DILONGI 42
Yinki Biblia metuba na yina metadila kimpupa mpe dikuela?
Na babuala yankaka, bantu kekanisaka ti muntu lenda vuanda na kiese kaka kana yandi mekuela. Nzokande, bantu nionso ve ya kukuela nde kevuandaka na kiese mpe bampupa nionso ve nde kevuandaka na kiadi. Samu na kutuba kedika, Biblia memonisa ti kimpupa mpe dikuela kele makabu.
1. Yinki kele mambote ya kuvuanda mpupa?
Biblia metuba ti: ‘Muntu yina mekuela mesala mbote, kasi muntu yina kuela ve mesala mbote kuluta.’ (Tanga 1 Bakorinto 7:32, 33, 38.) Na yinki mutindu muntu yina kele mpupa ‘mesala mbote kuluta’? Baklisto yina kele bampupa kekukitungisaka ve samu na bansatu ya nkuelani mosi. Na yau, bakevuandaka na kimpuanza mingi. Na kifuani, bakele na diluaku ya kukipesa mingi na kisalu ya kusamuna na mitindu ya mbote, na kifuani kukuenda na buala yankaka samu na kusamuna nsangu ya mbote. Yina meluta nionso, balenda lutisa ntangu mingi samu na kupusana penepene na Yehova.
2. Yinki kele mambote ya kukuela na meso ya dikanda mpe ya Leta?
Mutindu mosi na kimpupa, dikuela kenataka mambote na yau. Biblia metuba ti ‘bantu zole meluta muntu mosi.’ (Longi 4:9) Yakemonanaka mingi mingi na Baklisto yina kesadilaka bansikudukusu ya Biblia na dikuela na bau. Bankuelani yina mekuelana na meso ya dikanda mpe ya Leta kesalaka nsilulu ti bakemonasana ntangu nionso nzola, mpe luzitu. Yau kesalaka ti bakukimona ti bakele na luvuvamu kuluta nketo mpe bakala yina kezingaka kintuadi kukondua kukuelana. Mpe dikuela kevuandaka kisika ya luvuvamu samu na kuyundula bana.
3. Yinki mutindu Yehova ketadilaka dikuela?
Ntangu Yehova bandisaka dikuela ya ntete, yandi tubaka: ‘Bakala kebika tata na yandi mpe mama na yandi mpe yandi kekangama na nketo na yandi.’ (Kuyantika 2:24) Yehova zola ti bakala mpe nketo zolana mpe bavuanda kintuadi ntangu nionso yina bakevuanda na luzingu. Yandi mepesa nzila na kufua dikuela kaka kana mosi ya bankuelani mesala ekobo. Na ntangu yango, Yehova mepesa nzila na nkuelani yina sala disumu ve na kubaka nzengolo kana yandi kekufua dikuela to ve. a (Matayo 19:9) Yehova pesa nzila ve ya kuvuanda na banketo to babakala mingi na kati ya kimvuka ya Buklisto.—1 Timoteo 3:2.
KOTA NA MPINDA
Longuka mutindu nge lenda vuanda na kiese—mpe mutindu ya kusepedisa Yehova—yavuanda nge kele mpupa to ya kukuela.
4. Sadila dikabu ya kimpupa na mutindu ya mbote
Yesu vuandaka tadila kuvuanda mpupa lokola dikabu. (Matayo 19:11, 12) Tanga Matayo 4:23, mpe na manima tadila kiuvu yayi:
-
Yinki mutindu Yesu sadilaka dikabu ya kimpupa samu na kusadila Tata na yandi mpe samu na kusadisa bantu yankaka?
Baklisto lenda sadila kimpupa na bau mutindu kaka Yesu salaka. Tula VIDEO, mpe na manima tadila kiuvu yayi melanda.
-
Na yinki mutindu Muklisto lenda sadila kimpupa na yandi na mutindu ya mbote?
Nge zabaka yau?
Biblia pesa ve mvula mosi yina muntu fueti kokisa samu na kukuela. Kasi, yakena kukindisa muntu yandi vingila tii yandi kelutisa ‘nsungi ya kintuenia,’ ntangu yina bansatu ya ngolo ya kusangisa nzutu lenda sala ti ntuenia bika baka banzengolo ya mbote.—1 Bakorinto 7:36.
5. Vuanda na nduenga ntangu nge kena kupona nkuelani
Kupona nkuelani na nge kele mosi ya banzengolo ya mfunu mingi yina nge fueti baka. Tanga Matayo 19:4-6, 9, mpe na manima tadila kiuvu yayi:
-
Samu na yinki yakele mbote ve na Muklisto na kubaka nzengolo ya kukuela malu malu?
Biblia lenda sadisa nge na kuzaba yina nge fueti sosa na nkuelani. Yina meluta nionso, sosa nkuelani yina kezolaka Yehova. b Tanga 1 Bakorinto 7:39 mpe 2 Bakorinto 6:14. Mpe na manima, tadila biuvu yayi:
-
Samu na yinki beto fueti kuelana kaka na mpangi na beto Muklisto?
-
Nge mekanisa ti Yehova kekukimonaka yinki mutindu kana beto mekuelana na muntu yina kezolaka yandi ve?
Kana bamekangikisa kisika mosi bibulu zole yina kele yakusuasana, bakemona mpasi. Mutindu mosi, Muklisto yina mekuela muntu yina kesadilaka Yehova ve kekutana na bampasi mingi
6. Tadila dikuela mutindu Yehova ketadilaka yau
Na Yisaele ya ntama, babakala yankaka vuandaka kufua makuela na banketo na bau samu na mambote na bau mosi. Tanga Malaki 2:13, 14, 16, mpe na manima tadila kiuvu yayi:
-
Samu na yinki Yehova keyinaka kufua dikuela na mambu yina Biblia pesila nzila ve?
Ekobo mpe kufua dikuela kesalaka mpasi na nkuelani yina sala disumu ve mpe na bana
Tula VIDEO, mpe na manima tadila kiuvu yayi melanda.
-
Kana nge mekuelanaka na muntu yina kesambilaka Yehova ve, yinki mutindu nge lenda nunga na dikuela na nge?
7. Sadila bansikudukusu ya Yehova na yina metadila dikuela
Muntu fueti sala bangolo samu na kusadila bansikudukusu ya Yehova na yina metadila dikuela. c Kasi Yehova kesakumunaka bayina kesalaka mutindu yina. Tula VIDEO.
Tanga Baebreo 13:4, mpe na manima tadila biuvu yayi:
-
Nge mekanisa ti bansikudukusu ya Yehova na yina metadila dikuela kele ya kufuana? Samu na yinki? To samu na yinki ve?
Yehova melomba na Baklisto na kusonikisa dikuela to kufua dikuela na bau na buku ya Leta, mutindu bamfumu ya Leta ya babuala mingi kelombaka yau. Tanga Tito 3:1, mpe na manima tadila kiuvu yayi:
-
Kana nge mekuelaka, nge mendima ti dikuela na nge mezabana na Leta?
MUNTU YANKAKA LENDA YUVUSA: “Samu na yinki kukuela? Nketo mpe bakala lenda zinga kaka kintuadi ve kondua kukuelana?”
-
Yinki mvutu nge kepesa?
BUNKUFI
Kimpupa mpe dikuela kele makabu mekatuka na Yehova. Nionso zole lenda natina beto kiese mpe mayangi kana beto kena kusala na nguizani na lukanu ya Yehova.
Mvutukulu
-
Yinki mutindu muntu lenda sadila kimpupa na yandi na mutindu ya mbote?
-
Samu na yinki Biblia melomba kukuela kaka mpangi yina kele Muklisto?
-
Yinki diambu kaka mosi yina lenda sala ti bankuelani kufua dikuela na kutadila Biblia?
SOSA
Yinki zola monisa kukuela “kaka na Mfumu”?
“Mituna ya batángi” (Linɔ́ngi ya Mosenzeli ya 1 Juillet 2004)
Tala bavideo zole yina lenda sadisa nge na kubaka banzengolo ya mbote na yina metadila kuzolana mpe dikuela.
Longuka samu na yinki mpangi mosi ya bakala bakusaka ti yina Yehova pesaka yandi lutaka na valere bima yina yandi bikaka.
Yinki ndambu ya mambu muntu fueti tadila tekila yandi kanisa kufua dikuela to kuvambana?
“Kumisá libala, ebongiseli oyo Nzambe atyá” (Linɔ́ngi ya Mosenzeli ya Décembre 2018)
b Na babuala yankaka, bibuti nde keponaka samu na bana na bau nkuelani. Kana yakele mutindu yina, bibuti ya nzola ketadilaka ntete mbongo ve, to mutindu yina nkuelani yango kele to bima yina yandi kele na yau, kasi nde nzola yina yandi kele na yau samu na Yehova.
c Kana nge kena kuzinga na muntu yina nge kuelanaka na yandi ve, kubika yandi to kukuelana na yandi kele nzengolo yina metadila nge mosi.
