DILONGESHA DIA 42
Bible udi wamba tshinyi bua bujike ne dibaka?
Bilondeshile bilele bia bamue, muntu kena mua kuikala ne disanka padiye kayi mu dibaka to. Pabu ki mbonso badi mu dibaka badi anu ne disanka to, ne bajike kabatu anu bonso bapangile disanka to. Mu bulelela, Bible udi uleja ne: dibaka ne bujike bidi bionso mapa mimpe a kudi Yehowa.
1. Bujike budi ne malu mimpe kayi?
Bible udi wamba ne: “Muntu udi ubuela mu dibaka udi wenza bimpe, kadi muntu udi kayi ubuela mu dibaka udi utamba kuenza bimpe.” (Balayi 1 Kolinto 7:32, 33, 38.) Kuamba ne: mujike udi mua ‘kutamba kuenza bimpe’ kudi kumvuija tshinyi? Bena Kristo bajike kabena ne bujitu bu bua badi mu dibaka bua kutabalela majinga a bena diabu to. Nanku, mu kuamba kuimpe, badiku bobu ne ndambu wa budikadidi mukumbane. Tshilejilu, bamue ba kudibu badi mua kualabaja mudimu wabu wa Nzambi bimpe bitambe, bu mudi kuya ku babende bua kuambaku lumu luimpe. Ne tshidi tshipite bionso ndîba dia bungi didibu mua kuenza malu adi abasemeja pabuipi ne Yehowa.
2. Kuikala baselangane mu buimpe kudi ne malu kayi mimpe?
Anu bu bujike, kuikala mu dibaka kudi paku ne dikuatshisha dia wadi mushindu. Bible udi wamba ne: “Bantu babidi mbapite muntu umue.” (Muambi 4:9) Bidi nangananga nanku bua bena Kristo badi batumikila mêyi a mu Bible mu dibaka diabu. Mulume ne mukaji badi baselangana mu buimpe batu balayangana bua kunangangana, kunemekangana, ne kutabalelangana kashidi. Dîba adi, batu badimona mu dibaka didi dikubibue kupita mulume ne mukaji badi babanjijangane patupu. Kabidi dibaka dia nanku mmuaba mukumbane wa kukoleshila bana kakuyi lutatu.
3. Yehowa utu umona dibaka mushindu kayi?
Pakabueja Yehowa bantu mu dibaka dia kumpala, wakamba ne: “Mulume neashiye tatuende ne mamuende, nealamate mukajende.” (Genese 2:24) Yehowa mmusue bua bena dibaka bananganane ne balamatangane kashidi too ne ku lufu. Udi ubitabila bua kushipa dibaka anu pikala muena dibaka umue muende masandi. Dîba adi ke didi Yehowa upesha muena dibaka nende udi kayi muende masandi bukenji bua kusungula bua kushipa dibaka anyi kubenga kudishipa. a (Matayi 19:9) Yehowa ki mmuanyishile muena Kristo bua kuselangana ne balume anyi bakaji ba bungi nansha.—1 Timote 3:2.
BUELA MU BUONDOKE
Mona mua kuikala ne disanka ne kusankisha Yehowa, nansha wewe mujike anyi musele.
4. Enza malu bimpe ne bujike buebe
Yezu uvua umona bujike ne: ntshipedi anyi dipa. (Matayi 19:11, 12) Balayi Matayi 4:23, pashishe nuandamune lukonko elu:
-
Mmunyi muvua Yezu muenze malu ne bujike buende bua kuenzela Tatuende mudimu ne kuambuluisha bakuabu?
Bena Kristo bajike badi pabu mua kuikala ne disanka bobu benza malu ne bujike buabu anu muvua Yezu muenze. Tangilayi FILME, pashishe nuandamune lukonko ludi lulonda.
-
Nku malu kayi mimpe a disanka kudi bena Kristo bajike mua kudifila?
Udi mumanye anyi?
Bible ki mmukose bidimu bidi nsonga mua kushisha kubuela mu dibaka to. Nansha nanku, udi umulomba bua kuanji “kupita tshikondo tshia bunsonga” tshidi majinga makole a kusangila mua kukonyangaja meji a nsonga a mua kusunguluja malu.—1 Kolinto 7:36.
5. Sungula wa wewe kuselangana nende ne meji onso
Disungula dia wa kubuela nende mu dibaka ki mbualu bua bilele to. Balayi Matayi 19:4-6, 9, pashishe nuandamune lukonko elu:
-
Bua tshinyi ki mbimpe muena Kristo kubuela mu dibaka mu tshiputuku?
Bible udi mua kukuambuluisha bua kumanya malu a kukenketa kudi muntu uwaselangana nende. Bualu bua mushinga menemene mbua kukeba muntu udi munange Yehowa. b Balayi 1 Kolinto 7:39 ne 2 Kolinto 6:14. Pashishe, nuandamune nkonko eyi:
-
Bua tshinyi tudi ne bua kuselangana anu ne muena Kristo netu?
-
Buebe wewe, Yehowa udi mua kumvua bishi tuetu baselangane ne muntu udi kayi mumunange?
Bobu basuikile nyama ibidi mishilangane bikole ku tshikokedi tshimue, idi ikenga. Bia muomumue, muena Kristo udi uselangana ne udi kayi muena Kristo nende neapete ntatu ya bungi
6. Ikala umona dibaka anu mudi Yehowa udimona
Mu Isalele wa kale, kuvua balume bavua bashipa mabaka abu anu bua kudisankishabu nkayabu. Balayi Malaki 2:13, 14, 16, pashishe nuandamune lukonko elu:
-
Bua tshinyi Yehowa mmukine kushipa kua dibaka bua malu a tshianana?
Kuenda masandi kua muena dibaka ne kushipa kua dibaka mmalu atu anyingalaja muena dibaka udi kayi ne bualu ne bana bikole
Tangilayi FILME, pashishe nuandamune lukonko ludi lulonda.
-
Bikala muena dibaka nebe kayi mutendeledi wa Yehowa, ntshinyi tshiudi mua kuenza bua kusomba bimpe mu dibaka dienu?
7. Tumikila mikenji idi Yehowa muele bua dibaka
Bidi mua kulomba muntu bua kudienzeja bikole bua kutumikila mikenji idi Yehowa muele bua dibaka. c Kadi Yehowa udi ubenesha badi bayitumikila. Tangilayi FILME.
Balayi Ebelu 13:4, pashishe nuandamune nkonko eyi:
-
Buebe wewe, mikenji idi Yehowa muele bua dibaka eyi mmikumbane anyi? Bua tshinyi udi wamba nanku?
Yehowa mmusue bua bena Kristo kufundishabu dibaka diabu nansha difua dia dibaka diabu kua mbulamatadi, bualu ke tshidi mikenji ya matunga a bungi ilomba. Balayi Tito 3:1, pashishe nuandamune lukonko elu:
-
Biwikala mu dikaba, nukadi bafundishe dibaka dienu kua mbulamatadi anyi?
MUNTU YEYE MUKUEBEJE NE: “Bidi bikengela anu kuselangana anyi? Bantu kabena mua kusomba babanjijangane patupu anyi?”
-
Neumuambile tshinyi?
TSHIA KUKUATA
Bujike ne dibaka mmapa a kudi Yehowa. Basele ne bajike badi buonso buabu mua kupeta nsombelu wa disanka bobu balonda disua dia Yehowa.
Diambulula
-
Bajike badi mua kuenza malu bimpe ne bujike buabu mushindu kayi?
-
Bua tshinyi Bible udi utulomba bua kuselangana anu ne bena Kristo netu?
-
Mbualu kayi bumuepele budi Bible uleja budibu mua kushipela dibaka?
BIA KUTANGILA KABIDI
Kuselangana “anu mu Mukalenge” kudi kumvuija tshinyi?
Tangila filme wa tutupa 2 wakuambuluisha bua kuangata mapangadika mimpe mu tshilumbu tshia ditantshilangana ne diselangana.
Mona tshidi muanetu mukuabu wambidila ne: bidi Yehowa mumupeshe mbipite bionso bidiye mulekele kule ne kule.
Mmalu kayi adi muntu ne bua kuelela meji kumpala kua kupangadija bua kuabulukangana ne muena dibaka nende anyi kushipa dibaka?
“Nemeka ‘tshidi Nzambi musuike kaba kamue’” (Tshibumba tshia Nsentedi, 12/2018)
a Tangilayi Dimanyisha 4 dia bualu bua diabulukangana padi muena dibaka kayi muende masandi.
b Miaba mikuabu, baledi batu basunguila bana babu ba kuselanganabu nabu. Dîba dia nanku, baledi bimpe kabena banji bakeba bua kumanya makuta anyi muanzu bidi nabi udibu bakebela muanabu to, badi banji kutangila ni mmunange Yehowa.
c Binuikala babanjijangane ne muntu, wewe ke udi ne dipangadika dia kumulekela anyi kuselangana nende.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
