CIIYO 42
Ino Baibo Ilaamba Nshi Pamakani Akuba na Kutaba Mucikwati?
Mumishobo imwi bantu balabona ayi muntu inga wababo alusangalalo na kaali mucikwati. Nacibi boobo, teshi boonse bali mucikwati basangalete alimwi teshi boonse batabete mucikwati batasangalete. Baibo ilaamba ayi kuba mucikwati akutaba mucikwati shoonse nshipo.
1. Ino batabete mucikwati balicite shoolwe nshi?
Baibo ilaamba ayi: “Alakwe weenga weeba wacita kabotu, sombi uyo utakwe kweeba, weendaawo kucita kabotu.” (Amubelenge 1 Bene Kolinto 7:32, 33, 38.) Ino muntu utabete mucikwati ‘uleendaawo kucita kabotu’ munshila nshi? Mwineklistu utabete mucikwati taacitewo mikuli icite baabo bali mucikwati. Aboobo liinji alaba waangulukite mushintu shiinji. Kucakubonenaako, baanji balacikonsha kucita shiinji muncito yakwe Yehova mbuli kuya mukushimikila makani abotu kumisena imwi. Alimwi ciinditeewo, balaba aciindi cikwene kabotu cakuyumya bushicibusa bwabo a Yehova.
2. Ino mbubotu nshi bwa kweebana kweelana amulawo?
Bweenka mbuli kutaba mucikwati, akwalo kuba mucikwati kulicite shoolwe shilibetele. Baibo ilaamba ayi “bekala bobilo bali kabotu kwiinda muntu womwi.” (Shikushimikila 4:9) Makani aya ngancine bunene bunene ku Beneklistu bakonkela njiisho shakwe Yehova mucikwati cabo. Bantu beebana kweelana amulawo balashomesha ayi balaakunootondeshanya lusuno lyoonse, kupaana bulemu, alimwi akulamana kabotu. Aboobo balalinyumfwa kushitilishikwa kwiinda baabo batana kweebana mumulawo. Alimwi bana babo abalo balaakulinyumfwa kushitilishikwa.
3. Ino Yehova alacibona buyani cikwati?
Yehova ndyaakatalika cikwati cakutaanguna wakaamba ayi: “Paceebo ceeci, musankwa ulaakushiya baishi abanyina akupaankana amukaakwe.” (Matalikilo 2:24) Yehova alisuni kwaamba ayi musankwa amwanakashi bali mucikwati banootondeshanya lusuno alimwi akutolelela kuba pomwi. Alasuminishabo kulekana na umwi wacita bulale. Na caba boobo, Yehova alapa nkusu uyo utana kubisha kusalawo kutolelela kuba mucikwati na kulekana. a (Mateyo 19:9) Yehova tasuminishiiwo Beneklistu kweeba mpali na kweebwa kumpali.—1 Timoti 3:2.
AMWIIYILEWO ASHIMWI
Amwiiye nsheenga mwaciita kwaamba ayi mube alusangalalo akusangalasha Yehova ndyemuli mucikwati nabi sobwe.
4. Amucisebenseshe kabotu cipo cakutaba mucikwati
Yesu wakalinga kubona kutaba mucikwati mbuli cipo. (Mateyo 19:11, 12) Amubelenge Mateyo 4:23, akubandika mwiipusho uyu:
-
Ino Yesu wakacisebensesha buyani cipo cakwe cakutaba mucikwati kwaamba ayi asebensele Baishi alimwi akucafwa bamwi?
Beneklistu batabete mucikwati inga baba alusangalalo kwiinda mukusebensesha cipo cakutaba mucikwati bweenka mbuli Yesu mbwaakacita. Amweebele VIDYO, lyalo akubandika mwiipusho utokonkelaawo.
-
Ino Beneklistu batabete mucikwati inga bacita buyani kwaamba ayi basebenseshe kabotu cipo cabo?
Sa mulishi?
Baibo tayaambi ciimo muntu ndyaeelete kuba mucikwati. Nacibi boobo, ilayuminisha ayi bacanike balyeelete kulindila kushikila ‘beenda paciimo ca bucikula bwangu,’ ciindi ndyeenga lusuno lwakoonana lwabapa kwaamba ayi batasali kabotu.—1 Bene Kolinto 7:36.
5. Amusale kabotu muntu ngomusuni kubaakwe mucikwati
Kusala wakubaakwe mucikwati nkusala komwi kuyandika abuumbi. Amubelenge Mateyo 19:4-6, 9, akubandika mwiipusho uyu:
-
Ino nceebonshi Mwineklistu alyeelete kutaanguna kuyeeyawo cakubikila maano kaatana kusalawo kuba mucikwati?
Baibo inga yamucafwa kushiba mibo muntu ngomusuni kubaakwe mucikwati njaeelete kubaayo. Cintu ciyandika abuumbi nkucana muntu usuni Yehova. b Amubelenge 1 Bene Kolinto 7:39 alimwi a 2 Bene Kolinto 6:14. Lyalo amubandike miipusho iyi:
-
Ino nceebonshi tulyeelete kweeba na kweebwabo kumushominyineesu?
-
Ino Yehova inga walinyumfwa buyani na twasala kunjila mucikwati amuntu uteshi mushomi?
Na mwaanga shinyama shobilo shipusene abuumbi kulijoko lyomwi, shilapenga abuumbi. Ubu bweenka mbocibete a Mwineklistu wanjila mucikwati amuntu uteshi mushomi, ulacana mapensho aanji
6. Amubone cikwati bweenka mbuli Yehova mbwaacibona
Muciindi ca bene Isilaeli, basankwa bakalinga kuleka bamakaabo ceebo cakulisuna. Amubelenge Malaki 2:13, 14, 16, akubandika mwiipusho uyu:
-
Ino nceebonshi Yehova alipatite bantu balekana pamakani atayuminishikwi mu Baibo?
Bulale alimwi akulekana shilaleta mapensho kuwooyo utana kubisha alimwi akubaana
Amweebele VIDYO, lyalo akubandika mwiipusho utokonkelaawo.
-
Ino inga mwacita buyani kwaamba ayi cikwati canu ciswitilile na muli mucikwati amuntu uteshi mushomi?
7. Amukonkele njiisho shakwe Yehova shaamba pamakani acikwati
Kukonkela njiisho shakwe Yehova shaamba pamakani acikwati kulayandika kusebensa cankusu. c Nacibi boobo, Yehova alapa shoolwe abo beelesha kucita boobo. Amweebele VIDYO.
Amubelenge Bene Ebulu 13:4, akubandika miipusho itokonkelaawo:
-
Sa mutoobona ayi inga twacikoonsha kukonkela njiisho shakwe Yehova shaamba pamakani acikwati? Ino nceebonshi ncemwaambila boobo?
Yehova alalangila Beneklistu kulembesha ku mfulumeende na beebana nabi kulekana, mukwiinga mu shishi shiinji mfulumeende yakabika mulawo wakwaamba ayi balyeelete kucita boobo. Amubelenge Taitasi 3:1, akubandika mwiipusho uyu:
-
Na muli mucikwati, sa cikwati canu cakalembeshekwa ku mfulumeende kweelana amulawo?
BANTU BAMWI BALAAMBA AYI: “Cilibo kabotu musankwa amwanakashi kukala pomwi nabi tabana kweebana.”
-
Ino mwebo mulabona buyani?
CITEENTE CINENE
Kutaba mucikwati na kuba mucikwati shoonse nshipo kuswa kuli Yehova. Babete mucikwati abatabete mucikwati boonse inga baba alusangalalo na kabacita shintu kweelana akuyanda kwakwe Yehova.
Kwiindulukaamo
-
Ino abo batabete mucikwati inga bacisebensesha buyani cipo cabo?
-
Ino nceebonshi Baibo ilaamba ayi Mwineklistu alyeelete kweeba na kweebwabo kumushominyina?
-
Ino Baibo ilaamba ayi ngumulandu nshi womwibo weelete kupa kwaamba ayi bantu balekane?
AMULANGWETEEWO ASHIMWI
Ino kweeba na kweebwabo kumushominyineesu cilasansulula nshi?
“Miipusho Kuswa Kubeshikubelenga” (Njashi Yamulindilishi, July 1, 2004)
Amweebele tumavidyo tufwiifwi tobilo tweenga twamucafwa kusala kabotu pamakani acikwati.
Amubone cakapa mukwesu umwi kulinyumfwa ayi Yehova wakamupa shiinji kwiinda cili coonse ncaakashiya.
Ndakalinga Kuyeeya ayi Mpashi Alakwe Alakwiiya Cancine (1:56)
Ino nshiinshi shimwi muntu nshaeelete kuyeeyawo kaatana kuyeeya pamakani akulekana na kupansaana?
“Amulemeke ‘Yehova Ncaabika Pomwi’” (Njashi Yamulindilishi, December, 2018)
a Amubone Makani Aamwi 4 pamakani akupansaana na umwi taana kucita bulale.
b Mumishobo imwi bashali mbobasalila bana babo wakubaakwe mucikwati. Na mbocibete ubo, bashali bacite lusuno balataanguna kubona na muntu uyo ulisuni Yehova nabi sobwe, kuteshi kubikila maano ku maali ngaacite na shintu shimwi shakumubili.
c Na mutokala amwanakashi nabi musankwa ngomutana kweebanaakwe kweelana amulawo, cili kuli ndimwe nobeene kusalaawo kweebana nabi sobwe.
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
