ISAMBILILO 42
I Vyani Vino Baibo Ikalanda pa Usimbe na pa Cupo?
Uku mpanga zimwi antu yazumila ukuti umuntu atange aye ni nsansa ndi cakuti atatwazile nanti ukutwalwa. Nomba asi yonsi atwala nanti ukutwalwa aaya ni nsansa nupya asi yonsi aatatwala nanti ukutwalwa aataya ni nsansa. Baibo ikati usimbe ni cupo u wila ukufuma kuli Yeova.
1. Uusuma ci umwi uwaya umu usimbe?
Baibo ikalanda ukuti: “Wensi uwatwala nanti ukutwalwa, ala wacita ningo, lelo wensi uwakana ukutwala nanti ukutwalwa, ala wene wacita ningo sana.” (Belengini 1 Kolinto 7:32, 33, 38.) U mu nzila ci muno umusimbe angacita “ningo sana”? Aina Klistu asimbe yasikwata ya wao aakusakamala. Fwandi yakaya sana nu utungwa. Yamwi yakakwanisya ukulundulula umulimo wao umu nzila izipusanepusane, wakwe, yamwi yakaya uku ncende zyuze umu kusimikila ilyasi lisuma. Ni cicindamisye i cakuti yakapalama sana kuli Yeova.
2. Uusuma ci umwi uwaya umu kutwalana ukulingana ni sunde?
Wakwe vivi kwene vino caya uku usimbe, umu cupo namo kwene mwaya ivintu ivisuma. Baibo ikati: “Ukuya yaili cazipa kuluta ukuya wenga.” (Kasambilizya 4:9) Vikwene avino caya uku ina Klistu aakaomvya ivisinte vya muli Baibo umu cupo cao. Umonsi na mama aakatwalana ukulingana ni sunde, yakalayana ukuti yalatwalilila ukutemwana nu kucindikana. Cii cikalenga yayuvwa aacingililwe ukucila yayo aakaikala sile pamwi ukwaula ukutwalana ukulingana ni sunde. Nupya na anao kwene yakaya aacingililwe.
3. Uzye Yeova akalola uli icupo?
Lino Yeova watwalizyanga antu ya kutandikilapo, watiile: ‘Umonsi alasya isi na nyina nu kuilundanya ku muci wakwe.’ (Utandiko 2:24) Yeova akalonda atwalane ukutemwana nu kutwalilila ukuya pamwi umi wao onsi. Wazumilizya ukuti yangataana ndi cakuti wenga wacita ucende. Fwandi Yeova wapeela atacisile ucende insambu izya kusoololapo ndi cakuti yamataana nanti foo. a (Mateo 19:9) Yeova atazumilizya aina Klistu ukukwata impali.—1 Timoti 3:2.
LONDELEZYINI NA VYUZE
Sambililini vino mungacita pakuti muye ni nsansa na vino mungacita pakuti mwazanzya Yeova asi mulandu mwemwe yasimbe nanti mwatwala nanti ukutwalwa.
4. Mwaomvya ningo uwila wa usimbe
Yesu walolanga usimbe ukuti u wila. (Mateo 19:11, 12) Belengini Mateo 4:23, alino mulanzyanye iuzyo lii:
-
Uzye Yesu waomvizye uli usimbe uku kuombela Isi nu ku kwazwa yauze?
Aina Klistu yangaipakizya usimbe wakwe vino Yesu wacisile. Tambini VIDYO, alino mulanzyanye iuzyo ilyatililondelelapo.
-
Uzye aina Klistu asimbe yangaomvya uli ningo usimbe?
Uzye imumanya?
Baibo italanda umusinku uno umwi alinzile ukutwalila nanti ukutwalilwapo? Lelo ikakomelezya acance ukuloleela ukufikila yacila “pa musinku wa wance” lino cikatala sana uku yacance ukupingulapo ningo pa vintu ivicindame.—1 Kolinto 7:36.
5. Mulinzile ukosoolola ningo uwakutwalana nawe
Ukusoolola uwakutwalana nawe kwaya pa vintu ivicindame vino tulinzile ukupingulapo ningo. Belengini Mateo 19:4-6, 9, alino mulanzyanye iuzyo lii:
-
U mulandu ci uno umwina Klistu atalinzile ukupingwilapo zuwa ukutwala nanti ukutwalwa?
Baibo ingamwazwa ukumanya imiyele ino umuntu alinzile ukukwata pakuti aye iya umusuma nanti umuci musuma. Icicindamisye sana u kulola umuntu uwatemwa Yeova. b Belengini 1 Kolinto 7:39 na 2 Kolinto 6:14. Alino mulanzyanye mauzyo yaa:
-
U mulandu ci uno tulinzile ukutwalana sile na ina Klistu yanji?
-
Uzye mukwelenganya ukuti Yeova angayuvwa uli nga twasoololapo ukutwalana nu muntu aatamutemwa?
Ndi cakuti mwanyepa inyama ziili izipusane umwi yoko ukuti ziombele pamwi, zingacula sana. Vikwene, avino na ina Klistu aakatwalana na antu aatazumila yakakwata intazi
6. Mwalola icupo wakwe vino Yeova akacilola
Umu Izlaeli, aonsi yamwi yatanga ya mama yao apasi umulandu wa mpomvu. Belengini Malaki 2:13, 14, 16, alino mulanzyanye iuzyo lii:
-
U mulandu ci uno Yeova asiuvwila ningo ndi cakuti atwalane yataana apaula umulandu wa ucende?
Ucende nu kutaana vikalenga aatacisile uluyembu na ana ukuculilamo
Tambini VIDYO, alino mulanzyanye iuzyo ilyatililondelelapo.
-
Ndi cakuti mwatwalana nu muntu aasi kapepa, i vyani vino mulinzile ukucita pakuti umu cupo cinu muye insansa?
7. Mwalondela masunde yano Yeova wikako aakalanda pa cupo
Umuntu alinzile ukuombesya pakuti alondela masunde yakwe Yeova akalanda pa cupo. c Nomba Yeova akapaala akalondela masunde yayo. Tambini VIDYO.
Belengini Aebele 13:4, alino mulanzyanye mauzyo yaa:
-
Uzye mukwelenganya ukuti masunde yakwe Yeova akalanda pa cupo yaya sile ningo? U mulandu ci uno mwalandila vivyo?
Yeova akalonda aina Klistu ukulembesya ivyupo vyao nu kupoka ivipepala vya kutaanilapo, pa mulandu wakuti umu mpanga izingi uteeko ukalonda antu ukulembesya ivyupo vyao nu kupoka ivipepala vya kutaanilapo. Belengini Tito 3:1, alino mulanzyanye iuzyo lii:
-
Ndi cakuti mwatwalana, uzye icupo cinu calembesiwa uku uteeko?
UMWI ANGAMUZYA UKUTI: “U mulandu ci uwakutwalilana? Uzye umonsi nu mwanaci yatange yaikala sile pamwi?”
-
Mungasuka mutuuli?
VINO TWASAMBILILA
Usimbe ni cupo a mawila ukufuma kuli Yeova. Asimbe na atwalane yonsi kwene yangaya ni nsansa nga yakwikala ukulingana na vino Yeova akalonda.
I vyani vino mwasambilila?
-
Uzye umuntu angaomvya uli ningo usimbe wakwe?
-
U mulandu ci uno Baibo ikalandila ati tulinzile sile ukulatwalana na ina Klistu yanji?
-
Uzye Baibo ikalanda ukuti u mulandu ci onga sile ungalenga atwalane yataane?
LONDELEZYINI
Uzye cikapiliula cani ukutwalila nanti ukutwalilwa sile umu “Mwene”?
“Mauzyo Yano Aakabelenga Yakauzya” (Lupungu Lwa Mulinzi, Julai 1, 2004)
Tambini utumavidyo twiili tunono utungamwazwa ukupingulapo ningo pa kwizizyanya na pa cupo.
Vino Mungaipekanya Lino Mutatala Mwatwala Nanti Ukutwalwa (11:53)
Sambililini umulandu uno umwina umwi akayuvwila ukuti vino Yeova wamupeela vyacindama sana ukucila vino wasya.
I vyani vimwi vino umwi alinzile ukwelenganyapo lino akulonda yataane nanti ukupaatukana?
“Mwacindika ‘Cino Leza Watalundanya’” (Lupungu Lwa Mulinzi, Dizemba 2018)
a Lolini Vyeo Vya ku Mpela pa 4 ivikulanda pa kupaatukana lino pasi aatacita ucende.
b Uku mpanga zimwi, avyazi aakasoolwela ana yao yano yalinzile ukutwalana nayo. Ndi cakuti caya vivyo, avyazi aya nu kutemwa yakatandikilapo ukulola ndi cakuti umuntu wiyo watemwa Yeova asi kulola ndi cakuti wakwata impiya nanti foo.
c Ndi cakuti mukaikala nu muntu wino mutatwalana nawe ukulingana ni sunde, mulinzile ukuipingwila ndi cakuti mulatwalilila ukwikala nu muntu wiyo nanti foo.
Limwi Mungatemwa Ukulolako na Vii
MAUZYO YANO ANTU YAKAUZYA SANA
Uzye Isambililo Lya Baibo Ali Cani?
Zanini masuko ku mauzyo pali vino tukasambilizya antu Baibo ukwaula ukuyalipilisya.
