SOMO 42
Biblia ká po ngbá lo mbalaka le kʉ nari djo ndirigoti ndoa djo?
Nja kʉ ná desturi nǎ, ndrŭ urie ri nari kʉ ddikpa ke inga ddikpa le ro nga ka ndi é hwè na njati ndi chi ndoa nzá ró ri. Ro, ri nga kʉ ndoa chi ná ndrŭ krʉ i ka ndima é hwè na inga nzá chi ndoa ná ndrŭ krʉ i ka ndima é ngadhi hwè ro ri. Biblia ripo ndoa ma, mbalaka ma na krʉ kʉ Mungu dhó ro si ná kado.
1. Mbalaka le kʉ nari nǎ ro ká le ka le ba ngbá faida?
Biblia pori: “Ndoa chi ná le njiri bblo, ro nzá chi ndoa ná le njiri bblo pli.” (Azø 1 Wakorinto 7:32, 33, 38.) Nde nzá chi ndoa ná le ká “njiri bblo pli” ngbá chu na? Bí ina nzá chi ndoa ná Wakristo e uhuru na bbo. Nja kpa ka ndima njinjí bbo Yova dho. Loroji na, kpa ka ndima rá lod’ra uhitaji dhi eneo na maddi. Føri djolu pli, kpa ka ndima ba saa bbo ndiro ndima liri ndima kana nga ngʉ chøchø Yova na d’e.
2. Ndoa le chi sheria u ritso nari bbai nari ká adi ngbá faida bbʉ?
Nzá le chi ndoa nari adi faida bbʉ nari bbai, ndoa ma adi faida bbʉ ddi. Biblia ripo nari kʉ “Aro nga kʉ bblo ddiro nga djolu.” (Muhubiri 4:9) Føri kʉ bbʉbbʉ kʉ ná lo, nì njínji Biblia nǎ kanuni ná Wakristo kʉ ná dza dhi ndrŭ dho. Sheria u tso nari bbai chi ndoa ná ndrŭ tsoni tso ndima jini ji ndirigoti ndima heshima bbʉ ndima kana. Føri adi rili kpa di ngoi na ndima dhi dza nǎ, nzá chi ndoa sheria u ritso nari bbai ná ndrŭ djolu, ndirigoti kpadhi nzø ka ndima dhí b’odidha kana.
3. Yova ká adi ndoa nja ngbaribbai?
Yova ngangʉe ya kwanza ndoa tso ná saa na, ke pongʉeri: “Kpetsi ke si ndidzá baba ma, ndidzá mama ma bbabba ndirigoti ke si chini ndi bbá le na.” (Mwanzo 2:24) Yova jiri kpetsi ke ma, isɨle ma jini ji ndirigoti kpa di ddinga ndima dhó maisha nǎ. Ke uri tso u ndoa nanga kloni klo njati kpa kana ddi le njí uzinifu ró. Fø di ná lo kana, Yova bbari nga kʉ kosa na ná le vʉ lo nanga ndiro fø le njari ndi ká ka ndi kló ndoa nanga klo ma inga nzá ma nari d’e. a (Matayo 19:9) Yova nzá u ritso ro Mukristo kʉ ná ke bbá isɨ ndrŭ é bí inga isɨle bbá kpetsi kpa é bí ri.—1 Timoteo 3:2.
ANE LONANGA BBO
Aneri ni chu ngbaribbai ma ni ka ni é hwè na ndirigoti ngbaribbai ma ni ka ni bbʉ hwè Yova dho nari njati ni é mbalaka ma inga ndoa chi ná le ma ró.
4. Mbalaka ni kʉ ná saa na, anjinjí bblo nidhó saa na
Yesu njangʉe mbalaka le kʉ nari kado bbai. (Matayo 19:11, 12) Azø Matayo 4:23, ndirigoti anitilo i ngadhudha djo:
-
Yesu ká njingʉe njí ngbaribbai ndidhó saa na mbalaka ndi ngʉe nari kana, nja ndi njinjí ndidzá Baba dho ndirigoti ndi kó nja ndrŭ tsotso d’e?
-
Bbambalaka kʉ ná Wakristo ká ka ndima njí bbo na mana kʉ ná ngbá njí?
Ni ká churi ngbà?
Biblia nzá d’ra ndoa ká le ka le chi cho thɨ djó ma nari ro ri. Ni mai ri kʉ fø ro, ri jadda kpa li kpakpa ndima dá vi go ndima “ngboni ngbo ná cho djolu.” Føri kʉ bbo ngono dyu è kpa nǎ ná saa ndirigoti fø saa na ri ka ndi é kpakpa kpa vʉ lo nanga bblo.—1 Wakorinto 7:36.
5. Avʉ ni lai nyodyu na
Nidhó maisha nǎ ni lai ni vʉ ná føri kʉ bbo na mana kʉ ná longavʉdha. Azø Matayo 19:4-6, 9, ndirigoti anitilo i ngadhudha djo:
-
Addudho ká ringani nzɨ Mukristo di lele ndi lai ndi vʉ ndoa dho ná saa na?
Biblia ka ndi kó ni tsotso nja ni ne bblo dhó sifa kʉ ná ke inga ná le nja ndi é ni lai d’e. Bbo thonga nari kʉ ni ne ngbà ji Yova ná ke inga ná le. b Azø 1 Wakorinto 7:39 ndirigoti 2 Wakorinto 6:14. Ndirigoti anitilo i ngadhudha djo:
-
Ri ká ngani ko chi ndoa ko lai Wakristo ná dhé addudho?
-
Ni ká ddiri Yova ka ndi mbu ndi ngbaribbai, njati ko chi ndoa nzá ji ke ná ke na inga ná le na ró?
Njati le gba aro kʉ ná njonjo zǎ tso ddinga na ró, ri ka ndi nzáni nza. Føri bbai, ddikpa Mukristo ma chi ndoa nga kʉ Mukristo ná ke na inga ná le na ró, kpa ka ndima ba kpakpalo bbo
6. Anja ndoa Yova adi rinja nari bbai
Waizraeli bbá drrdrr, nja kpetsi kpa ngʉ adi ndima bbá dhɨ bba nga na mana kʉ ná lo djotsina. Azø Malaki 2:13, 14, 16, ndirigoti anitilo i ngadhudha djo:
-
Yova ká ndro ndoa nanga le kló nzá tso Biblia u ná lo djó nari addudho?
Uzinifu ndirigoti ndoa nanga le kló nari adi nzø ma, nga na kosa kʉ ná ke inga ná le ma na thí bʉbʉ
Aninja VIDEO, ndirigoti anitilo i ngadhudha djo.
-
Njati ni chi na ndoa ná rie nga kʉ Mukristo ná ke inga ná le ró, ká ni ka ni njí addu nja nidhó ndoa é bblo d’e?
7. Anjinjí ndoa djo Yova bbʉ ná sheria na
Ddikpa le dho ringani ndi njí kpakpanga bbo nja ndi njinjí ndoa djo Yova bbʉ ná sheria na d’e. c Ro, Yova adi fø rinji ná ndrŭ ronga léle. Aninja VIDEO.
Azø Waebrania 13:4, ndirigoti anitilo i ngadhudha djo:
-
Ni ká ddiri ndoa djo Yova bbʉ ná sheria thonga ngbà? Ká addudho, inga nzá addudho?
Yova jiri Wakristo ndi ndima dhó ndoa ndirigoti ndima ndi ndima dhó ndoa nanga ndima klo nari ma ndi ddi ndima bbá ngø nǎ sheria u ritso nari bbai. Azø Tito 3:1, ndirigoti anitilo i ngadhudha djo:
-
Nde rie b’lo ni chi ndoa ri ró, nidhó ndoa ká ndini sheria u ritso nari bbai i ngbà?
NJA LE KA NDI DHURI: “Ká addudho ringani le ndi ndoa ndi? Dza nǎ ká le ka le di nzá le ndi ndoa ro nzá?”
-
Ni ká ka ni ngʉ fø logoti ngbaribbai?
LO DZÁ DɄNGA
Mbalaka ma, ndoa le chi nari ma na kʉ Yova dhó ro si ná kado. Le é mbalaka ma, le chi ndoa ma ró, le ka le é hwè na dhé njati le njí Yova ji ná lo ngbà ró.
Lo djolu le ngʉ nari
-
Mbalaka le é ró ká le ka le njiri ngbà nja le é hwè na d’e?
-
Biblia ká ripo le chi ndoa Mukristo kʉ ná le na dhé addudho?
-
Biblia pori ndoa nanga le ka le kló dho ná lo kʉ ddikpa dhé, nde føri ká kʉ ngbá lo?
NI KA NI CHU NÁ NJA LO
“Bboke dyø ná ke na dhé” le ndoa chi nari na mana ká kʉ addu?
“Maulizo ya Wasomaji Wetu” (Munara wa Mulinzi, 1 Mwezi wa 7, 2004)
Anja ni tsotso ka ndi kó ná aro kʉ ná video ndiro ni vʉ longa bblo ndoa chidha dho ni matayarisho nji ná saa na d’e.
Anja addudho ma ddikpa le-djo njari nari kʉ, Yova bbʉ ndi dho ná ritsi na mana kʉ bbo pli ndi bbangʉe ná ritsi djolu nari.
Ddikpa le dho ká ringani ndi ddinga ngbá lo djo ndoa nanga ndi klo inga ndima kana nga ndima ndo nari nji?
Heshimia “Kile Chenye Mungu Ameunganisha” (Munara wa Mulinzi, Mwezi wa 12, 2018)
a Anja Longatudha ya 4 le kana nga le ndo nari djo, rie nzá ma uzinifu dhi lo banga ri ró.
b Nja desturi nǎ, gø dhi ndrŭ adi kpetsi ke vʉ ndima dhi singba ngba dho inga isɨle vʉ ndima dhi kpetsi ngba dho. Fø di ná hali bbʉ ndi ró, ji dhi gø dhi ndrŭ nzɨ adi ndima thí li fø ke inga fø le dhó kʉ ná mbø djo ri. Ro, kpa adi nja nari kʉ fø kpetsi ke inga fø isɨle ká ji Yova ngbà ma nari.
c Njati rie nzá ni d’e nidhó ndoa ndi sheria nǎ ri ró, ni dhé ka ni vʉ ni ká ka ni ndo ni kana nga ndo ma inga ni ndi nidhó ndoa ndi ma nari.
