LECCIÓN 42
¿Naguá kachi Biblia sɨkɨ ñayí iyo matuʼun ji sɨkɨ ñayí ni tánda̱ʼá?
Nu̱u̱ sava ñuu, nda ñayí ka jani ini-ji ja tágua koo sii ini-ji jiniñuʼun tánda̱ʼá-ji. De ma sú ndɨʼɨ ñayí ni tánda̱ʼá iyo sii ini-ji ni̱ ma sú ndɨʼɨ ñayí matuʼun kukuéká ini-ji. Ja nda̱a̱ kuu ja Biblia kachi ja ndúu̱ ja yaʼa ka kuu ja ni jinimani̱ Jeová.
1. ¿Na ja vaʼa iyo nu̱u̱ ñayí ja iyo matuʼun?
Biblia kachi ja: “Nda ñayí ja tánda̱ʼá vaʼa saʼa-ji de nda ñayí ja nduu tánda̱ʼá vaʼa ka saʼa-ji” (kaʼvi-ní 1 Corintios 7:32, 33, 38, TNM). ¿Naguá kúni kaʼan ja ɨn ñayí ja nduu tánda̱ʼá “vaʼa ka saʼa-ji”? Nda cristiano ja nduu ka tánda̱ʼá nduu ka ndakani ini-ji sɨkɨ ɨn yɨɨ́-ji axi ɨn ñasɨʼɨ-ji. Ja ñukua kuu ja, sanaa, ka nevaʼa ka-ji tiempo. Nu̱u̱ sava-ji vaʼa ka satiñu-ji nu̱u̱ Jeová, tanu kuu, ja kiʼin-ji nu̱u̱ inka ñuu tágua kaʼan-ji Tuʼun Yandios. De ja vaʼa tuni kuu ja ka nevaʼa-ji tiempo tágua saʼa ndakui-ji ja ka kitaʼan vaʼa-ji jín Jeová.
2. ¿Na ja vaʼa iyo nu̱u̱ ñayí ja tánda̱ʼá nu̱u̱ ley?
Tanu ñayí iyo matuʼun, suni nda ñayí ja tánda̱ʼá ka níʼi̱n-ji kuaʼa ja vaʼa. Nu̱u̱ Biblia kachi ja “vaʼa ka kuu ja iyo uu taʼan sá ja matuʼun” (Eclesiastés 4:9, TNM). Sukua kuu jín nda ñayí ja tánda̱ʼá de ka ndee-ji tanu kachi nda principio ja yoso nu̱u̱ Biblia. Nda ñayí ja tánda̱ʼá nu̱u̱ ley ka jeʼe-ji tuʼun ja ka kutoo taʼan-ji, koo yɨñuʼún-ji ji koto taʼan-ji. Ja ñukua kuu ja vaʼa ka ndee-ji ma sú ñayí ja iyo uu-ji de nduu tánda̱ʼá-ji. De suni, ñayí ja tánda̱ʼá nu̱u̱ ley ka jaʼnu sii ini nda seʼe-ji.
3. ¿Naguá jani ini Jeová sɨkɨ ja tánda̱ʼá?
Ta ni xtánda̱ʼá Jeová xinañuʼun teé ji ñaʼan, ni kachi-Ya: “Teé sndoo̱-de ta̱tá-de ji naná-de” de “kitaʼan-de jín ñasɨʼɨ-de” (Génesis 2:24, TNM). Jeová kúni-Ya ja ɨn yɨɨ́ ji ɨn ñasɨʼɨ ka kutoo taʼan-de ji ka koo inuú ini-de iini̱ ka teku-de. De jeʼe-Ya tuʼun ja ka kusíín taʼan-ji ta ɨn-ji kɨ̱vɨnduu-ji jín inka ñayí. Ta kuu sukua, Yandios jeʼe-Ya tuʼun nu̱u̱ yɨɨ́ axi ñasɨʼɨ ja nduu na kuachi tágua ka̱ji-ji nú kusíín-ji axi nduu (Mateo 19:9). a Jeová nduu jetaʼvi-Ya ja nda cristiano tánda̱ʼá-ji jín viʼi ka ɨn ñayí (1 Timoteo 3:2).
NÁ KUTUʼVA KA-YO SƗKƗ TUʼUN YAʼA
Ná kundeʼe-yo naguá kuu saʼa maa-ní—vaʼani̱ nú iyo matuʼun-ní axi ni tánda̱ʼá-ní—tágua koo sii ini-ní de saʼa-ní ja koo sii ini Jeová.
4. Kuatiñu vaʼa-ní ja iyo matuʼun-ní
Jesús ni ndeʼe-de, ja ɨn ja jinimani̱ kuu ja nú nduu kuu ini tánda̱ʼá (Mateo 19:11, 12). Ka kaʼvi-ní Mateo 4:23 de ka ndatuʼun-ní sɨkɨ nda tuʼun yaʼa:
-
¿Na̱sa ni jatiñu Jesús ja ni iyo matuʼun-de tágua satiñu ka-de nu̱u̱ Ta̱tá-de ji chíndeé-de nu̱u̱ inka ñayí?
Nda cristiano ja iyo matuʼun-ji kuu koo sii ini-ji nú jatiñu vaʼa ka-ji ja iyo matuʼun-ji, tanu ni saʼa Jesús. Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
-
¿Na̱sa kuu kuatiñu vaʼa ka tiempo nda cristiano ja nduu kuu ini-ji ka tánda̱ʼá-ji?
¿A jíni̱-ní?
Biblia nduu kachi nasaa kuiya kunevaʼa ɨn ñayí tágua kuu tánda̱ʼá-ji. De kachi, ja ná kundetu-yo nde ná ya̱ʼa kuiya “ja iyo kua̱chi-yo”, tágua kuu kani vaʼa xini-yo sɨkɨ tiñu yaʼa (1 Corintios 7:36, TNM).
5. Ka̱ji vaʼa-ní nde ñayí tánda̱ʼá jín-ní
Ɨn ja kánuu tuni kuu ja ka̱ji vaʼa-ní nde ñayí tánda̱ʼá jín-ní. Ka kaʼvi-ní Mateo 19:4-6, 9 de ka ndatuʼun-ní sɨkɨ nda tuʼun yaʼa:
-
¿Nakú jiniñuʼun ja ɨn cristiano kani vaʼa xini-ji nú kúni-ji tánda̱ʼá-ji?
Biblia ku̱ú chindeé nu̱u̱-ní ja kuni-ní na ja vaʼa ini jiniñuʼun kunevaʼa ɨn yɨɨ́ axi ɨn ñasɨʼɨ. De ɨn ja kánuu tuni kuu ja, nandukú-ní ɨn ñayí ja kutoo Jeová. b Ka kaʼvi-ní 1 Corintios 7:39 ji 2 Corintios 6:14. Ñukua de ka ndatuʼun-ní sɨkɨ nda tuʼun yaʼa:
-
Nú ɨn cristiano nda̱a̱ jani xini-ji ja tánda̱ʼá-ji, ¿nakú jiniñuʼun ja ka̱ji-ji ɨn ñayí ja kandija nu̱u̱ Jeová?
-
Nú tánda̱ʼá-ji jín ɨn ñayí ja nduu kutoo Jeová, ¿na̱sa jani ini-ní ja kuu ini-Ya?
Nu̱u̱ skitaʼan uu kɨtɨ ja siin kaa-ti chijin ɨn yugo, ndoʼo ndúu̱-ti. De suni sukua kuu, jín ɨn cristiano ja tánda̱ʼá jín ɨn ñayí ja nduu kutoo Jeová chi kunevaʼa-ji kuaʼa tuni tundoʼo.
6. Kundeʼe-ní ja tánda̱ʼá tanu ndeʼe Jeová
Nu̱u̱ ñuu janaʼán Israel, sava nda teé ni ka kusíín taʼan-de jín ñasɨʼɨ-de sɨkɨ ja kuásún ini-de. Ka kaʼvi-ní Malaquías 2:13, 14, 16, TNM de ka ndatuʼun-ní sɨkɨ nda tuʼun yaʼa:
-
¿Nakú ndeʼe juʼvi Jeová nu̱u̱ ɨn ñayí ja kusíín taʼan-ji sɨkɨ ɨn tuʼun ja nduu kachi nu̱u̱ Biblia?
Tiñu kɨ̱vɨnduu ji ja kusíín taʼan saʼa ja ndoʼo ñayí nduu na kuachi ji nda̱ká seʼe.
Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
-
Nú maa-ní ja ndee-ní jín ɨn ñayí ja nduu kutoo Jeová, ¿naguá kuu saʼa-ní tágua kuu koo sii ini-ní jín ñayí ja ni tánda̱ʼá jín-ní?
7. Kandija-ní nda tuʼun ja tetiñu Jeová sɨkɨ ja tánda̱ʼá
Nu̱u̱ sava ka nda ñayí víjin kuu ja saʼa-ji nda tuʼun ja tetiñu Jeová sɨkɨ ja tánda̱ʼá. c De maa-Ya chíndeé-Ya nu̱u̱ ñayí ja chuʼun ini saʼa ja kachi nu̱u̱ Tuʼun-Ya. Ka kundeʼe-ní VIDEO.
Ka kaʼvi-ní Hebreos 13:4 de ka ndatuʼun-ní sɨkɨ nda tuʼun yaʼa:
-
¿A káʼán-ní ja nda tuʼun ja tetiñu Jeová sɨkɨ ja tánda̱ʼá ɨn ja vaʼa kuu? ¿Nakú jani ini-ní sukua?
Jeová ndetu-Ya ja ɨn cristiano kunevaʼa-de tutu ja ni tánda̱ʼá-de suni nú kusíín taʼan-de, yaʼa kuu ɨn ja kánuu tuni nu̱u̱ níí ñuuyɨvɨ́. Ka kaʼvi-ní Tito 3:1 de ka ndatuʼun-ní sɨkɨ nda tuʼun yaʼa:
-
Nú ni tánda̱ʼá-ní jín ɨn ñayí, ¿a iyo kají nu̱u̱-ní ja ni tánda̱ʼá-ní nu̱u̱ ley de nevaʼa-ní tutu-ní?
JA KA JIKATUʼUN SAVA NDA ÑAYÍ: “¿A jiniñuʼun ja tánda̱ʼá-sa? ¿A ja nda̱a̱ ja jiniñuʼun ɨn tutu?”.
-
¿Naguá kachi-ní?
JA NI KUTUʼVA-YO
Ja iyo matuʼun ji ja tánda̱ʼá kuu ɨn ja jinimani̱ Jeová. Nú kuu-yo ñayí ja iyo matuʼun axi ja ni tánda̱ʼá-yo kuu koo sii ini-yo nú saʼa-yo nda tiñu tanu kúni Yandios.
Tuʼun núku̱ʼun ini
-
¿Na̱sa kuu kuatiñu vaʼa ka tiempo ɨn ñayí ja iyo matuʼun-ji?
-
¿Nakú kachi Biblia ja nda cristiano kuu tánda̱ʼá-ji matuʼun ni̱ jín ɨn ñayí ja kandija nu̱u̱ Jeová?
-
Tanu kachi Biblia, ¿na jáʼa kuu ja ku̱ú kusíín taʼan ñayí ja ni tánda̱ʼá?
NU̱U̱ NDANIʼI KA-NÍ TUʼUN
¿Naguá kúni kaʼan ja tánda̱ʼá matuʼun ni̱ “nu̱u̱ maá Je̱toʼo̱”?
“Nda tuʼun jikatuʼun nda ñayí” (La Atalaya, 1 yo̱o̱ julio kuiya 2004)
Kutuʼva-ní uu tuʼun sɨkɨ ñayí ndéca taʼan ji ja tánda̱ʼá ja ku̱ú chindeé nu̱u̱-ní tágua ka̱ji vaʼa-ní naguá kuu saʼa-ní.
Kutuʼva-ní nakú ɨn teé ni jínu ini-de ja Jeová ni jeʼe-Ya ɨn ja vaʼa tuni ma sú ja ni nevaʼa-de ichi yáta̱.
Ta nchaʼa ka ja kani ini ja kusíín taʼan, ¿naguá jiniñuʼun tíin kuenta ɨn cristiano?
“Na koo yɨñuʼún-yo ‘nu̱u̱ ja ni skitaʼan Yandiosʼ” (La Atalaya, yo̱o̱ diciembre kuiya 2018)
b Nu̱u̱ sava nda ñuu, nda ta̱tá ka ka̱ji-de nde ɨn tánda̱ʼá jín seʼe yɨɨ́-de axi seʼe síʼí-de. Nú sukua kuu, nda ta̱tá vaʼa ini ja xinañuʼun ja ka ndeʼe-de kuu nú ñayí ñukua kutoo-ji Jeová. Nu̱u̱ nda-de kánuu ka tiñu Yandios ma sú xu̱ʼún.
c Nú maa-ní ndee-ní jín ɨn ñayí de nduu ni ka tánda̱ʼá-ní, nú tánda̱ʼá-ní axi sndoo̱ taʼan-ní jín-ji kuu ɨn ja ka̱ji maa-ní.
