Alụpa nya odehe ịhyẹ kaa me irya nyori ọngịnyị nyị ka ye ahụ lee ọ-rwọrụ pyii ene kọ ka jẹ́-ẹ chị ọkẹkẹnị. Ma, ọ-ọng myị́ ọng ọlẹ kọ ye ahụ lee ọ-rwọrụ à kaa chị ọkẹkẹnị ka, ọ-ọng myị́ ọng ọlẹ kọ ji ụbwọọmwụ à tị kaa la ọkịlẹtụ o-kpenyi ka ịnyịnyị. Ẹlịlẹhị ri, ịBayịbụụ ya nyori ahụ oyeye, ọrụ ọrwọrwọ, tụ́ ọngịnyị o-ji ụbwọọmwụ nyị ri āhị.

1. Ịyẹ à tị́ ri apyobwuna nya ọngịnyị o-ji ụbwọọmwụ?

ỊPọlụ yẹkẹẹ: “M tịtọ kanụ ka la ịlọnụ bwu ẹpwụ nya olo nya imahị omeme wuu.” (Wa 1 Ala ịKọrịntị 7:32, 33.) Ịyẹ tị́ du ká ọngọ ji ụbwọọmwụ kaa ‘me imahị’ lụmẹ ka? Ọngọlịnyị á ye ahụ lee ọ-rwọrụ kpụ ọ ka kpa ụka nyamwụ kpẹhị rịraa bala ọ-họ ịbaba nyaa ka. Lẹ ị kaa la iwe yẹẹyẹẹ. Angịhyẹ nyaa jẹ́ kaa họ ụkụrwọ ha iJihova gụ ọlẹnẹ. Jaabwọ wẹẹ, ị kaa họ ang ịkpịpyọ-kpịpyọ lala ọ-ka ọpyị ọkịla kaka kpa ẹrụ ọnyịịla pyẹ. Ọlẹ kọ tị gụgụ wuu ri, ị kaa la ụka gụ nyọka tụ́ ju iJihova chwẹẹ.

2. Ịyẹ à tị́ ri apyobwuna nyọka ye ahụ lee ọ-rwọrụ ba ehile jẹ?

Lala ọngịnyị o-ji ụbwọọmwụ, ahụ oyeye lee ọrụ ọrwọrwọ la apyobwuna nyịlọmwụ ịnyịnyị. ỊBayịbụụ ya nyori “angịnyị angị imiiye [nyị] hagụ ọngọ ookpokpo.” (Ọngọlirya 4:9) Ọ kaa lịnyị gụgụụgụ ẹ-ẹga nya angịnyị nya ịKịrayịsị ịlẹ kị kaa kpa ẹla ọmẹjẹ ọlẹpwụ nya ịBayịbụụ họ ụkụrwọ ẹ-ẹpwụ nya awụlẹ oyeye nyaa. Ahụ bala ọrụ ịlẹ kị ye awụlẹ ba ehile jẹ kaa myị ọnụ nyọka la ọháha ẹ-ẹga nya awụlẹ, ju awụlẹ ihi, bala ọ-ka kpahị ju awụlẹ. Chajị nya ọọwa lẹ, ị kaa la ewu ọ-chị ke gụ ọlẹng bala ọnyang ịlẹ kị kpa awụlẹ ẹ-ẹpwa ị-ịwẹ kem la o-ye awụlẹ ka. Ọọwa kaa du ká anyị nyaa kaa chị uko ka bala ọ-kaa lịlaa ịnyịnyị.

3. Ányị iJihova à tị́ yẹ ahụ oyeye bala ọrụ ọrwọrwọ?

Ụka ká iJihova tụ́ ọlẹng bala ọnyang ọhọhẹ chị awụlẹ nyọka ri ahụ bala ọrụ, o yẹkẹẹ: “Ọlẹng ọnyị myị ọnyị kaa tụụbwọ hi ịnamwụ bala adamwụ kaka ye ahụ nya ịlọmwụ . . . du kọọwa bala ahụ nyamwụ ọọwa kaa tụchawụlẹ.” (Ọmwụ Ọdada 2:24) IJihova tịtọ ká ahụ bala ọrụ ka la ọháha ẹ-ẹga nya awụlẹ la ahyẹẹnụ nya ọhịhị nyaa wuu, kị ka chebwo hi awụlẹ ẹnẹnẹhẹ ka. Ụka ká ahụ lee ọrụ á họ ụya kem, iJihova à ya iwe da nya awụlẹ ọ-pwapwa lẹ. Ẹ-ẹpwụ nya iwe-ahụrụ ọlịnyị, iJihova ya iwe da ha ahụ lee ọrụ nyọka cheje kori kọ ka pwa ọngọlẹ kọ họ ụya wẹ. a (ỊMatiyu 19:9) IJihova á myị ọnụ nya Angịnyị nya ịKịrayịsị ọ-ka ye ahụ gụ ookpokpo lee ọ-rwọrụ gụ ookpokpo ka.—1 iTimoti 3:2.

 JẸ́ GỤ ỌỌWA

5. Chụ ọngọlẹ á ka ye lee ọ-rụrwọ la ẹla ọjẹ́jẹ

Ọ-ka chụ ọngọlẹ á ka ye lee ọ-rụrwọ ji ẹpwụ nya eje ọchịchị ịlẹ kị ju apyobwuna gụ wuu ọ-ọhịhị. Wa ịMatiyu 19:4-6, 9, kanụ ya ẹla u-uhye nya ịtọ ẹla ọlẹ:

• Ịyẹ tị́ du ká Ọngịnyị nya ịKịrayịsị ka chagaga kaka ye ahụ lee ọ-rwọrụ ka?

ỊBayịbụụ ka jẹ́-ẹ dang ụbwọ nyọka jẹ́ abwẹla ịlẹ kị mẹjẹ nyori ọngịnyị ka ri ahụ lee ọrụ ọnyịịla. Ịngịhyẹ ọlẹ kọ tị baba gụ wuu ri ọ-ka mwahị nya ọngọlẹ ká iJihova há. b Wa 1 Ala ịKọrịntị 7:39 bala 2 Ala ịKọrịntị 6:14, kanụ ya ẹla u-uhye nya ịtọ ẹla ịlẹ:

• Ịyẹ tị́ du ká Angịnyị nya ịKịrayịsị kem ahị ka ye lee ọ-rụrwọ?

• Ányị a tị́ me irya kọ ka la iJihova kori ká ye ọngọlẹ kọ la ọháha ẹ-ẹga nyamwụ ka, lee ọ-rụrwọ ọngọlịnyị?

 6. Yẹ awụlẹ oyeye jaabwọ ká iJihova yọọ

Lụka onyogo ọ-ọpyị nya Isirẹlụ, alẹng ịhyẹ kaa pwa ịhụ nyaa ododoodu chajị kị ka jẹ́-ẹ họ ẹla olirya nyịlaa. Wa ịMalakayị 2:13, 14, 16, kanụ ya ẹla u-uhye nya ịtọ ẹla ọlẹ:

• Ịyẹ tị́ du ká ahụ bala ọrụ ọ-pwa awụlẹ chajị nya ẹla ọkịla datị hi ụya ọhọhọ kaa wụ́ iJihova ẹjẹ?

Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.

• Kori ká ọngọlẹ ká ye lee ọ-rụrwọ á la ọháha ẹ-ẹga nya iJihova ka, ịyẹ a tị́ ka jẹ́-ẹ họ ká ọkẹkẹnị ka juwa ẹ-ẹpwụ nya awụlẹ oyeye nyanụ?

7. Kpa ehile nya iJihova họ ụkụrwọ ẹ-ẹpwụ nya awụlẹ oyeye nyang

 ẸLỊYẸ A TỊ́ JẸ́?

Ọngịnyị o-ji ụbwọọmwụ bala ahụ oyeye lee ọrụ ọrwọrwọ ri āhị bwu ẹga nya iJihova. Ịwa wuu ka jẹ́-ẹ ya ọkẹkẹnị ha ọngịnyị ọ-ọhịhị kori kọ họ ẹla ba irya nya iJihova jẹ.

Ẹlịyẹ A Tị́ Yụbwọ Chị?

• Ányị ọngịnyị à tị́ ka jẹ́-ẹ kpa ụka ọlẹ kọ ye ahụ lee ọ-rwọrụ ka, họ ụkụrwọ ọnyịịla?

• Ịyẹ tị́ du ká ịBayịbụụ ya ahị nyị ye ahụ lee ọ-rwọrụ ẹ-ẹpwụ-ẹpwụ nya Angịnyị nya ịKịrayịsị?

• Ang oyina ịBayịbụụ à tị́ myị ọnụ ju kem kọ ka ju ọmwụ nya awụlẹ ọ-pwapwa?