42-ШО УРОК
Библий пелашдыме лиймаш да мужыраҥмаш нерген мом ойла?
Южо калыкыште шонат, пуйто айдеме ешым чумырен огыл гын, пиалан лийын огеш керт. Но ешан-влак гыч чылан пиалан огытыл. Тыгак пелашдыме-влак гычат чылан пиалдыме огытыл. Библийыште возымо дене келшышын, пелашдыме лиймашат, мужыраҥмашат — тиде Юмо деч пӧлек.
1. Пелашдыме лиймаш мо дене сай?
Библийыште возымо: «Кӧн пелашыже уке але кӧн пелашыже колен, нунылан ойлем... шкет илат гын, нунылан сай». (1 Коринфян-влаклан 7:8, 32, 33 лудын лекса.) Мо шотышто пелашдыме айдемылан сай? Тыгай айдемын пелашыже уке, кудыжо нерген азапланаш кӱлеш. Сандене шукыж годым пелашдыме еҥ-влакын эрыкышт шукырак. Тыгак, нунын гыч южыштлан тӱрлӧ оҥай йӧн почылтеш. Мутлан, нуно таныклашлан вес элыш куснен кертыт. А эн тӱҥжӧ, нунын Иегова дене йолташ лиймыштым пеҥгыдемдаш шукырак жапышт уло.
2. Закон почеш мужыраҥмаш мо дене сай?
Мужыраҥмашыштат шуко сайже уло. Библийыште возымо: «Шкетын лийме деч коктын лияш сайрак» (Экклезиаст 4:9). Тиде шомакын чын улмыжым поснак библийысе принцип-влак почеш илыше пелаш-влак ужыт. Закон почеш мужыраҥше-влак пелашыштым йӧраташ да пагалаш, тыгак икте-весышт верч тыршаш сӧрат. Закон почеш мужыраҥде илыше-влак дене таҥастарымаште тыгай пелаш-влак тӱрлӧ шотышто аралыме улыт. Нунын йочаштат аралыме лийыт.
3. Иегова мужыраҥмаш нерген мом шона?
Кунам Иегова икымше еш мужырым чумырен, тудо каласен: «Пӧръеҥ шке ачаж ден аважым кода да ватыж дене ушна» (Тӱҥалтыш 2:24). Иегован кумылжо почеш марий ден вате икте-весыштым йӧратышаш улыт да нунын мужыраҥмышт ӱмыр мучкылан лийшаш. Тудын шонымаште, пелаш-влак гыч иктыже яжарлана гын, тунам гына ойырлаш лиеш. Иегова титакдыме пелашлан ойырлаш але уке решенийым лукташ правам пуа (Матфейын 19:9) a. Иегован шонымыжо почеш христиан-влакын иканаште икмыняр марий але вате лийшаш огыл (1 Тимофейлан 3:2).
КЕЛГЫНРАК ШЫМЛЕН НАЛЗА
Кеч мужыраҥше улыда але уке, пален налза, кузе пиалан лияш да кузе Иеговам шӱлыкаҥдаш огыл.
4. Пелашдыме улмыдам аклыза
Иисус пелашдыме лиймыжым аклен (Матфейын 19:11, 12, УТ). Матфейын 4:23 лудын лекса да вашмутым пуыза:
-
Кузе Иисус пелашдыме лиймылан кӧра Ачажлан служитлен да еҥ-влаклан полшен кертын?
Христиан-влак Иисус семын пелашдыме лиймыштлан кӧра шуко куаным налын кертыт. ВИДЕОРОЛИКЫМ ончалза да вашмутым пуыза:
-
Пелашдыме лиймаш христиан-влаклан могай тӱрлӧ чапле йӧным пуа?
Паледа мо?
Библийыште огеш ойлалт, могай ийгот гыч мужыраҥаш лиеш. Туге гынат тудо пеш рвезе жапыште мужыраҥме дене вучалташ каҥашым пуа. Вет тунам сексуальный кугу кумыл уш-акылан решенийым лукташ мешаен кертеш (1 Коринфян-влаклан 7:36, УТ).
5. Пелашым уш-акыл дене ойырен налза
Пелашым ойырен налмаш — илышым вашталтыше решений-влак гыч иктыже. Матфейын 19:4—6, 9 лудын лекса да вашмутым пуыза:
-
Молан мужыраҥаш вашкаш огеш кӱл?
Библий палдара, пелашым ойырен налме годым мом шотыш налман. Эн тӱҥжӧ — тыланда келшыше айдеме Иеговам йӧратышаш b. 1 Коринфян-влаклан 7:39 да 2 Коринфян-влаклан 6:14 лудын лекса да вашмутым пуыза:
-
Молан пелашым Иегован служитлышыже-влак коклаште веле кычалаш кӱлеш?
-
Кузе шонеда, кӧ Иеговам огеш йӧрате, тудын дене мужыраҥыда гын, Иегован могай шижмашыже лектеш?
Кок тӱрлӧ вольыкым пырля кычкаш гын, нуно коктынат орланаш тӱҥалыт. Тыгак христиан тыгай айдеме дене, кудыжо Иеговам огеш йӧрате, мужыраҥеш гын, шуко нелылык дене тӱкна
6. Мужыраҥмаш шотышто шонымашда Иегован гаяк лийже
Акрет годсо Израильыште южо пӧръеҥ-влак ватышт дене уло-уке амаллан кӧра ойырленыт. Малахия 2:13, 14, 16 лудын лекса да вашмутым пуыза:
-
Марий ден вате библийысе амал деч посна ойырлат гын, молан тыгай ойырлымаш Иеговалан ужмышудымо?
Яжарланымаш да ойырлымаш титакдыме пелашлан да икшыве-влаклан чон корштымашым кондат
ВИДЕОРОЛИКЫМ ончалза да вашмутым пуыза:
-
Пелашда Иеговам огеш йӧрате гын, мужыраҥмашда пиалан лийже манын, те мом ыштен кертыда?
7. Иегован нормыжо-влак почеш илыза
Южыштлан мужыраҥмаш шотышто Иегован нормыжо-влак почеш илашлан шуко вийым пыштыман c. Но тидын верч тыршымым Иегова эре суапландара. ВИДЕОРОЛИКЫМ ончалза.
Еврей-влаклан 13:4 лудын лекса да вашмутым пуыза:
-
Кузе шонеда, мужыраҥмаш шотышто Иегован нормыжо-влакым шукташ йӧсӧ мо? Умылтарыза.
Иегован кумылжо дене келшышын, кунам христиан-влак мужыраҥыт але ойырлат, нуно тидым илыме элыштын законжо-влак почеш ыштышаш улыт. Титлан 3:1 лудын лекса да вашмутым пуыза:
-
Мужыраҥмашда закон дене пеҥгыдемдыме лийын мо?
ИКТАЖ-КӦ ЙОДЫН КЕРТЕШ: «Молан возалташ? Тыгакак илаш лиеш».
-
Те вашешыже мом каласеда ыле?
ТӰҤ ШОНЫМАШ
Я пелашдыме лиймаш, я мужыраҥмаш — тиде Иегова деч пӧлек. Ешан-влакат, ешдыме-влакат пиалан лийын кертыт. Тидлан Иегован нормыжо-влак почеш илаш кӱлеш.
Ушештарымаш
-
Кузе айдеме пелашдыме улмыжым пайдалын кучылтын кертеш?
-
Библий дене келшышын, молан Иегован служитлышыж дене веле мужыраҥман?
-
Ойырлашлан Библий могай ик амалым гына палемда?
ЕШАРТЫШЛАН
«„Господь дене ушнымаште“ мужыраҥаш» манмым кузе умылаш?
Тиде кок видеоролик тыланда свиданий да мужыраҥмаш шотышто сай решенийым лукташ полша.
Пален налза, мом ик иза Иегова верч коден да кузе Иегова тудым суапландарен.
Ойырлаш але посна илаш шонымо деч ончыч мом шотыш налман?
a Пелаш-влак гыч иктыжат яжарланен огыл гын, нуно посна илен кертыт мо? Тидын нерген 4-ше ешартыш статьяште возымо.
b Южо калыкыште ача-ава-влак эргыштлан але ӱдырыштлан пелашым шке ойырен налыт. Тыгай годым ача-ава-влак айдемын мыняр окса улмыжым але социальный положенийжым ончышаш огытыл. Нуно шотыш налшаш улыт: тиде айдеме Иеговам йӧрата але уке.
c Те иктаж-кӧ дене закон почеш мужыраҥде иледа гын, мом ыштыман? Тудын деч каяш але тудын дене возалташ решенийым те шке луктыда.
Вас также может заинтересовать
ЧӰЧКЫДЫН ПУЭДЫМЕ ЙОДЫШ-ВЛАК
Иегован Таныкше-влакын Библийым шымлыме курсышт кузе эрта?
Иегован Таныкше-влак Библийым шымлыме курсым темлат. Шымлыме годым те шкендан Библийым кучылтын кертыда да шымлымашыш ешдам але йолташда-влакым ӱжын кертыда.
