TOLUMỌYE 42
Bible Ere-nana Anịghakpọ Yei-nana Bá, Bẹtịbị Timi Inyenrin Gbelemọ Yọmị Teeki Gbaa Wẹrị Emi A O?
Zụa ibeama, kịmị yei-nana anịghakpọ ere-nanaghaba, gesii pọwẹị nanagha fa bara kị gbaa mịnị. Anịa, yei-nana anịghakpọ ere-nana dẹ kịmịsẹ kị pọwẹị mịnị barafa, má bẹtịbị inyenrin mịnị kịmịsẹ pọwẹị nanagha bara kpọ fa. Bible ere-nana anịghakpọ yei-nana, bá bẹtịbị inyenrin Jehovah kị duo boemi dịẹpịrịye bara kị gbaa mị.
1. Bẹtịbị inyenrin mị te arereama k’emi a o?
Bible gbaa bara bị: “Yei anịghakpọ ere-nana bị ebi emi, anịa nanagha otubo mịẹ-ebimọ dẹịn emi.” (1 Corinthians 7:32, 33, 38 goo.) Yei anịghakpọ ere-nanagha kịmị tebara ka kị “mịẹ-ebimọ dẹịn mịnị a o”? Yei anịghakpọ ere-nanagha kịmị mị, yei kekere anịghakpọ taa kekere mụ yọ kẹrị irorogha. Anị duonị amịnị fomuun nana dẹịn emi. Gbaamaba, zụa kịmịama zịnị ibeama a mú ebi-egberi gbaa mịnị. Amịnị bá ifie kpọ nana wẹrị Jehovah mọ naịn dẹịn mịnị.
2. Zọzọ gbẹẹ nana mị te arereama k’emi a o?
Yei-nana anịghakpọ ere-nana bolou bị arereama emi, má bẹtịbị inyenrin mịnị bolou kpọ arereama emi. Bible “maa kịmị ebi akị bẹtịbị kịmị dẹịn emi” bara kị gbaa mị. (Ecclesiastes 4:9) Bible tolumọbịbị akị tụa inyenrin mịnị taa mọ yei mọ otubo kị bịsẹ bara paa dẹịn emi. Zọzọ gbẹẹ nana wẹrị emi taa mọ yei mọ otu, zọzọ diidụbamọ, zọzọ tarị, má zọzọ kekere mụ bara kị gbaapẹlẹ wẹrị emi. Anị duonị, amịnị kpá zọzọ ghọ barasingha. Ye gbẹẹghatimi inyenrin gbelei mịnị kịmịbo bịsẹ bara fa. Bei bi baratụa zọzọ gbẹẹ nanadẹ otubo pịrị wẹrị ebibara anị awọụbo kekere mịnị.
3. Jehovah tebara ka kị zọzọ-nanaye diimọ wẹrị emi a o?
Jehovah kị bọlọụ taa mọ yei mọ mịẹ paamọ mị, ụ gbaa mị: “Owei mị wo daụ mọ wo yin mọ ghọ barasin wẹrị wo taa mọ kị palịịtimi mịnị.” (Genesis 2:24) Taa mọ yei mọ zọzọ tarị ma kẹnị a timi inyenrin gbelei kị Jehovah mọ dọụ wẹrị emi. Jehovah tọrụyọ bị, zịnị kịmị yei anịghakpọ zịnị kịmị ere mọ bụnụ bẹtịbị kị taa mọ yei mọ puu a paa emi. Bịsẹ bara paa daba, Jehovah zọzọ-nanaye bọọ barasinmụ irorotọn yebị akị sei-mịẹgha ụbọ kị pịrị wẹrị emi. a (Matthew 19:9) Christtuuduo-otu kẹnị ere bẹtịbị kị nana bara kị Jehovah mọ gbaa wẹrị emi.—1 Timothy 3:2.
EBIBARA TUUDỌỤ
Bẹtịbị emi otu,—yei anịghakpọ ere-nana dẹ otu,—Jehovah mịẹ pọwẹịmọ mịnị bara tolumọ nimi.
4. Yei anịghakpọ ere-nanagha dịẹpịrịye bị akị ebi fịrị wẹnị
Jesus ere-nanagha yọmị akị dịẹpịrịye kị diimọ mị. (Matthew 19:11, 12) Mathew 4:23 goo dá, bei biibịbị kẹrị ẹrẹtei:
-
Jesus tebara ka kị ere-nanagha yọmị akị baratụa zịnịotu mọ Jehovah mọ pịrị ma o?
Ere-nanagha otu Jesus daamịẹ daba, pọwẹị nana a paa emi. VIDIO farị dá, biibịbị kẹrị ẹrẹtei.
-
Christtuuduo kịmị tebara ka kị yei anịghakpọ ere-nanagha yọmị akị ebi fịrị wẹnị mịnị a o?
Ị́ kpọ nimi ma?
Bible bei timitimi kụraị baị dẹkị zọzọ-nana bara gbaagha. Anịa, Bible asịyaị-pesi otu etipoutimi “ere anịghakpọ owei dịsẹ kụrọmọ ifie bụọdẹ” kị zọzọ-nana kị gbaa wẹrị emi, bịsẹ ifie mị, kịmị mọ bụnụ dịsẹ yọbị kịrịị tọn iroro mịẹmọ yọ seimọ a paa emi.—1 Corinthians 7:36.
5. Ebibara iroropẹlẹ dẹkị iné nanamọ kịmị sẹlẹ
Iné nanamọ kịmị sẹlẹmọ yọmị anị kẹnị yelaa dẹịn ye nị ị́ tọn angọ pịrịmụ ye. Matthew 19:4-6, 9 goo dá, bei biibịbị kẹrị ẹrẹtei:
-
Tetuu kị duonị, christtuuduo-otu iroro pẹlẹ dẹkị yei anịghakpọ ere nana agbẹị emi a o?
Bible baratụa ị́ pịrị wẹrị ị́ nanamụ kịmị sẹlẹ mịnị, má Jehovah tarị emi kịmị kị sẹlẹ angọ pịrị. b Wó 1 Corinthians 7:39 má 2 Corinthians 6:14 goo dá, mị biibịbịbo kẹrị ẹrẹtei:
-
Omịnị tetuu kị duonị christtuuduo mịnị kịmị bẹtịbị kị nana mọ agbẹị emi a o?
-
Omịnị Jehovah tarịgha kịmị nana daba, Jehovah mịẹ pọwẹịmọ mịnị a o?
Kala nama mọ opu nama mọ akị kẹnị kịkaịmọ wẹrị ye sibe daba, kala nama mị ụyafị mịnị, anị kpekẹnị bara bị christtuuduo kịmị mú Ọkpọnanaowei karịgha kịmị nana dẹsẹ bụụdọọnyeama paa mịnị
6. Jehovah dọụbara ka kị zọzọ-nanaye diimọ
Oruseri Israel bị, zụa owei-otuama tuu kpọ fa bara ka kị anị erebo a barasintim’mị. Malachi 2:13, 14, 16 goo dá, bei biibịbị kẹrị ẹrẹtei:
-
Tetuu kị duonị taa mọ yei mọ otu agbẹịgha bara zọzọ a barasinmụ yọmị Jehovah dịsẹgha o?
Amawẹnị má ere a barasin mịnị yọbị ere mọ awọụbo mọ gbele mịnị
VIDIO farị dá, mị biibịbịmọ kẹrị ẹrẹtei.
-
Jehovah karịgha kịmị kị ị́mịnị mọ nana wẹrị emi aba, teeki baratụa ị́ pịrị wẹrị Iné warịbolou mịẹ pọwẹịmọ mịnị a o?
7. Jehovah olokomọ akị iné warịbolou bọọ tụa inyenrin
Jehovah olokomọ akị warịbolou bọọ tụa inyenrinmụ yọmị bọụbọụgha. c Anịa, ị́ bịsẹ bara mịẹ daba Jehovah tarịama akị ị́ pịrị mịnị. VIDIO farị.
Hebrews 13:4 goo dá, bei biibịbịmọ kẹrị ẹrẹtei:
-
Yei anịghakpọ ere-nana gbelemọ yọbị Jehovah tụa wẹrị emi olokobo ebi emi bara ị́ mọ tọn ma o? Tetuu a o?
Biin ibeama zọzọ-nana dọụ mịnị otu government ghọ funtụa má zọzọ a barasin dọụmịnị otu kpọ funtụa dọụ wẹrị emi. Anị duonị, Jehovah kpọ bịsẹ bara dọụ emi. Titus 3:1 goo dá, bei biibịbị kẹrị ẹrẹtei:
-
Ị́mịnị kpọ iné ibe bọọ emi olokomọ gbaa wẹrị emi bara diimịẹ mịnị a o?
KỊMỊ BII A PAA EMI: “Ye gbẹẹgha bara kịmị mọ warị a inyenrin daba sei emi a? Tetuu kị duonị gbẹẹ dẹkị nanamọ agbẹị emi a o?”
-
Ị́mịnị tebara kị paraị mịnị a?
KỊLỌỌBARA
Yei-nana má yei-nanagha kpọ asẹsẹ Jehovah kị duo bo emi dịẹpịrịye-ama. Anịa, Jehovah dọụyọ mịẹ mịnị ụbọ kị tọrụkẹrịyọ má pọwẹị nana mịnị.
Waị diitụa
-
Ị́ kpọ tebara ka kị yei anịghakpọ ere-nanagha yọmị akị fịrịwẹnị mịnị a o?
-
Bible tetuu kị duonị Christtuuduo kịmị bẹtịbị kị nana bara gbaa ma o?
-
Bible te zọzọ ghọ barasin paa kị bụọmọ wẹrị emi a o?
DIITỤA
“Gesii ka” yei anịghakpọ ere-nanagha mị, teeki wo tuu a?
Baratụa ị́ pịrị ebibara tei kẹrị bá kịmị-nanamụ maa vidioama dii.
Kẹnị bịnaowei Jehovah mịẹ akị ụ pịrịdẹ yebosẹ diidụbamọ wo nanawẹrị yebo dẹịn tuu dii.
Te yeama kị kịmị mọ kẹrị iroro dẹkị zọzọ a barasin anịghakpọ ovuru finimọmụ iroro tọn agbẹị emi a o?
“Honor ‘What God Has Yoked Together’” (The Watchtower, December 2018)
b Zụa ibeama daụ mọ yin mọ kị anị awọụbo nanamụ kịmị sẹlẹ akị a pịrị mịnị. Bịsẹ bara emi ibebo, tarị nana wẹrị emi daụ mọ yin mọ sịlị emi kịmị kị sẹlẹ anị tọbọụ pịrịmụ bara mịẹgha. Amịnị Jehovah tarị wẹrị emi kịmị kị sẹlẹ anị awọụmọ pịrị mịnị.
c Ị́mịnị ye gbẹẹghatimi kịmị mọ warị a timi inyenrin mịnị aba, ị́mịnị bịsẹ ụbọ nana anịghakpọ nanagha fa yọmị ị́mịnị kị sẹlẹ angọ pịrị mịnị.
