TZOLOM 42
Kʼaru naxye li Santil Hu chirix li sumlaak ut wank saʼ junesal?
Saʼ wiibʼ oxibʼ li tenamit wankebʼ nekeʼxkʼoxla naq aajel ru naq tatsumlaaq re naq sahaq saʼ laachʼool. Abʼan moko chixjunilebʼ ta li sumsukebʼ sahebʼ saʼ xchʼool ut moko chixjunilebʼ ta li wankebʼ xjunes rahebʼ saʼ xchʼool. Li Santil Hu naxye naq wi nakatsumlaak malaj wankat aajunes aʼan jun li maatan li naxkʼe li Jehobʼa.
1. Kʼaru rusilal taataw wi toj wankat aajunes?
Li Santil Hu naxye: «Li nasumlaak […] us tixbʼaanu. Ut li inkʼaʼ nasumlaak, qʼaxal us wiʼ chik tixbʼaanu» (yaabʼasi 1 Corintios 7:32, 33, 38). Kʼaru naraj xyeebʼal naq «qʼaxal us wiʼ chik tixbʼaanu» li inkʼaʼ nasumlaak? Ebʼ laj paabʼanel li inkʼaʼ nekeʼsumlaak moko yookebʼ ta xkʼoxlankil li xbʼeelom malaj li rixaqil. Joʼkan naq wank naabʼal li naʼlebʼ li naru teʼxbʼaanu. Naru nekeʼxkʼe xhoonal re kʼanjelak chiru li Jehobʼa. Jun eetalil, naru nekeʼxik saʼ jalan chik li tenamit chi xkʼebʼal chi naweʼk li chaabʼil esil. Li wank xwankil aʼan naq nekeʼxtaw xhoonal re xchaabʼilobʼresinkil li xʼamiiwil rikʼin li Jehobʼa.
2. Kʼaru rusilal taataw wi sumsukat chiru li chaqʼrabʼ?
Ebʼ li sumsukebʼ naabʼal ajwiʼ li rusilal nekeʼxtaw xbʼaan naq li Santil Hu naxye: «Qʼaxal us naq teʼkʼanjelaq wiibʼ poyanam chiru naq taakʼanjelaq junaq xjunes» (Eclesiastés 4:9). Aʼin nakʼutunk naq ebʼ li tzʼaqal aj paabʼanel nekeʼxyuʼami li naxye li Jehobʼa chirix li sumlaak. Ebʼ li nekeʼsumlaak chiru li chaqʼrabʼ nekeʼxye naq teʼxra ribʼ, teʼroxloqʼi ribʼ ut teʼxkʼe xchʼool chi xtenqʼankil ribʼebʼ. Joʼkan naq, sa nekeʼrekʼa ribʼ chiru li yal xeʼxkʼam ribʼ chi joʼkan. Sahebʼ saʼ xchʼool ebʼ li kokʼal naq nekeʼkʼiik wi ebʼ li xnaʼ xyuwaʼ sumsukebʼ.
3. Kʼaru naxkʼoxla li Jehobʼa chirix li sumlaak?
Naq li Jehobʼa kixsumubʼ laj Adán ut li xʼEva kixye: «Li winq tixkanabʼ li xnaʼ xyuwaʼ, tixlaqʼabʼ ribʼ rikʼin li rixaqil» (Génesis 2:24). Li Jehobʼa naraj naq li sumsukebʼ teʼxra ribʼ ut kaʼajwiʼ li kamk tjachoq rehebʼ. Teʼruuq xraqbʼal li xsumlajikebʼ wi jun rehebʼ tixmux li xsumlajik. Joʼkan naq li Jehobʼa kixkʼe saʼ ruqʼ li ixaqilbʼej malaj li bʼeelomej li inkʼaʼ kimaakobʼk xsikʼbʼal kʼaru tixbʼaanu (Mateo 19:9). a Li Jehobʼa moko naxkʼulubʼa ta naq junaq aj paabʼanel naabʼalaq rixaqil malaj xbʼeelom (1 Timoteo 3:2)..
QASIKʼAQ XCHAMAL LI NAʼLEBʼ
Qatzolaq chanru sahaq saʼ laachʼool ut tsahobʼresi xchʼool li Jehobʼa maakʼaʼ naxye ma sumsukat malaj wankat aajunes.
4. Oksi chiʼus laamaatan
Li Jesús maajunwa kisumlaak ut choʼq re, aʼin jun li maatan (Mateo 19:11, 12). Cheeyaabʼasi Mateo 4:23 ut chexʼaatinaq chirix li patzʼom aʼin:
-
Chanru kiroksi li Jesús li maatan aʼin re kʼanjelak chiru li Jehobʼa ut xtenqʼankilebʼ li junchʼol?
Joʼ kixbʼaanu li Jesús naru naq sahaqebʼ ajwiʼ saʼ xchʼool ebʼ li tzʼaqal aj paabʼanel li toj wankebʼ xjunes. Cheerilaq li BʼIDEO ut chexʼaatinaq chirix li patzʼom aʼin:
-
Chanru teʼroksi xhoonal ebʼ li tzʼaqal aj paabʼanel li toj wankebʼ xjunes?
Ma nakaanaw?
Li Santil Hu moko naxye ta jarubʼ chihabʼ wanq re junaq li kristiʼaan naq tsumlaaq. Abʼanan naxye qe naq tento tqakanabʼ naq tnumeʼq li saajilal, li qʼehil bʼarwiʼ li narataw li tzʼejwalej naxpoʼ li kʼaʼuxej (1 Corintios 7:36, TNM).
5. Sikʼ chiʼus ani aj ikʼin tatsumlaaq
Li qʼaxal wank xwankil saʼ laayuʼam aʼan xkʼoxlankil chiʼus ani aj ikʼin tatsumlaaq. Cheeyaabʼasi Mateo 19:4-6, 9, Wy, ut chexʼaatinaq chirix li patzʼom aʼin:
-
Kʼaʼut jun laj paabʼanel tento tixkʼoxla chiʼus wi naraj sumlaak?
Li Santil Hu tatxtenqʼa chi xnawbʼal kʼaru li chaabʼil naʼlebʼ tixyuʼami junaq, re naq chaabʼilaq joʼ bʼeelomej malaj ixaqilbʼej. Li qʼaxal wank xwankil aʼan naq li kristiʼaan li taasikʼ tixra li Jehobʼa. b Cheeyaabʼasi 1 Corintios 7:39 ut 2 Corintios 6:14. Moqon chexʼaatinaq chirix ebʼ li patzʼom aʼin:
-
Kʼaʼut junaq li tzʼaqal aj paabʼanel tento tsumlaaq rikʼin junaq li rech aj paabʼanel?
-
Wi nakatsumlaak rikʼin junaq li kristiʼaan li inkʼaʼ naxra li Jehobʼa, chan tawiʼ ru trekʼa ribʼ li Jehobʼa?
Wi nakʼemank chi kʼanjelak wiibʼ chi xul li moko juntaqʼeetebʼ ta xmetzʼew nekeʼxrahobʼtesi ribʼ. Joʼkan ajwiʼ naxkʼe ribʼ saʼ rahilal jun laj paabʼanel wi nasumlaak rikʼin junaq li moko naxra ta li Jehobʼa.
6. Oxloqʼi li sumlaak joʼ naxbʼaanu li Jehobʼa
Saʼ li najter Israel, wankebʼ keʼxsikʼ xyaalal re xkanabʼankil li rixaqil. Cheeyaabʼasi Malaquías 2:13, 14, 16 ut chexʼaatinaq chirix li patzʼom aʼin:
-
Kʼaʼut naq li Jehobʼa xikʼ naril naq teʼxraq xsumlajik wi moko wank ta xyaalal re xbʼaanunkil?
Li muxuk sumlaak ut xraqbʼal li sumlajik kʼajoʼ naxrahobʼtesi xchʼool li ixaqilbʼej malaj bʼeelomej li inkʼaʼ kimaakobʼk ut ebʼ li alal kʼajolbʼej.
Cheerilaq li BʼIDEO ut chexʼaatinaq chirix li patzʼom aʼin:
-
Wi sumsukat rikʼin junaq li maawaʼ aj paabʼanel, kʼaru tatruuq xbʼaanunkil re naq sahaq saʼ laachʼool saʼ laasumlajik?
7. Yuʼami li chaqʼrabʼ li naxkʼe li Jehobʼa chirix li sumlajik
Chʼaʼaj chiru wiibʼ oxibʼ li kristiʼaan xyuʼaminkil li naxye li Jehobʼa chirix li sumlajik. c Abʼan li Jehobʼa narosobʼtesihebʼ li nekeʼxyal xqʼe chi xyuʼaminkil li xchaqʼrabʼ. Cheerilaq li BʼIDEO.
Cheeyaabʼasi Hebreos 13:4 ut chexʼaatinaq chirix ebʼ li patzʼom aʼin:
-
Ma nakaapaabʼ naq wank xyaalal li naxpatzʼ li Yos chirix li sumlajik? Kʼaʼut nakaaye chi joʼkan?
Li Jehobʼa naraj naq tatsumlaaq chiru chaqʼrabʼ ut wi taaraq laasumlajik taatzʼiibʼa ajwiʼ chiru li chaqʼrabʼ. Aʼin naxpatzʼ li awabʼej saʼ jalan jalanq chi tenamit. Cheeyaabʼasi Tito 3:1 ut chexʼaatinaq chirix li patzʼom aʼin:
-
Wi xatsumlaak, ma chʼolchʼo chaawu naq xeʼxkʼe resil laasumlajik chiru li chaqʼrabʼ?
WIIBʼ OXIBʼ NEKEʼXPATZʼ: «Ma aajel tawiʼ ru naq tinsumlaaq chiru chaqʼrabʼ?».
-
Kʼaru raj taasume?
LI AK XQATZOL
Li sumlaak ut li wank saʼ junesal aʼan jun li xmaatan li Jehobʼa. Maakʼaʼ naxye ma sumsuko malaj wanko qajunes naqayal xsahil li yuʼam ut sa qachʼool wi naqabʼaanu li nawulak chiru li Jehobʼa.
Qajultikaq
-
Chanru teʼruuq roksinkil chiʼus li xhoonal li wankebʼ xjunes?
-
Kʼaʼut naxye li Santil Hu naq ebʼ laj paabʼanel teʼsumlaaq kaʼajwiʼ rikʼin junaq li rech aj paabʼanel?
-
Kʼaru xyaalal naxkʼe li Santil Hu re xraqbʼal li sumlajik?
SIKʼ XKOMON LI NAʼLEBʼ
Kʼaru naraj xyeebʼal sumlaak joʼ «naraj li Qaawaʼ»?
«Xpatzʼom ebʼ laj ilol hu» (Laj Kʼaakʼalehom, 1 re julio 2004)
Il li bʼideo aʼin li tatxtenqʼa wi xkoho aachʼool chirix junaq li kristiʼaan ut wi nakaakʼoxla sumlaak.
Kʼe reetal kʼaʼut li hermaan aʼin naxkʼoxla naq qʼaxal chaabʼil li kikʼeheʼk re xbʼaan li Jehobʼa chiru li kixkanabʼ chaq.
Kʼaru tento tixkʼoxla junaq li kristiʼaan li naraj xraqbʼal li xsumlajik malaj xkanabʼankil li xsumʼaatin?
«Qoxloqʼihaq “li xlaqʼabʼahom li Yos”» (Laj Kʼaakʼalehom, diciembre 2018)
a Saʼ xyaalalil li naʼlebʼ 4 t-aatinaq chirix li jachok ibʼ (naq moko xwank ta li muxuk sumlaak)
b Saʼ wiibʼ oxibʼ li tenamit li naʼbʼej yuwaʼbʼej nekeʼxsikʼ rikʼin ani teʼxsumubʼ li ralal xkʼajol. Wi joʼkan nakʼulmank ebʼ li naʼbʼej yuwaʼbʼej li chaabʼil nekeʼnaʼlebʼak moko nekeʼril ta xbʼihomal. Nekeʼxkʼe bʼan reetal naq aʼan qʼaxal wiʼ chik naxra li Jehobʼa.
c Wi yal xaalaqʼabʼ aawibʼ laaʼat yaal aawe ma taakanabʼ laasumʼaatin malaj tatsumlaaq chiru chaqʼrabʼ.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
