SMALKANKA 42
¿Mayas kaia bara marit lâka ba dukiara Baibil dîa wisa?
Iwanka tnatka kum kum ra, upla lukisa lilia kaia dukiara marit takaia sa. Sakuna marit takan uplika nani sut pali lilia iwras, baku sin mayas uplika nani sut ba sari apia sa. Raitka pali ba sika Baibil bila Gâd ba upla nani sut ra chans yabisa lilia iwbia mayas kabia, apia kaka marit takan kabia sin.
1. ¿Upla mayas nani ba dîa chanska yamni brisa?
Baibil wisa: “waitna mairin briras nani ra, bara piarka mairin nani ra sin wisni: man nani mampa ra kau pain kabia mairin briras kama kaka” (1 Korint 7:8, 32, 33 aisi kaikma). ¿Dîa muni Baibil wisa mayas uplika nani ba “kau pain kabia”? Kau marit takras kristian nani ba ai maya nahki main kaikaia sapa wari takras sa. Kan witin nani ba plis wala ra Jehova warkka daukaia kau pri lâka brisa, kau isi sa yakan impakaia smalkaia warkka daukaia dukiara. Baha purkara witin nani mapara kau isi sa Jehova wal kau asla kaia.
2. ¿Marit uplika nani ba dîa yamnika nani brisa?
Baibil wisa “kau yamni sa wâl ba wihki kumi ba wal” (Smasmalkra 4:9). Witin nani ba lâ kat marit taki bara ban asla kabia pramis munan taim, rispik lâka bara latwan lâka ba bâra sa, baku kau pain sa marit takras ban wal bri iwaia watlika ra kan pana pana main kaikisa bara luhpa nani ba kau lilia iwisa.
3. ¿Marit lâka ba dukiara Jehova dîa lukisa?
Jehova bui pas uplika nani ra marit sakan ba ra win: “Mairin ba dukiara waitna ba ai aisika bara ai yaptika sin swibia, bara ai mairka ra asla prawbia” (Blasi Sturka 2:24). Witin want sa marit uplika nani ba pana pana latwan kaikbia bara asla kabia. Marit uplika nani ba dibors takaia sip sa, witin nani tila wina kum ba rug lâka ra kauhisa kaka, bara maya pâtkas ba dibors takaia want sa kaka, Jehova mita daukbia chanska yabisa (Matiu 19:9). a Jehova yamni kaikras upla kum maya ailal wal marit takbia ba (1 Timoti 3:2).
KAU LAN TAKS
Laki kaiks man nahki sip sma lilia iwaia mayas, apia kaka marit uplika kama sin bara Jehova ra lilia daukaia.
4. Mayas uplika nani ba ai taimka pain yus munaia sip sa
Jisas ba marit takras kan (Matiu 19:11, 12). Matiu 4:23 aisi kaikma, bara naha dukiara aisi banhma:
-
Jisas ba ai Aisa kupia lâka daukaia bara upla wala ra hilp munaia dukiara, ¿ai taimka nahki yus munan?
Jisas daukan baku, kristian mayas nani ba ai taimka pain yus munbia kaka, naiwa piua ra liliakira iwaia sip sa. LILKA ba kaikma, bara naha dukiara aisi banhma:
-
Kristian kum mayas sa taim, ¿nahki ai rayaka ra diara yamni briaia sip sa?
¿Nu kapram ki?
Baibil ba wiras ahkia piua wina upla kum marit takaia sip sa. Sakuna naha baman wisa, wahma bara “tiara piua pat lui” wan kaka kau pain sa marit takaia, kan uba wahma bara uba tiara marit takbia kaka upla wal briaia brinka ba uba karna ba mita ya wal marit takbia sapa pain wahbi sâkbia apia (1 Korint 7:36).
5. Ya wal marit takma ba pain wahbi sâks
Man ya wal marit takma ba rayakam ra tânka tara brisa. Matiu 19:4-6, 9 aisi kaikma, bara naha dukiara aisi banhma:
-
¿Dîa muni kristian kum diara lukraskira isti marit takaia apia sa?
Baibil smalkisa maya waitna pain kum, bara maya mairin pain kum ba nahki kaia sa. Sakuna maya kum plikisma taim, kau lukaia sma ba sika, Jehova ra latwan kaiki lalukra kum kaia sa. b 1 Korint 7:39 bara 2 Korint 6:14 aisi kaikma. Bara naha dukiara aisi banhma:
-
¿Dîa muni kristian ba lalukra kum wal marit takaia sa?
-
¿Bara lalukra kum wal marit takras sma kaka Jehova dîa lukbia?
Daiwan tara kum wihki sirpi kum ba wal sim twilkaika ra asla prakisa kaka, wâlsut ba panis wauhbia. Sim baku kristian kum Jehova ra latwan kaikrs ba wal marit takbia kaka trabil ailal bribia
6. Jehova baku marit lâka ba tara kulks
Patitara piua ra Israel waitnika kum kum ba ai maya mairin swih dibors taki kan ai brinka saura nina blikaia dukiara. Malaquías 2:13, 14, 16 aisi kaikma, bara naha dukiara aisi banhma:
-
Upla kum marit lâka sauhkras kuna ban dibors takisa kaka, ¿dîa muni Jehova saura pali kaikisa?
Marit lâka sauhkaia bara dibors takaia ba, maya pâtkas bara tuktan nani ra sin saura munisa
LILKA ba kaikma, bara naha dukiara aisi banhma:
-
Jehova ra mayunras uplika kum wal marit takram sa kaka, ¿maritkam lâka ba lilia kabia dukiara dîa daukaia sip sma?
7. Jehova marit lâka dukiara dîa smalki ba yawan bîla walaia sa
Upla kum kum mapara Jehova mita marit lâka smalkanka nani yabi ba karna kaikisa. c Sakuna yawan Jehova bîla walisa kaka witin yamni wan munaisa. LILKA ba kaikma.
Hibru Nani 13:4 aisi kaikma, bara naha dukiara aisi banhma:
-
¿Man lukisma marit lâka ba dukiara Jehova dîa smalki ba yawan alki daukaia sip sa? ¿Dîa muni baku lukisma?
Jehova makabisa kristian nani ba marit takan wauhkataya, apia kaka dibors takan wauhkataya ba lâ watla ra dingkbia, kan kuntri aihkika nani ra gabamint nani mita baku daukbia makabisa. Taitus 3:1 aisi kaikma, bara naha dukiara aisi banhma:
-
Man marit takram kaka, ¿kasak nu sma marit takram wauhkataya ba lâ kat wapni sa bara gabamint ba kulkisa?
UPLA KUM KUM MAKABI WALISA: “¿Dîa mata marit takaia? ¿Upla wal briaia baman aitani apia?”.
-
¿Man dîa wima?
DÎA LAN TAKRAM
Mayas, apia kaka marit takan uplika kum sma kaka baha ba Jehova wina chans painkira kum sa. Upla sut ba Jehova bîla walisa taim lilia iwaia sip sa mayas, apia kaka marit takan kabia sin.
Wan kupia krawaia
-
Mayas uplika nani ba diara ailal daukaia chanska pranakira brisa. Baha mita ¿nahki ai taimka ba pain yus munaia sip sa?
-
¿Dîa muni Baibil ba kristian nani ra wisa lalukra nani wal baman marit takaia sa?
-
Baibil aisi ba kat, ¿dîa tâwan baman sip sa dibors takaia?
KAU PLIKI KAIKS
¿Dîa tânka sa “lalukra” kum wal baman marit takaia?
“Aisi kakaira nani ba makabi walisa” (La Atalaya julio 1, 2004)
Upla wâl sturka lilkika ba kaiks, bahara marikisa kut takanka bara marit lâka ba dukiara nahki sip sa pain luki diara wapni daukaia.
Kaiks nahki waitna kum Jehova witin ra diara yaban ba kau tara kulkisa diara wala nani ba wal.
Kristian kum dakwi takaia, apia kaka dibors takaia luki ba, ¿dîa tânka dukiara lukaia sa?
“Yawan ba ‘Gâd mita asla prakan ba’ tara kulkaia sa” (La Atalaya diciembre, 2018)
a Ulbanka tâka 4 ra nu takma ahkia piua ra dakwi takaia sip sa marit lâka ba sauhkras sa kaka.
b Plis kum kum ra aisa yapti nani ba ai luhpia ya wal maya baikbia plikisa. Baku daukbia kaka, aisa yapti nani ba wahbi sakaia sa Jehova ra latwan kaiki uplika kum ra. Baha ba kau tânka tara brisa lalah bara kulkanka nina tara kum ba wal.
c Man upla kum wal brisma kuna marit takras sma kaka, baha uplika swima, apia kaka wal marit takma sapa mihtam ra sa.
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
