TƆM KƖKPƐLƖKƖTƲ 42
Suwe Bibl yɔɔdʋʋ ɛɖandʋ caɣʋ nɛ nesi ɖɔkʋʋ yɔɔ?
Kedeŋa hɔɔlɩŋ nɩɩyɩ taa pamaɣzɩɣ se ye ɛyʋ ɛtɩɖɔkɩ nesi yɔ, ɛɛpɩzɩɣ nɛ ɛnɩɩ leleŋ e-wezuu caɣʋ taa. Ɛlɛ pɩtɩkɛ nesi ɖɔkɩyaa kpeekpe wɛnɩ koboyaɣ taa nɛ pɩtɩkɛ aɖamɛɛ kpeekpe wɛnɩ ɛsɩñɩŋɩyɛ taa. Toovenim taa lɛ Bibl yɔɔdaa se ɛɖandʋ caɣʋ nɛ nesi ɖɔkʋʋ pɛkɛ kʋjɔŋ weyi ɩlɩnɩ Yehowa cɔlɔ yɔ.
1. Wazasɩ nzɩ ɛɖandʋ caɣʋ kɔŋnɩ ɛyʋ yɔ sɩ-taa nasɩyɩ lɛ nzɩ?
Bibl yɔɔdaa se: «Weyi ɛɖɔkʋʋ nesi yɔ ɛlakɩ camɩyɛ, ɛlɛ weyi ɛɛɖɔkʋʋ nesi yɔ ɛkaɣ labʋ camɩyɛ nɛ pɩkɩlɩ.» (Kalɩ 1 Kɔrɛntɩ mba 7:32, 33, 38.) Ɛbɛ yɔɔ pɔtɔŋ se weyi ɛkɛ ɛɖanɛ yɔ, ɛlakɩ «camɩyɛ nɛ pɩkɩlɩ?» Weyi ɛkɛ ɛɖanɛ yɔ ɛɛmaɣzɩɣ ɛzɩma ɛcɔnɩ ɛ-tɛŋga kɩcɛyɩm ɖeɖe yɔ pɩ-yɔɔ. Pʋyɔɔ lɛ, ɖoŋ ɖoŋ lɛ aɖamɛɛ wɛnɩ alɩwaatʋ nɛ pɩkpaɖɩ. Kɩɖaʋ nakʋyʋ yɔ: Pa-taa nabɛyɛ pɩzɩɣ nɛ powolo nɛ paɖʋ nesi tɔm susuu tʋmɩyɛ egeetiye lɛɛɖɛ yaa ɛjaɖɛ lɛɛɖɛ taa. Kɔzɩ kɔzɩ lɛ, papɩzɩɣ nɛ pɛwɛɛnɩ alɩwaatʋ nɛ pɩkɩlɩ nɛ pɛcɛyɩsɩ pa nɛ Yehowa pa-taabalɩyɛ.
2. Mba pɔɖɔkɩ nesi komina ɛsɩndaa yɔ, wazasɩ nzɩ pehikiɣ yɔ sɩ-taa nasɩyɩ lɛ nzɩ?
Ɛɖandʋ caɣʋ kɔŋnɩ wazasɩ, mbʋ ɖɔɖɔ nesi ɖɔkʋʋ kɔŋnɩ wazasɩ. Bibl yɔɔdaa se: «Ɛyaa naalɛ wɛ weewee nɛ pɩkɩlɩ ɛyʋ kʋɖʋm.» (Eklezɩyasɩtɩ 4:9) Tɔm tʋnɛ tɩkɛ toovenim kɔzɩ kɔzɩ Krɩstʋ ñɩma mba palakɩnɩ tʋmɩyɛ Bibl paɣtʋ kila pe-nesi ɖɔkʋʋ taa yɔ pɔ-hɔɔlʋʋ taa. Mba pɔɖɔkɩ nesi komina ɛsɩndaa yɔ, poɖuki se pɔsɔɔlʋʋ ɖama, pɛwɛɛnɩ ñamtʋ ɖama yɔɔ nɛ pɛhɛndɩnɩ ɖama. Nɛ pʋyɔɔ lɛ, pɛwɛɣ pɛɛyɛ taa nɛ pɩkpaɖɩ halaa nɛ abalaa mba pacakɩ ɖama cɔlɔ ɛlɛ patɩɖɔkɩ nesi komina ɛsɩndaa yɔ. Nɛ palʋlʋʋ piya nzɩ yɔ, sɩwɛɣ ɖɔɖɔ pɛɛyɛ taa.
3. Yehowa maɣzɩɣ suwe nesi ɖɔkʋʋ yɔɔ?
Yehowa labɩ kajalaɣ abalʋ nɛ kajalaɣ halʋ nesi ɖɔkʋʋ sɔnzɩ nɛ pɩtɛ lɛ ɛyɔɔdɩ se: «Abalʋ kaɣ yebu ɛ-caa nɛ e-ɖoo nɛ ɛñɔɔnɩ ɛ-halʋ.» (Kiɖe Tɛɛ Tɔm 2:24) Yehowa sɔɔlaa se abalʋ nɛ ɛ-halʋ pɔñɔɔnɩ ɖama pe-wezuu caɣʋ kpeekpe taa. Ɛtɔm se acɛyɛ labʋ ɖeke pɩzɩɣna nɛ piyele nɛ pɛcɛ nesi. Ye pa-taa nɔɔyʋ ɛlabɩ acɛyɛ yɔ, Yehowa haɣ lɛlʋ waɖɛ se ɛkpaɣ lɩmaɣzɩyɛ se ɛcɛkɩ nesi yaa ɛɛcɛkɩ. a (Maatiyee 19:9) Yehowa tɩha nʋmɔʋ se Krɩstʋ tʋ ɛkpaɣ nɛ pɩcɛzɩ halʋ kʋɖʋm.—1 Timootee 3:2.
TAZƖ NƐ PILIMI
Tazɩ nɛ ŋna mbʋ nesi ɖɔkɩyaa nɛ aɖamɛɛ papɩzɩɣ pala nɛ pɛwɛɛ koboyaɣ taa, nɛ peyele ɖɔɖɔ nɛ Yehowa wɛɛ taa leleŋ taa yɔ.
4. Labɩnɩ ɛɖandʋ caɣʋ kʋjɔʋ tʋmɩyɛ camɩyɛ
Yesu yɔɔdaa se ɛɖandʋ caɣʋ kɛ kʋjɔʋ. (Maatiyee 19:11, 12) Ɩkalɩ Maatiyee 4:23, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma Yesu labɩnɩ ɛɖandʋ caɣʋ kʋjɔʋ tʋmɩyɛ camɩyɛ nɛ ɛsɛɛ ɛ-Caa nɛ ɛsɩnɩ ɖɔɖɔ ɛyaa?
Krɩstʋ ñɩma mba pɛkɛ aɖamɛɛ yɔ, ye pamaɣzɩɣnɩ Yesu yɔ, papɩzɩɣ nɛ pehiɣ taa leleŋ pe-wezuu caɣʋ taa. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Tʋma kɩbana wena Krɩstʋ ñɩma mba pɛkɛ aɖamɛɛ yɔ papɩzɩɣ nɛ pala?
Ŋŋsɩm-tʋ?
Bibl tɩyɔɔdɩ se pɩpɔzʋʋ se ɛyʋ ɛtalɩ pɩnzɩ nasɩyɩ pʋcɔ nɛ ɛɖɔkɩ nesi. Paa mbʋ yɔ, kɩtɔm se pɩwɛɣ ɖeu se ɛyʋ ɛcɛzɩ «evebitu yaa pɛlɩtʋ alɩwaatʋ yɔɔ» pʋcɔ nɛ ɛɖɔkɩ nesi. Mbʋ pʋyɔɔ yɔ alɩwaatʋ ndʋ tɩ-taa, kʋzʋʋ kɔɖɛyɩ pɩzɩɣ piyele nɛ ɛkpaɣ lɩmaɣza wena atɩmʋna yɔ.—1 Kɔrɛntɩ mba 7:36.
5. Lɩzɩ weyi ña nɛ ɩ ɩkaɣ ɖɔkʋʋ nesi yɔ camɩyɛ
Lɩmaɣza sɔsɔna wena ŋkaɣ kpaɣʋ ñe-wezuu caɣʋ taa yɔ, a-taa naɖɩyɛ lɛ weyi ña nɛ ɩ ɩkaɣ nesi ɖɔkʋʋ yɔ ɛ-lɩzʋʋ. Ɩkalɩ Maatiyee 19:4-6, 9; nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ yɔɔ pɩfɛyɩ se Krɩstʋ tʋ ekpidisi nɛ ɛɖɔkɩ nesi?
Bibl yɔɔdʋʋ wɛtʋ kɩbandʋ ndʋ pɩwɛɛ se weyi ña nɛ ɩ ɩkaɣ ɖɔkʋʋ nesi yɔ ɛwɛɛna yɔ tɩ-tɔm. Mbʋ pɩ-tɔm kɩlɩ cɛyʋʋ yɔ lɛ se pɩpɔzʋʋ se ɛsɔɔlɩ Yehowa. b Ɩkalɩ 1 Kɔrɛntɩ mba 7:39 nɛ 2 Kɔrɛntɩ mba 6:14, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ yɔɔ pɩcɛyaa se Krɩstʋ tʋ ɛñɩnɩɣ se ɛɖɔkɩ nesi lɛ, pɩmʋnaa se ɛlɩzɩ weyi ɛsɛɣ Yehowa yɔ na?
-
Ye ŋkpaɣ lɩmaɣzɩyɛ se ña nɛ weyi ɛɛsɛɣ Yehowa yɔ ɩɖɔkɩ nesi yɔ, ŋmaɣzɩɣ se ɛzɩma pɩlakɩ Yehowa?
Ye pɛkpɛndɩ kpɩna wena a-ɖoŋ nɛ a-paɣlɩka fɛyɩ kɩmaŋ yɔ se ala tʋmɩyɛ yɔ, a-naalɛ alakɩ kʋñɔŋ. Mbʋ ɖɔɖɔ ye Krɩstʋ tʋ nɛ weyi ɛɛsɛɣ Yehowa yɔ pɔɖɔkɩ nesi yɔ, Krɩstʋ tʋ kaɣ katʋʋ kala sakɩyɛ.
6. Wɛɛnɩ Yehowa lɩmaɣza nesi ɖɔkʋʋ yɔɔ
Caanaʋ taa Izrayɛɛlɩ taa, nabɛyɛ kizaɣ pa-halaa lɩmaɣza wena a-yɔɔ yɔ, atɩmʋna. Ɩkalɩ Malakii 2:13, 14, 16; nɛ pʋwayɩ lɛ ɩtazɩ tɔm tʋnɛ tɩ-taa:
-
Yehowa tɩsɔɔlɩ se lɩmaɣza wena atɩmʋna yɔ ana ituyini ɛyʋ nɛ ɛcɛ nesi. Ɛbɛ yɔɔ?
Acɛyɛ nɛ nesi cɛbʋ pɔkɔŋnɩ wɩzasɩ siŋŋ hɔʋ taa.
Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Ye ña nɛ weyi ɛɛsɛɣ Yehowa yɔ ɩɖɔkɩ nesi yɔ, ɛbɛ ŋpɩzɩɣ ŋla nɛ pɩɖɔmnɩ-mɩ camɩyɛ mi-nesi ɖɔkʋʋ taa?
7. Labɩnɩ tʋmɩyɛ paɣtʋ ndʋ Yehowa ɖʋ nesi ɖɔkʋʋ yɔɔ yɔ
Pɩpɩzɩɣ nɛ pɩpɔzɩ se ɛyʋ ɛñaɣ pana siŋŋ pʋcɔ nɛ ɛpɩzɩ nɛ ɛlabɩnɩ tʋmɩyɛ paɣtʋ ndʋ Yehowa ɖʋ nesi ɖɔkʋʋ yɔɔ yɔ. c Ɛlɛ Yehowa wazɩɣ mba pañakɩ pana ana yɔ. Ɩcɔnɩ VIDEO.
Ɩkalɩ Ebree mba 13:4, nɛ pʋwayɩ lɛ ɩtazɩ tɔm tʋnɛ tɩ-taa:
-
Ŋmaɣzɩɣ se paɣtʋ ndʋ Yehowa ɖʋ nesi ɖɔkʋʋ yɔɔ yɔ tɩmʋnaa? Ɛbɛ yɔɔ?
Ajɛɛ sakɩyɛ taa lɛ, komina ɖʋ paɣtʋ se ɛyaa ɩɖɔkɩ nesi komina ɛsɩndaa nɛ pɛcɛ nesi ɖɔɖɔ komina ɛsɩndaa. Yehowa pɔzʋʋ Krɩstʋ mba se paña paɣtʋ ndʋ. Ɩkalɩ Tiiti 3:1, nɛ pʋwayɩ lɛ ɩtazɩ tɔm tʋnɛ tɩ-taa:
-
Ye ŋtɛm ɖɔkʋʋ nesi yɔ, ŋñɩnaa nɛ ŋna se toovenim taa lɛ palabɩ ñe-nesi ɖɔkʋʋ takayɩsɩ komina ɛsɩndaa ɛzɩ paɣtʋ pɔzʋʋ yɔ?
NƆƆYƲ PƖZƖƔ NƐ ƐPƆZƖ SE: «Ɛzɩ pɩcɛyaa se ɖɩɖɔkɩ nesi na? Ðɩɩpɩzɩɣ nɛ ɖɩcaɣ ɖama cɔlɔ yem ɛzɩ halʋ nɛ ɛ-walʋ yɔ?»
-
Suwe ŋpɩzɩɣ nɛ ŋcosi?
TOBI LƐ
Ɛɖandʋ caɣʋ nɛ nesi ɖɔkʋʋ pɛkɛ kʋjɔŋ weyi ɩlɩnɩ Yehowa cɔlɔ yɔ. Ye ɛyʋ ɛcakɩ wezuu ŋgʋ kɩlakɩ nɔɔ kʋɖʋmaɣ nɛ Yehowa paɣtʋ yɔ, ɛpɩzɩɣ nɛ ɛnɩɩ leleŋ e-wezuu caɣʋ taa paa ɛkɛ ɛɖanɛ yaa ɛɖɔkɩ nesi yɔ.
Tɔm taa tazʋʋ
-
Ɛzɩma ɛyʋ pɩzɩɣ nɛ ɛlabɩnɩ ɛ-ɛɖandʋ caɣʋ alɩwaatʋ tʋmɩyɛ camɩyɛ?
-
Bibl yɔɔdaa se pɩwɛɛ se Krɩstʋ tʋ nɛ weyi pɔɖɔkʋʋ nesi yɔ, ɛkɛ Yehowa sɛyʋ. Ɛbɛ yɔɔ?
-
Bibl taa lɛ, wɛtʋ kʋɖʋmtʋ ndʋ haɣ waɖɛ nesi ɖɔkɩyaa se papɩzɩɣ nɛ pɛcɛ nesi?
WONDU LƐƐTƲ
Pɔyɔɔdʋʋ se ɛyʋ ɛɖɔkɩ nesi «Kɩbaɣlʋ taa ɖeke» yɔ pʋ-tɔbʋʋ lɛ suwe?
«Questions des lecteurs» (La Tour de Garde, 1er juillet 2004)
Cɔnɩ videowaa cikpema naalɛ mba patasɩɣ lɔŋ kɩbaŋ pɩlɩɩnɩ ɖanɩyɛ nɛ nesi ɖɔkʋʋ yɔɔ yɔ.
Cɔna nɛ ŋna mbʋ pʋyɔɔ koobu abalɩñɩnʋ nɔɔyʋ maɣzaa se mbʋ Yehowa labɩ-ɩ yɔ pɩcɛzɩ mbʋ ɛlaa yɔ.
Ɛbɛ nɛ ɛbɛ yɔɔ pɩwɛɛ se ɛyʋ ɛmaɣzɩ pʋcɔ nɛ ɛkpaɣ lɩmaɣzɩyɛ se ɛcɛkɩ nesi yaa ɛ nɛ ɛ-tɛŋga payaɣ ɖama?
«Ðʋ hɩɖɛ nesi ɖɔkʋʋ ɖʋtʋ ndʋ Ɛsɔ laba yɔ» (Feŋuu Tilimiye, décembre 2018)
a Cɔnɩ Tɩnaɣ yɔɔ tɔm 4 nɛ ŋna lɩmaɣza wena a-yɔɔ nesi ɖɔkɩyaa pɩzɩɣ nɛ paya ɖama paa pa-taa nɔɔyʋ ɛtɩla acɛyɛ yɔ.
b Kedeŋa hɔɔlɩŋ nɩɩyɩ taa, lʋlɩyaa ñɩnɩɣnɩ halʋ pa-pɩyalʋ yaa walʋ pɛ-pɛlɛ. Ye mbʋ yɔ, lʋlɩyaa mba pɛwɛnɩ sɔɔlɩm yɔ, alɩwaatʋ ndʋ paalɩzɩɣ weyi ɛ nɛ pa-pɩɣa pakaɣ ɖɔkʋʋ nesi yɔ lɛ, pɩtɩkɛ liidiye yaa lone nɖɩ ɛyʋ ɛnʋ ɛwɛna yɔ pɩ-yɔɔ pacalɩɣnɩ maɣzʋʋ, ɛlɛ pacalɩɣnɩ ñɩnʋʋ se pana se ɛsɔɔlɩ Yehowa toovenim na.
c Ye ña nɛ nɔɔyʋ ɩwɛ ɖama cɔlɔ ɛzɩ halʋ nɛ ɛ-walʋ ɛlɛ ɩtɩɖɔkɩ nesi komina ɛsɩndaa yɔ, ña pɩwɛɛ se ŋkpaɣ lɩmaɣzɩyɛ se ña nɛ ɩ ɩɖɔkʋʋ nesi komina ɛsɩndaa yaa ɩyaɣ ɖama.
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
