MPANTTA 42
Isiyani Ibiiblya inhimyaaya nhina uthela ni ukhala nthupa?
Ikhapila cikiina atthwaayo anoopuwela wiira ntthu nokhala ootteeliya akhalaka wiira hothela awula hotheliya. Masi kahi wiira anamathelana otheene ankhala atthu ootteeliya ni kahi wiira athupa otheene ankhala atthu oohitteeliya. Ibiiblya ineera wiira uthela ni hataa ukhala nthupa cikhanle itthuvo cinkhuma wa Yehova.
1. Ifayitani cimphwanyaaya athupa?
Ibiiblya ineera: “Ule nothela nopanka itthu yooreera, masi ule hinthela nopanka itthu yootepa ureera.” (Nsome 1 Akorintu 7:32, 33, 38.) Manannani nthupa nopankaawe itthu “yootepa ureera”? Makristau athupa khankhalana iwasiwaasi toko cinkhalanaawe ntthu thenle awula theliye. Coo, ayo ankhala ootaphuwa cinene. Ayo pooti wiikurumica uvara nteko woolalyeera, atthunaka yarwaaka ukavihera ilapo cikhwaawe ulalyeera ihapari comaana. Ni ciicammo ayo anaakhalana ukati mwinci woolipihaca upatthannyaaya ni Yehova.
2. Ifayitani cimphwanyaaya ale anantikhiha waakhulupale uthelanaca waya?
Uthela awula ukhala nthupa—citthu coopiilinnya cihaana ifayita caya. Ibiiblya ineera: “Phataari ukhala atthu eeli, uhiya ukhala ntthu mmoca.” (Eklesyaste 4:9) Iyo itthwiiyo khweeli inaawiirannyeela anamathelana, venci-venci makristau aneettela malakihero o mbiiblyani muuthelanacani waya. Nlopwana ni nthiyana yantikhihaka uthelanaca waya, ayo anaakhuluvelihana ufentana, uhisimana ni uwacerana. Iyo itthwiiyo inaawiiriha ayo ukhuluvela wiira anaahala ukhalaca wamoca mahuku otheene. Masi ale ahantikhihile uthelanaca waya, khankhalana nwo ukhuluvelanwo. Uthelanaca wowantikhihiya waakhulupale unaawiiriha anamathelana ukhuluvela wiira anaahala uwuunuwiha asaanaaya nkhayi.
3. Yehova noonela cani uthelanaca?
Ukati Yehova waatthonkomanihilyaawe anamathelana oopacera, uyo aheera: “Nlopwana naahala waahiya athumwaane ni anumwaane wiira aavaresese amwaarawe.” (Uphattuwaca 2:24) Yehova nopheela wiira anamathelana afentane ni akhale wamoca wakhalaka wiira khaavo nakhwa. Uyo notthuniha umwalanaciya wakhalaka wiira alopwanaayo awula athiyanaayo aheetta uluva. (Matewus 19:9) Yeerannyaaka iyo itthwiiyo, Yehova nantthunihera ule rina isariya ulakela itthu yoopanka, wakhala wiira umwalanaca awula mena. a (Moone niwehero.) Yehova khantthuniha waattya; phimaana, uyo khanaatthunihera makristau waattya.—1 Timotiyu 3:2.
MUNCERERE WIITTHUCA WINYU
Moone citthu cinhala waakavihera athupa ni ale athelanne ukhala ootteeliya ni untteeliha nrima Yehova.
4. Manannani athupa cinlamuliyaaya uvarela nteko saana ukumyaaya?
Yesu oona ukhala itthu yomaana ukhala nthupa, kontha uyova aari nthupa. (Matewus 19:11, 12) Nsome Matewus 4:23, ni mwamalihaka usoma, moopele mwaha nna nikohonna:
-
Manannani Yesu caavarenlyaawe nteko utaphuwa waarinaawe wiira aaswalele Athumwaane ni aakavihere atthu akhwaawe?
Makristau athupa pooti upanka itthu yaapankilyaawe Yesu. Moone IVIDIYU, ni mwamalihaka woona, moopele mwaha nna nikohonna:
-
Manannani makristau athupa cinlamuliyaaya uvarela nteko utaphuwa urinaaya wiira anvarele nteko Yehova?
Mwaanaacuwela?
Ibiiblya khinhimya myaakha cinreerana ntthu uthela awula utheliya. Masi iyo inankurumica ntthuuyo uweherera mpaka uvikaniha “myaakha ceemirawo”, ukhala wiira uyo ukhanle ukati unoopuwelaawe cinene urupihana ni iyo itthwiiyo pooti umwiiriha ulakela upanka itthu yoohiloka.—1 Akorintu 7:36.
5. Munthanle saana ntthu onthela awula owuuthelani
Unthanla ntthu oohala unthela awula oohala wuuthelani ikhanle itthu yuulupale cinene ntthu nolakelaawe muukumini wawe. Nsome Matewus 19:4-6, 9, ni mwamalihaka usoma, moopele mwaha nna nikohonna:
-
Kontha isiyani nkristau uhinlamuliyaawe waakuvela uthela awula utheliya?
Ibiiblya pooti wuukaviherani nyuuva ucuwela makhalelo omaana anlamuliyaaya ukhalana awannyinyu awula amwaarinyu. Masi itthu yootepa ukhalana ifayita, ukhanle ntthuuyo unfenta Yehova. b (Moone niwehero.) Nsome 1 Akorintu 7:39 ni 2 Akorintu 6:14. Mwamalihaka usoma, moopele mwaha ala makohwaala:
-
Kontha isiyani ninlamuliyeehu uthelana nintthu nonswalela Yehova?
-
Nyuuva woonela winyu, Yehova nokhala cani nathelanaka nintthu hinonfenta uyova?
Wakhalaka wiira inama piili coovirikana moonuwelwaaya cinaatthukeleliya wiira civare nteko nkhayi, coopiili cinaahuva. Inanna imocaaru, nkristau nothelana nintthu hinonswalela Yehova ciicammo naahala waanana masakha menci.
6. Nwehere uthelana khampa Yehova cinweheraawe
Khalayi, alopwana akhwaawe yaapanka mphantte wa apoovu a Nluku, yaanaamwalanaca naasaaraya woohisariya. Nsome Malakiya 2:13, 14, 16, ni mwamalihaka usoma, moopele mwaha nna nikohonna:
-
Kontha isiyani Yehova unanrusa umwalanaca uhinvaranaca niitthu inhimyaaya Ibiiblya?
Uluva ni umwalanaca cinanwiihera masakha ule rina isariya ni ciicammo asaanaayo
Moone IVIDIYU, ni mwamalihaka woona, moopele mwaha nna nikohonna:
-
Wakhala wiira nyuuva nthelanne ni ntthu hinonswalela Yehova, isiyani inlamuliyeenyu upanka wiira nkhalakhale ntteeliyaka nrima?
7. Mweettele itthu inhimyaawe Yehova nhina uthelanaca
Wiira ntthu eettele itthu inhimyaawe Yehova nhina uthelanaca, atthunaka haana eekurumicaka cinene. c (Moone niwehero.) Masi Yehova nawaacaaliha atthu ampanka iyo itthwiiyo. Moone IVIDIYU.
Nsome Maberewu 13:4, ni mwamalihaka usoma, moopele mwaha nna nikohonna:
-
Woonela winyu, wanaakhitirya weettela itthu inhimyaawe Yehova nhina uthelanaca? Kontha isiyani?
Ilapo cinci, akhulupale ookuvernu anawaakurumica atthwaayo wantikhiha uthelanaca waya ni hataa umwalanaca waya. Yehova nopheela wiira makristau yiiwelele ayo malamulwaayo. Nsome Titu 3:1, ni mwamalihaka usoma, moopele mwaha nna nikohonna:
-
Wakhala wiira nyuuva nhothela awula nhotheliya, nhantikhiha ukuvernu uthelanaca winyu?
NTTHU AKOHAKA: “Nlattuni ninlamuliyeehu wantikhiha uthelanaca wihu? Khuntosa paahi ukhalakhala wamoca?”
-
Nyuuva mwaahala waakhula cani?
UTHIKILELA
Uthela awula ukhala nthupa cikhanle itthuvo cinkhuma wa Yehova. Athupa ni ale athenle awula atheliye, pooti ukhala ootteeliya yeewelelaka itthu inhimyaawe Yehova.
Wuupuwela
-
Manannani nthupa cinlamuliyaawe uvarela nteko ukumyaawe?
-
Kontha isiyani Ibiiblya ineeraaya wiira nihaana nithelanaka nintthu nonswalela Yehova?
-
Ibiiblya inontthunihera ntthu umwalanaca naamwaarawe awula naawanuwawe yeerannyaaka isiyani?
MWAPHEELAKA UCUWELA CITTHU CIKIINA
Uthela “wa Apwiiya paasi” maanaaya isiyani?
Moone ividiyu piili cooyevaca cinhala wuukaviherani ucuwela itthu yooreera upanka nhina ucuwelana nintthu ni uthelana.
Moone kontha isiyani munneehu noopuwelaawe wiira Yehova honvaha itthu yomaana uvikana ile ihiilyaawe uttuli.
Mi kanweherera wiira wanihukuni ayo yanhala wiitthuca ikhweeli (1:56)
Wakhalaka wiira ntthu nawuupuwela umwalanaca awula ukhumelana, isiyani inlamuliyaawe uhiliyala?
“Nhisime ‘ikumanihilyaawe Nluku’” (Ukhalenla, yo Dezembro yo 2018)
a Niwehero: Moone Mwiiweehe Saana n.º 4 mwapheelaka malakihero nhina ukhumelana wakhalaka wiira khaavo eettile uluva.
b Niwehero: Ikhapila cikhwaawe, ayari phinonthanla ntthu nolamuliya uthelana nimwanaya. Wakhalaka commo, itthu inhooleliheraaya ayari oofenta, ukhanle unthanla ntthu nonswalela Yehova, kahi unthanla nlattu wo nteko unvaraawe awula nlattu wookhalana nsurukhu mwinci.
c Niwehero: Mwakhala wiira nneera munkhalakhalanaka ntthu masi khannaaya wantikhiha uthelanaca winyu, unhiya uyo ntthuuyo awula wantikhiha uthelanaca winyu ikhanle itthu nyuuva inlamuliyeenyu ulakela veekha cinyu.
