ERISOMO 42
E Biblia Yikabugha Yithiki Okwa Buhuru n’Obutheke?
Omwa sindi kalikya, abandu b’ikirirye bathi omundu syangatsema athe omwa butheke. Nomwabine, sibugha indi abathahenie bosi batsemire kandi sibugha indi abahuru abosi si batsemire. Okwenene kuli kuthi e Biblia yikabugha yithi obuhuru n’obutheke ni bihembo.
1. Ni mighaso nga yahi eyiri omw’ibya muhuru?
E Biblia yikabugha yithi: ‘Oyukaherukaya akakolha ndeke, kandi oyutheherukaya akakolha ndeke kwilhaba.’ (Soma 1 Abanya Korinto 7:32, 33, 38.) Ni nzira syahi esyo muhuru angakoleramo “ndeke kwilhaba”? Abakristayo abahuru sibawithe omwanze oyo batholere ibatsomana omwa biyithawa. Neryo kwesi, bawithe obwiranda bunene. Ng’eky’erileberyako, abandi bakathoka erikanyirirya omubiiri wabu w’erithulira omwa nzira nyingyi, ng’erighenda omwa kindi kihugho eriyathulha engulhu yuwene. Ekikulhu kutsibu, bangana bana obuthuku bunene obw’eriyithundiramu hakuhi na Yehova.
2. Ni mighaso nga yahi eyikasa busana n’erilungwa erikwamana n’ebilhaghiro?
Ng’obuhuru, obutheke nabu bukaletha emighisa y’embaghane. E Biblia yikabugha yithi ‘ababiri bowene kwilhaba omughuma.’ (Omugambuli 4:9) Eki kutsibu-tsibu kihikire okwa Bakristayo abakaghendera okwa misingyi ye Biblia omwa butheke bwabu. Abali omwa butheke erikwamana n’ebilhaghiro bakalhaghana erianzana, erisikania, n’eritsemerana. Ekyo kikaleka mughulhu wosi ibayowa ibane omwa butheya bunene kwilhaba abak’ikalha haghuma isibamathanibwe erikwamana n’ebilhaghiro. Kandi n’abaana babu ibakendi yowa ibane omwa butheya obuwene.
3. Yehova akalhangira athi obutheke?
Yehova abere akatsukisya obutheke bw’erimbere, mwabugha athi: ‘Omundu [omulhume] asyasighania ise wiwe na nyinya, asyalhanda okwa mukali wiwe.’ (Enzuko 2:24) Yehova anzire omulhume na mukali wiwe ibanzana n’erilhandanako, bakineho. Akalighira erikomolha hamabya oyukasingira. Omwa mibere ng’eyo, Yehova akaha oyutheko lhubanza y’obughabe bw’erithwamu ng’athwe embeta. a (Matayo 19:9) Yehova syalilighira Abakristayo erithahya abakali banene.—1 Timoteo 3:2.
THASYIGHA BINGYI
Minya nga wangatsema wuthi—kandi nga wangatsemesya wuthi Yehova—mbulha wuli muhuru kutse wuli omwa butheke.
4. Kolesaya ndeke ekihembo ky’obuhuru
Yesu mwalhangira obuhuru ng’ekihembo. (Matayo 19:11, 12) Soma Matayo 4:23, mwanakania okwa kibulyo kino:
-
Yesu mwakolesya athi ekihembo ky’obuhuru erikolera Thatha wiwe n’eriwathikya abandi?
Abakristayo bangana tsemera erikolesya obuhuru bwabu nga Yesu kw’akolha. Mubughaye EVIDIYO, mwanakania okwa kibulyo ekikakwamako.
-
Abakristayo banga kolesya bathi obuhuru bwabu omwa nzira esikaghasa?
Wunalhue wasi?
E Biblia siyiriha emyaka mirebe ey’eringiriramu omo butheke. Aliwe, yikahira omwa mundu mw’omuhwa w’erilinda erihika ah’akendi syalhabira “omo kanyethu kabehi,” obuthuku obwa esyongumbu sy’emyatsi y’engyingo syanganaleka ikyakalira omundu erithwamu ndeke.—1 Abanya Korinto 7:36, NWT.
5. Sombolha ndeke ow’eringira nayu omwa butheke
Erisombolha ndeke ow’eringira nayu omwa butheke ni kighuma ky’okw’ithwamu likulhu eryo wanga kolha. Soma Matayo 19:4-6, 9, mwanakania okwa kibulyo kino:
-
Busana naki Omukristayo syatholere akaharabanira eringira omwa butheke?
E Biblia yangana kuwathikya eriminya emibere eyo wanga sondya ok’oyowanzire eringira nayu omwa butheke. Ekikulhu kutsibu, sondaya ow’eringira nayu omwa butheke oyuwanzire Yehova. b Soma 1 Abanya Korinto 7:39 na 2 Abanya Korinto 6:14. Neryo, mukanaye okwa bibulyo bino:
-
Busana naki thutholere ithwingira omwa butheke n’Omukristayo mulikyethu musa?
-
Wukalengekanaya Yehova iniakendi yowa athi thwamingira omwa butheke n’omundu oyuthamwanzire?
Ebisoro bibiri ebith’ingene byamalimisibwa haghuma ibine kw’engomo, ebyosi bikaghalhawa. Kuthya, Omukristayo oyukingira omwa butheke n’oyuthikirirye akabana ebitsibu bingyi
6. Lhangira obutheke ngoku Yehova akabulhangira
Kera omwa Israeli, abandi balhume ibakakomolha bakali babu busana n’esyonzumwa esithatholere. Soma Malaki 2:13, 14, 16, mwanakania okwa kibulyo kino:
-
Busana naki Yehova aponire erikomolha erithe ly’obulingirirania?
Obusingiri n’erithwa embeta bikaghalhaya omwanze oyuthe kw’olhubanza n’abaana
Mubughaye EVIDIYO, mwanakania okwa kibulyo ekikakwamako.
-
Wamabya iwuli omwa butheke n’oyuthikirirye, wanga kolhaki obutheke bwawu eribya mw’etseme?
7. Ghendera okwa bihano bya Yehova ebihambire okwa butheke
Omundu angana yithagha erihiraho akaghalha kanene erighendera okwa bihano bya Yehova ebihambire okwa butheke. c Aliwe Yehova akatsumulha abakakolha ekyo. Mubughaye EVIDIYO.
Soma Abaebrania 13:4, mwanakania okwa bibulyo bino:
-
Wukalengekanaya ebihano bya Yehova ebihambire okwa butheke binatholere? Busana naki?
Yehova anzire Abakristayo ibahandikisya obutheke bwabu kandi hamabya erikomolha iryabya erikwamana n’ebilhaghiro, kundi omwa bihugho bingyi ebi bikakolhawa n’ab’egavumente. Soma Tito 3:1, mwanakania okwa kibulyo kino:
-
Wamabya iwune omwa butheke, kwenene obutheke bwawu bunasibwe omwa gavumente erikwamana n’ebilhaghiro?
OMUNDU ANGANA BULYA ATHI: “Busana naki ithwalunga? Omulhume n’omukali sibang’ikalha haghuma isi balungire?”
-
Iwe iwukendi subirya wuthiki?
OMWA BIKUHI
Obuhuru n’eringira omwa butheke ni bihembo erilhua oku Yehova. Ebyosi byangana letha etseme n’obuholho byamatsemerwa erikwamana n’erisonda lya Yehova.
Eriyibukya
-
Omundu angakolesya athi ndeke obuhuru bwiwe?
-
Busana naki e Biblia yikabugha yithi ithwingira omwa butheke n’Omukristayo mulikyethu musa?
-
Ni nzumwa yahi nguma eyiseghemere oko Masako eyanga leka omundu iniathwa embeta?
MINYA BINGYI
Eringira omwa butheke ‘n’Omukristayo kwenene’ kikamanyisayaki?
“Ebibulyo Erilhua Omwa Basomi” (The Watchtower, Okwomusanju 1, 2004)
Lebaya esyovidiyo nguhi-nguhi ibiri esyanga kuwathikya erithwamu ndeke bikahika okwa by’obuthethane n’eringira omwa butheke.
Minya ekyaleka mughalha wethu mughuma iniayowa athi ebya Yehova abirimuha ni by’obughuli kwilhaba eby’abirisighania.
Nabya Ngwithe Amaha Indi Nayu Akendi Syaminya Ekwenene (1:56)
Ni byahi ebya mundu atholere inialengekaniako athali athwamu erithwa embeta kutse erilhuamu?
“Sikaya Endegheka ya Nyamuhanga ey’Obutheke” (Akaleberyo, Okwerikuminibiri 2018)
a Lebaya Endomeko 4 eyihambire okw’ighabulhana isihathabya obusingiri.
b Omo sindi kalikya, ababuthi bakasombolera abaana babu ow’eringira nayu omwa butheke. Ekyo kyamabya, ababuthi b’olhwanzo bakatsuka eriminya omundu oyo ng’ananzire Yehova, butsira erilengekania ng’anawithe oko sente.
c Wamabya iwune haghuma n’omundu oyo muthalungire nayu, mbulha wamathwamu erimuleka kutse erilunga nayu, erithwamu ni ryawu.
