SAK 42
Biiblã pʋgẽ, bõe la b yet rakõtã la kãadmã wɛɛngẽ?
Buud kẽer pʋgẽ, nebã tẽedame tɩ ned sã n pa kẽ kãadem, a pa tõe n paam sũ-noog ye. La pa sẽn kẽ-b kãadmã fãa n tar sũ-noog ye. Leb n pa sẽn pa kẽ-b kãadmã fãa n pa tar sũ-noog ye. Biiblã pʋgẽ, b yetame tɩ rakõtã la kãadmã fãa yaa a Zeova kũuni.
1. Rakõtã nafa kẽer la bʋse?
Biiblã pʋgẽ, b yetame yaa: “Ned sẽn kẽed kãadem maanda neere, la ned sẽn pa kẽed kãadem na n maana neer n yɩɩda.” (Karm-y 1 Korẽnt rãmb 7:32, 33, 38.) Wãn to la ned sẽn pa kẽ kãadem tõe n “maan neer n yɩɩda”? Kiris-ned sẽn pa kẽ kãadem pa tar pag bɩ sɩd n tog n ges a yell ye. Naoor wʋsgo, a tara lohorem n yɩɩda. Wala makre, kiris-neb kẽer sẽn pa kẽ kãadem tõe n bao n tʋma a Zeova tʋʋmã n paase, hal tɩ kõ-b sũ-noogo. B tõe n toga sor n kẽng tẽng a to n tɩ moon koe-noogã. La sẽn yɩɩd fãa, b tara sẽk n tõe n bao n bãng a Zeova n paase.
2. Neb sã n kẽ kãadem tɩ zems ne b tẽngã laloa wã, nafa kẽer la bʋse?
Wa rakõtã, kãadmã me tara nafa buud toor-toore. Biiblã pʋgẽ, b yetame tɩ “neb a yiib n são nin-yende.” (Koɛɛg soab 4:9) Rẽ yaa sɩda, sẽn yɩɩd fãa ne kiris-neb hakɩɩkã sẽn tũud Biiblã noyã la a saglsã b kãadmã pʋgẽ wã. Sẽn kẽ-b kãadem tɩ zems ne b tẽngã laloa wã pʋlma taab tɩ b na n nonga taaba, n waoog taaba, la b ges taab yell wakat fãa. Woto kɩtame tɩ b yamã gãe bãan wakat fãa, n yɩɩd pag ne rao sẽn vɩ ne taab woto bala. B kambã me yam na n gãe bãane.
3. A Zeova tagsg yaa wãn ne kãadem?
A Zeova sẽn wa n lugl pipi kãadmã, a yeelame yaa: ‘Rao na n basa a ba ne a ma, n tɩ loe a meng ne a paga.’ (Sɩngre 2:24) A Zeova ratame tɩ pagã ne a sɩdã nong taaba, la b zĩnd ne taab b yõor tɛka. A Zeova kõo sor tɩ b tõe n kao b kãadmã, la yaa pagã bɩ sɩdã sã n yo. Sã n wa yaa woto, a Zeova kõta soab ning sẽn pa yo wã sor t’a yãk a sã n na n kaoo kãadmã. a (Matiye 19:9) A Zeova pa kõ sor tɩ kiris-ned tõe n kẽ kãadem ne neb a yiib bɩ sẽn yɩɩd rẽ ye.—1 Tɩmote 3:2.
D BAO N BÃNG N PAASE
D ges y sẽn tõe n maan to-to n paam sũ-noogo, la y noog a Zeova sũuri, y kẽe kãadem tɩ y pa kẽ kãadem me.
4. Tũnug-y ne rakõtã n maan sẽn yaa neere
A Zeezi ra geta rakõtã wa a Zeova kũuni. (Matiye 19:11, 12) Karm-y Matiye 4:23, tɩ rẽ poor bɩ y leok sokrã:
-
A Zeezi sẽn da pa kẽ kãadmã, wãn to la a tũnug ne rẽ n maan a Ba wã raabo, la a sõng a taabã?
Kiris-neb nins sẽn pa kẽ kãadmã me tõe n maana wa a Zeezi, tɩ kõ-b sũ-noogo. Ges-y VIDEO wã, tɩ rẽ poor bɩ y leok sokrã.
-
Bõe la kiris-ned tõe n tũnug ne a rakõt n maane, tɩ naf-a?
Yãmb miime bɩ?
Biiblã pʋgẽ, b pa kõ yʋʋm takɩ kãadmã kõom wɛɛngẽ ye. La b wilgame tɩ bi-bɩɩg segd n gũume, hal n tãag wakat ning a sẽn “pa le yaa yãaga.” Bala wakat kãnga, pag ne rao lageng tʋlsmã sẽn tar pãngã tõe n kɩtame tɩ yɩ toog ne bi-bɩɩg t’a bãng n yãk yam.—1 Korẽnt rãmbã 7:36.
5. Bãng-y n yãk-y y sẽn na n kẽ kãadem ne ned ningã
Yãk f sẽn na n kẽ kãadem ne ned ningã yaa yam-yãkr sẽn tar yõod wʋsgo. Karm-y Matiye 19:4-6, 9, tɩ rẽ poor bɩ y leok sokrã:
-
Bõe yĩng tɩ kiris-ned pa segd n yɩ yãg-yãg n kẽ kãadem?
Biiblã tõe n sõnga yãmb tɩ y bãng zʋg-sõma nins sẽn wilgd tɩ ned na n yɩɩ pʋg-sõng bɩ sɩd-sõngã. La sẽn yɩɩd fãa, bao-y rao bɩ pag sẽn nong a Zeova. b Karm-y 1 Korẽnt rãmb 7:39 la 2 Korẽnt rãmb 6:14, tɩ rẽ poor bɩ y leok sogsgã:
-
Bõe yĩng tɩ d segd n kẽ kãadem ne ned sẽn yaa kiris-ned wa tõnd bala?
-
Yãmb tagsdame t’a Zeova tagsg na n yɩ wãna, d sã n kẽ kãadem ne ned sẽn pa nong-a?
B sã n balg rũms a yiib sẽn yaa toor fasɩ ne taaba, b na n namsame. Woto me, kiris-ned sã n kẽ kãadem ne ned sẽn pa tũud a Zeova, a na n paama zu-loees wʋsgo
6. Tall-y a Zeova tagsgã buud kãadmã wɛɛngẽ
Pĩnd wẽndẽ Israyɛll nin-buiidã sʋka, rap kẽer kao b kãadmã bʋʋm toor-toor sẽn wilgd tɩ b yaa rat-m-yembr dãmb yĩnga. Karm-y Malasɩ 2:13, 14, 16, tɩ rẽ poor bɩ y leok sokrã:
-
Bõe yĩng t’a Zeova kis kãadem kaoob sẽn pa zems ne a sẽn togs Biiblã pʋgẽ wã?
Yoob la kãadem kaoob namsda ned ning sẽn pa yo wã la kambã wʋsgo
Ges-y VIDEO wã, tɩ rẽ poor bɩ y leok sokrã.
-
Y sã n kẽe kãadem ne ned sẽn pa tũud a Zeova, bõe la y tõe n maane, n paam sũ-noog y kãadmã pʋgẽ?
7. Tũ-y noy nins a Zeova sẽn kõ kãadmã wɛɛngẽ wã
Tõe n yɩɩ tɩlɛ ne nina t’a maan modgr wʋsgo, sẽn na yɩl n tũ noy nins a Zeova sẽn kõ kãadmã wɛɛngẽ wã. c La a Zeova ningda sẽn maand-b woto wã barka. Ges-y VIDEO wã.
Karm-y Ebre-rãmb 13:4, tɩ rẽ poor bɩ y leok sogsgã:
-
Yãmb tagsdame t’a Zeova sẽn kõ noy nins kãadmã wɛɛngẽ wã zemsame bɩ? Bõe yĩnga?
A Zeova ratame tɩ kiris-nebã gʋls b kãadem, wall b kãadem kaoob wa sẽn zems ne laloa wã. Bala tẽns wʋsg pʋgẽ, goosneema-rãmbã ratame tɩ yɩ woto. Karm-y Tɩt 3:1, tɩ rẽ poor bɩ y leok sokrã:
-
Y sã n kẽe kãadem, y kɩsa sɩd tɩ y tara sebr sẽn wilgd tɩ zemsa ne laloa wã bɩ?
NINA TÕE N SOKAME YAA: “Bõe yĩng tɩ m tog n kẽ kãadem? Rao ne pag pa tõe n vɩɩmd ne taab woto bal la?”
-
Y na n leokame tɩ bõe?
KƲMSGO
Rakõtã la kãadmã fãa yaa a Zeova kũuni. Sẽn kẽ-b kãadmã la sẽn pa kẽ-b kãadmã fãa tõe n paama sũ-noogo, b sã n tũud a Zeova raabã.
Lebg-n-gese
-
Ned sã n pa kẽ kãadem, wãn to la a tõe n bãng n tũnug ne rẽ n maan sẽn yaa neere?
-
Bõe yĩng tɩ b yet Biiblã pʋgẽ tɩ d segd n kẽe kãadem ne ned sẽn yaa kiris-ned wa tõnd bala?
-
Biiblã pʋgẽ, b yeelame tɩ bõe bal n kõt ned sor t’a tõe n kao a kãadem?
BŨMB A TAABA
Kẽ kãadem ‘Zu-soabã pʋgẽ bal’ rat n yeelame tɩ bõe?
“Karemdbã sogsgo” (Yʋʋmd 2004 sẽoog kiuug pipi daar Gũusg Gasgã)
Video-koees a yiib sẽn tõe n sõng-y tɩ y bãng n yãk yam, rolsmã la kãadmã wɛɛngẽ.
Bõe n kɩt tɩ saam-biig a ye tagsdẽ tɩ bũmb nins a Zeova sẽn kõ-a wã yõod yɩɩda bũmb nins a sẽn mong a mengã hal zĩig sẽn zãre?
Nand tɩ neb kao b kãadem, pa rẽ bɩ n welg taaba, bõe yell la b segd n deng n tagse?
“Bɩ d waoog kãadmã Wẽnnaam sẽn luglã’” (Yʋʋmd 2018 yʋʋm-sar kiuug Gũusg Gasgã)
a Ges-y vẽnegr a 4 soabã sẽn gomd welg taabã yellã, yoob sã n wa pa be sʋkã.
b Buud kẽer pʋgẽ, yaa roagdbã n baood pag n kõ b bi-ribla, pa rẽ bɩ sɩd n kõ b bi-pugla. Sã n yaa woto, roagdb nins sẽn nong a Zeova la b kambã segd n deng n bao n bãnga raoã bɩ pagã sã n nonga a Zeova, la pa segd n yɩ a soabã sẽn tar ligd ningã, wall ziir ning buudã neb sʋkã ye.
c Y sã n vɩɩ ne ned y sẽn pa kẽ kãadem ne, yãmb n yãkd y sã n na n loog n bas-a lame, pa rẽ bɩ y sã n na n kẽe kãadem ne-a.