SUƐI LEBOLII 42
Yɛɛ Baabuiyo Dimi yɛ a Yembuleŋ Vɛlɛ a Nɔɔ Okɔɔ?
O naamulaŋ lapum niŋ, waŋnda laalaŋ maa le mi waŋndo wa a kɔl kɛndɛ mɛɛ mbo chua nɔɔ. Kɛ, o cho wanaa cho o nɔlaŋ niŋ nda kpou le cho a kɔl kɛndɛ le. Nduyɛ o cho yembuaa kpou le cho a kɔl tambɛiyo le. Tonyaa cho ni maa, Baabuiyo dimi maa kioo yembuleŋ a nɔɔ cho ni.
1. Tɔnɔla yɛɛ yembuleŋ le nɔ yɛ?
Baabuiyo dimi aa: “Wana chua pɛ nɔɔ, o chaa tosa. Kɛ wana loŋnuŋ pɛ yufuaanɔ, ndu hiou chaa tosa.” (Nuawɔ 1 Kɔliŋtiaŋ 7:32, 33, 38.) O nɛila kuɛɛ choo yemboo ‘hiou yɛ chaa tosa’? Kilisiɔŋaa yembuaa nɔ kalaŋ pɔnɔ a lanɔ o lebol te. Le hei, nda hiou waŋnɔŋ hɛnɛkɛ. Le tamaseliiyo, apum nɔla ma yɔŋguŋ le walta yɛ yɛlaŋ tosaa o wali Chɛhowaa niŋ. A nɔla ma kuɛ o lɛŋnde cheleŋ niŋ le yooŋgu kɛndɔɔ dimioo. I hiou kpou ve, ma sɔla teleŋndo tau le pɛɛkoo a Chɛhowa okɔɔ.
2. Tɔnɔla yɛɛ cho yɛ le yau nɔɔ solioo?
Tɔnɔɔ cho o nɔɔ niŋ, mɛɛ yembuleŋ bɛɛ le nɔ tɔnɔɔ yɛ koni. Baabuiyo dimi pɛŋ aa: “Wanaa ŋiɔɔŋ a bɛnda mbo hiau wana pilɔɔ.” (Ikilisiaatii 4:9) Hei cho tonya taama taama le Kilisiɔŋaa cho sawala mandaala Baabuiyo dɔwɔɔ o wali niŋ o nɔ ndaa niŋnda. Mi wanaa soli yau nɔɔ wa chua buŋgɛi maa a cho kaaliaŋ, ma keŋnaŋ bɛɛleŋ, nduyɛ ma biinaŋ nyɛkɛndɛi. Le hei, a nɔ tiindaŋndo o ndapila niŋ vellaa velle, mbo hiau wanaa chal a soli yau nɔ le wa. Nduyɛ te a velu pɛ chuauwa, mi chuauwaa ndaa waŋnuŋ hɛnɛkɛ.
3. Vɛɛ Chɛhowa che yɛ nɔɔ?
Mɛɛ Chɛhowa kila nɔ tasoo, mbo dimi aa: “Le saboo hoo poo mɛi finya ndɔ a kala ndɔ mbo chalnuŋ nda laa ndɔ ni, ma simnuŋ dialle i pilɛ.” (Chɛnɛsee 2:24) Chɛhowa yeema mi pɔnɔɔ a lanɔɔ kaaliaŋ haaa a yoomu ndaa mɛɛlulaŋ. Suundaa kinɛi tosa ni mbo chɛl ma kɛyaŋ. Te wana pilɛ suunda pɛ, mi Chɛhowa ke wana suunda le wo dioo le mbo kɛsiaa te o kɛɛ niŋ wana suunda wo ɔɔ o kɛɛ niŋ ndu le. a (Maatiu 19:9) Chɛhowa chɛl mi Kilisiɔŋnɔɔ kpɔɔndiaa laanduaa ɔɔ piaanduaa le.—1 Timoti 3:2.
CHƆƆLU YAASIAA
Pɛɛku ma sina nyɛ tosa ma wa a kɔl kɛndɛ nduyɛ mi Chɛhowa wa a kɔl kɛndɛ wo, o yɔŋ bɛɛ aa yemboo ŋ cho ni ɔɔ a chua nɔɔ.
4. Soliŋ yembule numndeŋ kpeku nyɛkɛndɛi
Mi Chiisu dimi maa kioo yembuleŋ le cho ni. (Maatiu 19:11, 12) Nuawɔ Maatiu 4: 23, okoŋ mi la suukaŋ o nyunaa hoo choo:
-
Vɛɛ Chiisu soliŋ yɛ yembule ndɔleŋ kpeku le wali Finya ndɔ wo tosaa a waŋnda malaa?
Kilisiɔŋaa yembuaa nɔla ma wa a nyaale te a soliŋ pɛ teleŋ ndaa kpeku maa Chiisu. Handu VIDUEIYO, okoŋ mi la suukaŋ o nyunaa hoo choo:
-
O nɛila kuɛɛ choo Kilisiɔŋnda nɔla yɛ ma soliŋ yembule ndaleŋ kpeku nyɛkɛndɛi?
A sina pa?
Baabuiyo chɔm naa wɔsila waŋndo wa le nɔɔ chuaa wo le. Kɛ o dɛɛniaa naa maa waŋndo nɔ mbo chum “mbo fuuluu boondii o chua nɔɔ ve.” Te o chum mi boondii keŋ i fuuluu le mbo chua nɔɔ le yeemɛi, o wa ikala le kɛɛsiaa kɛndɔɔ tosaa.—1 Kɔliŋtiaŋ 7:36.
5. Hɛli wana nya cho ichali o nɔɔ niŋndo a taasi
Wana nya cho ichali o nɔɔ niŋndo hɛlioo cho kɛsiaala sɔvɛlaŋ opilɛ o yoomoo niŋ. Nuawɔ Maatiu 19:4-6, 9, okoŋ mi la suukaŋ o nyunaa hoo choo:
-
Le yɛɛnɛ Kilisiɔŋnɔɔ nɔ mbo lau le nɔɔ chuaa le?
Baabuiyo nɔla mbo mala num ma sina suliŋnda ŋ tofa waŋndo o ŋdial taŋ tuupa mi la chal o nɔɔ niŋ. Kɛ nyɛ ŋ nɔ ma kɛsi kɔllo choo tau wo cho kaala wana koŋ nɔ le Chɛhowa wo ni. b Nuawɔ 1 Kɔliŋtiaŋ 7:39 a 2 Kɔliŋtiaŋ 6:14. Okoŋ, mi la suukaŋ o nyunalaŋ ndaŋ choo:
-
Le yɛɛ o bɛnda yɛ ma chua wana nya nɔ laalaŋ pilɔɔ wo o nɔɔ niŋ?
-
O yiyaŋ numndo niŋ, vɛɛ kɔllo wa yɛ Chɛhowa te ŋ chua pɛ wana kaala ndu le wo o nɔɔ niŋ?
6. Chɔ nɔɔ o sɔvɛ mɛɛ Chɛhowa che ndu yɛ
O Isɔluɛi niŋ sindɛ, mi waŋ piaanduaa apum ndaa kɛɛ laandaa ndaa o fondo fuu wo choo. Nuawɔ Malakai 2:13, 14, 16, okoŋ mi la suukaŋ o nyunaa hoo choo:
-
Le yɛɛ Chɛhowa tullɛ waŋndo kiɔɔ o fondo fuu wo cho leyɛ?
Handu VIDUEIYO, okoŋ mi la suukaŋ o nyunaa hoo choo:
-
Te o yɔŋ pɛ aa wana nya cho o nɔɔ niŋndo cho Chɛhowa piɛi le, yɛɛ ŋ nɔ yɛ ma tosa le mi nɔ nyaa wa a nyaale?
7. Bii sawala Chɛhowa yɔŋgu a nɔɔ okɔɔ laŋ
Sɛmbɔɔ pila yeemaŋ ni le sawala Chɛhowa yɔŋgu a nɔɔ okɔɔ laŋ biyɔɔ. c Kɛ, mi Chɛhowa dɔu wanaa bii laŋ nda sala. Handu VIDUEIYO.
Nuawɔ Hibuluiya 13:4, okoŋ mi la suukaŋ o nyunalaŋ ndaŋ choo:
-
A yiyaŋ pa maa sawala Chɛhowa dɔu a nɔɔ okɔɔ laŋ la bɛnda? Le yɛɛ ŋ dimi yɛ lende?
Chɛhowa yeema mi Kilisiɔŋnda soli yau nɔɔ. Nduyɛ te a kɛyaŋ pɛ, a nɔ ma kuɛ o lemasa le yau nɔ ndaa sɛɛsiaa. Nuawɔ Taitɔɔ 3:1, okoŋ mi la suukaŋ o nyunaa hoo choo:
-
Te o yɔŋ pɛ maa la cho o nɔɔ niŋ nya waŋndo, a laalaŋ pa maa la soli yau nɔɔ a mɛɛ sawa lelɛŋndo dimi yɛ?
TE WAŊNDO NYUNA PƐ AA: “Mɛɛ mi wana soli yau nɔɔ kaŋgalaŋ? Te la kaaliaŋ pɛ nya waŋndo, la chelnuŋ te?”
-
Vɛɛ ŋ cho yɛ muli?
SƆƆŊ KULLOŊ
Ke fula Chɛhowa o ba wo yembuleŋ a nɔɔ cho ni. Yembuaa a wanaa cho o nɔlaŋ niŋnda kpou nɔla ma wa a nyaale, te a tosa pɛ hɛnaŋ Chɛhowa wo.
Nyunala miiŋgaa choo laŋ
-
Vɛɛ waŋndo soliŋ yɛ yembule ndɔleŋ kpeku o nɛi bɛnda wo choo?
-
Le yɛɛ Baabuiyo dimi yɛ maa wana laalaŋndo kinɛi naŋ nɔ ni miŋ chua o nɔɔ niŋ?
-
Yɛɛ Baabuiyo dimi yɛ maa ndu kinɛi tosa ni mi waŋnda kɛyaŋ?
CHƆƆLU SƆƆŊ PUM TOFA
Yɛɛ o sim yɛ le wana laalaŋndo chuaa o nɔɔ niŋ?
“Nyunala Wanaa Nua o Yaula Naalaŋ Niŋnda” (Bandu Mɛŋgɛlaa, Suɛɛsɔɔ 1, 2004)
Nuawɔ vidueila biŋgila yaalaŋ ndaŋ, le num malaa ma tosa kɛɛsiaa kɛndɔɔ le nuaŋnaŋndo a challe o nɔɔ niŋ.
Pɛɛku wɔ ma sina nyɛ tosa mi puaapilɛnɔ pilɛ dimi maa, nyɛ Chɛhowa ke ndu wo hiou wa o sɔvɛ a nyɛ o nyɛ o mɛi kɔɔli.
Tuupa mi waŋndo kɛɛsiaa le kɛyaŋndo ɔɔ piɔuwaŋndo, a sɔɔŋ kuɛɛ okɔɔ o nɔ yɛ fɛŋ mbo yiyaŋ?
“Chɔm Bɛɛleŋ le Kɛɛsiaa Mɛlɛkaa le Nɔɔ” (Bandu Mɛŋgɛlaa, Yindimiiyo 2018)
a Tofawɔ nyɛ Diomnda Chɔɔlaala hiɔɔlu laŋ la dimi a piɔuwaŋndo okɔɔ wo, te waŋndo o pilɛ o suunda le.
b O naamulaŋ lapum niŋ, kalaŋ chuauwa pila nuuvial chuauwaa ndaa pɔnɔɔ ɔɔ lanɔɔ ni. O naamu waa ndoo niŋ, kalaŋ chuauwa nɔ fɛŋ ma yiyaŋ te wana nda yeema le po ndaa ɔɔ chua ndaa wo kaala pɛ Chɛhowa. Kɛ, a nɔ ma kɛsi kɔllo o kanioŋ ɔɔ o nyɛm kiɔɔŋ choo le.
c Te la soli wɔ yau nɔɔ nya wana nya cho wo le, o lo a num le ma tosa kɛɛsiaa te a cho ndu malɔɔ ɔɔ a cho yau nɔɔ soli.