Ke kuhtuh acn, mwet uh luhlahlfongi muh sie mwet el kuh in insewowo muhkwena el fin ac pahyuckyak. Tuhsruhktuh, tiac mwet pahyuck nuhkewa insewowo ac tiac mwet lolacp nuhkewa puhla ahsor. Pwacyeiyac uh pa, Bible uh fahk lah moul in lolacp ac pahyuck uh sie mwe sang.

1. Meac kuhtuh ma wo ke moul in lolacp?

Bible uh fahk: “Ke ma inge mukul se fin pahyuck, wo ma el oruh uh, a mukul se fin tiac pahyuck ac wo liki na.” (Riti 1 Corinth 7:32, 33, 38.) Ke ohiyac fuhkah sie mwet suc tiac pahyuck “ac wo liki na”? Mwet Christian suc lolacp ac oasr pacl yohk lal in oruh ma pucspucs. Ke sie mwe puhpuhlyuck, el kuh in ahkyohkye pacl lal nuhke orekma in luti, oacna in som nuhke acn sahyac in fahkwack pweng wo. Yohk liki nuhkewa, oasr pacl yohk lal in ahkfototoyacl nuh sin Jeova.

2. Meac kuhtuh ma wo ke siacnyacn uh pahyuck fal nuhke oakwuck luhn masap?

In oacna ke moul in lolacp, oasr pac ma wo pucspucs ke pahyuck uh. Bible uh fahk lah “mwet luo wo liki mwet sacna.” (Ecclesiastes 4:9) Pwacye ma inge, yohk na nuh sin mwet Christian suc orekmakihn oakwuck wowo luhn Bible nuhke moul in pahyuck lalos. Ke pacl se ma siacnyacn se pahyuck in fal nuhke oakwuck luhn masap, oasr wuhlelah lalos nuh sin sie sin sie in ahkkahlwemye luhngse, suhnak, ac in karihngihn sie sin sie. Ke srihpac inge, moul in pahyuck lalos wo liki moul luhn mwet luo suc tuhkweni muhta tuhsruhk tiac pahyuck. Ac tuhlihk nahtuhlos ac fah insewowo liki ac engankihn mislac.

3. Meac nuhnak luhn Jeova ke pahyuck?

Ke pacl se ma Jeova el oruh pahyuck se meet, el fahk: “Sie mukul el som liki pahpah tuhmwacl ac ninac kiacl, ac fulyang nuh sin muhtwacn kiacl.” (Genesis 2:24) Jeova el luhngse mukul ac muhtwacn in luhngse sie sin sie ac in fulyang ac tuhkweni nuh sie nwe ke elos moul. El lwelah divorce muhkwena fin sie sin siacnyacn inge orek kosro. Ke kain in ohiyac inge, Jeova el sang suwohs nuh sin muhtwacn kiyacn kuh mukul tuhman mwet suc oruh ma koluk in oruh sulaclah el fin ac orek divorce kuh tiac. a (Matthew 19:9) Jeova el tiac lwelah mwet Christian in pahyuck nuh sin mwet puhkantwen.​—1 Timothy 3:2.

 AHKYOHKYE LUTLUT LOM

5. Sulaclah ahkwoyac mwet se kom ac fah pahyuck nuh se uh

Sie sin sulaclah yohk srihpac emeet kom ac fah oruh pa in sulaclah mwet se suc kom ac fah pahyuck nuh se. Riti Matthew 19:4-6, 9, ac tohkohyang sramsramkihn kihsen siyuck se inge:

• Efuh kuh sie mwet Christian el tiac enenuh in suhlahklahk pahyuckyak?

Bible uh kuh in kahsre kom in liye ac etuh ohiyac wowo luhn sie mwet suc kom luhngse in pahyuck nuh se. Yohk liki nuhkewa, konwacack sie mwet suc luhngse Jeova. b Riti 1 Corinth 7:39 ac 2 Corinth 6:14. Tohkohyang sramsramkihn kihsen siyuck inge:

• Efuh kuh kuht enenuh in pahyuck nuh sin mwet Christian muhkwena?

• Meac kom nuhnkuh ke ma Jeova el puhla ke pacl se sie mwet Christian el sulaclah in pahyuck nuh sin sie mwet suc tiacna luhngse El?

 6. Etahi nuhnak luhn Jeova ke pahyuck uh

In acn Israel in pacl meet ah, kuhtuh mukul eltahl sahf sin muhtwacn kiyaclos ke srihpen eltahl nuhnkuh kaclos sifacna. Riti Malachi 2:13, 14, 16, ac tohkohyang sramsramkihn kihsen siyuck se inge:

• Efuh kuh Jeova el sruhnga ke siacnyacn uh divorce tiac ke srihpen kosro a ke srihpac sahyac?

Liye VIDEO se, ac tohkohyang sramsramkihn kihsen siyuck se inge.

• Kom fin pahyuckyak nuh sin sie mwet suc tiac alu nuh sin Jeova, meac kom kuh in oruh tuh moul in pahyuck lomtacl in insewowo?

7. Orekmakihn oakwuck luhn Jeova ke pahyuck

 MA KUHT LOTWELAH

Lolacp ac pahyuck kewana mwe sang sin Jeova. Fin sie mwet el sulaclah in pahyuck kuh muhtana lolacp, el kuh in puhla insewowo el fin ahkos Jeova.

Kalweni

• Sie mwet el ac orekmakihn wo pacl lal oacna sie mwet lolacp fuhkah?

• Efuh kuh Bible uh fahk in pahyuck muhkwena nuh sin sie mwet suc alu nuh sin Jeova?

• Meac srihpac sefanna ma Bible uh lwelah nuhke divorce?