aflɛyi a, ó kahinii: “Ɔ̄cɛnyīlɔ géē nyɛ̄ɛ̄ ŋmá ɛgiyí ádā nū mɛ́mla ɛ́nɛ́ nū gaá le pīya tɔ̄há mla ɔnyā nu.” (Ohútu 2:24) Ujehofa dɔka ka ɔba mla ɔnyā kéē yihɔtu iyi uwa klla yɔ tɔha mla iyi uwa abɔ é yeeyi a. Ujehofa gē jɛga lɛ ɔba amāŋ ɔnyā kéē ta iyi uwa, ɔdaŋ ka éyi ku uwa lɛ aja gbo amāŋ lɛ ikpo ɔnyā ɔhá ce. Ipu āhɔ̄ ɛgɛnyā, Ujehofa gē jɛga lɛ ɔba amāŋ ɔnyā nɛ abɔ nu le yeŋee a kóō miya ɔdaŋ ka ó géē miyɛ ɔkpá ku ɔnyā ō ta. a (Umátiyu 19:9) Ujehofa i jɛga lɛ Ācɛ O Yɛce Ukraist kéē lɛ ɔba amāŋ ɔnyā fiyɛ éyi ŋ.—1 Utímōti 3:2.
JÉ GƆBU
Nwu ɛgɛ nɛ a géē lɛ eeye klla ya ku Ujehofa kóō gweeye, ɔdaŋ ku a wɛ ɔcɛ nōo lɛ ɔba amāŋ ɔnyā, amáŋ ɔdaŋ ku á wɛ ɔcɛ nōó lɛ ɔba amāŋ ɔnyā ɛ ŋ.
4. Bi ɛga nɛ a lɛ, abɔ á lɛ ɔba amāŋ ɔnyā ɛ ŋ ma le yuklɔ olɔhi
Ujisɔsi leyi má āhɔ̄ ku ācɛ nōó lɛ ɔba amāŋ ɔnyā ɛ ŋ ma ka ɛhi nɛ Ɔwɔico je lɛ uwa. (Umátiyu 19:11, 12) Jé Umátiyu 4:23, cɛɛ ku aa kɔka lɛyikwu ɔka nyā:
-
Ɛgɛnyá nɛ Ujisɔsi bi ɛga nɛ ó lɛ, abɔ ó lɛ ɔnyā ŋ ma le gba adā nu ɛ̄gbā klla ta ācɛ ɔhá abɔ a?
Ācɛ O Yɛce Ukraist lɔfu jɔɔnyɛ ɛga néē lɛ abɔ é lɛ ɔba amāŋ ɔnyā ɛ ŋ ma, ɛgɛ nɛ Ujisɔsi ya a. Lɛ UVIDIO nyā mafu, cɛɛ ku aa kɔka lɛyikwu ɔka nyā.
-
Ɔwɛ ɛgɛnyá nɛ Ācɛ O Yɛce Ukraist nōó lɛ ɔba amāŋ ɔnyā ɛ ŋ lɔfu bi ɛga néē lɛ a le yuklɔ a?
A jé?
Ubáyíbu i da alɔ ihayi nɛ ɔcɛ cika ō lɛ ɔba amāŋ ɔnyā ŋ. Naana kpɔ a, Ubáyíbu ta ɔcɛ ɔtu kwu ɔtu ō gbeyi kóō le gla eko nɛ ó jé ka “unwū ɔnyā” amāŋ unwu ɔcɛnyilɔ “le lɔfú tū anúɔ iye” gbɔbu ɛɛ kóō gáā lɛ ɔba amāŋ ɔnyā, ohigbu ka eko ɔɔma unwu ku ɔkpiye i gē cɛ lɛ ɔcɛ ya ōmiya ku ijeeyi ŋ.—1 Ācɛ Ukɔ́rīnti 7:36.
5. Bi ijeeyi le fu ɔcɛ nɛ a géē lɛ a
Ō fu ɔcɛ nɛ a géē lɛ a wɛ éyi ku ōmiya okpɔcii nɛ a géē ya ipu oyeeyi ku uwɔ a. Jé Umátiyu 19:4-6, 9, cɛɛ ku aa kɔka lɛyikwu ɔka nyā:
-
Ɔdiya nɛ Ɔcɛ O Yɛce Ukraist i cika ō ŋmuleyikwu ō nyɔ i lɛ ɔba amāŋ ɔnyā ŋ ma?
Ubáyíbu lɔfu ta uwɔ abɔ ku a jé uce ō ya nɛ a géē leyi kwɛɛcɛ ku nu ɛgiyi ɔcɛ nɛ a dɔka ō lɛ a. Ofiyɛ duu a, dɔka ɔcɛ nōo yihɔtu ku Ujehofa. b Jé 1 Ācɛ Ukɔ́rīnti 7:39; mla 2 Ācɛ Ukɔ́rīnti 6:14. Cɛɛ ku aa kɔka lɛyikwu aɔka nōo ba nyā:
-
Ɔdiya nɛ alɔ cika ō lɛ ɔba amāŋ ɔnyā nōo wɛ ɔcɔlohɔnyɛta ofoofunu a?
-
Ɛgɛnyá nɛ a gbɛla ka ɔtu géē ya Ujehofa lɛ, ɔdaŋ ku alɔ lɛ ɔcɛ nɛ ó yihɔtu ku nu ŋ lɛ a?
Ɔdaŋ kéē lɛ ɛbɛ́ ɛpa nɛ ɔfu ku uwa i wɛ ekponu ŋ kpo bɔha, é géē má owe. Ɔwɛ ekpo ɔɔma, ɔdaŋ ka Ɔcɛ O Yɛce Ukraist lɛ ɔcɛ nɛ ó yɔ ipu ɔkwɛyi a ŋ lɛ, ó géē má unwalu alɛwa
6. Leyi má obatɔha ku ɔba mla ɔnyā ɛgɛ nɛ Ujehofa gē má ɔ a
Eko ku ācɛ Isrɛlu ku ikee a, acɛnyilɔ ōhī gē je ɔkpá ku ɔnyā ō ta lɛ ɔnyā uwa ohigbu itene ku abɔyi uwa foofunu. Jé Umálakāyi 2:13, 14, 16, cɛɛ ku aa kɔka lɛyikwu ɔka nyā:
-
Ɔdaŋ ka ɔba mla ɔnyā ō ta i cɛtɔha mla ɛlā nɛ Ubáyíbu ka a ŋ, ɔdiya nōó gē wu Ujehofa ɔtu a?
Ikpo ɔnyā ɔhá ō ce amāŋ aja ō gbo mla ɔba mla ɔnyā ō ta gē ya ku ɔcɛ nɛ abɔ ku nu le yeŋee mla ayipɛ a kéē má owe
Lɛ UVIDIO nyā mafu, cɛɛ ku aa kɔka lɛyikwu ɔka nyā.
-
Ɔdaŋ ku a lɛ ɔba amāŋ ɔnyā nōó gē gba Ujehofa ɛ̄gbā ŋ, ɔdi nɛ a lɔfu ya o ya ɛɛ ku obatɔha ku awɔ mla anu kóō lɛ eeye a?
7. Bi aukɔ́ ku Ujehofa lɛyikwu obatɔha ku ɔba mla ɔnyā a le yuklɔ
Ó cɛgbá ō ceyitikwu nɛhi o ya ɛɛ ka ɔcɛ kóō bi ukɔ́ ku Ujehofa lɛyikwu obatɔha ku ɔba mla ɔnyā le yuklɔ. c Amáŋ, Ujehofa gē hɔha ce ācɛ nōo gē bi uwa le yuklɔ a. Lɛ UVIDIO nyā mafu.
Jé Ācɛ Uhíbru 13:4, cɛɛ ku aa kɔka lɛyikwu aɔka nōo ba nyā:
-
A gbɛla ka aíne ku Ujehofa lɛyikwu obatɔha ku ɔba mla ɔnyā le kpaakpa a? Ɔdiya nɛ a ka lɛ a?
Ujehofa leyice ka Ācɛ O Yɛce Ukraist cika ō lɛ abɔ tu ɔkpá ku ɔnyā ō lɛ mla ɔkpá ku ɔnyā ō ta, ohigbu ka ipu éwo alɛwa, igɔmɛnti cɛgbá kéē ya lɛ a. Jé Utáyítɔ̄si 3:1, cɛɛ ku aa kɔka lɛyikwu ɔka nyā:
-
Ɔdaŋ ku a lɛ ɔba amāŋ ɔnyā, a cɛ kpɔcii ka ācɛ igɔmɛnti a jé ku aa lɛ iyi aa lɛ ɔkwɔɔkwɛyi ɛ?
ƆCƐ LƆFU DA ƆKA KA: “Ɔdiya nɛ ācɛ cika ō lɛ iyi uwa a? Ɔdaŋ ka ɔcɛnya mla ɔcɛnyilɔ i lɛ iyi uwa ŋ naana, é lā tɔha gla ŋ nɛɛ?”
-
Ɛgɛnyá nɛ a gáā cila ohi ku ɔka nyā a?
ƆDI NƐ A NWU A?
Ācɛ nōo lɛ ɔba amāŋ ɔnyā mla ācɛ nōó lɛ ɛ ŋ ma wɛ ɛhi ŋma ɛgiyi Ujehofa. Ɛjɛɛji uwa kē lɔfu lɛ eeye ɔdaŋ kéē lā oyeeyi ku uwa ɔwɛ nōo cɛtɔha mla ococɛ ku Ujehofa.
Aɔka ō tu alɔ ɛlá kwu ɔdā nɛ alɔ nwu
-
Ɛgɛnyá nɛ ɔcɛ lɔfu bi eko nɛ ó lɛ ɔba amāŋ ɔnyā ɛ ŋ ma le yuklɔ olɔhi a?
-
Ɔdiya nɛ Ubáyíbu ku alɔ lɛ ɔcɔlohɔnyɛta ɔmpa alɔ ofoofunu a?
-
Ɔdi nɛ Ubáyíbu ka, nōo kē wɛ ɔdā ekponu nōo ya nɛ ɔba mla ɔnyā lɔfu ta iyi uwa a?
JILA ƐLĀ NYĀ MÁ TŌŌTƆ̄Ɔ̄
Ɔdi nōó wɛ ka ɔcɛ kóō lɛ ɔba amāŋ ɔnyā nōo wɛ “ɔ̄cɛ kú Ohɔ́nyɛtá” ofoofunu a?
Má uvidio ɛpa nyā nōo lɔfu ta uwɔ abɔ ku a ya ōmiya olɔhi lɛyikwu eko nɛ ācɛ ɛpa yɔ i jé iyi uwa o ya ɛɛ kéē kwu iyi uwa i lɛ mla ōmiya lɛyikwu ɔba amāŋ ɔnyā ō lɛ.
Nwu ɔdā nōo ya ɛɛ nɛ ɔyinɛ nɔnyilɔ éyi gbɛla ka ɔdā nɛ Ujehofa je lɛ anuɔ a nwune fiyɛ ɔdā nɛ anuɔ leyi gwu ɔ bonu a.
Aɔdā ōhī nyá nɛ ɔcɛ cika ō leyi yɛ ɔ ɛɛ kóō géē ta ɔnyā amāŋ ɔba nu, amāŋ ɛɛ kéē géē kɔ hɛ iyi uwa ta a?
“Honor ‘What God Has Yoked Together’ ” (The Watchtower, December 2018)
a Má Ɛlā néē ta oŋmɛyi ku ɔkpá a 4 nōo kɛla lɛyikwu ɔba mla ɔnyā ō kɔ hɛ iyi uwa ta eko nɛ oduuma ku uwa i gbo aja amāŋ ce ikpo ɔnyā ɔhá ŋ.
b Ipu ucolo ōhī, ɛ́nɛ́ mla adā gē fu ɔcɛ nɛ ɔyi ku ɔlɛ uwa géē lɛ a. Ipu āhɔ̄ ɛgɛnyā, ɛ́nɛ́ mla adā gē leyi yɛ ɔ ɔdaŋ ka ɔcɛ a yihɔtu ku Ujehofa, ó wɛ ije amāŋ āhɔ̄ ku ɔcɛ ɔɔma ŋ.
c Ɔdaŋ ku a lā mla ɔcɛ nɛ aa lɛ iyi aa ɛ ŋ, ōmiya ō habɔ ɔcɛ ɔɔma ta amāŋ ō lɛ ɔ lɛ wɛ ōmiya nɛ a cika ō ya abɔyi uwɔ.
