LUFUNJISHO 42
Baibolo Waambapo’mba ka pa Bukatanda, Buzhike ne Masongola?
Mu bisho bimo, bamba’mba muntu wakonshatu kwikala na lusekelo inge wasongola nangwa kusongolwa. Pano bino, kwambatu kine kechi bantu bonse basongola ne kusongolwa baji na lusekelo ne. Kabiji kechi bonse babula kusongola nangwa kusongolwa babula kwikala na lusekelo ne. Kishinka ke kya kuba’mba Baibolo waamba’mba bukatanda, buzhike ne masongola ke bya bupe kufuma kwi Yehoba.
1. Ñanyi bintu byawama bimwenamo bakatanda ne bazhike?
Baibolo waamba’mba: “Yense wabula kutwela mu masongola wakizhamo kuba bulongo.” (Tangai 1 Kolinda 7:32, 33, 38.) Mu ñanyi jishinda muntu wabula kusongola nangwa kusongolwa mo ‘akizhamo kuba bulongo’? Balongo ne banyenga babula kusongola ne kusongolwa kechi balanguluka pa mulume nangwa mukazhi wa kuta muchima ne. Ko kuba’mba abo kechi bekala na bya kwibalabika ne. Bamo babena kwingijila Yehoba papelela bulume bwabo nabiji kuya na kusapwila mambo awama ku mapunzha akwabo. Kabiji kyakilamo kunema bekala na kimye kyabaya kuba’mba bafwenye kwipi ne Yehoba.
2. Ñanyi bintu byawama bifuma mu kusongola nangwa kusongolwa mwayila mizhilo?
Kusongola nangwa kusongolwa, kwikala katanda nangwa muzhike mufuma bintu byawama bingi. Baibolo waamba’mba “bantu babiji bawama kukila uji bunke.” (Musapwishi 4:9) Akino kikwasha bingi kikatakata ku bena Kilishitu ba kine bengijisha mafunde a mu Baibolo mu masongola abo. Bamulume ne mukazhi besongola mwayila mizhilo belaya kuba’mba bakatwajijila kwitemwa, kwinemeka ne kwikwashanga mulwabo. Baji mu masongola betemwa ne kwinemeka, bekala bingi bulongo kukila babula kwisongola mwayila mizhilo. Kabiji bamulume ne mukazhi betemwa kibapeelela bingi kukomesha bulongo baana babo.
3. Yehoba umona byepi masongola?
Yehoba byo asongweshe bamulume ne mukazhi batanshi, waambile’mba: “Mwanamulume ukasha bashanji ne bainanji ne kulamachila ku mukazhanji.” (Ntendekelo 2:24) Yehoba ukeba mwanamulume ne mwanamukazhi besongola kwitemwa bingi ne kwikalanga pamo myaka ne myaka byo bakiji na bumi. Yehoba waswishatu masongola kupwa inge umo mu masongola wauba bukende. Inge umo wauba bukende, Yehoba waswisha wabula mambo kusalapo kulekelako mambo mukwabo nangwa kwikana. a (Mateo 19:9) Yehoba waswisha mwina Kilishitu kusongolatu mwanamukazhi umo kechi kusongola mpaji ne.—1 Timoti 3:2.
FUNJILAIPO BIKWABO
Inge mwi bakatanda, bazhike nangwa mwasongola nangwa kusongolwa, yukai bintu byafwainwa kwimukwasha kwikala na lusekelo ne byo mwafwainwa kutokeshanga Yehoba ku muchima.
4. Ingijishainga bulongo kya bupe kya bukatanda nangwa buzhike
Yesu wamonanga bukatanda ne buzhike amba kya bupe. (Mateo 19:11, 12) Tangai Mateo 4:23, ne kwisamba buno bwipuzho:
-
Yesu waingijishe byepi bukatanda bwanji byo aingijilenga mingilo ya shanji ne byo akwashishenga bantu?
Bena Kilishitu nabo bafwainwa kwikala na lusekelo mu bukatanda nangwa mu buzhike bwabo byonkatu byajinga Yesu. Tambai VIDYO, ne kwisamba ano mepuzho.
-
Mu ñanyi mashinda awama bena Kilishitu mo bafwainwa kwingijisha bulongo bukatanda ne buzhike bwabo?
Bishinka bikwabo
Baibolo kechi watongola mu kushinkamika myaka muntu yo afwainwa kusongwelapo ne. Pakuba itundaika muntu kupembeleko “wakipitaila pa jifumbi ja bwanyike.” Mambo muntu inge ukiji mwanyike kilaka kya kukeba kwilaala kibaya bingi. Kabiji kusongola nangwa kusongolwa bukiji kwakonshatu kulengela muntu kubula kufuukula bintu bulongo.—1 Kolinda 7:36.
5. Salai bulongo muntu wa kusongola nangwa kusongolwako
Mwafwainwa kusala bulongo muntu wa kutwela nanji mu masongola, mambo ke kintu kyanema bingi kyo mukabula kuba jikwabo. Tangai Mateo 19:4-6, 9, ne kwisamba buno bwipuzho:
-
Mambo ka mwina Kilishitu o afwainwa kubujila kunyemena kusongola nangwa kusongolwa?
Baibolo wafwainwa kwitukwasha kuyuka bulongo muntu wafikilamo ye twafwainwa kusongola nangwa kusongolwako. Kyakilamo kunema, twafwainwa kusala muntu watemwa Yehoba. b Tangai 1 Kolinda 7:39 ne 2 Kolinda 6:14. Kepo mwisambe ano mepuzho:
-
Mambo ka o twafwainwa kusongola nangwa kusongwelwatu ku mwina Kilishitu mukwetu?
-
Mwalanguluka’mba Yehoba umvwa byepi ku muchima inge twasongola nangwa kusongolwa ku muntu wabula kutemwa Yehoba?
Banyama babiji bapusana inge bebakasa ku kikonkoji kimo, kechi bengila bulongo ne. Kyo kimotu, mwina Kilishitu inge wasongola nangwa kusongolwa ku muntu wabula kuyuka Lesa wikala na makatazho avula bingi
6. Monainga masongola byonka Yehoba byo eamona
Mu bena Isalela kala, banabalume bamo bakananga bakazhi babo pa tubintutu twabula ne kufwainwa ne. Tangai Malakai 2:13, 14, 16, ne kwisamba buno bwipuzho:
-
Mambo ka Yehoba o ashikilwa bantu kwikana pa kubula mambo a bukende?
Bukende ne kwikana kukozha bingi ku muchima wabula kwibuba kabiji baana bayanjilamo bingi
Tambai VIDYO, ne kwisamba buno bwipuzho.
-
Inge mwasongola nangwa kusongolwa ku muntu wabula kutemwa Yehoba, mwafwainwa kuba byepi pa kuba’mba masongola enu awame?
7. Londelainga mizhilo ya Yehoba mu masongola enu
Muntu wafwainwa kwibikako bingi pa kuba’mba alondelenga mizhilo ya Yehoba yaamba pa masongola. c Pano bino, Yehoba upesha bantu balondela mizhilo yanji mu masongola abo. Tambai VIDYO.
Tangai Bahebelu 13:4, ne kwisamba ano mepuzho:
-
Mwalanguluka’mba kyapeela kulondela mizhilo ya Yehoba yaamba pa masongola nyi? Mambo ka o mwakumbwila byobyo?
Yehoba ukeba bena Kilishitu kunembesha masongola abo ne kwikala na mapepala a kwikainapo, mambo mu byalo byavula ino mizhilo yo yo balondela. Tangai Titusa 3:1, ne kwisamba buno bwipuzho:
-
Inge mwasongola nangwa kusongolwa, nanchi masongola enu beayuka ku kafulumende nyi?
BANTU BAMO BAMBA’MBA: “Inge bamulume ne mukazhi kechi babena kumvwañana ne, kyawama kwikana.”
-
Mwakonsha kukwasha byepi bantu bamba bino?
ÑANYI BISHINKA BYO MWAFUNDA?
Bukatanda, buzhike ne masongola ke bupe kufuma kwi Yehoba. Bonse bakatanda, bazhike nangwa basongola ne kusongolwa bafwainwa kwikala na lusekelo inge ke bobe bintu mwayila bikeba Yehoba.
Mepuzho a kupitulukamo
-
Mwafwainwa kuba byepi pa kuba’mba mwingijishenga bulongo bukatanda nangwa buzhike bwenu?
-
Mambo ka Baibolo o aambila’mba mwafwainwatu kusongola nangwa kusongolwa ku mwina Kilishitu mukwenu?
-
Ñanyi mambotu aambapo Baibolo a kwikainapo?
KEBAI BISHINKA BIKWABO
Nanchi kusongola nangwa kusongolwa “kanatu monka mwi Nkambo” kulumbulula ka?
“Mepuzho Afuma ku Batanga” (Kyamba kya Usopa, July 1, 2004)
Tambai mavidyo abiji epi afwainwa kwimukwasha kufuukulapo bulongo pa kwiipanguzha ne kusongola nangwa kusongolwa.
Yukai ene mambo mulongo umo o aambijile kuba’mba Yehoba wamupeele bintu byanema kukila bintu byonse byo ashile.
Ñanyi bintu byafwainwa kulangulukapo muntu saka akyangye kufuukulapo kwikana nangwa kwabana?
“Nemekai ‘Akya Kyasambakanya Lesa’” (Kyamba kya Usopa, December 2018)
a Monai Byambo byo Balumbulula 4 byaamba pa kwabana inge kechi paji mambo a bukende ne.
b Mu bisho bimo, bansemi bo bakebela baana babo mwanamulume nangwa mwanamukazhi wa kusongola nangwa kusongolwako. Inge byobyo kiji koko kwenu, bansemi kechi bafwainwa kutalanga pa bwikalo bwa muntu nangwa pa bintu byo aji nabyo ne. Pakuba bafwainwa kuta muchima ne kumona inge awo mwanamulume nangwa mwanamukazhi watemwa Yehoba na muchima yense nangwa ne.
c Inge mwikala na muntu ye mwabula kwisongola nanji, kiji kwi anweba bene kufuukulapo kwabana nangwa kwisongola nanji.
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
