Efu ọgwu abo ka, ma kẹdọno kaki ichẹñwu k’onẹ atene n’ẹdẹbọ i dukpẹ ki n’ọya abẹki ọkọ. Ama, i ch’abo ku ma n’ọkọ kp’ọya chaka an’ẹdẹbọ n, i la ch’ọgbọ abo ku ma ma nẹ n la n’ẹdọ ẹkpabiẹ n. Ochochi i che kaki, t’abo ki n’ọkọ abẹki ọya t’abo ku ma ma nẹ n, ọchaka ma ch’ile ki kwugbo Ọjọ.

1. Ẹñwu ch’amile k’onẹ neke nẹ ichẹñwu ki ma n’ọkọ abẹki ọya n?

Baibul kakini: “I muda d’umi ẹdọ ku mẹ we en’ejiji eda.” (Gba 1 Abo Kọrint 7:32, 33, 38.) Am’ọna ẹñwu abo ki ma n’ọkọ abẹki ọya n neke “we en’ejiji eda” ololo dabu abo ki n’ọkọ abẹki ọya? Abo Kraist ki ma n’ọkọ abẹki ọya n n’udu ed’eju t’ọkọ abẹki ọya n. Todulẹ, ma n’uña echẹñwu abẹki elo t’ugbo du t’abo ku ma n’ọkọ abẹki ọya le. Ichẹ ka efu ma an’uña ech’ukolọ Ọjọ nyọgba dabu, elo t’ojanẹ omunẹ na j’uchẹnyọ. E-ki tule, ma n’iko nana ku ma adu jẹñwu agbade ma kpai Jihofa ki lonyanẹ nyọnyọ.

2. Am’ile ẹñwu defu en’ọkọ abẹk ọya ọna k’ọda ojanẹ ka?

Alu k’abo ki ma n’ọkọ abẹki ọya n n’ile, abalẹ oñ abo ku ma n’ọkọ abẹki ọya onugo n’amile e-ma. Baibul kakini “eji nyọ t’oka le.” (Akọla ñw Ujeju 4:9) E-i ch’ọgẹcha. Ololo-wñ ch’abo Kraist ochochi ku ma ad’amukọ ki defu Baibul chekwu efu akwọra unyi ma. Ọkọ kp’ọya ki n’ọlama ọna k’ọda ojanẹ ka agbalu ufẹdọ, ojima kpai ekwula ñwu ọlama. Todulẹ, ẹdọ ma awanẹ nyọnyọ, ma la ad’ejiji kaki ẹnẹ ka ara t’ẹnẹ ẹkeji le n. E-lẹ ajẹñwu ẹdẹbọ ki d’akwọra unyi ma, am’ọma ma onugo la an’uyọ.

3. Abu ọkọ enẹ abẹki ọya enẹ dẹ eju Jihofa?

Iko ki Jihofa chanẹ udama ọkọ kp’ọya ejodudu, i kakini: “Ẹnẹkẹlẹ at’ata-wñ kpai iye-wñ nọ ki la amany’ọya-wñ.” (Abakwanẹ 2:24) Jihofa atene k’ọkọ kp’ọya ki na fẹdọ ọlama, ku ma la jọ dama gbogbo ọjọ udeju ma. Iko kate ki Jihofa jẹ k’ọkọ kp’ọya ki neke daru abẹki ku ma k’ọlama che ichẹñwu k’ẹnẹ ka efu ma na f’abutabu che kp’ẹnẹ omunẹ. Ef’uña aba-i, Jihofa d’uña ñwu ẹnẹ k’ọwọ-wñ chẹ fẹ lẹ ki tu ichẹñwu ki ak’ọkọ abẹki ọya-wñ. a (Matiu 19:9) Jihofa tene k’Abo Kraist ochochi ku ma n’ọkọ t’oka le n abẹki en’ọya t’oka le n.—1 Timoti 3:2.

 N’UMA NYỌGBA

5. Dẹdọ wanẹ k’ẹ tu ẹnẹ k’ẹ nẹ nyọnyọ

Oka efu amẹñwu ogbagaga k’ẹ tu ef’ọlai wẹ ch’ẹnẹ k’ẹ nẹ. Gba Matiu 19:4-6, 9, ubilẹ mẹ ch’oluka oji ene-i:

• Ẹñwu chi ki dukpẹ k’ẹnẹ Kraist ki d’ẹdọ wanẹ nyọnyọ tak’i tu ẹnẹ ki anẹ?

Baibul neke ch’atẹko wẹ k’ẹ m’amali ọmẹmẹlẹ ki dukpẹ k’ọkọ abẹki ọya ki nẹ. E-ki ch’ogbogaga tule che kaki ẹnẹ k’ẹ tene nẹ ki ch’ẹnẹ ki afẹdọ Jihofa nyọnyọ. b Gba 1 Abo Kọrint 7:39 kpai 2 Abo Kọrint 6:14. Ubilẹ, mẹ ch’oluka oji am’ene-i:

• Ẹñwu chi ki dukpẹ k’Abo Kraist ki n’ọkọ abẹki ọya kwefu abo ku ma ar’Ọjọ dama?

• Abu ẹdọ Jihofa adẹ ichẹñwu k’a n’ẹnẹ ki ma fẹdọ Jihofa n?

 6. Eju k’ẹ du g’ọla ọya enẹ kp’ọkọ enẹ ki ch’alu kate kpai e-Jihofa

Iko igbele, uchẹ ka ef’abo Israẹl kọ amọya ma tinyọ todu ku ma n’onobulẹ omunẹ. Gba Malakai 2:13, 14, 16, ubilẹ mẹ ch’oluka oji ene-i:

• Ẹñwu chi ki chẹñwu ulaka ñwu Jihofa ichẹñwu k’onẹ k’ọkọ abẹki ọya-wñ ki ma ch’abutabu n?

G’IFIDIO-i, ubilẹ mẹ ch’oluka oji ene-i.

• Ichẹñwu k’ẹ n’ọkọ abẹki ọya ki ma rẹ Jihofa n, ẹñwu ẹ neke che todu ku mẹ n’ẹdẹbọ efu akwọra unyi mẹ?

7. Na leb’ọda ki Jihofa du lugbo ọya abẹki ọkọ enẹ

ẸY’ỌLA UKỌ-I

T’ẹnẹ ki n’ọya abẹki ọkọ kpai ẹnẹ ki ma nẹ n, ochaka-ma ch’ele ki kwugbo Ọjọ. T’ẹnẹ ki n’ọkọ abẹki ọya t’ẹnẹ ki ma nẹ n, ma neke n’ẹdẹbọ kp’uyọ ichẹñwu ku ma chẹñwu ki Jihofa atene.

Ẹñwu ẹ kọchẹ?

• Ẹñwu ch’amọna k’ẹnẹ ki ma n’ọkọ abẹki ọya ta n neke d’iko-wñ chẹñwu ọmẹmẹlẹ?

• Ẹñwu chi ki Baibul kakini i dukpẹ k’Ẹnẹ Kraist ochochi ki n’ọkọ abẹki ọya kwefu abo ku ma ar’Ọjọ dama?

• Ẹñwu chẹñwu kate ki Baibul ka kakini i neke jẹñwu ọkọ kp’ọya ki k’ọlama?