KIFUNDWA 42
Lelo Bible Unena Bika pa Bukunga ne Busongi?
Mu matanda amo, bantu bakulupile amba muntu kabwanyapo kwikala na nsangaji shi kasongelepo nansha kusongwa. Inoko ke bantupo bonso besonge badi na nsangaji, kadi ke bankungapo bonso babudilwe’yo. Bubine i buno amba, Bible utela bukunga ne busongi bu byabuntu.
1. Le i byabuyabuya’ka bimo bidi mu bukunga?
Bible unena’mba: “Yewa ense usonga walonga biyampe, ino yewa ense kasongele ukalonga biyampe kutabuka.” (Tangai 1 Bene Kodinda 7:32, 33, 38.) Le i muswelo’ka ubwanya nkunga kulonga “biyampe kutabuka”? Bene Kidishitu bankunga kebasasaketangapo bisakibwa bya benē pabo. Mu uno muswelo, bekalanga na bwanapabo buvule. Kimfwa, bamo i babwanye kutandabula mwingilo wabo mu muswelo usangaja, mwikadile kuvilukila kungi mwanda wa kukasapula myanda miyampe. Kadi kutentekela pa bino byonso, badi na kitatyi kikatampe kya kufwena pabwipi na Yehova.
2. Le i byabuyabuya’ka bimobimo bidi mu kwisonga mungya bijila?
Busongi, buletanga byabuyabuya bya pa bula, monka mwikadile bukunga. Bible unena’mba “babidi bapityile buya muntu umo.” (Musapudi 4:9) Ne kino i kimweke nakampata ku bene Kidishitu ba bine balonda misoñanya ya mu Bible mu busongi bwabo. Ba mulume ne mukaji besongele mungya bijila, batyipanga mutyipo wa kwisanswa, kwilēmeka, ne kwikena. Mfulo mfulō, kino kilengejanga bekale na mutyima-ntenke, kupita’ko boba bashikete bya ntēkele-nkuvwike. Kadi busongi bwalanga kyalwilo kiyampe kya kulelela’mo kisaka.
3. Lelo Yehova umwene busongi namani?
Yehova paātūdile’ko busongi bubajinji, wānenene amba: “Mwana-mulume ukashiya shandi ne inandi kadi ukalamata wandi mukaji.” (Ngalwilo 2:24) Yehova usakanga ba mulume ne mukaji besanswe ne kwilamata ponso pobakidi bōmi. I mwitabije dilubu, enka shi padi umo walonga makoji. Shi bibaikala namino, Yehova i mupe yewa wambulwa mambo bubinga bwandi bwa kutonga kwilubula nansha kuleka. a (Mateo 19:9) Yehova ketabijepo mwine Kidishitu kusonga bakaji bavule.—1 Temote 3:2.
LANGULUKA BININGE
Wifunde, umone muswelo obwanya kwikala na nsangaji ne kusangaja Yehova mu bukunga bobe nansha mu busongi bobe.
4. Ingidija biyampe kyabuntu kya bukunga
Yesu wādi umwene bukunga bu kyabuntu. (Mateo 19:11, 12) Tangai Mateo 4:23, ne kwisambila pa kino kipangujo:
-
Lelo Yesu wāingidije namani bukunga bwandi mwanda wa kwingidila Shandi ne kukwasha bakwabo?
Bene Kidishitu bakokeja kutana nsangaji pobengidija bukunga bwabo na mwālongēle Yesu. Talai VIDEO, ne kwisambila pa kipangujo kilonda’kya.
-
Lelo bene Kidishitu bankunga babwanya namani kwingidija biyampe bukunga bwabo?
Le wadi uyukile?
Bible katelelepo myaka ya kusonga nansha ya kusongwa. Inoko ukankamikanga muntu ekale kupita bidi “pa kusongola,” myaka ikalanga bankasampe na bilokoloko bivule bibwanya kwibalengeja bakomenwe kukwata butyibi buyampe.—1 Bene Kodinda 7:36.
5. Tonga mwinē pobe na tunangu
Kutonga mwinē pobe i butyibi bukatampe mpata. Tangai Mateo 19:4-6, 9, ne kwisambila pa kino kipangujo:
-
Mwanda waka mwine Kidishitu kafwaninwepo kwipējeja kutwela mu busongi?
Bible ubwanya kukukwasha uyuke bine byofwaninwe kukimba mu mwinē pobe. Ne nakampata, ukimbe mwinē pobe usenswe Yehova. b Tangai 1 Bene Kodinda 7:39 ne 2 Bene Kodinda 6:14. Kupwa, mwisambilei pa bino bipangujo:
-
Mwanda wa bika i biyampe kwisonga enka na mwine Kidishitu mukwetu?
-
Shi mwine Kidishitu wakesonge na muntu kasenswepo Yehova, le Yehova mwine wiivwananga’byo namani?
Shi banyama babidi beshile bakutyilwe pamo mu lupungu, nabya bakasusuka. Mo monka ne mwine Kidishitu wisonga na wampikwa kwitabija ukekala na makambakano mavule
6. Busongi, wibumone mwibumwena Yehova
Mu Isalela wa kala, bana-balume bamo bādi balubula bakaji babo ku nshikani. Tangai Malaki 2:13, 14, 16, ne kwisambila pa kino kipangujo:
-
Mwanda waka Yehova ushikilwe dilubu dyampikwa kukwatañana na Bible?
Makoji ne dilubu bisusulanga mulume nansha mukaji wampikwa mambo ne bana
Talai VIDEO, ne kwisambila pa kipangujo kilonda’kya.
-
Shi mwinē pobe i wampikwa kwitabija, le ukalonga bika pa kwikala na nsangaji mu busongi?
7. Londa misoñanya ya Yehova mu busongi
Bikokeja kulomba muntu alonge bukomo bukatampe pa kulonda misoñanya ya Yehova mu busongi. c Inoko Yehova weselanga boba bonso beilonda. Talai VIDEO.
Tangai Bahebelu 13:4, ne kwisambila pa bino bipangujo:
-
Molangila bijila bya Yehova bitala busongi i bifwaninwe? Mwanda waka ubanena nankyo?
Yehova usaka bene Kidishitu bekale kulembeja masongi abo ne malubu abo mene na mobilombēlwe mu matanda mavule. Tangai Tetusa 3:1, ne kwisambila pa kino kipangujo:
-
Le usumininwe, busongi bwenu i bebuyuke ne kudi Leta?
MUNTU UBWANYA KWIPANGULA’MBA: “Mwanda waka kwisonga? Mwene tubwanya’tu kushikata bya ntēkele-nkuvwike?”
-
Le ukalondolola namani?
MU KĪPI
Bukunga ne busongi i byabuntu bitamba kudi Yehova. Kadi shi bantu abebingidija senene babwanya kutana nsangaji ne kuloelelwa.
Pitulukai’mo
-
Lelo muntu ubwanya kwingidija namani bukunga bwandi biyampe?
-
Mwanda waka Bible usoñanya kwisonga enka na mwine Kidishitu mukwetu?
-
Le i bubinga’ka bumo kete bwa mu Bisonekwa bubwanya bantu kwilubwila’po?
KIMBA
Lelo kwisonga “enka mudi Mfumwetu kete” kushintulula bika?
“Bipangujo bya Batangi” (Kiteba kya Mulami, 1 Kweji 7, 2004)
Tala madrame abidi akakukwasha ukwate butyibi buyampe mu mwanda utala kwinangila ne busongi.
Tala umone mwanda waka uno tutu wamwene amba byobya bimupēle Yehova bidi na mvubu kutabuka byobya byawashile.
I bintu’ka bimo bifwaninwe kubandaula muntu kumeso kwa kukimba dilubu nansha kusansana?
“Lēmeka ‘Kyokya Kyakuta Leza Pamo mu Lupungu’” (Kiteba kya Mulami, Kweji 12, 2018)
a Tala Bilembwa bya ku Mfulo 4 bīsambila pa kusansana shi kekudipo ulongele makoji.
b Mu bibidiji bimo, bambutwile bo batongelanga babo bana bantu ba kwisonga nabo. Shi bidi uno muswelo, bambutwile ba buswe kebemaninangapo pa kutala shi muntu i wa lupeto nansha wa kitenta, mhm, ino batalanga shi usenswe Yehova.
c Shi ushikete na muntu okwisongelepo nandi mungya bijila, butongi bwa kumuleka nansha bwa kwisongelelela nandi i bobe.
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
