ISAMBILILO 42
Vino Baibolo Ikatunena pa Wusimbe ni Twala
Mu ntambi zimwi, wamwi wazumila ukuti ukutwala nanti ukutwalwa akuno kungalenga vye wumwi ukuwa ni nsansa, asa wusimbe. Nomba tuzipizile twakwizuka ukuti asa watwalane wonsinye wano wawa ni nsansa, swinya asa wasimbe wonsi wano watawa ni nsansa. Cino Baibolo ikatunena aca kuti uwusimbe ni twala vyonsinye avyawila ukufuma kwe Yehova.
1. Awuzima ci wuno wawa mukuwa umusimbe?
E Baibolo ikati: “Wino watwala umukazyana wino wimala atela wachita ichete, ukuwa weni wino wakana ukutwala atela wachita ichete walusya.” (Wazya 1 Wakorinte 7:32, 33, 38.) Amunzila ci muno wino wasolapo ukuwa umusimbe akacitilamo “ichete”? Umulandu wumwi awakuti awina Klistu awasimbe wasitalika ukusakamikwa pe vino wandi wasunge wawakwawo. Fwandi wakawa nu wuntungwa nkaninye. Ica kuti wamwi wakatalika ukuwombesya mu mulimo wa kwe Yehova. Ku cakulolelako, wangaya na ku cifulo cinji mukuwizya ilandwe lizima. Ni cikulu nkani acakuti wakawa ni mpindi inkulu iyakucita vino vingalenga wapalamile sana kwe Yehova.
2. Awuzima ci wuno wawa mukutwalana icete?
Na mwi twalanye mwawa uwuzima ndi vino cawa ku wusimbe. Ku cakulolelako e Baibolo ikati “ukuwa wawili chazipa ukulusya ukuwa wenga.” (Ekawizya 4:9) Co-o cikawomba sana ku wina Klistu wano wakakonka ivisinka vya mu Baibolo mwi twala lyawo. Wano watwalana ukulingana ni sundo, wakalayana ukuti waliwakundana, ukucindikana swinya waliwasungana icete. Wano wakatwalana mwe yo-o inzila wakayivwa awacinjililwe, ukucila wano wakasendana vye ukwasowa ukutwalana ukulingana ni sundo. Cinji aca kuti na wananye wakayivwa ukuti wacinjililwa nkaninye.
3. Uzye e Yehova akalola wuli itwala?
Pano e Yehova watwazizye awakwasi witu awakutalicilapo, wavwanzile amazwi yakuti: “Muno akwe chonyechoo umonsi akusyanga yisi nu nyina ayilemenkanya ku muchi, awawa a muwili wonga.” (Intaliko 2:24) E Yehova akalonda ukuti awatwalane wakundana nu kutwalilila ukwikala ponga mpaka imfwa yawo. Wazumilizyavye ukulekana nga cakuti wenga wacita uwucende. Nga cawa wo-o e Yehova akalecela wino asi nu mulandu ukusolapo nga cakuti akulonda walekane nanti awe. a (Mateyu 19:9) Asilonda nanti katicinye ukuti awina Klistu wapalika.—1 Timoti 3:2.
SAMBILILA IVICILE PA-A
Lola vino ungawa ni nsansa na vino ungasecelesya e Yehova nampo nga we musimbe nanti poole.
4. Mwawomvya icete uwusimbe
E Yesu walolanga uwusimbe ukuti acawila. (Mateyu 19:11, 12) Wazyani Mateyu 4:23, nu kulanzyanya lyo-o iwuzyo:
-
Uzye e Yesu wawomvizye wuli uwusimbe mukuwombela Umukwasi wakwe na mukwavwa wanji?
Awina Klistu awasimbe wangawa ni nsansa nga wakuwomvya uwusimbe wawo ndi vino Yesu wawuwomvizye. Tambani e VIDYO, nu kulanzyanya lyo-o iwuzyo.
-
Amwinye mumwi muno awina Klistu wangawomvezyamo uwusimbe wawo?
Uzye umanyile?
E Baibolo yitalanda imyaka yino umuntu azipizile ukutwalilapo nanti ukutwalilwapo. Lelo ikalanda ukuti azipizile ukucila “pa chimo cha wutici” pano inyengwa ikakula sana ku wacitici icakuti yingalenga wapotwe nukupingulapo icete.—1 Wakorinte 7:36.
5. Uzipizile ukusola icete uwakutwalana nawe
Ukusola uwakutwalana nawe acintu cimwi icikulu nkaninye cino uzipizile ukwelenganyapo sana. Wazyani Mateyu 19:4-6, 9, nu kulanzyanya lyo-o iwuzyo:
-
Amulandu ci wuno umwina Klistu atazipizile ukwinjila vye mwi twala ukwasowa ukwelenganyapo?
E Baibolo ingakwavwa ukumanya imiwele yino ungawikako amano mwe wino ukulonda ukuti ayize awe we wakwako. Cino uzipizile ukuwikako amano pe vyonsinye, akulola umuntu wino wakunda Yehova. b Wazyani 1 Wakorinte 7:39 ne 2 Wakorinte 6:14. Nu kulanzyanya ya-a amawuzyo:
-
Amulandu ci wuno tuzipizile ukutwalanavye nu mwina Klistu wunji?
-
Uzye ukulola ukuti Yehova angayivwa wuli nga twasolapo ukutwalana na wino atamukunda?
Nga cakuti wanyefile inyama ziwili impusane ku cikonkoli conga, zingacula. Wonye avino cawa na ku mwina Klistu wino watwalwa nanti ukutwala wino watazumila ivili vyonga, angawa ni ntazi.
6. Mwalola itwala ndi vino Yehova akalilola
Mu mpindi zya wina Israeli awonsi wamwi walekanga wawakwawo pa tumilandu utwavye. Wazyani Malakayi 2:13, 14, 16, nu kulanzyanya lyo-o iwuzyo:
-
Amulandu ci wuno e Yehova wapatila ukulekana pano pasi umulandu wa wucende?
Uwucende nu kulekana kukalenga umukwasi wino asi nu mulandu na wana ukuculilamo
Tambani e VIDYO, nu kulanzyanya lyo-o iwuzyo.
-
Nga cakuti e wakwinu atakunda Yehova, avyani vino mungacita pakuti mwawa ni nsansa mwi twala linu?
7. Mwakonka vino Yehova walanda pi twala
Umuntu azipizile ukuwombesya pakukonka vino Yehova walanda pi twala. c Lelo e Yehova akapala nkaninye wano wakacita wo-o Tambani e VIDYO.
Wazyani Waheberi 13:4, nu kulanzyanya ya-a amawuzyo:
-
Uzye ukulola ukuti tungakwanisya ukucita wo-o vino Yehova walanda pi twala? Amulandu ci wuno wasucila wowo?
E Yehova akakwenecela awina Klistu ukulembesya Itwala lyawo nu kuwa ni vipepala ivya kulecelanilapo. Amuno mu nsi zimwi avino uwuteko wukalonda. Wazyani Taitasi 3:1, nu kulanzyanya lyo-o iwuzyo:
-
Nga cakuti mwatwalana, uzye mwasinincizya ukuti mwatwalana ukulingana na masundo ya wuteko?
WAMWI WAKATI: “Nga walola mwatalika ukupusana ne wakwako, akulekana vye.”
-
Avyani vino unganena wano wakalanda wo-o?
IVISINKA VIKULU
Itwala nu wusimbe vyonsinye avyawila ukufuma kwe Yehova. Awasimbe na wano asa wasimbe wangawa ni nsansa nga cakuti wakwikala ukulingana na vino Yehova akalonda.
Avyani Vino Wasambilila?
-
Uzye wumwi angawomvya wuli icete uwusimbe wakwe?
-
Amulandu ci wuno Baibolo ikatunenela ukuti tuzipizile ukutwalanavye nu mwina Klistu wunji?
-
Amulandu ci wonga wuno Baibolo yalanda ukuti awuno wungalenga awatwalane ukulekana?
MANYILAPO NA VINJI
Uzye ukutwala nu kutalilwa mwe “tatakulu” cikapiliwula cani?
“Amawuzyo Ukufuma kwa Kawazya” (Ulupungu lwa kwa Kalinda, July 1, 2004)
Tamba ama vidyo yawili ayafupi yano yangakwavwa ukupingulapo icete pa kwizizyanya nu ni twala.
Sambilila umulandu wuno umonsi wumwi akayivwa ukuti vino Yehova wamupa vyacindama ukulusya vino wasya.
Avyani vino wino akulonda ukulekana nanti ukuseparation?
“Mwacindika ‘Cino Leza Wasanzya Apaliponga’” (Ulupungu lwa kwa Kalinda, December 15, 2018)
a Lola Amazwi na Yanji pa 4 yano yakulanda pakupawunkana nga cakuti pasi umulandu wawucende.
b Mu ntambi zimwi, awakwasi awano wakasolela awana wawo uwakutwalana nawe. Nga cawa wo-o, lyo cino awakwasi walukundo walitalicila ukucita, akulola nga ca kuti weyo umuntu wakunda Yehova, asa pa ndalama zino wawa nazyo nanti icifulo cino wakwata.
c Nga cakuti ukakwikala na wumwi wino mutatwalana nawe ukulingana ni sundo, wewenye awe muno uzipizile ukupingulapo nampo nga akumusya nanti akutwalana nawe.
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
